RA ECHO 8

1Ha nura Saulo xqui da̱ rá hña̱ gue da tho ra cu Teba. Nepʉ 'bestho nú'a̱ ra pa'a̱ bi mʉdi bi nja 'nara da̱nga nt'ʉtsate contra nú'ʉ xqui gamfri Ajua̱ nuni Jerusale. Ne bi nxanga gatho ya gamfri habʉraza maxøgue ra hai Judea ne Nsamaria, hønsɛ ya apostol himbi bønga de Jerusale. 2Y nu 'raya cu xi mi ja yá jamfri co Ajua̱, go gue'ʉ bi 'ñoni pa bi 'yagui ra cu Teba, ne xi bi nzoni ndunthi ngue'a̱ xi mri ma̱di'ʉ. 3Ha nura Saulo xi bi 'yø'tua ndunthi ra nts'o'mʉi ya gamfri, ne 'rama'na ra ngu mi cʉt'i pa mi jʉca ya 'ñøhø ne ya 'bɛhña̱ pa da zits'i da got'a fadi. 4Ha nú'ʉ ma'ra ya gamfri xqui 'bat'i ne xqui nxani, go gue'ʉ mi 'yo mi ma̱mba rá noya Ajua̱ habʉraza. 5Ha 'na de gue'ʉ mrá thuhu ra Lipe bi ma pa ja 'nara hnini nuni Nsamaria pa bá xipa ya ja̱'i de ra Zidada Jesucristo. 6Y nuya ja̱'i de guehni mri munts'i pa mi huxa nt'øde xá hño de nú'a̱ mi ma̱nga ra cu Lipe, ne mi handi'ʉ nú'ʉ ya nt'udi mi øt'e'a̱. 7Ngue'a̱ nu'á̱ mi ɛmba ya ts'onda̱hi nú'ʉ to'o mi pɛ'tsi, ne nuya ts'onda̱hi asta mi mafi da bøni. Ne ndunthi ya ts'onate mi øthe'a̱. 8Hangue njabʉ bi mɛ'tsa 'nara da̱nga johya nú'a̱ ra hnini'a̱. 9Ne mi 'bʉhni 'nara 'ñøhø mrá thuhu ra Simu nú'a̱ mrá 'ñete de nú'a̱ ra hnini'a̱. Nura 'ñete'a̱ xi xqui hyat'a ndunthi ya me Nsamaria, ne xi mri 'ñets'i co nú'a̱ rá mfa̱di mi pa̱di. 10Ne gatho nuya ja̱'i de guehni notsi nda̱ngui xi mi huxa nt'øde de nú'a̱ mi ma̱nga nú'a̱ ra 'ñete'a̱, ne mi eñ'ʉ: ―Nura 'ñøhø'a̱ ha̱mpa rá da̱nga ts'ɛdi Ajua̱. 11Ne gatho ya ja̱'i xi mi huxa nt'øde ngue'a̱ ya ya'mʉ xqui hyat'i'ʉ co rá nt'ete. 12Pe nu mi zønga ra cu Lipe ja nú'a̱ ra hnini'a̱ bi ma̱nga ra hoga nt'øde de rá hmanda Ajua̱ ne bi ma̱ de ra Zidada Jesucristo. Nepʉ gatho ya ja̱'i bi gamfri ne bi nxistehe, ya 'ñøhø ne ya 'bɛhña̱. 13Nehe nú'a̱ ra 'ñete mrá thuhu ra Simu bi gamfribi rá noya Ajua̱ ne bi nxistehe. Ne nza̱ntho bi 'ñoui ra cu Lipe, mi handa nú'ʉ ya nt'udi ne ya da̱nga t'øt'e mi øt'e, ne nu'á̱ xi mri 'yø de nú'a̱ mi handi. 14Nepʉ mi ba̱di nú'ʉ ya apostol mi 'bʉhni Jerusale gue ya me Nsamaria ya xqui hña̱nga rá noya Ajua̱, 'bestho bi mɛhna ra apostol Pedro ne ra apostol Xuua pa guehni. 