RA ECHO 19

1Nura cu Apolo mi 'bʉhni Corinto, ha nura cu Pablo mbi 'yo ra 'ñu pa mri ma Efeso, bi 'ranga ja 'raya t'øhø xi myá mboza, ne de gue'a̱ bi zønga Efeso habʉ mi 'bʉi 'raya gamfri. 2Nepʉ nu'á̱ bi 'yambabi'ʉ ne bi 'ñembabi: ―¿Ha gue gá hña̱ñhʉ ra Ma̱ca Nda̱hi núbya gá camfrihʉ rá noya Ajua̱? Nu'ʉ́ bi da̱di ne bi 'ñena: ―Hina, nixi stá øhe ua 'bʉ ra Ma̱ca Nda̱hi. 3Hangue nura cu Pablo bi 'yambabi ne bi 'ñembabi: ―¿Te ma sistehe xcá hña̱ñhʉ 'bʉ? Ne nu'ʉ́ bi da̱di ne bi 'ñena: ―Rá sistehe ra Xuua. 4Ra cu Pablo bi 'ñembabi'ʉ: ―Nura Xuua mi xi'tsa ya ja̱'i ngue'a̱ gue'a̱ ngu 'nara seña gue nuya ja̱'i'ʉ ya xqui ñobri de yá ts'oqui. Pe bi xipabi'ʉ nehe gue mahyoni da gamfri nú'a̱ mi ma da zøhø 'mɛfa de gue'a̱, go gue'a̱ ra Jesu nú'a̱ to'o ra Cristo nú'a̱ bá pɛhna Ajua̱ pa da nda̱. 5Ha nu mi 'yøde njabʉ bi nxistehe'ʉ de rá thuhu ra Zidada Jesu. 6Nepʉ ra cu Pablo bi hñuxa yá 'yɛ ja gatho ya gamfri pa bi hña̱nga ra Ma̱ca Nda̱hi. Y nura ora'a̱ bi ña̱'ʉ 'rama'na'ño ya hña̱qui ne bi ma̱ñ'ʉ ngu nú'a̱ xqui xipabi Ajua̱ da ma̱. 7Ngu mi 'rɛt'amayoho por gatho nú'ʉ xqui hña̱nga ra Ma̱ca Nda̱hi. 8Ngu hñu nza̱na̱ ra cu Pablo bi ma ja yá nija̱ ya xodyo habʉ mbi ma̱mba rá noya Ajua̱ co ndunthi ra ts'ɛdi. Nu'á̱ mi ntsanoyaui ya ja̱'i ne mi øt'a 'nara ts'ɛdi pa da gamfri'ʉ nú'a̱ mi xipabi hanja go ri manda Ajua̱. 9Pe 'ra de gue'ʉ xi xmá me yá coraso hangue himbi ne bi gamfri, hønsɛ mi tsanba rá noya Ajua̱ ja yá thandi ya ja̱'i. Hangue nura cu Pablo bi 'uegue de gue'ʉ, ne bi zixa nú'ʉ xqui gamfri ja 'nara scuela, ne nura xahnate mi 'bʉhni rá thuhu ra Tiranno. Y ja guehni ra cu Pablo mbi ma̱mba rá noya Ajua̱ hyastho. 10Njabʉ bi 'yøt'a yo njɛya pa bi 'yødebi rá noya ra Zidada Jesu gatho nú'ʉ mi 'bʉ ja ra hai Asia, ya xodyo ne nú'ʉ himyá xodyo. 11Y Ajua̱ bi umba ra ts'ɛdi ra cu Pablo pa bi 'yøt'a ya da̱nga nt'udi, 12asta mi tha̱'tsua yá nthu'taña̱xu ne ma'ra yá dutu nuya da'thi pa mi thani'a̱ ne mi yopa tha̱'tsuabi ya da'thi y nu'ʉ́ mi ña̱ni, y nu'ʉ tó'o mi pɛ'tsa ya ts'onda̱hi nu'ʉ́ mi pøni de gue'ʉ. 13Pe nu 'raya xodyo myá 'ñete mi 'yo'ʉ mi japa ya ts'onda̱hi da bøni de ja ya ja̱'i, nepʉ nu'ʉ́ bi beni gue da zapi da 'yɛnga ya ts'onda̱hi de rá thuhu ra Zidada Jesu nehe ngu mi øt'a ra cu Pablo. Ne mi embabi ya ts'onda̱hi: ―Dí xi'a'ihe gui pøni de rá thuhu ra Jesu nú'a̱ ma̱nga ra Pablo. 