RA ECHO 18

1Nepʉ de gue'a̱ ra cu Pablo bi bøni de guehni Atena pa bi ma ja ra hnini Corinto. 2Ne ja bi nthɛuini 'nara cu mrá xodyo mrá thuhu ra Aquila, mrá me Ponto ne ja xqui 'ñehe de ra hai Italia, ne mri 'ñoui rá 'bɛhña̱ mrá thuhu ra Priscila. Nú'ʉ́ xqui bøni de ra hnini Nroma ngue'a̱ ra nda̱ Claudio bi manda da juui de guehni gatho ya xodyo. 3Ra cu Pablo bi ma bá 'bʉhui ra cu Aquila co rá 'bɛhña̱ ngue'a̱ mi 'nada yá 'bɛfi'ʉ, mi hoca ya carpa dega dutu. 4Ne cada ra pa dega tsaya ra cu Pablo mi pa ja yá nija̱ ya xodyo pa mi ña̱ui'ʉ, nehe mi ña̱ui nú'ʉ himyá xodyo, y mi zofo'ʉ de rá noya Ajua̱. 5Ne nu mi zøhø ra cu Sila ne ra cu Timoteo xqui 'ñehe'ʉ de ra hai Macedonia, bi zʉhni'ʉ ra cu Pablo mi ja ndunthi ra 'bɛfi ngue'a̱ hyastho mi zofo ya xodyo mi xipabi gue ra Jesu go gue'a̱ ra Cristo nú'a̱ xqui mɛhna Ajua̱ pa da nda̱. 6Pe nuya xodyo bi nø'tuabi ne bi zani. Nu'bʉ́ ra cu Pablo bi hña̱ca rá pat'i ne bi hua̱t'i, gue'a̱ 'nara seña gue mi ma da 'uegue de gue'ʉ ne hinda ma da da̱di de yá ts'oqui, ne bi 'ñembabi: ―Nu'ahʉ go ma gui tha̱disɛhʉ de ri duhʉ, ngue'a̱ nuga ya hinte dí tha̱di de gue'ahʉ. Desde nubya ma ga zofo nú'ʉ hingyá xodyo. 7De guehni ra cu Pablo bi 'uegue de gue'ʉ ne bi ma ja rá ngu 'nara 'ñøhø mrá thuhu ra Justo mi 'bʉ gueta yá nija̱ ya xodyo, ne nu'á̱ mi xøcambeni Ajua̱. 8Nepʉ 'nara 'ñøhø mrá thuhu ra Crispo mrá nda̱ de yá nija̱ ya xodyo bi gamfri ra Zidada Jesu con gatho ya mengu rá ngu. Ne ndunthi ya me Corinto bi 'yøtua rá noya Ajua̱ mi ma̱nga ra cu Pablo, bi gamfri'ʉ ne bi nxistehe. 9Nepʉ 'nara xuui ra Zidada Jesu bi zofo ra cu Pablo ngu dega t'i ne bi 'ñembabi: ―Oguí tsu, sigui gui ma̱nga ra ma̱ca noya, oguí tsaya gui ña̱. 10Ngue'a̱ nuga dí 'bʉi con gue'e, y hinda za to da 'yø't'a ra nts'o'mʉi. Ngue'a̱ ja nuna hninina̱ 'bʉi ndunthi ya ja̱'i go ma mɛti, y nú'ʉ́ ma da gamfrigui. 11Hangue ra cu Pablo bi gohni 'na njɛya made nuni ja ra hnini Corinto. Ne nza̱ntho mi zofo ya ja̱'i de rá noya Ajua̱ de guehni. 12Pe de nú'ʉ ya pa mrá nda̱ ra Galio nuni ja ra hai Acaya, ya xodyo bi 'ñʉ'ti pa da gʉ ra cu Pablo, ne bi zix'ʉ ja ra ts'ʉtbi. 13Ne bi 'ñembabi ra nda̱: ―Nuna 'ñøhøna̱ ʉ'ta ya ja̱'i pa hinda nsunda Ajua̱ ngu ma̱nga rá ley ra Moise. 14Ra cu Pablo mi ma da da̱hma̱ha̱, pe ra nda̱ Galio bi 'ñemba ya xodyo: ―'Bʉ di jahma̱ te xa 'yø't'ahʉ nuna ra 'ñøhø, o xa 'yøt'a 'nara ts'ocate nuua ja ra hnini, nu'bʉ́ ha̱, da za ga øt'a nú'a̱ guí ma̱ñhʉ. 15Pe nú'a̱ guí ma̱ñhʉ hønsɛ dega noya ne de ri leyhʉ, go da nuhʉ te gui 'yøthʉ. Nuga hinte dí 'ñɛnt'i con guehna. 