RA ECHO 25

1Ha nu mi zønga ra Festo nuni Cesarea pa da 'mʉi dega nda̱, rá hñupa'a̱ bi ma pa Jerusale. 2Ne de guehni nuya nda̱ gá macja̱ ne ma'ra ya nda̱ gá xodyo bi ma bá c'a̱'tsi pa bi xipabi nú'a̱ xqui 'yøt'a ra cu Pablo. 3Y nu'ʉ́ bi 'yapa ra favo gue da manda da ts'i ra cu Pablo pa Jerusale, ngue'a̱ nu'ʉ́ bi benga ma'na'qui xa daca ja ra 'ñu pa xa hyo. 4Pe nura Festo bi da̱tuabi'ʉ ne bi xipi gue nura Pablo ja da gotritho ja ra fadi Cesarea, cabʉ nu'á̱ 'bestho mi ma da mengui pa guehni. 5Ne bi 'ñembabi'ʉ: ―Dí xi'ahʉ 'bʉ 'ra de gue'ahʉ guí ne ga maha, maha pa ja grí xicjʉni 'bʉ te xa 'yøt'a nú'a̱ ra 'ñøhø'a̱. 6Ra Festo bi 'mʉ Jerusale hønsɛ ngu hña̱to ma pa o 'rɛt'a ma pa, ne bi menga pa Cesarea. Ne rá hyax'a̱ bi gʉ rá hudi ne bi manda da ts'i'tsua ra cu Pablo. 7Nepʉ de mi yʉt'a ra cu Pablo de habʉ mi hudi ra nda̱, nuya xodyo xqui 'ñehe de Jerusale bi 'yøt'a 'nara nthets'i habʉ mi 'bai'a̱, ne bi ña̱pabi de ndunthi ya nthøsthai, pe hinte bi ts'ʉtuabi'a̱. 8Ha nura cu Pablo bi mʉdi bi da̱di ne bi 'ñena: ―Nuga hinstá ts'ocuabi yá ley nuyʉ ma cu ya xodyo, nixi stá ts'onga ma nija̱he, nixi hinte stá ts'ocuabi ra Cesa nú'a̱ ma nda̱hʉ Nroma. 9Pe nura Festo mi ne da gohi xá hño co ya xodyo, hangue bi 'yambabi ra cu Pablo ne bi 'ñembabi: ―¿Ha guí ne ga maha pa Jerusale pa ja grá xʉc'ani ra uɛnda de nú'a̱ xcá 'yøt'e? 10Nu'bʉ́ nura cu Pablo bi da̱di ne bi 'ñena: ―Pøde hina, ngue'a̱ dí 'bʉcua ja rá thandi ra ts'ʉtbi de ma nda̱hʉ Nroma, ne ja guecua mahyoni ga nhyanthya̱'be núyʉ to'o ña̱pqui. Y ngu guí pa̱di gue nuga hinte stá ts'ocua ma mixodyo'be. 11Nu'bʉ stá øt'a 'nara da̱nga ts'ocate ne rí 'ñepcagui da thogagui, da za. Nuga hindí tsu ma du. Pe nu'bʉ hinga majua̱ni de nú'a̱ ña̱pcaguiyʉ, ni 'na hingui pɛ'tsa ra nsɛqui da 'yɛntc'a ja yá 'yɛ ya xodyo. Nuga dí adi gue numa da̱nga nda̱hʉ ra Cesa de Nroma go gue'a̱ da hña̱bga nguɛnda ua xi stá øt'a 'nara ts'ocate ua hina. 12Nu'bʉ́ nura Festo bi ña̱ui rayá mfats'i, nepʉ bi 'ñembabi ra cu Pablo: ―Nu'i xcá 'yadi gue ma dí hña̱p'a nguɛnda ra nda̱ Cesa de Nroma de nú'a̱ xcá 'yøt'e, hangue nubyá ma gui ma pa guehni. 13Nepʉ de ya xqui thogui 'raya pa, ma'na ra nda̱ rá thuhu Agripa bi mɛui rá 'bɛhña̱ nú'a̱ mrá thuhu ra Berenice, ne bi ma pa Cesarea pa bá zɛngua ra nda̱ Festo. 