RA ECHO 7

1Nepʉ de gue'a̱ ra da̱nga nda̱ gá macja̱ bi 'yambabi ra cu Teba ne bi 'ñembi: ―¿Ha gue xi majua̱ni xcá ña̱ma'ñʉ de Ajua̱ ne de ra Moise? 2Nu'bʉ́ ra cu Teba bi da̱di ne bi 'ñena: ―Nú'ahʉ ma cu'ihʉ, ne nú'ahʉ ma nda̱'ihʉ xcá muntshʉua 'nadbʉ, 'yøhʉ núna ma ga xi'ahʉ. Ajua̱ nú'a̱ xá nsunda bi zofo ndu ma xitahʉ ra Abrá nú'bʉ hinxqui matho pa ja ra hai Arán ne mi 'bʉhnitho Mesopotamia. 3Ne bi 'ñembabi: “Pøni de guecua ri hai, tsopʉ nú'ʉ ja te ri njaui, ne grí ma pa ma'na ra hai nú'a̱ ma ga u't'a'i pa ja gui 'bʉhni.” 4Nu'bʉ́ bi bøni de guehni habʉ mi 'bʉi, habʉ myá hai ya Caldeo, ne bi ma pa bá 'bʉ ja ra hai Arán. Ha nu mi du rá dada, Ajua̱ bá tsi pa guecua habʉ dí 'bʉhʉbya, ja bi 'mʉcua nehe'a̱. 5Pe nu Ajua̱ himbi umbabiua ni 'na xɛni ra hai pa drá mɛti'a̱, pe xqui ña̱'tuabi gue nuna hai habʉ dí 'bʉhʉbya go drá mɛti'a̱ 'mɛfa ne gatho yá ja̱'i de rá ji'a̱ nú'ʉ da 'mʉi 'mɛfa. Pe nuya pa'ʉ ra Abrá hinxqui mɛ'tstho ni 'nara ba̱tsi. 6Y Ajua̱ bi 'ñembabi'a̱: “Nuri ba̱tsi ri 'bɛto ne ri mbong'bɛto ma da 'mʉ ja 'nara hai habʉ hindyá mɛti'ʉ ngue'a̱ dya nzøhøtho de guehni. Ne ja ma da 'mʉhni'ʉ ngu goho nthebe njɛya, ne ma da 'mɛgotho'ʉ, ne ma da t'ø'tua ndunthi ra nts'o'mʉi.” 7Nehe bi 'ñembabi Ajua̱: “Nuga go ma ga ha̱'mba nguɛnda ya ja̱'i de nú'a̱ ra hnini habʉ ma da 'mɛgo'ʉ. Ne 'mɛfa ma ga yopa tsi de guehni pa da 'ñehe da mɛpcagui de guecua.” 8Nepʉ Ajua̱ bi gohui 'nara cohi ra Abrá, ne bi manda gue gatho yá ba̱tsi yá 'bɛto ne yá mbong'bɛto da mɛ'tsa 'nara seña ja yá ndo'yo de nú'a̱ ra cohi bi gohi. Hangue nu mi 'mʉi rá t'ʉ ra Abrá nú'a̱ mrá thuhu ra Isaac, nurá hña̱to ma pa de xqui 'mʉi bi 'yø'tua nú'a̱ ra seña xqui gohui Ajua̱ da 'yøt'e. Ne guet'a̱ bi 'yøt'a ra Isaac co rá t'ʉ nú'a̱ mrá thuhu ra Cobo, ne guet'a̱ bi 'yøt'a ra Cobo co nú'ʉ 'rɛt'amayoho yá t'ʉ, y go gue'ʉ yá dada nú'ʉ 'rɛt'amayoho ya 'mʉi de Israel. 9Nepʉ nú'ʉ yá t'ʉ ra Cobo xi bi ʉtsa 'na de nuyá cu nú'a̱ mrá thuhu ra Jose. Hangue nu'ʉ́ bi papabi ya me Egipto nú'a̱ yá cu'ʉ, ne bi ts'its'i pa guehni. Pe Ajua̱ himbi hyɛsɛ'a̱. 10Hangue xi bi ña̱ni de ja yá ts'othogui bi thogui, ne bi umba ndunthi ra mfa̱di ne bi mats'i pa njabʉ ra Faraó bi hopa rá 'mʉi. Ra Faraó go gue'a̱ mrá nda̱ de Egipto. Nepʉ ra Faraó bi umba 'nará nsu ra Jose pa bi gohi ngu rá ñoho de gue'a̱, ne bi manda maxøgue ja rá ngu ra Faraó. 