RA GALATA 1

1Núgui drá Pablo drá apostol. Hingo ya ja̱'i xa hñuxcagui, nixi xa mɛncagui. Numa zi Hmuhʉ ra Jesucristo ne Ajua̱ ma Dadahʉ go gue'ʉ xa hñuxcagui pa dyá 'mɛhnigui'ʉ pa ga ma̱nga nú'a̱ ra ma̱ca noya xa 'racagui'ʉ. Ma zi Hmuhʉ ra Jesucristo go gue'a̱ xqui du y Ajua̱ ma Dadahʉ go gue'a̱ bi 'yøt'e pa bi yopa nte ma'na'qui. 2Nugui ne gatho ma zi cu 'bʉiua con guequi dí op'ahe nuna carta nú'ahʉ grí muntshʉbʉ ja ya nija̱ Galacia. 3Ajua̱ ma Dadahʉ ne ma zi Hmuhʉ ra Jesucristo da max'ahʉ ne da ja̱p'a'ihʉ. 4Ajua̱ ma Dadahʉ go rá paha'a̱ gue ma zi Hmuhʉ ra Jesucristo bi unga rá te pa bi hña̱sca ma ts'oquihʉ ne pa bi ña̱ngaguihʉ de nuna ts'oximhai mapaya. 5¡Ajua̱ go gue'a̱ rí 'ñepi dra nsunda pa nza̱ntho! Njabʉ gue'a̱. 6Ajua̱ bi zoncahʉ pa ga 'bʉhʉ xá hño con gue'a̱ po nú'a̱ bi 'yøt'a ma zi Hmuhʉ ra Jesucristo po rá hñoja̱'i'a̱. Y nubyá guí ne gui 'ueguehʉ de gue'a̱ pa gui tɛnhʉ ma'na'ño ra jamfri hingue ngu nú'a̱ ma̱nga ra ma̱ca noya. Y nugui xi drí 'yø ngue'a̱ 'bestho guí ne gui 'ueguehʉ. 7Xi majua̱ni otho ma'na ra ma̱ca noya. Pe de gue'ahʉbʉ 'bʉi 'raya ja̱'i nú'ʉ ri ts'oc'a ri mfenihʉ. Nú'ʉ́ xi nehma̱ da patua rá ma̱ca noya ma Zidadahʉ ra Jesucristo. 8Pe nuya ja̱'i'ʉ hinda ma da mpont'ui rá cuɛ Ajua̱. Ha nu'bʉ nuje nehe ga patuahe hma̱ha̱ rá noya Ajua̱ ne ga u't'ahe ma'na ra jamfri nú'a̱ di 'na'ño de nú'a̱ ya stá u't'ahe, nu'bʉ́ necje hinga ma ga mponthe rá cuɛ Ajua̱. O 'bʉ 'nara ɛnxɛ dua ehe de mahets'i ne da ne da 'yøt'a njabʉ nehe, nu'bʉ́ nú'a̱ nehe hinda ma da mpont'ui rá cuɛ Ajua̱. 9Dí yopa xi'ahʉ nú'a̱ ya stá xi'ahʉ: 'Bʉ da 'mʉi 'na to'o da zo'ahʉ de ma'na ra jamfri nú'a̱ di 'na'ño de nú'a̱ ya stá u't'ahe, nú'a̱ ra ja̱'i'a̱ hinda ma da mpont'ui rá cuɛ Ajua̱. 10Ya guí pa̱hʉ xá hño gue nugui hindí ma̱ njabʉ pa da numahñogui ya ja̱'i. Dí ma̱nga njabʉ pa da hyandgagui xá hño Ajua̱. Hindí øt'a ra ts'ɛdi pa ga pønga ma hmi co ya ja̱'i, ngue'a̱ 'bʉ go ga pønga ma hmi co ya ja̱'i, nu'bʉ́ ya drá 'bɛgo de gue'ʉ y ya hindrá 'bɛgo de ra Zidada Jesucristo. 11Ma zi cu'ihʉ, dí ne gui pa̱hʉ gue nú'a̱ ra ma̱ca noya dá xi'a'ihʉ hingo rá noya 'nara ja̱'i. 12Nú'a̱ ra ma̱ca noya dá u't'ahʉ go gue'a̱ bi 'ñutcagui ra Zidada Jesucristo. Hingo bi 'ñutcagui ya ja̱'i nú'a̱ ra ma̱ca noya dí ma̱, y nixi dá ha̱ni de gue'ʉ. 13Nu'ahʉ gá pa̱tcahʉ ma 'mʉi ma'mɛt'o nú'bʉ ndá pɛ'tsta ra jamfri mahyɛgui co ya xodyo. Nugui xi ndí ø'tua ndunthi ra nts'o'mʉi nú'ʉ to'o mi camfri Ajua̱, ne ndí ne hma̱ha̱ stá ho gatho. 14Nugui hønsɛgui go ma'na dá tɛnba yá jamfri ya xodyo de ma'ra ma compa nú'ʉ myá xodyo nehe, ngue'a̱ xi dá øt'a ra ts'ɛdi pa dá tɛnba yá nza̱i ndu ma xitahe ne ndu ma dadahe. 15Pe nugui ante ga 'bʉi, Ajua̱ ya xqui huancagui. Y nu mi zø ra ora de nú'a̱ xqui beni Ajua̱, nú'á̱ bi zocagui con gatho rá hñoja̱'i. 16Ajua̱ ma Dadahʉ bi zocagui pa dá camfribi rá ma̱ca T'ʉ. Bi zocagui pa bi za dá zofo nehe nú'ʉ hingyá xodyo. Y pa dá nzote, hingue 'mɛt'o dá anba 'nara ja̱'i. 17Nixi dá ma Jerusale pa stá ña̱'be 'mɛt'o nú'ʉ ya myá apostol 'mɛt'o de guequi. Nu'a̱ dá øt'e, dá ma ja ra hai Arabia. Nepʉ de guehni dá pengui pa Damasco. 18Ha nu mi thogui hñu njɛya de dá camfri, nu'bʉ́ ha̱, ja dá ma Jerusale pa duá c'a̱'tsa ra cu Pedro, y dá 'bʉ'beni'a̱ 'nɛt'ocʉt'a. 19Hinto ma'ra ya apostol dá nu de guehni. Hønsɛ ra apostol Cobo nú'a̱ rá cu ra Zidada, go gue'a̱ dá nu'beni'a̱. 20Ajua̱ go gue'a̱ pa̱di gue hingrá nc'uamba nú'a̱ dí op'ahʉ. 21'Mɛfa dá ma pa ja ra hai Siria, y ja ra hai Cilicia. 22Y asta ra pa'a̱ himi pa̱caguitho nuya cu xqui gamfri ra Zidada Jesucristo nuni Judea. 23Nu'ʉ́ hønsɛ xqui 'yøde gue nuguí ma'mɛt'o ndí ø'tua ra nts'o'mʉi ya cu, pe nubyá dí ña̱ de ra jamfri, masque ma'mɛt'o ndí ne hma̱ha̱ stá huata nuna jamfrina̱. 24Hangue nuya cu'ʉ xi bi xøcambeni Ajua̱ ngue'a̱ bi ba̱di'ʉ gue nugui ya stí camfri ma Zidadahʉ ra Jesucristo.

will be added

X\