RA ECHO 9

1Ha nuya pa'ʉ ra Saulo mi hu'tsa ya gamfri da hyo, ne bi ma bá nu ra da̱nga nda̱ gá macja̱. 2Bi ma bá a nsɛqui pa da ma nuni ja yá nija̱ ya xodyo nuni Ndamasco pa da gʉ nú'ʉ ri dɛmba rá jamfri ra Zidada Jesu, gue dra 'bɛhña̱ gue dra 'ñøhø, ne dua tsi pa Jerusale da got'a fadi. 3Ne de mri ne ra 'ñu ya mi ma da zønga Ndamasco, mi da̱mfri bi got'atho 'nara ñot'i asta mi huɛxqui nú'a̱ ra hyats'i mri 'ñehe de mahets'i. 4Nepʉ ra ora'a̱ 'bestho bi dagui ma'mɛmfo ja ra hai. Ne bi 'yøde 'nara noya mi ena: ―Saulo, Saulo, ¿hanja guí hongagui pa gui 'yøtca ra nts'o'mʉi? 5Nu'bʉ́ ra Saulo bi da̱di ne bi 'ñena: ―¿To'o'i, zi Hmu? Nu'á̱ bi da̱di ne bi 'ñena: ―Nuga go gueque drá Jesu. Ha nu'i guí hongui pa gui 'yøtcagui ra nts'o'mʉi ngue'a̱ guí honi pa gui 'yø'tua ra nts'o'mʉi nú'ʉ to'o xa gamfrigui. Pe nu'i go grí 'ñʉnsɛ, guí nja ngu nú'a̱ øt'a ra nda̱mfri ora tica ra nsʉmboi. 6Y ra Saulo asta mri hua̱t'i co ra ntsu ne bi 'ñena: ―Ma zi Hmu'i, ¿te rá 'bɛ guí ne ga øt'ebya? Nu'bʉ́ ra Zidada bi 'ñembabi: ―Nangui ne rí ma ja ra hnini, nuni ja guehni ma da si'a'i nú'a̱ rí 'ñep'a'i gui 'yøt'e. 7Y nú'ʉ ya 'ñøhø mri 'ñoui ra Saulo xi bi ntsu ngue'a̱ nu'ʉ́ xqui 'yøde nehe nú'a̱ ra noya pe hinxqui hyandi ua to'o mi 'bahni. 8Nepʉ nura Saulo bi nangui de ja ra hai, ne xi mri zøthma̱ yá da pe himbi za bi hyandi. Hangue bri jʉhni bi ts'its'i pa asta ja ra hnini Ndamasco. 9Y nuni ja bá 'bʉhni hñu pa ne himi handi. Y nú'ʉ hñu pa ni ts'ʉ hinte bi zi. 10Nuni Ndamasco mi 'bʉhni 'nara gamfri mrá thuhu ra Ananía, y nura Zidada Jesu bi zofo ngu dega t'i ne bi 'ñembabi: ―¡Nugue Ananía! Nu'á̱ bi da̱di: ―¿Te'a̱, zi Hmu? 11Ha nura Zidada bi 'ñembabi: ―Rí ma, jʉ nú'a̱ ra 'ñu rá thuhu ra Jua̱'ñu, ne thogui ja rá ngu ra Juda, ne ja gui 'ñanini ra Saulo nú'a̱ ra me Tarso. Nu xcrí tsøni gui tsʉdi di øt'a rá søcambeni. 12Nu'á̱ ya stá xipabi ngu dega t'i gue ma da tsøni 'nara 'ñøhø rá thuhu ra Ananía, ne da hñu'tsua yá 'yɛ pa da yopa hyandi. 13Nu mi 'yøde njabʉ ra cu Ananía bi da̱di ne bi 'ñena: ―Zi Hmu, stá øde ndunthi de nú'a̱ ra 'ñøhø'a̱ gue xi mi ø'tuabi ndunthi ra nts'o'mʉi ya cu nuni Jerusale. 