11'Mɛfa bi nja 'nara da̱nga thuhu nuni Egipto ne nuni Canaán, ne bi nja 'raya da̱nga dumʉi, ne bi 'ñotho te bi zi ndu ma xitahʉ. Himi tsʉdi habʉ da dai ngue'a̱ mi otho te da dañ'ʉ. 12Nepʉ ra Cobo bi 'yøde gue mi ja ra trigo nuni Egipto, hangue bi mɛhna yá t'ʉ pa guehni. Gue'a̱ ra mʉdi 'mi'qui bi ma pa Egipto. 13Nepʉ nurá ño'qui bi ma'ʉ, ra Jose bi xipabi'ʉ to'o mi gue'a̱ pa bi ba̱di'ʉ gue go mi gue'a̱ myá cu. Hangue nura Faraó bi ba̱tuabi yá ja̱'i ra Jose. 14Nepʉ nura Jose bá pɛmpa ra noya rá dada pa da ma da 'mʉ Egipto con gatho ma'ra yá ja̱'i. Nu'ʉ́ mi hñu'rate ne 'rɛt'amacʉt'a. 15Nepʉ 'bestho bi ma'ʉ pa Egipto. Y nepʉ ja bá tuni'a̱, ne ja bá tuni gatho yá t'ʉ, y nú'ʉ́ go gue'ʉ ndu ma xitahʉ. 16Ne 'mɛfa de ya xqui thogui ndunthi ya jɛya de xqui du'ʉ, bá tha̱mpa yá ndo'yo'ʉ de guehni pa e bi t'acua ja yá hai nuni Siquem 'nara hnini de Canaán. Ne bi t'acuabi nuyá ndo'yo ja 'nara nt'agui xqui danga ndu ra Abrá xqui damba yá t'ʉ ra Amor nuni Siquem. 17Y ya xqui nxa̱nda ndunthi yá t'ʉ yá 'bɛto ne yá mbong'bɛto ra Cobo nuni Egipto, ne ya mi ma da zø ra pa da hña̱nga nú'a̱ ra hña̱'ti xqui xipabi Ajua̱ ra Abrá. 18Nepʉ de nú'ʉ ya pa'ʉ bi 'mʉ ma'na ra nda̱ nú'a̱ himi pa̱di to'o mi gue'a̱ ra Jose ne te xqui mɛfi'a̱, ngue'a̱ ya mi pɛ'tsa ndunthi ya jɛya xqui du'a̱. 19Nú'a̱ ra nda̱'a̱ xi bi 'yø'tua ra nts'o'mʉi nú'ʉ ndu ma xitahʉ. Ne bi manda dra japi da 'yɛi gatho yá zi 'uɛne nú'ʉ myá ts'ʉnt'ʉ, pa njabʉ da du gatho'ʉ. 20Y gue'ʉ ya pa bi 'mʉ ra Moise, y Ajua̱ xi mri hopa rá 'mʉi. Nu'á̱ bi tede rá dada ne rá na̱na̱ hñu nza̱na̱ ja yá ngu'ʉ. 21Nepʉ bi thogui nú'ʉ hñu nza̱na̱, nu'ʉ́ bi ma bá ɛi ngue'a̱ njabʉ xqui manda ra Faraó da t'øt'e. Pe 'nará t'ixu ra Faraó bá jʉxa ra Moise de habʉ xqui t'ɛi, nú'a̱ mrá zi 'uɛnetho, pa bi tede, ja ra uɛnda go mrá ba̱tsi'a̱. 22Hangue ra Moise bi te ne bi ba̱tua yá mfa̱di ya me Egipto, ne xi mrá nimfeni, ne mi ha̱ ra ts'ɛdi pa da ña̱ ne pa te da 'yøt'e. 23Nepʉ de ya mi pɛ'tsa ñote njɛya ja bi zo rá mfeni da ma da c'a̱'tsa ya me Israel nuyá ja̱'i pa bá nu te ngra 'mʉ'ʉ. 24Nepʉ ngu mi zøni habʉ mi 'bʉ yá ja̱'i, bi hyanda 'nara me Egipto mi na'mbabi 'na de gue'ʉ. Hangue pa bi za bi ña̱nga rá ja̱'i, ra Moise bi hyo nú'a̱ ra me Egipto. 25Nura Moise mi beni yá ja̱'i'a̱ xa unga nguɛnda gue Ajua̱ xqui mɛhni'a̱ pa da ña̱ni'ʉ, pe nu'ʉ́ himbi zo yá mfeni ua mrá 'mɛhni Ajua̱ ra Moise. 