RA ECHO 21

1Dá 'ueguehe de ya cu dá mahe co ra motsa manjua̱ntho asta ja 'nara zi xɛca hai rá thuhu Cos bí o madetho ra ndehe. Nepʉ rá hyax'a̱ dá thohe ja ma'na ra hai rá thuhu Roda bí o madetho ra ndehe nehe. Ne de guehni dí mahe ja 'nara hnini rá thuhu Patara bí ja ja rá hyo ra ndehe. 2Nepʉ de guehni Patara dá tsʉhe 'nara motsa mri ma pa Finicia dá mahe con gue'a̱. 3Ha nu de ndí pahe ja ra ndehe dá hanthe ra hai Chipre mi ja lado nga̱ha̱, ne dá siguihe asta dá tsøñhe Siria, ngue'a̱ nú'a̱ ra motsa ndrí 'ñohe mi ma da zogui nú'a̱ mri ndude ja ra hnini Tiro nú'a̱ bí ja ja rá hyo ra ndehe, ja dá ca̱heni. 4Ne ma dá tsʉheni ya gamfri, ne dá 'bʉheni yoto ma pa con gue'ʉ. Ha nu'ʉ́ bi xipa ra cu Pablo gue hinda ma pa Jerusale ngue'a̱ ra Ma̱ca Nda̱hi xqui xipi'ʉ te ma da thoguini. 5Pe nu mi uadi nú'ʉ yoto ma pa, dá mahe con gatho ya gamfri, ya 'bɛhña̱ ne ya ba̱tsi, dá pøñhe de ra hnini pa bi nexcahe ja ra motsa, ne dá ndandiña̱hmuhe gatho ja ra ñanthe pa dá apabihe Ajua̱. 6Nepʉ dá edihe ya cu dá nhyʉfihe 'na ngu 'na, ne dá pøxhe ja ra motsa dá mahe. Ha nu'ʉ́ bi menga ja yá ngu. 7De guehni Tiro dí mahe ja ra hnini Tolemaida. Ja dá zɛnguaheni ya cu, y dá 'bʉheni 'na pa con gue'ʉ. 8Nepʉ rá hyax'a̱ dá thohe pa dí mahe ja ra hnini Cesarea. Y ja mi 'bʉhni ra cu Lipe nú'a̱ mi ma̱mba rá noya Ajua̱ ne mi 'na de gue nú'ʉ yoto ya nda̱ de ra nija̱, hangue ja dá ma dá oxheni ja rá ngu. 9Nú'a̱ ra cu Lipe mi pɛ'tsa goho yá t'ixu, y nu'ʉ́ hinxqui ntha̱ti, y mi ña̱ co rá ts'ɛdi ra Ma̱ca Nda̱hi. 10Ne dá 'bʉheni 'raya pa, ne bi zøhø 'nará 'mɛhni Ajua̱ mrá thuhu ra Agabo xqui 'ñehe de Judea. 11Bá ehe pa e da c'a̱scahe, ne bi hña̱mba rá ngʉt'i ra cu Pablo, nepʉ con gue'a̱ bi du'tasɛ yá ua ne yá 'yɛ, ne bi 'ñena njaua: ―Rá Ma̱ca Nda̱hi Ajua̱ ena gue ya xodyo de guehni Jerusale ma da du'ta njaua nú'a̱ to'o rá mɛti nuna ngʉt'ina̱, ne da 'yɛnt'ua ja yá 'yɛ ya ja̱'i nú'ʉ hingyá xodyo. 12Nu ndá øhe njabʉ nuje ne ya cu de guehni Cesarea dá ba̱ntebihe ra cu Pablo gue hinda ma Jerusale. 13Nepʉ nura cu Pablo bi da̱di ne bi 'ñena: ―¿Pa te guí zoñhʉ? Hønsɛ guí jacjʉ da du ma mʉi nehe. Nuga ya dí 'bʉi pa da thogagui de guehni Jerusale po rá thuhu ma zi Hmu Jesu, y hingue hønsɛ pa dra thu'tcagui. 14Pe himbi za dá ha̱cuahe ra cu Pablo pa da ma de guehni, ne ya hinte dá ma̱ñhe, hønsɛ dá embabihe: ―Nu'bʉ́ dá t'øt'a ngu nú'a̱ rá paha ma zi Hmuhʉ. 