RA ECHO 6

1Nuya pa'ʉ mri xu ma'ra ya gamfri. Ne mi 'bʉhni 'raya cu mi ña̱ griego. Nepʉ nu'ʉ́ bi 'ñembabi nú'ʉ ya cu mi ña̱ de yá hña̱qui ya xodyo, ne mi ambi hanja himi t'umbabi te da zi xá hño nú'ʉ yá viuda ya griego ra ora mi t'umba te da zi ya hyoya ne nú'ʉ ma'ra ya viuda, ngue'a̱ nu'ʉ́ hyastho mi t'umbi te da zi. 2Nepʉ nú'ʉ 'rɛt'amayoho ya apostol bi zohna gatho ya cu pa bi munts'i ne bi 'ñembabi'ʉ: ―Ma zi cu'ihe, nuje dí 'bʉhe pa ga ma̱ñhe rá noya Ajua̱, ne hingui tsa ga tsayahe ni 'na ora pa da za go ga hecuahe nú'a̱ te da zi nú'ʉ hingui tsʉpabi. 3Hangue mahyoni gui huañhʉ yoto ya cu de guecjʉ nú'ʉ xcá hanthʉ 'yo xá hño ne ha̱mpa rá ts'ɛdi ra Ma̱ca Nda̱hi ne xi di ja yá mfa̱di. Nú'ʉ́ go gue'ʉ dyá uɛnda da mɛ nuna 'bɛfina̱. 4Ha nuje ma ga sigui ga aphe Ajua̱ ne ga ma̱mfe rá noya'a̱. 5Ha nu mi 'yøde bi sipa njabʉ ya cu, gatho xi bi ho'ʉ. Rá mʉdi, bri huahna ra cu Teba nú'a̱ mi pɛ'tsa ndunthi ra jamfri ne mi ha̱mpa rá ts'ɛdi ra Ma̱ca Nda̱hi. Nepʉ bi huahna ra cu Lipe, ne ra cu Procoro, ne ra cu Nicano, ne ra cu Timu, ne ra cu Parmena, ne ra cu Cula nú'a̱ ra me Antioquía xqui nxodyo ngue'a̱ xqui dɛmba yá ley'ʉ. 6Ne bi ts'ixa pa habʉ mbi 'bʉi ya apostol pa bi 'yapabi Ajua̱ por gue'ʉ. Nepʉ ya apostol bi hñuxa yá 'yɛ ja nú'ʉ ya cu xqui thahni. 7Y njabʉ ma'na mri ntʉnga rá noya Ajua̱, ne mri xu ndunthi ya gamfri nuni Jerusale, ne ndunthi ya macja̱ bi gamfri rá noya Ajua̱ nehe. 8Ha nura cu Teba xi mi ha̱mpa rá ts'ɛdi Ajua̱ ne mi ja rá mfa̱di pa mi pɛpa rá 'bɛfi Ajua̱, mi øt'a ya da̱nga t'øt'e ne ya nt'udi de ja yá thandi ya ja̱'i. 9Y nuni ja yá nija̱ ya xodyo nú'a̱ mrá thuhu ya Nza̱i 'Bɛgo xa Thøgue, ja mi 'bʉhni 'raya 'ñøhø nú'ʉ mri 'ñoui 'raya me Cirene, 'raya me Alejandría, 'raya me Cilicia, ne 'raya me Asia, gatho'ʉ bi mʉdi bi ntsanoyaui ra cu Teba. 10Pe nu'ʉ́ himi tsa te da da̱tuabi'a̱ ngue'a̱ nu'á̱ mi ha̱ ra hoga mfa̱di ne mi ha̱mpa rá ts'ɛdi ra Ma̱ca Nda̱hi pa mi ña̱. 11Nepʉ nú'ʉ ya ja̱'i'ʉ bi 'yʉ'ta 'raya 'ñøhø ne bi gu'tuabi pa da ma̱nga ya nc'uamba ne da 'ñena njaua: “Nuje stá øhe gue nura 'ñøhø'a̱ xa ña̱ma'ñʉ de ra Moise ne de Ajua̱.” 12Hangue bi bø yá cuɛ yá nda̱xjua nda̱ ya xodyo ne ya xahnate de ra ley ne gatho ya ja̱'i. Nepʉ bri jʉ ra cu Teba bi ts'ixa ja ra hmunts'a nda̱ gá xodyo. 13Ne bri japabi 'raya ja̱'i da hyøxa ra thai ra cu Teba ne bi 'ñena'ʉ: ―Nuna 'ñøhøni hingui tsaya ña̱ma'ñʉ de nuna ra ma̱ca nija̱ ne de rá ley ra Moise. 14Nuje go stá øhe nú'a̱ xa ma̱ni xa 'ñena gue nú'a̱ ra Jesu mrá me Nasare ma da huata nuna nija̱ ne ma da pata ma nza̱ihʉ nú'ʉ bi 'ñutcahʉ ra Moise ga øthʉ. 15Nepʉ gatho nú'ʉ to'o mi 'bʉhni ja ra hmunts'i xi mi heta ra cu Teba ne mi handuabi rá hmi gue mi ngu rá hmi 'nará ɛnxɛ Ajua̱.

will be added

X\