RA ECHO 4

1Ra apostol Pedro ne ra apostol Xuua mi 'bʉhnitho ja ra nda̱nija̱ mi zofo ya ja̱'i. Nepʉ bi zøni 'raya macja̱ ne ra nda̱ de ya nsunija̱, ne ya saduceo nú'ʉ himi camfri gue da yopa nte nú'ʉ ya xa du. 2Nepʉ nu'ʉ́ bi bø yá cuɛ ngue'a̱ ra Pedro ne ra Xuua mi xipabi ya ja̱'i gue ra Zidada Jesu xqui yopa nte de ra du, hangue mi utuabi'ʉ gue gatho ya ja̱'i ma da yopa nte. 3Nu'bʉ́ nuya ja̱'i'ʉ 'bestho bi gʉ nts'a̱hni ra Pedro ne ra Xuua, ne bi zits'i pa bá cot'a fadi. Y asta rá hyax'a̱ mi ma da nhyanthya̱, ngue'a̱ nú'a̱ ra pa'a̱ ya bi nde. 4Pe ya xi mi ndunthi nú'ʉ to'o xqui 'yøde ne xqui gamfri nú'a̱ mi ma̱nga ra Pedro. Ya ngu mi cʉt'a 'mo ya 'ñøhø xqui gamfri, y himi pa 'mede ya 'bɛhña̱ nixi ya ba̱tsi. 5Nurá hyax'a̱ bi munts'a nuni Jerusale nuyá nda̱xjua nda̱ ya xodyo ne ya xahnate de ra ley ne gatho ma'ra ya nda̱ gá xodyo. 6Gatho'ʉ bi munts'a mahyɛgui co ra Anás nú'a̱ to'o mrá da̱nga nda̱ gá macja̱, nehe mi 'bʉhni ra Caifá ne ra Xuua ne ra Jandro, ne gatho ma'ra ya 'ñøhø nú'ʉ mi ja te yá njaui ya da̱nga nda̱ gá macja̱. 7Nepʉ nu'ʉ́ bi manda bá ts'i ra apostol Pedro co ra apostol Xuua ne bri 'ba'ma madetho de gue'ʉ pa bi t'ambabi, ne bi t'embabi: ―¿To'o yá 'mɛhni'ihʉ, ne to'o rá ts'ɛdi guí ha̱mpahʉ pa guí øthʉ njabʉ? 8Nu'bʉ́ ra Pedro mi ha̱mpa rá ts'ɛdi ra Ma̱ca Nda̱hi pa bi da̱di ne bi 'ñena: ―Nú'ahʉ gyá nda̱hʉ de ma hninihʉ Israel, 9ya gue guí angahe de nú'a̱ ra hño bi t'ø'tua nuni ra zi 'ñøhø mrá doua, 10ma ga xi'ahe hanja bi za bi ña̱nini, pa gui pa̱hʉ ne gatho nú'ʉ ma'ra ya me Israel. Nuni ra zi 'ñøhø guí hanthʉ 'bahni, nuni bi ña̱ni de rá thuhu ra Jesucristo nú'a̱ mrá me Nasare nú'a̱ gá ponthʉ ja 'nara pont'i, pe nu'á̱ bi 'yøt'e Ajua̱ pa bi yopa nte de ra du. 11Nú'á̱ go gue'a̱ gá ʉtsahʉ, nja ngu nú'ʉ ya hyøngu mi 'bʉi maya'bʉ bi føthma̱bʉ ra mʉdi do nú'a̱ mi ma xa hyoca rá nija̱ Ajua̱. Pe nubyá go gue'a̱ ra mʉdi do bi mɛgui Ajua̱ pa bi hyø rá nija̱. 12Jo'o ma'na to'o da za da pøhøguihʉ, hønsɛ ma zi Hmuhʉ ra Jesu, ngue'a̱ jo'o ma'na to'o bá 'bɛhni nuua ja ra ximhai pa da pøhøguihʉ, hønsɛ ra Jesu go gue'a̱ bá 'bɛhni ne go gue'a̱ tsa da pøhøguihʉ. 