15Y ngu mi zøñ'ʉ bi 'yapabi Ajua̱ po ya gamfri de guehni Nsamaria pa bi za bi hña̱nga ra Ma̱ca Nda̱hi, 16ngue'a̱ ni 'na de gue'ʉ hinxqui hña̱ni thoho ra Ma̱ca Nda̱hi, hønsɛ xqui nxistehe de rá thuhu ma zi Hmuhʉ ra Jesucristo. 17Hangue ra Pedro ne ra Xuua bi hñuxa yá 'yɛ ja ya gamfri, nepʉ nu'ʉ́ 'bestho ra ora'a̱ bi hña̱nga ra Ma̱ca Nda̱hi. 18Ha nu mi hyanda ra Simu nú'a̱ mrá 'ñetehma̱ gue xqui hña̱nga ra Ma̱ca Nda̱hi nú'ʉ to'o xqui hñu'tsua yá 'yɛ ra Pedro ne ra Xuua, hangue nu'á̱ asta bi ña̱'tuahma̱ ra boja̱ nú'ʉ ya apostol, 19ne bi 'ñembabi: ―'Racaguihʉ nehe nú'a̱ ra ts'ɛdi guí ha̱hʉ, pa njabʉ necagui da za ga huxa ma 'yɛ ja ya ja̱'i ne nu'ʉ́ da hña̱nga ra Ma̱ca Nda̱hi. 20Nepʉ ra Pedro bi da̱di ne bi 'ñembi: ―Ma'na xá hño 'mɛdiui ri boja̱. ¿Hanja xcá beni gue rá ts'ɛdi Ajua̱ da za da thai co ra boja̱? 21Hinguí pɛ'tsa ra nsɛqui nixi rí 'ñep'a'i gui pɛfi nuna 'bɛfina̱, ngue'a̱ hingui ho núna xcá beni de ja rá thandi Ajua̱. 22Hangue nu'a̱ mahyoni gui 'yøt'ebya, ntsø'mi de nú'a̱ ri ts'oqui xcá beni, ne 'yapabi Ajua̱ pa xahma̱ da pun'a'i de nú'a̱ ra ts'omfeni xcá beni. 23Ngue'a̱ nuga dí handi gue xi 'nagrá ts'omfeni ne 'nagrá 'yøt'ats'oqui. 24Nepʉ nú'a̱ ra Simu bi da̱di ne bi 'ñena: ―'Yaphʉ ts'ʉ Ajua̱ por gueque, pa hinda njabʉ ngu nú'a̱ xcá ma̱. 25Ha nú'ʉ ya apostol ngu bi damajua̱ni'ʉ de ma zi Hmuhʉ ra Jesu ne bi ma̱mba rá noya Ajua̱, bi bøni'ʉ de nú'a̱ ra hnini'a̱. Ne bi thohni ja ma'ra ya t'ʉca hnini de Nsamaria mi ma̱nga ra hoga nt'øde de ra mpøhø. Nepʉ nu'ʉ́ bi yopa menga Jerusale. 26'Mɛfa de gue'a̱ 'nará ɛnxɛ Ajua̱ bi zofo ra cu Lipe ne bi 'ñembabi: ―Lipe, stá ehe ga pɛñ'a'i grí ma grí ca̱i, jʉ nú'a̱ ra 'ñu nexa Jerusale pa rí zønga asta ja ra hnini Gasa. Nú'a̱ ra 'ñu'a̱ thogui ja 'nara mbonthi. 27Nepʉ ra cu Lipe 'bestho bi gʉ ra 'ñu bi ma. Ne de má 'ñu bi nthɛui 'nara 'ñøhø mrá me Etiopía. Nú'á̱ mrá eunuco, ne mi gue'a̱ 'namrá da̱nga mfats'i nú'a̱ ra 'bɛhña̱ mrá nda̱ nuni Etiopía ne mrá thuhu ra Candace. Nura 'ñøhø'a̱ go gue'a̱ mrá mɛ'sboja̱ de ja rá ts'ʉtbi nú'a̱ ra 'bɛhña̱ mrá nda̱. Y nu'á̱ xqui mengui xqui xøcambeni Ajua̱ nuni Jerusale. 