RA ECHO 27

1Y mi zø ra pa de nú'a̱ xqui benga ra nda̱ Festo pa da mɛncahe ja ra hai Italia, ra cu Pablo ne ma'ra ya 'yofadi bi t'ɛnt'ua yá 'yɛ 'nara nda̱ gá soldado mrá thuhu ra Julio nú'a̱ 'na de yá soldado ra nda̱ Augusto Cesa. Y núga drá Luca dá mɛ'be'ʉ. 2Y bi zixcahe 'nara da̱nga motsa xqui 'ñehe de ra hnini Adramitio, ne dá pøñhe de guehni Cesarea pa dá 'raxhe ja ra ndehe dí mahe pa ja ra hai Asia. Nehe drí 'ñohe ra cu Aristarco nura me Tesalonica 'nara hnini de ra hai Macedonia. 3Y rá hyax'a̱ dá tsøñhe ja ra hnini Sidó. Y nura Julio xi bi nhyoja̱'i co ra cu Pablo ne bi umba nsɛqui da ma dua c'a̱'tsa ya cu nú'ʉ mi 'bʉ de guehni, ne pa bá t'umbi nú'a̱ te mi honi. 4Nepʉ dá pøñhe de guehni Sidó dá thothe po ra lado mac'angui de ra hai Chipre nú'a̱ o madetho ra ndehe. Dá øthe njabʉ pa dá 'banpahe ra bʉnthi mi 'yo. 5Ne dá 'raxhe ja ra ndehe dá 'ranthe manjua̱ntho de ra hai Cilicia ne Panfilia, ne dá tsøñhe ja ra hnini Mira de ra hai Licia. 6De guehni ra nda̱ gá soldado ja bi zʉhni 'nara motsa mrá me Alejandría de ra hai Egipto mri ma pa ja ra hai Italia. Nu'bʉ́ dá jʉhe nú'a̱ ra motsa'a̱ pa dá thoguihe habʉ ndrá mahe. 7Ndunthi ya pa ndrí 'yohe 'ramats'ʉ ja ra ndehe, xi xmá hñei pa dá tsøñhe gueta Gnido. Nepʉ ngue'a̱ mi 'yo ndunthi ra bʉnthi himi hocaguihe ga 'yohe, hangue dá 'rañhe gueta ra hnini Salmón, dá 'bañhe po lado mac'angui de ra hai Creta o madetho ra ndehe. 8Xi dá 'yohe masque 'ramats'ʉ ngue'a̱ mi 'yo ndunthi ra bʉnthi himi hocje ga 'yohe xá hño. Y hingá 'me dá tsøñhe ja rá hyo ra ndehe habʉ xqui thu'mbabi Ya Hoga Gosthi gueta ra hnini Lasea. 9Ya xqui thogui ndunthi ya pa ndí 'yohe ja ra ndehe, y ya ma'na xi xmá nts'uni pa ga 'yohe ngue'a̱ ya mi ma da zøhø ya pa de ya tsɛ, ne gue'bʉ xi 'yo ndunthi ra bʉnthi. Hangue nura cu Pablo bi zofo gatho ya ja̱'i, 10ne bi 'ñembabi: ―Compahʉ, dí handi gue ma ga thohʉ ndunthi ya ts'othogui má 'ñu, da za da yʉi ra motsa con gatho nú'a̱ te di cʉ, ha nujʉ́ ga tuhʉ nehe. 11Pe nura nda̱ gá soldado himbi 'yø'tua ncaso ra cu Pablo, ma'na bi 'yøta nú'a̱ mi ma̱nga ra 'yɛt'amotsa ne nú'a̱ to'o mrá mɛti. 12Y ngue'a̱ xmá nts'uni da gohni ra motsa ja Ya Hoga Gosthi pa nú'ʉ ya pa'ʉ de ya tsɛ, hangue ndunthi nú'ʉ to'o mi pani bi beñ'ʉ gue ma'na xá hño da bøni de guehni pa xahma̱ xa zahma̱ xa zønga Fenice nú'a̱ ja ja ra lado yʉhyadi de ra xɛca hai Creta, pa ja xa 'mʉhma̱ni'ʉ nú'ʉ ya pa de ya tsɛ. 13Nepʉ bi mʉdi bi 'ño 'na tʉi ra nda̱hi nú'a̱ mri 'ñe ngue mac'angui, hangue bi beñ'ʉ gue xá hño da sigui da thogui pa habʉ mri ma'ʉ. Hangue dá pøñhe de guehni habʉ stí ntsayahe, ne dá 'bañhe gueta rá hyo ra hai Creta. 