14Guehna bi 'yøt'a nú'ʉ yoto yá t'ʉ ra Seva nú'a̱ 'namrá nda̱ gá macja̱ gá xodyo. 15Pe nu mi 'yø'tua njaua 'nara ts'onda̱hi, nu'á̱ bi da̱di ne bi 'ñemba nú'ʉ ya 'ñøhø: ―Nuga dí pa̱ca to'o ra Jesu, ne dí pa̱ca to'o ra Pablo, xi nu'ahʉ, ¿to'o'ihʉ? 16Ha nú'a̱ ra 'ñøhø to'o mi pɛ'tsa ra ts'onda̱hi bi ma bá jʉ nú'ʉ ya 'ñete co rá ts'ɛdi ra ts'onda̱hi ne xi bi na'mbi nts'ɛdi. Ha nu'ʉ́ bi nest'ihi bi bøni de guehni myá thɛlo ngue'a̱ bi thʉmba gatho yá dutu, ne bi hña̱xa ndunthi ya nts'ɛni. 17Y gatho ya xodyo mi 'bʉhni Efeso ne nú'ʉ himyá xodyo bi 'yøde'ʉ nú'a̱ xqui nja, nu'bʉ́ nu'ʉ́ xi bi ntsu. Ne ma'na xi mri t'e'tsua rá nsu rá thuhu ra Zidada Jesu. 18Ne ndunthi de nú'ʉ xqui gamfri mi pa mri njua̱ni de yá ts'oqui. 19Y ndunthi ya 'ñete bi hña̱xa yá t'ofo pa bi tsa̱t'a ja yá thandi ya ja̱'i, ha nuya libro'ʉ nu mi t'øt'a ra uɛnda, mri muui ngu made nthebe 'mo ya t'axaboja̱. 20Njabʉ ma'na mri ntʉnga rá noya Ajua̱ co ndunthi ra ts'ɛdi. 21Nepʉ de gue'a̱ ra cu Pablo bi hñuts'i gue da ma da c'a̱'tsa ya cu asta ja ra hai Macedonia ne Acaya, nepʉ rí 'ñehe Jerusale, nepʉ de guehni mahyoni rí ma Nroma. 22Hangue bi mɛhna yoho yá mfats'i da 'mɛt'o pa rí ma Macedonia, bi mɛhna ra cu Timoteo ne ra cu Erasto. Ha nura cu Pablo bi gohnitho ma'ra ya pa de guehni ja ra hai Asia. 23Nú'ʉ ya pa'ʉ bi ñʉnts'a gatho ya me Efeso ngue'a̱ bi zønini rá noya Ajua̱. 24Mi 'bʉhni 'nara 'ñøhø mrá thuhu ra Demetrio. Nura 'bɛfi mi pa̱di'a̱ mi pøe ya boja̱ dega t'axi. Ne mi 'bʉ yá mfats'i mi hoca ya c'oi de 'nara zina̱na̱ rá thuhu Diana pa mi papa ya ja̱'i. Y xi mi ta̱ha̱ ndunthi ra boja̱. 25Nepʉ 'nara pa ra Demetrio bi munts'a gatho nú'ʉ yá mfats'i ne ma'ra nú'ʉ to'o mi hoca ya c'oi nehe, ne bi 'ñembabi: ―Nu'ahʉ́ guí pa̱dihʉ gue co nuna 'bɛfina̱ stá ta̱hʉ ndunthi ra boja̱, ne hinte stá 'bɛhʉ. 26Pe ngu xcá 'yøhʉ ne xcá hyanthʉ gue nura Pablo ri 'yo ne ma̱ gue nú'ʉ ya zidada nthoqui, hingyá zidada. Y njabʉ xa hña̱cua ndunthi ya ja̱'i gue hinda nsunda ya zidada, hingue hønsɛua Efeso, nehe maxøgue gatho ma haihʉ Asia. 27Nuna guehna ma'na xá nts'obyana̱, ha go guehna ma 'bɛfihʉ dí hanthma̱hʉna̱. Nubyá da ne ma ga 'bɛdihʉ za̱i, asta ne ra nija̱ de ma zina̱na̱hʉ Diana nú'a̱ xi rá nsunda, ma da 'mɛdi nú'a̱ ra nsu pɛ'tsi. Ha ne gue numa zina̱na̱hʉ Diana ri nsunda gatho ya ja̱'i de guecua ja ma haihʉ Asia ne gatho maxøgue ra ximhai. 