14Ne bá 'bʉ de guehni ndunthi ya pa. Y nura Festo bi metuabi ra nda̱ Agripa de ra cu Pablo, ne bi 'ñembabi: ―Nuua jot'a ja ra fadi 'nara 'ñøhø bi zogui ra Feli. 15De duá 'bʉhni Jerusale 'raya nda̱ gá macja̱ ne 'rayá nda̱xjua nda̱ ya xodyo bi ma bí ña̱te'ʉ ne bi xicagui te xqui 'yøt'a̱, ne mi adi'ʉ gue stá manda xa tho. 16Pe nuga dá embabi'ʉ gue ra ts'ʉtbi de Nroma hingrá nza̱i da hyo 'nara ja̱'i 'bʉ hinxa nhyanthya̱thoui nú'a̱ to'o xa ña̱pabi. 17Hangue ngu dá tsøheua nú'ʉ ya 'ñøhø de Jerusale, rá hyax'a̱ dá hudi ja ma hudi, ne dá manda dua ts'i nú'a̱ ra 'ñøhø. 18Pe nú'ʉ to'o mi ña̱pabi hinte bi ma̱ de gue nú'a̱ ndí beni. Ngue'a̱ nuga ndí beni gue nu'á̱ mi ts'oca ma leyhʉ de Nroma. 19Pe hina, hønsɛ nu'a̱ mi ña̱te'ʉ, por nuyá jamfri pɛ'tsasɛ'ʉ, ne bi ma̱ de 'nara 'ñøhø rá thuhu ra Jesu ma̱ñ'ʉ gue xa du, pe nura Pablo ena gue bi yopa nte 'na̱. 20Ha nuga hinduí pa̱dihma̱ te ga øt'e con gue'ʉ, hangue dá ambabi ra Pablo 'bʉ mi nehma̱ xa ma pa Jerusale pa ja xuá tha̱'mbani nguɛnda de nú'a̱ mi hña̱pabi. 21Pe nu'á̱ bi 'yadi gue go da hña̱'mba nguɛnda ma nda̱hʉ ra Augusto Cesa, hangue dá manda da gohitho ja ra fadi asta hinga pɛhna ja ma nda̱hʉ Nroma. 22Nepʉ ra nda̱ Agripa bi 'ñembabi ra Festo: ―Nequi dí ne ga øde te rá 'bɛ'a̱ ma̱nga nú'a̱ ra 'ñøhø'a̱. Nu'bʉ́ ra Festo bi 'ñembabi: ―Nu'bʉ́ 'bestho rixudi ma gui 'yøde te 'bɛ da ma̱. 23Hangue nurá hyax'a̱ ra Agripa ne ra Berenice bi zøhø bi yʉt'a co ndunthi ra nsu ja ra ts'ʉtbi, nehe mi 'ñoui ma'ra ya nda̱ de ra hnini ne ya nda̱ gá soldado. Nepʉ ra Festo bi manda da ts'i'tsua ra cu Pablo. 24Nepʉ bi 'ñena: ―Ma nda̱'ihe Agripa, ne gatho'ihʉ guí 'bʉhʉua con guecje, xi 'bʉcua nuna ra 'ñøhø xi xa ña̱ma'ñʉ ya xodyo de guehni nuni Jerusale ne de guecua Cesarea, ne hingui tsaya xicagui'ʉ gue mahyoni ga manda da tho. 25Pe nuga hinstá tsʉtuabini ni 'nara ts'oqui pa da za ga manda da tho. Y nuni xa 'yadisɛ gue da ma pa nuni ja ma nda̱hʉ Augusto Cesa pa go da hña̱'mbasɛ ra uɛnda, hangue stá beni ma'na xá hño ga pɛmpabi'a̱. 26Ha nuga hindí pa̱di te ma noya ga ofo pa ga pɛmpa ma nda̱hʉ Nroma, hangue stuá tsin'a ja ri thandi, ma nda̱'ihe Agripa, ne ja ri thandihʉ gatho nú'ahʉ guí 'bʉhʉua, pa gui 'yamfʉ ts'ʉ te xa 'yøt'e pa gui xicaguihʉ te ma noya da za ga pɛmpabi ma nda̱hʉ. 27Ngue'a̱ nuga dí beni gue hindí 'ñepi ga pɛhna 'nara ts'a̱hni ja ma nda̱hʉ Cesa 'bʉ hindí pɛhna ra noya hanja xa hña̱pabi.

will be added

X\