15Ne de gue'a̱ dá hñocje dá mahe pa Jerusale. 16Ne bi dɛngahe 'raya cu de guehni Cesarea, y 'na de gue'ʉ mrá thuhu ra Nasó mrá me Chipre, ya mi pɛ'tsa ndunthi ya jɛya xqui gamfri ra Zidada Jesu. Y mi ja rá ngu nuni Jerusale hangue bi zixcahe pa duá 'bʉheni con gue'a̱. 17Y nu ndá tsøñhe Jerusale ya cu de guehni bi 'racje 'nara hoga 'ñehe. 18Ha nurá hyax'a̱ ra cu Pablo bi ma con guecje pa dá c'a̱'tshe ra cu Cobo, ne ja mi 'bʉhni gatho ma'ra ya da̱nga cu de ra nija̱. 19Nura cu Pablo bi zɛngua'ʉ, ne bi metuabi gatho nú'a̱ xqui 'yøt'e co rá ts'ɛdi Ajua̱ pa bi gamfri nú'ʉ ya ja̱'i hingyá xodyo. 20Y nu mi 'yøde njabʉ'ʉ, bi xøcambeni Ajua̱, ne bi 'ñemba ra cu Pablo: ―Nde'bʉ zi cu, pe ya guí pa̱di gue ya 'motho de ma mixodyohʉ ya xa gamfri ra Zidada Jesu, pe nu'ʉ́ ma̱ gue mahyoni da t'øt'e ngu nú'a̱ ma̱nga rá ley ra Moise. 21Ne xa sipabi'ʉ gue nú'i guí utuabi nú'ʉ ma'ra ma mixodyohʉ bí 'bʉ ja ma'ra ya hai gue hinda 'yøt'a ngu nú'a̱ ma̱nga rá ley ra Moise. Nehe nu'ʉ́ ena gue xcá xipabi'ʉ gue hinda hñu'tsua nú'a̱ ra seña yá ba̱tsi, ne hinda 'yøt'a ngu nú'ʉ ma nza̱ihʉ. 22Xibya, ¿te ga øthʉ? Ngue'a̱ nu sta ba̱di ya ja̱'i gue guí 'bʉcua ma da munts'i gatho'ʉ. 23Hangue ma'na xá hño 'yøt'a núna ma ga xi'ahe: De guecjʉua 'bʉcua goho ya cu mahyoni da 'yøt'a 'nara hña̱'ti bi ña̱'tuabi Ajua̱. 24Tsits'i rí mɛ ua nxʉqui con guehyʉ ngu yá nza̱i ma mixodyohʉ, ne ju'tuabi yá gasto. Nepʉ nu'ʉ́ da za da 'ña̱xi. Y njabʉ ha̱, da ba̱di gatho ma mixodyohʉ gue hinga majua̱ni nú'a̱ xa sipabi'ʉ gue go xcá manda njabʉ. Y njabʉ da ba̱di'ʉ gue ne'i guí øt'e ngu nú'a̱ ma̱nga rá ley ra Moise. 25Pe nú'ʉ ya gamfri hingyá xodyo, ya stá opabihe gue hinga mahyoni da 'yøt'e ngu ma nza̱ihʉ, hønsɛ gue nu'a̱ mahyoni da 'yøt'e, hinda zi ra ngø nú'a̱ xa hña̱'tua ya c'oi, nixi yá ji ya mbo'oni, nixi nú'ʉ ya mbo'oni xa hmi'tua yá 'yʉga hinxa 'bømba yá ji, ne ni 'na de gue'ʉ hinda hñuxui 'nara 'bɛhña̱ nú'a̱ hingue xi rá 'bɛhña̱. 26Nu'bʉ́ rá hyax'a̱ ra cu Pablo bi zixa nú'ʉ goho ya cu pa dua nxʉca mahyɛgui con gue'a̱ ngu yá nza̱i ya xodyo. Ne 'mɛfa bi yʉt'a ja ra nda̱nija̱ pa bi unga nt'øde ha'mʉ da ua yá pa de ra nsʉqui, ne ha'mʉ da dat'a ra pa da unga yá hña̱'ti nú'ʉ ya cu'ʉ. 27Pe ya mi ma da uadi nú'ʉ yoto ma pa de ra nsʉqui, 'raya xodyo me Asia bi hyanda ra cu Pablo gue mi o mbo ra nda̱nija̱. Nepʉ nu'ʉ́ bi 'yʉ'ta ya ja̱'i pa bi japi bi ñʉnts'i, nepʉ bi gʉ ra cu Pablo. 