14Ha xa umba nsɛqui ya nda̱ gá macja̱ pa da za da gʉ gatho nú'ʉ di xøcambeni'i ri thuhu de guecua nehe. 15Nepʉ ra Zidada bi 'ñemba ra cu Ananía: ―Grí ma gui 'yøt'a nú'a̱ dí xi'i, ngue'a̱ go gue'a̱ ra 'ñøhø stá huahni pa da mɛpcagui ne da 'ñutua ma thuhu ya me Israel ne gatho nú'ʉ hingyá me Israel ne nuyá nda̱'ʉ, pa da ba̱di'ʉ to'ogui. 16Ne nuga go ma ga utuabi gatho nú'ʉ ya ts'othogui pɛ'tsi da thogui po rá ngue ma thuhu. 17Nu'bʉ́ ra cu Ananía bi ma ne bi yʉt'a ja ra ngu habʉ mi 'bʉ ra Saulo. Ne bi hñu'tsua yá 'yɛ, ne bi 'ñembabi: ―Zi cu Saulo, ra Zidada Jesu nú'a̱ to'o gá handa ja ra 'ñu nú'a̱ ngrí nehi pa guecua, go gue'a̱ xa mɛncagui pa da yopa xo ri da ne gui hña̱nga ra Ma̱ca Nda̱hi. 18Ne 'bestho ra ora'a̱ bi dagui nú'a̱ te mi co'tua yá da, ne 'bestho bi yopa hyandi. Ne nu'á̱ bi 'mai bi ma bá nxistehe. 19Ne bi ñuni, nepʉ bi yopa nja rá ts'ɛdi, ne bi 'mʉhni 'raya pa co ya gamfri nuni Ndamasco. 20Nepʉ 'bestho bi ma bá damajua̱ni de ma zi Hmuhʉ ra Jesucristo ja yá nija̱ ya xodyo, ne mi ma̱ gue ra Jesu go gue'a̱ rá T'ʉ Ajua̱. 21Y gatho nú'ʉ to'o mi øde nú'a̱ mi ma̱ñ'a̱ xi mri 'yø ne mi eñ'ʉ: ―¿Ha hingo guehni núni xi mi ø'tua ra nts'o'mʉi nú'ʉ to'o xøcambenibi rá thuhu ra Jesu nuni Jerusale? ¿Ha hingo guehni xqui 'ñehe da gʉ nts'a̱hni ya gamfri pa da zi'tsua ya nda̱ gá macja̱? 22Pe nura cu Saulo ma'na mi jʉ rá ts'ɛdi pa da damajua̱ni gue ra Jesu go gue'a̱ ra Cristo rá 'mɛhni Ajua̱ ne xqui hñuts'i'a̱ pa da e da nda̱. Y nuya xodyo himbi ba̱di te da beni gatho nú'ʉ mi 'bʉhni Ndamasco. 23Bi thogui ndunthi ya pa, nepʉ bi mʉdi bi má̱mbi ya xodyo pa da hyohma̱ ra cu Saulo. 24Pe nú'a̱ ra cohi bi gohi'ʉ, bi t'umba nt'øde ra cu Saulo gue nu'ʉ́ ma pa ra xuui mi su gatho ya gosthi de nú'a̱ ra hnini'a̱ pa xa thohma̱'a̱. 25Pe nu mi ba̱di ya cu njabʉ, bi 'yɛnt'a ra cu Saulo ja 'nara da̱nga 'bøts'e pa bri tonts'a dega xuui pa møte de ra ja̱do nú'a̱ mi cot'a ra hnini, pa bi za bi 'bat'i'a̱. 26Nu mi zønga ra cu Saulo Jerusale mi nehma̱'a̱ da munts'iui ya gamfri, pe nu'ʉ́ mi tsu ngue'a̱ himi camfri'ʉ gue nu'á̱ ya mi 'nara gamfri. 27Pe nura cu Berhna bi zits'i pa habʉ mbi 'bʉ ya apostol, ne bi metuabi hanja xqui hyanda ra Zidada Jesu ja rá 'ñu ra cu Saulo, ne xqui ña̱ui. Ne bi metuabi'ʉ gue nu'á̱ ya xqui ña̱ de rá thuhu ra Zidada Jesu co ndunthi ra ts'ɛdi nuni Ndamasco. 28Y njabʉ bi za bi 'mʉi co ya gamfri nuni Jerusale. 