RA ECHO 24

1De ya mi pɛ'tsa cʉt'a ma pa mi 'bʉhni ra cu Pablo nuni Cesarea, bi zønga ra da̱nga nda̱ gá macja̱ nú'a̱ mrá thuhu ra Ananía co 'rayá nda̱xjua nda̱ ya xodyo, ne mi 'ñoui'ʉ 'nara pønjya̱ mrá thuhu ra Tértulo, bi zøñ'ʉ pa da ña̱pa ra cu Pablo ja ra nda̱ Feli. 2Nepʉ bá ts'i ra cu Pablo pa bi nja ra nthanthya̱ ja rá thandi ra Feli, y ra Tértulo bi mʉdi bi ña̱te ne bi 'ñembabi ra Feli: ―Dí jama̱di'ihe, ma hoga nda̱'ihe, ngue'a̱ stá pɛ'tshe 'nara hoga'mʉi ne hinto stá ntuñhe. Po ri da̱nga mfats'igue xa 'mʉi xá hño ma hninihe. 3Gatho nuya ya hño xcá 'yøt'e de guecua ne habʉraza, guehna 'nara da̱nga jama̱di dí 'ra'ahe, nú'i ma zi hoga nda̱'i Feli. 4Pe pa hinga ha̱c'ahe ri 'bɛfi, dí ba̱nte'ihe gui øtca ra favo gui hñuxa nt'øde 'na zi ora de núna ma ga xi'ahe. 5Nuje stá hanthe gue nuna 'ñøhøni gue nuyá noya ma̱ 'ñena 'nara hñeni teste, ne xa 'ño habʉraza xa heca ya xodyo, ne dí pa̱he gue go guehni 'nara nda̱ de nú'a̱ ra hmunts'i rá thuhu nasareno. 6Nuní mi ne xa ts'onga ma nija̱he ngue'a̱ ya mi tsixa 'raya ja̱'i hingyá xodyo. Hangue nuje dá jʉhe ne ndí ne stá nhyanthya̱he con gue'a̱ ngu nú'a̱ ma̱nga ma leyhe. 7Pe nura da̱nga nda̱ gá soldado rá thuhu ra Lisia bi yʉt'a madetho de guecje, ne bi ja bi zingahe nuna ra 'ñøhø. 8Nepʉ nu'á̱ bi ma̱ gue nú'ʉ to'o mi ne da ña̱pa nuna ra 'ñøhø gue da 'ñehe pa guecua pa da e da ngaste con gue'e. Nu'i go da za gui 'yambasɛ pa gui pa̱di hanja dí ña̱phe. 9Gatho nú'ʉ ya xodyo mi 'bʉhni mi eñ'ʉ gue xi majua̱ni nú'a̱ mi ma̱nga ra Tértulo. 10Nepʉ nura Feli bi 'ñutua ra seña ra cu Pablo gue da ña̱, hangue nura cu Pablo bi mʉdi bi ña̱ ne bi 'ñena: ―Con gatho ra paha ma ga ma̱ ja ri thandi nú'a̱ te stá øt'e, ngue'a̱ dí pa̱di gue ya øt'a ndunthi ya jɛya grá nda̱ de nuna hninina̱. 11Da za gui 'ñani pa gui pa̱di gue nuga ja øt'a 'rɛt'amayoho ma pa dá tsønga de guehni Jerusale pa ga xøcambeni Ajua̱. 12Ne hinto xa zʉcagui to'o dí ntsanoya'be nixi to'o xa zʉqui dí ʉ'ta ya ja̱'i ja ra nda̱nija̱, nixi ja ma'ra ya nija̱, nixi ja ra hnini. 13Nuyʉ ya ja̱'i hingui tsa da xitca ma hmi de nú'a̱ te gra ña̱pcagui. 14Nuga ma xi ga xi'a'i nú'a̱ majua̱ni. Nuga dí pɛpabi nu Ajua̱ nú'a̱ mi pɛpa ndu ma dada, ne drí dɛna 'nara 'ra'yo jamfri nú'a̱ ma̱nyʉ gue hinga majua̱ni. Pe nehe nuga dí camfri gatho nú'a̱ xa t'ofo ja rá ley ra Moise, ne nú'a̱ bi 'yofo ma'ra yá 'mɛhni Ajua̱. 