28Ne nu'ʉ́ xi mi mafi mi ena: ―¡Nú'ahʉ gyá me Israelhʉ, faxcaheua! Nuna guehna ra 'ñøhø 'yo habʉraza ʉ'ta ya ja̱'i da ña̱ma'ñʉ de ma hninihʉ ne de ma leyhʉ ne de ma nija̱hʉ. Ha nubyá xa cʉ'ta 'raya me Grecia ja ma nija̱hʉ, núyʉ hindi 'ñepi da yʉt'i, y hønsɛ ri ts'onga ma ma̱ca nija̱hʉ. 29Mi ma̱nga njabʉ'ʉ ngue'a̱ xqui hyandi'ʉ ra cu Pablo ja ra hnini mri 'ñoui ra cu Trofimo ra me Efeso. Ha nu'ʉ́ mi hu yá mʉi gue go gue'a̱ xqui zixa ra cu Pablo ja ra nija̱. 30Hangue gatho ra hnini bi njʉts'i, ne gatho mri nest'ihi'ʉ habʉraza mbrí 'ñehe. Nepʉ bi gʉ ra cu Pablo ne bi gʉt'i pa bi pøni de ra nija̱, ne 'bestho bi jot'a ya gosthi nija̱. 31Ne nu'ʉ́ mi 'ramanu pa xa da̱ma hyo. Pe bi 'yøde ra da̱nga nda̱ gá soldado gue gatho ra hnini de Jerusale xqui njʉts'i. 32Hangue nú'á̱ bi munts'a gatho yá soldado ne ma'ra ya nda̱ gá soldado, ne bi ma hnest'ihi pa habʉ xqui munts'a ya ja̱'i. Nepʉ ngu mi hyanda ya ja̱'i ra da̱nga nda̱ gá soldado bi zøni mi zi yá soldado, ra ora'a̱ ya himbi sigui bi na'mba ra cu Pablo. 33Hangue nura da̱nga nda̱ gá soldado bi gʉ nts'a̱hni ra cu Pablo ne bi manda dra tha̱t'i co yoho ya cadena, nepʉ 'mɛfa bi 'ñani to'o mi gue'a̱ ne te xqui 'yøt'e. 34Nu'bʉ́ nuya ja̱'i xi mi thø ya hmafi ne 'rama'na'ño mi ma̱ñ'ʉ, hangue njabʉ himbi za bi ba̱di ra da̱nga nda̱ gá soldado de nú'a̱ xqui nja ngue'a̱ mi mantho'ʉ. Hangue ma'na xá hño bi manda da ts'ixa ra cu Pablo asta ja ra cuarte. 35Ha nu mi zøni ja ra 'rendo de ra cuarte ya soldado bi ndudetho ra cu Pablo ngue'a̱ xi mi ne da na'mbabi ya ja̱'i. 36Ngue'a̱ gatho ya ja̱'i mri 'bɛfa mi mantho mi ena: ―¡Dá tho nura 'ñøhø'a̱! 37Ne de mi ma da jʉ'ta mbo ra cuarte, ra cu Pablo bi 'ñemba ra da̱nga nda̱ gá soldado: ―¿Ha hingui 'raca nsɛqui ga ña̱ ts'ʉ? Ha nura da̱nga nda̱ gá soldado bi 'ñembabi: ―A, xi guí pa̱di gui ña̱ dega griego. 38Nu'bʉ́ hingo gue'a'i grá me Egipto nú'a̱ to'o bi 'yøt'a 'nara tuhni ya pɛ'tsa ya pa, ne bi zixa ja ra mbonthi nú'ʉ goho 'mo ya 'yøt'atuhni. 39Nepʉ nura cu Pablo bi da̱di ne bi 'ñembabi: ―Hina. Nugá drá xodyo, drá me Tarso nú'a̱ ra da̱nga hnini de ra hai Cilicia. Ne dí ba̱nte'ibya gui 'raca nsɛqui ga zofo nuyʉ ya ja̱'i 'bahni. 40Nepʉ nú'a̱ ra da̱nga nda̱ gá soldado bi umba nsɛqui da ña̱. Nu'bʉ́ ra cu Pablo bi 'mai ja ra 'rendo ne bi 'ñutua ra seña ya ja̱'i co rá 'yɛ pa da go'ta yá ne, ne ya hinto bi ña̱. Ha nura cu Pablo bi ña̱ dega ebreo ne bi 'ñembabi'ʉ:

will be added

X\