29Nu'á̱ himi tsu da ma̱ de rá thuhu ra Zidada Jesu, ne mi ntsanoyaui ya xodyo nú'ʉ mi ña̱ca griego, ha nu'ʉ́ mi ɛcuabi da hyo'a̱. 30Pe nu mi ba̱di njabʉ ya cu bi zixa ra cu Saulo pa nuni Cesarea, nepʉ bi mɛhni'ʉ pa Tarso. 31'Mɛfa gatho ya gamfri bi mɛ'tsa 'nara hoga'mʉi nuni Judea ne Galilea ne Nsamaria, ne mi zɛdi yá jamfri, ne mi 'yo'ʉ co ndunthi rá ntsu Ajua̱, ne ma'na mri xu ya gamfri co rá mfats'i ra Ma̱ca Nda̱hi. 32Ha nura apostol Pedro bi 'ño bi zønga gatho ya gamfri, ne bi ma bá c'a̱'tsa ya cu nú'ʉ mi 'bʉhni Lida. 33Ne ja bi zʉhni 'nara 'ñøhø rá thuhu ra Enea, ne ya mi øt'a hña̱to jɛya xqui 'mɛnga ja ra mfidi ngue'a̱ mi tsʉ 'nara hñeni nú'a̱ nixi mi tsa da a̱nga rá ndo'yo. 34Nepʉ ra cu Pedro bi 'ñembabi: ―Enea, ra Zidada Jesucristo xa 'yøthe'i. Nangui jʉxa ri mfidi. Nepʉ nu'á̱ 'bestho bi nangui. 35Y gatho ya mengu de guehni Lida ne ya me Sarón bi zogui yá nda̱xjua jamfri ne bi gamfri ra Zidada Jesu co nú'a̱ xqui hyandi'ʉ. 36Nuni Jope mbi 'bʉ 'nara 'bɛhña̱ mrá gamfri nú'a̱ mrá thuhu ra Tabita, dega griego t'embi ra Dorca. Nú'á̱ nza̱ntho mi øt'a ndunthi ra hñoja̱'i ne mi faxa ya hyoya. 37Ha nuya pa'ʉ bi zʉ 'nara hñeni ne bi du. Nepʉ bi sati ngu myá nza̱i'ʉ ne bá 'bɛgui ja 'nara tøngu. 38Pe de guehni Jope mi guetbʉ pa ja ra hnini Lida, ne nuya gamfri de guehni xqui 'yøde gue ja mbi 'bʉhni ra cu Pedro nuni Lida, hangue bi 'bɛhna yoho ya 'mɛhni pa dua tsi ne da 'ñembi: ―Dí ba̱nte'ihe ga maha 'bestho pa Jope. 39Nepʉ nura cu Pedro 'bestho bi mɛui'ʉ. Ne nu mi zøni bi ts'its'i pa ja ra tøngu habʉ xqui munts'a ndunthi ya viuda mi zoni. Ne bi t'utuabi ra cu Pedro nuya pahni ne ma'ra ya he xqui hyoca ra nju Dorca nú'bʉ mi te'a̱. 40Nu'bʉ́ ra cu Pedro bi 'bɛpi da bønga pa thi gatho nú'ʉ mi 'bʉhni, ne nu'á̱ bi ndandiña̱hmu ne bi 'yapabi Ajua̱. Nepʉ bi zofo nú'a̱ xqui du ne bi 'ñembabi: ―Tabita, nangui. Ne nu'á̱ 'bestho bi zøt'a yá da, ne nu mi hyanda ra cu Pedro bi nangui bi hñudi'a̱. 41Ha nura cu Pedro bi mipa 'nará 'yɛ ne bi 'ba'mi. Nepʉ bi zohna ya viuda ne ma'ra ya gamfri pa bi 'ñutuabi gue ya xqui yopa nte. 42Y gatho de guehni Jope bi nt'øde de nú'a̱ xqui nja, ne ndunthi to'o bi gamfri ra Zidada Jesu. 43Ha nura cu Pedro bi gohi ndunthi ya pa de guehni Jope ja rá ngu ra cu nú'a̱ rá thuhu ra Simu dɛxifri.

will be added

X\