28Ne ya mri menga pa ja rá hai ne mri zi rá carro mri gʉt'a ya fani. Nuni ja mi huhni mi he'ta ra Ma̱ca T'ofo nú'a̱ bi 'yofo ra ba̱di Isaía. 29Nepʉ ra Ma̱ca Nda̱hi bi 'ñemba ra cu Lipe: ―Rí ma ua tsʉ nuna carro xa mani ne rí mɛui. 30Nepʉ nura cu Lipe bi nest'ihi bi ma bá tsʉ nú'a̱ ra carro, ne bi 'yøde nú'a̱ ra 'ñøhø mi he'tua rá t'ofo ra ba̱di Isaía, ne bi 'ñembabi: ―¿Ha gue guí pa̱di te rí bønga nú'ʉ ya noya guí he'ti? 31Nepʉ nu'á̱ bi da̱di ne bi 'ñena: ―¿Hanja da za ga pa̱di te rí bøni 'bʉ hinto da 'ñutcagui? Ne bi 'ñemba ra cu Lipe: ―Bá pøxa ja ra carro ne bá e ga huhui. 32Y nú'a̱ ra xɛni de ra Ma̱ca T'ofo mi he'ti'a̱ nu habʉ ena njaua: Nú'á̱ bi ts'its'i nja ngu 'nara zi dɛti pa da tho; ne 'besthó himbi xoxa rá ne nja ngu 'nara zi dɛti bi 'bɛgui pa da t'a̱xi. 33Mri 'ñenda ya ja̱'i, ne hinto bi ña̱ni; ha nú'ʉ yá ja̱'i xi bi nts'o'mʉi, ne bi tha̱cua rá te de guecua ja ra ximhai. Njabʉ ma̱nga ra Ma̱ca T'ofo. 34Nepʉ nú'a̱ ra me Etiopía bi 'ñembabi ra cu Lipe: ―Dí ba̱nte'i gui xicagui de nú'a̱ rá 'mɛhni Ajua̱, ¿ha gue mi ma̱ de guesɛ'a̱, o mi ma̱ de ma'na ra ja̱'i? 35Nepʉ nura cu Lipe bi mʉdi bi ña̱, ne bi xipabi gatho ra hoga nt'øde de ma zi Hmuhʉ ra Jesu desde habʉ mi he'ta ra me Etiopía go gue'a̱ 'nara xɛni de ra Ma̱ca T'ofo nú'a̱ xqui 'yofo ra ba̱di Isaía. 36Nepʉ de mi 'yo'ʉ ja ra 'ñu bi zønga habʉ mi ja 'nara mothe, ha bi 'ñenga nú'a̱ ra me Etiopía: ―Jani 'nara zi mothe po ra dehe. ¿Ha hinda za ja ga nxisteheni? 37Ha nura cu Lipe bi 'ñembabi: ―'Bʉ xi guí camfri con gatho ri mfeni da za, hanja hina. Nura me Etiopía bi 'ñena: ―Ha̱ha̱, dí camfri gue ra Jesucristo go gue'a̱ rá T'ʉ Ajua̱. 38Nu'bʉ́ nu'á̱ bi 'bɛpa rá 'bɛgo bi 'ba'ma ra carro, nepʉ bi ga̱i ri yoho'ʉ, ne bi yʉt'a mbo ra dehe. Nepʉ ra cu Lipe bi xi'tsa nú'a̱ ra cu me Etiopía. 39Y nu mi bøxa ra cu Lipe de ja ra dehe, bi 'mɛtho ngue'a̱ rá Ma̱ca Nda̱hi Ajua̱ bi zits'i. Nepʉ nura cu me Etiopía ya himbi yopa hyanda ra cu Lipe ma'na'qui. Y ya mri sɛhɛ'a̱ bi sigui bi ne rá 'ñu co ndunthi ra johya mi pɛ'tsi. 40Nepʉ nura cu Lipe bi zønga nuni Asoto, ne de mi 'rani de guehni bi mʉdi bi ma̱nga ra hoga nt'øde asta bi zønga nuni Cesarea.

will be added

X\