14Nepʉ hinga ya'a̱ bi zʉcje 'nara bʉnthi xi nts'ɛdi mbrí 'ñehe ngue mahuifi habʉ ndrá mahe. 15Nura bʉnthi'a̱ bi duxa ra motsa ngue'a̱ xi mi tsɛdi, ne himi tsa ga tsa̱mhe. Hangue dá hɛhe bi duts'i. 16Dá thothe gueta 'nara zi xɛca hai rá thuhu Clauda o madetho ra ndehe, ja ra lado habʉ hints'ʉ mi tsɛ ra bʉnthi. Nu'bʉ́ ja dá pø'tsheni ra t'ʉca motsa pa ja ra da̱nga motsa nú'a̱ mri gʉt'i, pe xi dá henbahe. 17Nepʉ de ya dá pø'tshe ra t'ʉca motsa, dá tha̱the co ya ntha̱hi nura da̱nga motsa ne xi dá dʉ'the pa hinda nhuati. Nepʉ nú'ʉ to'o mri 'yɛt'a ra motsa, mi tsu da pø'tsa pa ja ra 'bomu ja 'nara t'ʉca hai rá thuhu ra Sirte, hangue bi ja̱'ma ya dutu nú'ʉ xqui thuxa maña̱ de ra motsa pa da 'ño co ra nda̱hi, ne bi hopabi'ʉ da duxa ra nda̱hi. 18Ha nurá hyax'a̱ hinxqui tsayatho nú'a̱ ra bʉnthi xi mi tsɛdi, hangue nu'ʉ́ bi føta ja ra ndehe nú'ʉ te mri du ra motsa. 19Nepʉ nurá hñupa dá føthe nehe ja ra ndehe ma'ra ya t'øt'e nú'ʉ mi pɛpabi ra motsa. 20Bi thogui ndunthi ya pa hindá hanthe ra hyadi nixi ya tsø ngue'a̱ xi mi 'yo ndunthi ra bʉnthi, hangue ndí hu ma mʉihe gue ya ma stá tuhma̱he. 21Ya mi pɛ'tsa ndunthi ya pa hinte stí tsihe, hangue ra cu Pablo bi 'mai madetho de guecje ne bi 'ñena: ―Compahʉ, 'bʉ xcá 'yøhma̱hʉ nú'a̱ dá xi'ahʉ gue stá cohma̱hʉni Creta, nu'bʉ́ hinstá thohma̱hʉ núna dí thohʉ, ne hinxa 'mɛdihma̱ gatho nú'a̱ stá 'bɛhʉ. 22Pe nubyá, oguí tu ri mʉihʉ, ngue'a̱ ni 'na de guecjʉ hinga ma ga tuhʉ, masque ra motsa da nxɛni ne da yʉi nuua ja ra ndehe. 23Ngue'a̱ manxuui bi zocagui 'nara ɛnxɛ bá pɛnca Ajua̱ nú'a̱ to'o dí camfri ne dí pɛpabi. 24Y nú'a̱ ra ɛnxɛ'a̱ bi 'ñengagui: “Pablo, oguí tsu, ngue'a̱ mahyoni gui tsønga Nroma habʉ bí 'bʉ ra nda̱ Cesa, ne gui 'ba ja rá thandi'a̱, ne por gue'a'i Ajua̱ ma da ña̱nga de ra du núyʉ guí pɛuiua ja ra motsa.” 25Hangue compahʉ, nubya dí xi'ahʉ, oguí tu ri mʉihʉ, ngue'a̱ nuga dí camfri gue Ajua̱ da sujʉ, ngue'a̱ dí camfri gue ma da njabʉ ngu nú'a̱ bi xicagui rá ɛnxɛ'a̱. 26Nu'a̱ ma da nja, ma da 'yɛtc'ahʉ ra nda̱hi ne ma dí zogahʉ ja 'nara zi xɛca hai o mbo ra ndehe. 27Ne ya mi pɛ'tsa 'nɛt'ocʉt'a ndí 'yohe njabʉ co nú'a̱ ra bʉnthi, ndí 'yohe ja ra da̱nga ndehe nú'a̱ rá thuhu Adria, mi 'yɛtc'ahe ra nda̱hi pa habʉraza. Ne ngu made ra xuui nú'ʉ to'o mi ɛt'a ra motsa bi mʉdi bi unga nguɛnda gue ya mi ma ga tsøñhe ja 'nara hai. 28Nu'bʉ́ bi mʉdi bi 'yɛni hangu rá hñe ra dehe, y ya mi pɛ'tsa ntsøca 'natema'rɛt'a ne 'rato metro rá hñe. Nepʉ dá thohe má ts'ʉ de guehni pa ja ra hai, bi yopa 'yɛni ma'na'qui, y ya mi pɛ'tsa ntsøca 'natemayoto metro. 