13Nu'bʉ́ nuya nda̱ mi 'bʉhni xi bi 'yø ngue'a̱ bi hyandi gue ra Pedro ne ra Xuua himi tsu, ne mi pa̱di gue himyá 'ñøhø dega da̱nga mfa̱di ngue'a̱ myá hyoya ja̱'i. Pe bi ba̱di'ʉ gue mi gue'ʉ 'raya 'ñøhø xqui 'ñoui ra Jesu. 14Pe nu'ʉ́ himbi za te bi da̱tuabi ra Pedro ngue'a̱ bi hyandi mi 'bahni con gue'ʉ nú'a̱ ra zi doua xqui ña̱ni. 15Nu'bʉ́ nú'ʉ ya nda̱ bi 'bɛpabi ra Pedro ne ra Xuua ne nú'a̱ ra 'ñøhø mrá doua da bøhma̱ de habʉ xqui munts'i'ʉ, ne bi 'ñʉ'ti'ʉ 'na ngu 'na, 16ne bi 'ñémbi: ―Xibya, ¿te ga øthʉ co nuyʉ ya 'ñøhøyʉ? Ngue'a̱ nú'a̱ xa 'yø'tua nuna 'ñøhø mrá doua, ya pa̱di gatho ya ja̱'i nuua ja ma hninihʉ Jerusale, y hingui tsa ga cønihʉ. 17Ha nujʉ́ ya hindí nehʉ da fa̱di de guehna habʉraza, hangue ma ga hø'tuahʉ ra hña̱ gue ya hinte da sigui da ma̱, ne ya hinto da zofo de rá thuhu ra Jesu. 18Nepʉ bi ts'ohna ma'na'qui ra Pedro ne ra Xuua ne nú'a̱ ra 'ñøhø mrá doua, ne bi t'embabi'ʉ: ―Ya ote ma xqui ma̱ñhʉ, ne ya oxqui ma gui zofohʉ ma'ra ya ja̱'i de rá thuhu ra Jesu. 19Nu'bʉ́ nura Pedro ne ra Xuua bi da̱di ne bi 'ñena: ―¿Ha gue guí beñhʉ xá hño njabʉ ja rá thandi Ajua̱ gue go rí 'ñepi ga ø't'ahe ri pahahʉ que rá paha Ajua̱? 20Ngue'a̱ nuje hinda za to'o da hña̱gahe ga ma̱ñhe de nú'a̱ stá hanthe ne nú'a̱ stá øhe. 21Nu'bʉ́ nú'ʉ ya nda̱ hinte bi 'yø'tuabi ra Pedro ne ra Xuua, hønsɛ bi xipabi gue ya hinda sigui da zofo ya ja̱'i, nepʉ bi hyɛguitho. Himbi za te bi 'yø'tuabi ngue'a̱ mi tsu ya ja̱'i xa bø yá cuɛ, ngue'a̱ gatho ya ja̱'i xi mi xøcambeni Ajua̱ po rá ngue nú'a̱ ra 'ñøhø xqui ña̱ni. 22Ngue'a̱ nú'a̱ ra 'ñøhø xqui ña̱ni ya mi pɛ'tsa thogui ñote njɛya. 23Nu mi thɛgui ra apostol Pedro ne ra apostol Xuua bi ma bá c'a̱'tsa nú'ʉ ma'ra ya gamfri pa bi metuabi nú'a̱ xqui xipabi ya nda̱ gá macja̱ ne yá nda̱xjua nda̱ ya xodyo. 