15Nuga dí camfri nehe ngu camfriyʉ gue Ajua̱ da 'yøt'e pa da yopa nte nú'ʉ xa du, ngu ya hoja̱'i ngu ya ts'o'mʉi. 16Hangue nza̱ntho stá øt'a ra ts'ɛdi ga 'bʉi xá hño co 'nara hoga mfeni ja rá thandi Ajua̱ ne ja yá thandi ya ja̱'i. 17Øt'a 'raya jɛya ndí 'yo ja ma'ra ya hai, ne duá yopa penga nuua ma hai pa ga umba 'nara mfats'i ya hyoya ne ga unga ma hña̱'ti. 18Guehna ndí øt'a ja ra nda̱nija̱ ha bi zø 'raya xodyo ya me Asia, ne ja bi zʉcni ya stí nxʉqui ngu yá nza̱i ma ja̱'ihe, hingue bi zʉcni co 'nara hmuntsja̱'i ndí ʉ'ti pa da ñʉnts'i. 19'Bʉ nú'ʉ ya xodyo me Asia xa zʉcagui gra øt'a 'nara ts'ocate, nu'bʉ́ go guehma̱'ʉ di ña̱pcagui, hingo nuyʉ. 20Dá ma̱nga núyʉ ua bi zʉtca 'nara ts'ocate nú'bʉ dá 'ba ja yá thandiyʉ ne ja yá thandi ma'ra ya nda̱ de ra hmunts'a nda̱ gá xodyo. 21Hønsɛ nu'a̱ dá ma̱ ja yá thandiyʉ dá ena njaua: “Nubya xcá ña̱pcaguihʉ hønsɛ ngue'a̱ dí camfri gue ma da yopa nte nú'ʉ xa du.” 22Ra Feli ya mi pa̱di xá hño de yá jamfri nú'ʉ to'o xqui gamfri ra Zidada Jesucristo. Y nu'á̱ bi zoguitho njabʉ de nú'a̱ mi ma̱ñ'ʉ, ne bi 'ñena: ―Nu sta zøhø ra da̱nga nda̱ gá soldado ra Lisia gue'bʉ ma ga yopa øthʉ ra nthanthya̱ pa ga pa̱di xá hño de nú'a̱ guí ma̱ñhʉ. 23Nepʉ ra Feli bi 'bɛpabi 'nara nda̱ gá soldado gue da su ra cu Pablo mbo ra fadi, ne da umba nsɛqui nú'ʉ yá ja̱'i'a̱ da c'a̱'tsi ne da umbi nú'a̱ te da hyoñ'a̱. 24Nepʉ ya xqui tho 'raya pa, bi yopa zøhø ra nda̱ Feli mri 'ñoui rá 'bɛhña̱ mrá thuhu ra Drusila ne mrá xodyo. Y ra Feli bi manda bi ts'i'tsua ra cu Pablo pa bi 'yøde'ʉ bi ña̱ de rá noya ra Zidada Jesucristo. 25Pe nu mi mʉdi bi ma̱nga ra cu Pablo nda'a̱ ri ho Ajua̱ ga øthʉ ne ga nsuhʉ pa hinga øthʉ ya ts'oqui, ne ma̱nga Ajua̱ gue ma da hña̱'mba nguɛnda ya ja̱'i de rá nga̱ts'i ra pa, nu'bʉ́ nura ora'a̱ ra Feli bi ntsu, ne bi 'ñembabi: ―Grí mahma̱, ne nu sta 'ñotho ma 'bɛfi ga yopa zo'a'i pa da za ga ña̱hʉ xá hño. 26Mi hu rá mʉi ra Feli gue ra cu Pablo mi ma da umba ra boja̱ pa da hyɛgui, hangue ja guetbʉ mi zohni pa mi ña̱ui. 27Rá yo njɛya bi bønga ra Feli dega nda̱, ne go bi gohi ra Porcio Festo. Nura Feli hinhya'mʉ bi hyɛgui ra cu Pablo ngue'a̱ mi ne da gohi xá hño co ya xodyo.

will be added

X\