28Nu mi 'yøde njabʉ gatho nuyá mfats'i ne gatho nú'ʉ ma'ra to'o mi hoca ya c'oi xi bi bø yá cuɛ'ʉ, ne mi mafi mi ena: ―¡Xi rá nsunda ma zina̱na̱hʉ Diana! 29Ne bi nja ngu ra mpumfri gatho ja ra hnini, ne bri mihi ra cu Gayo ne ra cu Aristarco myá me Macedonia nú'ʉ xqui 'ñoui ra cu Pablo. Ne bri jʉt'i ne bri ts'its'i asta habʉ mi øt'a yá hmunts'i. 30Ha nura cu Pablo mi ne xa yʉt'ini pa xa zofo ya ja̱'i, pe nuya gamfri himbi hyopi bi yʉt'i. 31Nehe 'raya nda̱ de Asia nú'ʉ mi ntsixui ra cu Pablo, bi mɛmpa ra noya gue hinda yʉt'a de guehni. 32Nura ora'a̱ xi mbi ja 'nara hmahni ja yá hmunts'i'ʉ, 'rama'na'ño mi ma̱ñ'ʉ, ngue'a̱ gatho xi xqui mpumfri, ne xi ndunthi de gue'ʉ nixi mi pa̱di hanja xqui munts'i. 33Pe nu 'ra de gue'ʉ bi xipabi ra Jandro hanja xqui munts'i. Nuya xodyo xqui umba ya nt'ent'i ra Jandro pa da 'mai da ña̱ ja yá thandi ya ja̱'i. Nepʉ nu'á̱ bi 'ñutua ra seña ya ja̱'i co rá 'yɛ pa da go'ta yá ne. Nu'á̱ mi ne da ña̱nga yá mixodyoui nú'ʉ xcrí jʉ. 34Pe nu mi ba̱di ya ja̱'i gue mrá xodyo'a̱, nu'ʉ́ bi mafi nts'ɛdi ngu yo ora, ne mi ena: ―¡Xi rá nsunda ma zina̱na̱hʉ Diana! 35Nepʉ 'nara nda̱ de ra hnini bi go'tua yá ne ya ja̱'i ne bi 'ñembi: ―Nú'ahʉ gyá menguhʉua Efeso, habʉraza xa fa̱di gue nuua ja ma hninihʉ xi drí suphʉ rá nija̱ ma zina̱na̱hʉ Diana nú'a̱ xá nsunda, y drí suphʉ rá c'oi nú'a̱ bá ca̱i de mahets'i bá pɛhna ma zidadahʉ ra Jupite. 36Guí pa̱hʉ gue xa fa̱di habʉraza, oguí tu ri mʉihʉ, ne ote guí øthʉ 'bʉ hinxcá beñhʉ xá hño 'mɛt'o nú'a̱ guí ne gui øthʉ. 37Nuyʉ ya 'ñøhø xcuá tsihʉ hinte xa 'yø't'ahʉ, ha nixi xa ña̱ma'ñʉ de ma zina̱na̱hʉ drí nsundahʉ. 38Y nura Demetrio ne nú'ʉ ma'ra to hoca ya c'oi, 'bʉ ja te da ña̱pabi, dá ña̱pabi ja ra ts'ʉtbi, ne dá nhyanthya̱ui ja ra nzaya. 39Nu'bʉ ja ma'na te gui ma̱ñhʉ, da za gui maha ja ra ts'ʉtbi gui ma̱ñhʉ ja ma hmunts'ihʉ ngu ma̱nga ra ley. 40Ngue'a̱ pa guecjʉ xá nts'uni. Da za da hña̱pcahʉ da t'ena gue xi dyá necatuhnihʉ por nuna ra ñʉnts'i stá øthʉbya, ne hindí pa̱hʉ te ga tha̱dihʉ nu sta t'angahʉ. 41Nepʉ mi ma̱nga njaua ra nda̱, bi 'ñehui ya ja̱'i ne bi ua ra hmunts'i.

will be added

X\