16Nepʉ bi japi da bøñ'ʉ de guehni ja ra ts'ʉtbi. 17Nu'bʉ́ gatho nú'ʉ himyá xodyo mi 'bʉhni bi mihi ra Soste nú'a̱ mrá nda̱ de yá nija̱ ya xodyo de nura hnini'a̱, ne ja bi hna'mbabini nts'ɛdi ja rá thandi ra nda̱ Galio, pe nu'á̱ nixi bi 'yøt'a ncaso, y nixi hinte bi ma̱. 18Ha nura cu Pablo bi gohi ndunthi ya pa de guehni. Nepʉ de gue'a̱ bi 'ñedi gatho ya cu, ne bi mɛui ra cu Aquila co ra nju Priscila pa bi ma ja ra hai Siria. Ne de má 'ñu bi 'ranga ja 'nara zi t'ʉca hnini rá thuhu Cencrea. Ne ante da gʉ ra motsa'ʉ pa da 'raxa ja ra ndehe, 'mɛt'o ra cu Pablo bi 'ña̱xa gatho rá sta̱ pa bi 'yøt'a ra hña̱'ti ngu nú'a̱ xqui ma̱. 19Y nu mi zønga Efeso ra cu Pablo ja bi zoguini ra nju Priscila co ra cu Aquila, y nu'á̱ bi ma ja yá nija̱ yá mixodyoui pa bá ña̱ui'ʉ. 20Y nu'ʉ́ bi ba̱ntebi ra cu Pablo da gohi 'raya pa, pe nu'á̱ himbi ne. 21Hangue bi 'ñehui'ʉ ne bi 'ñembabi: ―Dí pɛ'tsi te grá 'bʉ Jerusale pa ga øt'a ra ngo nú'a̱ ya ma da dat'i, pe ma ga penga ma'na'qui pa ga c'a̱'ts'a'ihʉ 'bʉ Ajua̱ go rá paha. Ne bi bøni de guehni Efeso, ne bi gʉ ra motsa pa bi 'raxa ja ra ndehe pa bi ma Cesarea. 22Nu mi zøni de guehni bi thogui 'bestho pa bi ma Jerusale. Ne nu mi uadi bi zɛngua gatho ya cu de guehni, bi thogui pa bi ma Antioquía. 23Nepʉ de ya xqui 'mʉhni 'raya pa, bi bøni ma'na'qui pa bi ma gatho ja ya hnini de ra hai Galacia ne de Frigia pa da nu te gra ma rá 'bɛfi Ajua̱, ne mi xipi da zɛdi yá jamfri gatho ya gamfri nú'ʉ mbi 'bʉhni. 24Nú'ʉ ya pa'ʉ bi zønga Efeso 'nara xodyo mrá thuhu ra Apolo mrá mengu ja ra hnini Alejandría. Xi mi pa̱di da ña̱ xá hño, ne mi pa̱di xá hño gatho nú'a̱ ma̱nga ra Nda̱xjua T'ofo. 25Nu'á̱ xqui t'utuabi rá noya ra Zidada Jesu desde bi gamfri'a̱, ne xi mrá ehya mi udi xá hño de nú'a̱ mi pa̱di de ra Zidada Jesu, masque hønsɛ mi pa̱di de rá sistehe ra Xuua. 26Ne bi mʉdi bi zofo ya xodyo ja yá nija̱'ʉ, ne himi tsu. Nepʉ mi 'yøde ra nju Priscila ne ra cu Aquila, bi zixa 'nambʉ pa bi 'ñutuabi ma'na xá hño de rá noya Ajua̱. 27Nepʉ nu'á̱ 'mɛfa mi ne da ma Acaya, y ya cu de guehni Efeso bi xipabi gue xá hño da ma. Ne nu'ʉ́ bi 'yopa 'nara hɛ'mi pa bi mɛmpa ya cu Acaya pa da t'umba ra hoga 'ñehe'a̱. Ne nu mi zønga Acaya, nu'á̱ bi mats'i de guehni nú'ʉ xqui gamfribi rá noya Ajua̱. 28Ne xi mi ntsanoyaui ya xodyo ja yá thandi gatho ya ja̱'i. Nu'á̱ mi xipi ngu nú'a̱ ma̱nga ja ra Nda̱xjua T'ofo gue ra Jesu go gue'a̱ ra Cristo nú'a̱ to'o bá pɛhna Ajua̱ pa da nda̱, ne go gue'a̱ nú'a̱ mi tø'mi'ʉ.

will be added

X\