RA EFESIO 1

1Núgui drá Pablo rá apostolgui ma zi Hmuhʉ ra Jesucristo. Ajua̱ go rá paha'a̱ pa bi hñuxcagui dega apostol. Dí op'ahʉ nú'ahʉ zi cuhʉ guí 'bʉhʉbʉ Efeso guí camfrihʉ ma zi Hmuhʉ ra Jesucristo ne yá mɛti'ihʉ Ajua̱. 2Ajua̱ ma Dadahʉ ne ma zi Hmuhʉ ra Jesucristo da ja̱p'ahʉ ne da max'ahʉ pa gui 'bʉhʉ te rá 'ñentho. 3Ga xøcambenihʉ Ajua̱ ma Dadahʉ nú'a̱ to rá Dada nehe ma zi Hmuhʉ ra Jesucristo, ngue'a̱ nu'á̱ xa 'racjʉ gatho nú'ʉ ya ja̱pi ja pa guecjʉ ngue'a̱ dí 'nathohʉ co ma zi Hmuhʉ ra Jesucristo, ja ra uɛnda ya dí 'bʉhʉ con gue'a̱ nuni mahets'i. 4Ante da hyoca nuna ra ximhai, nu'á̱ ya xqui huancahʉ pa ga 'nathohʉ co ma zi Hmuhʉ ra Jesucristo, pa njabʉ strá nt'axiguihʉ ne hingra pɛ'tshʉ ni 'nara ts'oqui ja rá thandi'a̱. 5Ante da hyoca ra ximhai, nu'á̱ ya xqui hñuxcahʉ po rá da̱nga hma̱te pa bi jaba̱tsiguihʉ'a̱. Hangue bá pɛhna ma zi Hmuhʉ ra Jesucristo pa bi njabʉ ngu nú'a̱ xqui hñuxcahʉ. Gue'a̱ rá paha'a̱, hangue bi beni njabʉ da 'yøt'e. 6Nú'á̱ po rá hñoja̱'i bá pɛncahʉ rá hma̱ca T'ʉ pa bi jaba̱tsiguihʉ, pa njabʉ nujʉ xi ga e'tsuahʉ rá nsu po nú'a̱ ra hñoja̱'i pɛscaguihʉ. 7Ngue'a̱ po rá hñoja̱'i bá pɛhna rá hma̱ca T'ʉ pa bi manga rá ji ja ra pont'i, y njabʉ bi gutca ma thaihʉ'a̱, ne bi pungahʉ gatho ma ts'oquihʉ ngue'a̱ ya dí 'nathohʉ con gue'a̱. 8Nehe ngue'a̱ ra da̱ngui rá hñoja̱'i pa guecaguihʉ hangue bi 'racjʉ ndunthi ra mfeni ne ra mfa̱di, 9pa bi za dá pa̱hʉ nú'a̱ himi fa̱di ma'mɛt'o nú'a̱ xqui beni da 'yøt'e'a̱ de rá paha sɛhɛ. Y go bi hñuxa ma zi Hmuhʉ ra Jesucristo pa go da 'yøt'e gatho ngu nú'a̱ xqui beni maya'bʉ. 10Nú'á̱ go gue'a̱ ma da nda̱ de gatho nú'ʉ bí 'bʉ mahets'i ne nú'ʉ 'bʉcua ja ra ximhai. Go gue'a̱ xqui beni Ajua̱ da 'yøt'e. Y ma da njabʉ nú'a̱ ra pa'a̱ ngu xa beni Ajua̱ da nja. 11Ajua̱ bi huancahʉ desde rá mʉdi pa dyá ba̱tsiguihʉ'a̱ pa da 'racjʉ gatho ngu nú'a̱ xqui beni da 'racjʉ ngue'a̱ dí 'nathohʉ co ma Zidadahʉ ra Jesucristo. Gue'a̱ xqui beni da 'yøt'e Ajua̱, ne nu'á̱ øt'e ngu nú'a̱ xa beni ne ngu nú'a̱ ri ho'a̱ da 'yøt'e. 12Ajua̱ bi 'yøt'a njabʉ pa núje dyá mʉdi gamfrihe de ma zi Hmuhʉ ra Jesucristo ga e'tsuahe rá nsu'a̱, pa njabʉ ma'ra da nsunda'a̱ nehe. 13Y nu'ahʉ nehe ya xcá 'yøtuahʉ rá noya'a̱ nú'a̱ xicjʉ hanja da za grá mpøhøhʉ, ne xcá camfrihʉ. Hangue nubyá guí 'nathohʉ nehe co ma Zidadahʉ ra Jesucristo ne guí e'tsuahʉ rá nsu Ajua̱ nehe. Ne ra Ma̱ca Nda̱hi 'bʉi ja ri corasohʉ nehe, ngu nú'a̱ xqui ña̱tcahʉ Ajua̱ da 'racjʉ. Y nú'á̱ go gue'a̱ 'nara seña gue ya yá ba̱tsiguihʉ Ajua̱ ngue'a̱ 'bʉi ja ma corasohʉ. 