26Nepʉ rá hyax'a̱ bi yopa thohni ra Moise, ne bi hyanda yoho ya me Israel mri ntunsɛhɛ. Ne mi ma da hyeque'ʉ ne bi 'ñembabi: “Nu'ahʉ́ gyá me Israelhʉ, ne grí ncuhʉ. ¿Hanja grí ntunsɛhʉ 'na ngu ma'na?” 27Nepʉ nú'a̱ to'o mi na'mba nú'a̱ ma'na, bi umba 'nara nt'ent'i ra Moise ne bi 'ñembabi: “¿To'o xa hñux'ague dega nzaya ne dega nda̱ pa go gui hña̱gahe nú'a̱ dí øthe? 28¿Ua gue guí ne gui hyogagui nehe ngu gá ø'tua ra me Egipto mande?” 29Nu mi 'yøde njabʉ ra Moise xi bi ntsu, ne bi 'bat'i bi ma pa ja 'nara hai rá thuhu Madián, y ja bá 'bʉhni dega nzøhø, y ja bá ntha̱tini ne bi mɛ'tsa yoho yá t'ʉ. 30Ne ya xqui thogui ñote njɛya de xqui bønga ra Moise de Egipto pa bá 'bʉ ja ra hai Madián, nepʉ 'nara pa xqui bønga de rá ngu mbi 'yo asta ja rá ua 'nara t'øhø rá thuhu Sinaí. Ne de guehni bi hyanda 'nara 'bai gá nda̱po mi zø 'nara faspi madetho de gue'a̱, ne mi 'bahni 'nará ɛnxɛ Ajua̱ madetho de ra faspi. 31Nepʉ nura Moise himbi ba̱di há bi nja, pe bi uat'a ja ra faspi pa bi hyandi te rá 'bɛ'a̱, ne bi 'yøde bi ña̱ Ajua̱ y bi 'ñembabi: 32“Nuga go gueque rá Ajua̱gui ra Abrá, ra Isaac, ra Cobo, ne gatho nú'ʉ ma'ra ndu ri xitahʉ.” Nu'bʉ́ ra Moise asta mri hua̱t'i co ra ntsu hangue ya himi nehma̱ da sigui da hyanda nú'a̱ ra faspi mi handi. 33Ha nu Ajua̱ bi 'ñembabi: “C'o'ta ri zɛsthi ngue'a̱ nuua habʉ guí net'i guehna 'nara ma̱ca hai xá nt'axi. 34Xi majua̱ni stá handa nuya ts'othogui thogui ma ja̱'i nuni Egipto, ne stá øtua yá ts'oni'ʉ, ne stá ehe pa ga ña̱ni. Nubya ma ga pɛñ'a'i gui yopa penga Egipto.” Njabʉ bi xipabi Ajua̱ ra Moise. 35Masque nuyá ja̱'i ra Moise xqui ʉtsa'a̱ ne xqui 'ñembi: “¿To'o xa hñux'ague dega nzaya ne dega nda̱ pa go gui hña̱gahe nú'a̱ dí øthe?”, pe xi majua̱ni go Ajua̱ xqui mɛhna ra Moise pa da nda̱ ne pa da zinga nú'ʉ yá ja̱'i mbi o ja yá 'yɛ ya me Egipto, ngue'a̱ njabʉ xqui xipa rá ɛnxɛ Ajua̱ nú'a̱ bi hnequi madetho de 'nara faspi nuni ja rá ua ra t'øhø Sinaí. 36Nepʉ ra Moise bá penga pa Egipto pa bá tsinga gatho ya me Israel nú'ʉ mbi 'bʉhni. Ne bi 'yøt'a ndunthi ya da̱nga t'øt'e ne ya nt'udi nuni Egipto ne ja ra Thɛnga Ndehe, nehe bá øt'a nuni ja ra mbonthi habʉ bá 'yo'ʉ ñote njɛya. 