24Ha nu mi 'yøde ya gamfri, bi xøcambeni Ajua̱ co 'nadra mfeni ne bi 'ñena'ʉ: ―Ma zi Hmu'ihe, nu'i go gue'e grá Ajua̱ gá hoca mahets'i ne ra ximhai ne ra ndehe ne gatho nú'a̱ te ja. 25Ne nu'i po ra Ma̱ca Nda̱hi gá xipa ri 'bɛgo ra Davi da ma̱nga njaua: Ya ja̱'i bi munts'i pa bi 'ñʉ'ti'ʉ da 'yøt'a ya nts'o'mʉi, pe nú'a̱ ra nts'o'mʉi bi beñ'ʉ da 'yøt'e, hinda za da 'yøt'e. 26Bi munts'a ya nda̱ de gatho ya hnini de ra ximhai pa bi 'ñʉ'ti'ʉ da ʉtsa Ajua̱ ne ra Cristo nú'a̱ xa hñuts'i'a̱ pa da nda̱. 27Ngue'a̱ xi majua̱ni ja nuna hninina̱ bi munts'a ra nda̱ Erode ne ra Poncio Pilato co ya me Israel ne co nú'ʉ hingyá me Israel, pa bi ʉtsa nuri ma̱ca T'ʉ ra Jesu nú'a̱ xcuá pɛhni pa da nda̱. 28Ne bi 'yøt'e'ʉ ngu nú'a̱ gá beni ne gá ma̱nga maya'bʉ gue mahyoni da nja. 29Nubya ma zi Hmu'ihe, hyanda núna te øtcahe ya ja̱'i, ne faxcahe pa hinga ntsuhe ga ña̱he de ri ma̱ca noya, ngue'a̱ go dí pɛp'ahe. 30Ne nu'i go ma gui hñuxa ri 'yɛ ja ya da'thi pa da ña̱ni'ʉ ne da hyanda ya ja̱'i. Ne gui 'yøt'a ndunthi ya nt'udi ne ya da̱nga t'øt'e de rá thuhu ri ma̱ca T'ʉ ra Jesu. 31Ngu xi bi uadi'ʉ bi xøcambeni Ajua̱, bi hma̱nga ra ngu habʉ xqui munts'i'ʉ, ne gatho nú'ʉ mi 'bʉhni bi hña̱nga rá ts'ɛdi ra Ma̱ca Nda̱hi, ne bi ña̱ nts'ɛdi'ʉ de rá noya Ajua̱, ne ya hinto mi tsu. 32Y gatho nú'ʉ ya xqui gamfri Ajua̱ mi 'nada yá mfeni, ne mi 'nada yá hma̱te'ʉ. Ne mi mfax'ʉ 'na ngu ma'na nú'a̱ te mi ø'tua ra 'bɛdi, ngue'a̱ gatho nú'a̱ mi pɛ'tsi'ʉ mrá mɛti mahyɛgui, ne ni 'nara cu himi pɛ'tsa ni 'nara t'øt'e nú'a̱ mrá mɛtisɛ. 33Ne co ndunthi ra ts'ɛdi mi pɛ'tsa ya apostol bi damajua̱ni gue xqui yopa nte de ra du ma zi Hmuhʉ ra Jesu, ne Ajua̱ xi bi mats'i'ʉ. 34Ha ni 'na de gue'ʉ hinte mi ø'tua ra 'bɛdi, ngue'a̱ gatho nú'ʉ to'o mi pɛ'tsa yá hai ne yá ngu bá pa gatho, ne bá ha̱ gatho nú'a̱ ra boja̱ mi ha̱ni de yá hai ne de yá ngu, 35ne bi umbabi ya apostol. Y nuya apostol go gue'ʉ mi hecuabi cada 'nara gamfri ngu nú'a̱ te mi ø'tua ra 'bɛdi gue'a̱ mi t'umbabi nehe. 36Ne mi 'bʉhni 'nara cu mrá thuhu ra Jose mrá me Chipre mrá levita. Ne bi hñu'mbabi ya apostol dra Berhna, rí bøni da 'ñena Nú'a̱ To'o Hu'mba yá mʉi ya Ja̱'i. 37Nu'á̱ bi pa 'nará hai'a̱ ne bá ha̱ gatho ra boja̱ pa bi umbabi ya apostol.

will be added

X\