14Nehe ngue'a̱ ra Ma̱ca Nda̱hi 'bʉi con guecjʉ dí pa̱hʉ gue Ajua̱ ma da 'racjʉ nehe gatho nú'a̱ xa ña̱tcahʉ da 'racjʉ nu stí zixcahʉ de nuna ra ts'oximhai pa ma grá 'bʉhʉ 'nadbʉ con gue'a̱. Gatho gue'a̱ da 'yøt'a Ajua̱ pa ma'na dra nsunda'a̱ ne da t'e'tsua rá nsu. 15Nuguí stá øde gue xcá camfrihʉ ma Zidadahʉ ra Jesucristo, nehe stá øde de nú'a̱ ra hma̱te guí pɛ'tsuahʉ gatho nú'ʉ ma'ra yá ba̱tsi Ajua̱. 16Hangue desde dá øde njabʉ, cada dí apa Ajua̱ por gue'ahʉ, hindí tsaya ga umbabi njama̱di'a̱ por gue'ahʉ. 17Ajua̱ ma Dadahʉ go guesɛ'a̱ xá nsunda ne go gue'a̱ bá pɛhna ma zi Hmuhʉ ra Jesucristo pa bi 'ñutcaguihʉ tengu rá 'mʉi'a̱, dí apabi gue da 'ra'ahʉ ra mfa̱di ne ra hoga mfeni co rá ts'ɛdi ra Ma̱ca Nda̱hi, pa ma'na da za gui pa̱hʉ'a̱. 18Nehe dí apabi'a̱ da xoc'a ri mfenihʉ pa gui pa̱hʉ xá hño gue dí tø'mhʉ ga 'bʉhʉ con gue'a̱ ngue'a̱ bi zoncahʉ pa dyá mɛtiguihʉ'a̱. Nehe dí apabi pa gui pa̱hʉ tengu yá nsunda nuya hño xa ña̱tcahʉ da 'racjʉ ngue'a̱ yá ba̱tsiguihʉ'a̱. 19Nehe dí apabi'a̱ pa gui pa̱hʉ hangu rá nda̱ngui rá ts'ɛdi'a̱. Y nura ts'ɛdi'a̱ gue'a̱ faxcahʉ nújʉ stá camfrihʉ'a̱. 20Y guet'a̱ rá da̱nga ts'ɛdi Ajua̱ bi japi bi yopa nte ma zi Hmuhʉ ra Jesucristo ne bi japi bi nangui de habʉ xqui nt'agui. Nepʉ bá umba rá hudi ja rá 'ñɛi'a̱ nuni mahets'i. 21Nehe bi hñuts'i'a̱ pa da nda̱ de gatho ya nda̱, ne de gatho nú'ʉ to'o ha̱ ra ts'ʉtbi ne ra ts'ɛdi ne ra hmanda nuua ja ra ximhai ne nuni mahets'i. Nehe bi umba 'nara nsu nú'a̱ xi ra da̱ngui de gatho ma'ra ya nsu nú'ʉ ja ne nú'ʉ ma da nja. 22Nehe bi hñuts'i pa da nda̱ de gatho nú'a̱ te ja ne nú'ʉ 'bʉi. Nehe bi thuts'i'a̱ pa go dra ña̱xu de ra nija̱, y nujʉ go guecjʉ rá nija̱guihʉ'a̱. 23Ha nújʉ rá nija̱guihʉ'a̱ go guecjʉ rá ndo'yoguihʉ nehe, hangue con guecjʉ ri nxøgue rá ndo'yo'a̱, ne dí ohʉ ja rá 'yɛ'a̱, ne o ja rá 'yɛ gatho nú'a̱ te ja ne nú'ʉ 'bʉi.

will be added

X\