37Go guet'a̱ ra Moise nú'a̱ bi xipabi yá ja̱'i nú'ʉ myá me Israel bi 'ñembi: “Ajua̱ ma da hñux'ahʉ 'na de gue'ahʉ pa drá 'mɛhni'a̱ ngu xa hñuxcagui nehe. Y nú'á̱ ma gui 'yøtehʉ nú'a̱ da xi'a'ihʉ.” Njabʉ bi xipa ra Moise yá ja̱'i. 38Nura Moise go guet'a̱ mi 'ñoui ya me Israel nuni ja ra mbonthi, ne ja bi munts'ini'ʉ ja ra t'øhø Sinaí. Ne ja bi ña̱uini ra Moise rá ɛnxɛ Ajua̱. Nepʉ ra Moise bi xipa ndu ma xitahʉ ngu nú'a̱ xqui xipa ra ɛnxɛ. Njabʉ ra Moise bi hña̱nga ra noya dega te pa bi 'racjʉ nehe. 39Pe nú'ʉ ndu ma xitahʉ himbi ne bi 'yøta ra Moise, ne himi ne go da nda̱ de gue'ʉ, ne bi benga ja yá mfeni gue ma'na xá hño da mengui pa Egipto. 40Ha nu mi ma ra Moise bá ña̱ui ra ɛnxɛ, nu'bʉ́ nuya ja̱'i bi 'ñembabi ra Aarón: “Stá beñhe gue xá hño 'bʉ ga hocjʉ 'rama ajua̱hʉ pa go gue'ʉ dri 'bɛt'o de guecjʉ, ngue'a̱ nura Moise hønsɛ bá jʉgaguihʉ de Egipto pa e bi hyɛgahʉua ja ra mbonthi, ha nu'á̱, hadifa̱'a̱ te xua ja'a̱.” 41Hangue nu'ʉ́ bi hyoca 'nara t'ʉntfani dega bøja̱, ne bi thopabi ya mbo'oni pa bi t'umbabi'a̱, ne mri nsunda'ʉ, ne xi mri johya ngue'a̱ bi hyandi gue mi mahotho nú'a̱ ra c'oi xqui hyocsɛ'ʉ. 42Hangue nu Ajua̱ 'bestho bi 'uegue de gue'ʉ, ne bi hyɛpʉ da nsunda ya tsø ne ra za̱na̱ ne ra hyadi. Njabʉ bi 'yofo maya'bʉ 'na de yá 'mɛhni Ajua̱ nú'a̱ ena njaua: Nu'ahʉ gyá me Israelhʉ, ¿ha'mʉ rá 'nandi gá hyohʉ 'raya mbo'oni pa gá ña̱tcahʉ de nú'ʉ ñote njɛya gá 'yohʉ ja ra mbonthi? 43Hinhya'mʉ gá øtcahʉ njabʉ. Nu'a̱ nguí øthʉ, ngrí ndudehʉ nú'ʉ ri c'oihʉ gá hocjʉ pa gui nsundahʉ, 'na nguí hu'mbabihʉ ra Moloc, ha nu'a̱ ma'na gá hocjʉ ngu 'nara tsø, nguí hu'mbabihʉ ra Renfán. Hangue nubyá ma ga pøñ'a'ihʉ de ri haihʉ pa ga pɛñ'ahʉ asta thogui de ra hai Babilonia. Guehna bi xipa Ajua̱ ya me Israel. 44Nú'a̱ ra mbonthi habʉ bi 'ranga ndu ma xitahʉ, ja guehni xqui hocni'ʉ 'nara ngu dega dutu habʉ mi 'bɛ'tsa nú'a̱ ra xingdo habʉ mi nt'ofo nú'ʉ 'rɛt'a ya hmanda. Nú'a̱ ra ngu'a̱ bi thoqui ngu xqui xipa Ajua̱ ra Moise da hyoqui, ne ngu nú'a̱ xqui 'ñutuabi. 45Nepʉ 'mɛfa nú'a̱ ra ngu'a̱ bi gohui ndu ma xitahʉ nú'ʉ mri zi ra Josue. Nepʉ bá ha̱'ʉ pa nuua habʉ bi ntuncui ya ja̱'i nú'ʉ himyá me Israel nú'ʉ bi guui Ajua̱ de guecua nú'bʉ mi zøcua nú'ʉ ndu ma xitahʉ. Y ja nura ngu'a̱ ja bi nsundani'ʉ Ajua̱ asta mi 'mʉi ra Davi nú'a̱ bi nda̱. 46Y Ajua̱ xi bi hopa rá 'mʉi'a̱. Y ra Davi mi nehma̱ xa hyoca 'nara ngu pa habʉ dra nsunda hma̱ha̱ Ajua̱ nú'a̱ rá Ajua̱ ndu ma xitahʉ ra Cobo. Pe himbi za bi hyoqui. 