29Y co ra ntsu da mfant'ui ya do nura motsa, bi ja̱'ma goho ya bøja̱ de møte ra motsa asta habʉ bi zʉdi ra hai pa ya hints'ʉ bi ntihi nts'ɛdi, y gathoguihe ga nehma̱he ya xa hyats'i. 30Y nú'ʉ to'o mi ɛt'a ra motsa bi má̱mbi gue xahma̱ xa za xa 'bathma̱'ʉ, hangue nu'ʉ́ bi yopa ca̱'ma ra t'ʉca motsa ja ra ndehe mi ma̱ntho'ʉ gue pa xa 'yɛnt'a ma'ra ya bøja̱ ja rá ña̱xu ra motsa. 31Hangue nura cu Pablo 'bestho bi xipabi ra nda̱ gá soldado ne ma'ra ya soldado ne bi 'ñembabi: ―Nu'bʉ núyʉ da ga̱i de guecua ja ra motsa, nu'bʉ́ hinda za ga pøñhʉ de guecua. 32Nu'bʉ́ ya soldado bi da̱ma hyɛca ya ntha̱hi de ra t'ʉca motsa ne bi døgue bi ma. 33Nepʉ rá hyax'a̱ hamxuditho, ra cu Pablo bi xicje drí gathohe gue ga tsihe te ga tsihe, ne bi ba̱nteguihe bi 'ñenje: ―Nu'ahʉ, ya øt'a 'nɛt'ocʉt'a hinte xcá a̱hʉ ne hinte xcá tsihʉ. 34Dí ba̱nte'ihʉ gui tsihʉ te gui tsihʉ, ngue'a̱ guehna mahyoni pa njabʉ da nja ri ts'ɛdihʉ, ngue'a̱ dí pa̱di gue ni 'na de gue'ahʉ hingui ma gui tuhʉ. 35De mi ma̱nga njabʉ ra cu Pablo bi gʉ 'nara thuhme ne bi umba njama̱di Ajua̱ ja yá thandi'ʉ. Nepʉ bi heque, ne bi mʉdi bi zi'a̱. 36Nepʉ gathoguihe xi bi hñu ma mʉihe, ne dá ñunihe nehe. 37Y núje ndí pahe ja ra motsa, ndí tsøxhe yo nthebe ne hñu'rate ne 'rɛt'ama'rato. 38Y ya de dá juahe dá ñuñhe ne dá niña̱he, nú'a̱ ra trigo bi bongui dá føthe mbo ra ndehe pa ma'na ya hinxmá hñʉ nú'a̱ mri du ra motsa. 39Nepʉ de ya bi hyats'i, nú'ʉ to'o mri 'yɛt'a ra motsa bi hyandi gue ya ma da zønga ja ra hai pe himi pa̱di te ma hai'a̱. Ne bi hyanda 'nara luga ngu ra gosthi mbo ra zi xɛca hai habʉ mri hnequi 'na xɛni ra 'bomu guetbʉ rá hyo ra ndehe. Ne nu'ʉ́ bi beni xahma̱ da za da zønga ra motsa asta habʉ mi ja ra 'bomu. 40Bi hyɛca ya ntha̱hi nú'ʉ mi tha̱t'a ya bøja̱ nú'ʉ mri gʉt'a mbo ja ra dehe. Nehe bi xo'tua yá ntha̱hi nú'ʉ ya za dega nt'ɛt'a motsa. Nepʉ bi pø'tsa ya dutu pa da daca ra nda̱hi ja rá ña̱xu ra motsa. Nepʉ ra motsa bi 'yent'a ra nda̱hi gá ma ja rá hyo ra hai. 41Pe bi zønga habʉ mi ja yoho yá ts'ɛdi ra dehe, nepʉ bi 'yent'a ra motsa pa ja ra 'bomu. Ha nurá ña̱xu ra motsa xi bi yʉ ja ra 'bomu, hangue ya himbi za bi 'ño. Ha nu de rí møte bi mʉdi bi nxɛni co rá ts'ɛdi ra dehe. 42Nura ora'a̱ ya soldado mi ne xa hyo gatho ya 'yofadi pa hinda 'ba'tuabi'ʉ dega ncʉnthe. 43Pe nura nda̱ gá soldado bi hña̱cuabi'ʉ pa hinda hyo, ngue'a̱ nu'á̱ mi ne da ña̱nga ra cu Pablo. Nepʉ nu'á̱ bi 'bɛpabi gue da mføte rá mʉdi pa ja ra dehe nú'ʉ to'o mi pa̱ da 'raxa ja ra dehe dega nsaha, pa da zønga asta ja ra hai. 44Ha nu'ʉ ma'ra nú'ʉ to'o himi pa̱ da 'raxa ja ra dehe dega nsaha, bi 'bɛpabi da gʉ 'ra 'na xɛni ra za nú'ʉ xqui xø'tsa ra dehe de ja ra motsa. Y njabʉ ha̱, bi za bi zønga gatho'ʉ ja ra hai.

will be added

X\