47Pe nu 'nará t'ʉ ha̱, nú'a̱ mrá thuhu Salomó, nu'á̱ ha̱, go gue'a̱ bi hyocua rá ngu Ajua̱ nú'a̱ mi behma̱ da hyoca rá dada. 48Masque nu Ajua̱ bí 'bʉi maña̱ mahets'i, hingui 'bʉ ja 'nara ngu nú'a̱ xa thoqui co yá 'yɛ ya ja̱'i, ngu bi 'ñenga ra ba̱di Isaía gue Ajua̱ mi ena njaua: 49Nuua mahets'i ja guecua ma hudiga habʉ dí 'bʉi dega nda̱, ha nu ja ra ximhai ja guehni dí tøta ma ua. Nehe ena: ¿Te ma ngu nú'a̱ ra ngu ma da thogaga 'bʉ? O ¿habʉ ma ga 'bʉca 'bʉ? 50¿Ha gue hingue co ma ts'ɛdi stá hocaga gatho nuya t'øt'e ja ja ra ximhai? 51Y ra cu Teba bi sigui bi 'ñembabi ya ja̱'i: Pe nu'ahʉ́ nza̱ntho xi xcá njahʉbʉ, xi xá me ri mfenihʉ, hinguí ne gui 'yøhʉ. Guí njahʉ ngu nú'ʉ ya ja̱'i hingui pa̱ Ajua̱, ngue'a̱ nu'ahʉ́ hinguí ne gui 'yøthʉ nú'a̱ xi'ahʉ ra Ma̱ca Nda̱hi ngu mi nja ndu ma xitahʉ nehe. 52¿Hangu hma̱ yá 'mɛhni Ajua̱ bi t'ø'tua ra nts'o'mʉi? Y nú'ʉ ndu ma xitahʉ go gue'ʉ bi 'yøt'a njabʉ. Nú'ʉ́ go gue'ʉ bi hyo nú'ʉ to'o mi ma̱ desde rá mʉdi gue mi ma da 'ñehe nú'a̱ ra hoja̱'i hinda ma da 'yøt'a ni 'nara ts'oqui. Ha nu mi zøhø'a̱, go gue'ahʉ gá dahʉ ne gá hyohʉ. 53Nu'ahʉ gá hña̱ñhʉ ya hmanda nú'a̱ e bi zogahʉ yá ɛnxɛ Ajua̱, pe hinxcá ne xcá 'yøthʉ ngu nú'a̱ bi hmanda'ihʉ. 54Nepʉ mi 'yøde njabʉ nuya ja̱'i nuya noya'ʉ, xi bi bø yá cuɛ nts'ɛdi co ra cu Teba. 55Pe nura cu Teba mi ha̱mpa rá ts'ɛdi ra Ma̱ca Nda̱hi, ne bi nøxa pa mahets'i ne bi hyandua rá nsunda Ajua̱, nehe bi hyanda ma zi Hmuhʉ ra Jesu mi 'bahni ja rá 'ñɛi Ajua̱. 56Nepʉ ra cu Teba bi 'ñemba ya ja̱'i: ―¡Ndi! Dí handa mahets'i xogui, nehe dí handa Nú'a̱ To'o e bi Nja̱'i bí 'bai ja rá 'ñɛi Ajua̱. 57Y nura ora'a̱ gatho nú'ʉ ya ja̱'i mi 'bahni bi go'ta yá gu ne bi dø ya hmafi, ne bi nest'ihi ri gatho bi mfats'i bi mihi ra cu Teba. 58Nepʉ de guehni nuya ja̱'i'ʉ bi pønga ra cu Teba de ra hnini, nepʉ bi c'ahni. Ne mi 'bahni 'nara ba̱sja̱'i mrá thuhu ra Saulo, nú'á̱ nehe go gue'a̱ bi hyandua rá du ra cu Teba, nehe go gue'a̱ mi supa yá he ya hyote nú'ʉ xqui hña̱qui pa bi za bi hñote'ʉ. 59Y nú'a̱ ra ora mi thøxa ya nc'ahni ra cu Teba, nu'á̱ bi 'yapabi Ajua̱ ne bi 'ñena: ―Ma zi Hmu'i Jesu, dí a'i gui hña̱ni ma te ja ri ma̱ca 'yɛbya. 60Nu'bʉ́ nu'á̱ bi ndandiña̱hmu ne bi 'ñena: ―Ma zi Hmu'i, oxqui ha̱'mba nguɛnda nuyʉ ya ja̱'i de nú'a̱ øtcagui. Y ngu bi uadi bi ma̱nga njabʉ, 'bestho bi du.

will be added

X\