RA ECHO 16

1De mi zønga ra cu Pablo co ra cu Sila ja ra hnini Derbe, de guehni bi thogui pa rí ma Listra, y ja bi nthɛuini 'nara gamfri rá thuhu ra Timoteo, nurá na̱na̱ mrá xodyo ne mrá gamfri'a̱, y nurá dada mrá me Grecia. 2Ha nuya cu mbi 'bʉ Listra ne Iconio mi ña̱ xá hño de ra cu Timoteo. 3Ha nura cu Pablo mi ne da zits'i pa da mɛui'a̱. Pe 'mɛt'o bi japi da thu'tsua nú'a̱ ra seña ma̱nga rá ley ra Moise, pa hinda bø yá cuɛ nú'ʉ ya xodyo mi 'bʉhni, ngue'a̱ gatho'ʉ mi pa̱di gue mrá me Grecia rá dada. 4Nepʉ nu'ʉ́ bi ma de guehni bi thogui pa ja ma'ra ya hnini, ne mi xipa ya cu nú'ʉ ya noya xqui mɛhna ya apostol ne ya nda̱ de ra nija̱ nuni Jerusale pa da 'yøt'e'ʉ. 5Ne njabʉ ma'na bi te yá jamfri gatho nú'ʉ ya gamfri de nú'ʉ ya hnini habʉ xqui 'rañ'ʉ. Ne hyastho mi 'yo mi camfri ma'ra ya ja̱'i de rá noya Ajua̱, ne mi munts'ini ma'ra ya cu. 6De guehni bi thogui'ʉ pa bi ma ja ra hai Frigia ne Galacia, ngue'a̱ ra Ma̱ca Nda̱hi himbi hopabi da thogui ja ra hai Asia pa da ma̱mba rá noya Ajua̱ de guehni. 7Ne bi thogui'ʉ pa bi ma ja ra hai Misia, ne mi ne xa mahma̱'ʉ pa ja ra hai Bitinia, pe rá Ma̱ca Nda̱hi ra Jesu himbi hopi da ma'ʉ. 8Hangue bi thoguitho de guehni Misia pa bi ma ja ra hnini Ntroa. 9Ne mi nxuui ra cu Pablo bi hyanda 'nara nt'udi ngu dega t'i. Bi hyanda 'nara 'ñøhø mrá me Macedonia, mi 'bahni ne bi 'ñembabi: “Thogui pa Macedonia pa grí faxcaheni.” 10Ne nu mi hyanda njabʉ ra cu Pablo nú'a̱ ra nt'udi'a̱ ngu dega t'i, 'bestho dá hñocje pa dá mahe ja ra hai Macedonia, núga drá Luca ne ra cu Pablo ne nú'ʉ ma'ra ya cu. Dá pa̱he gue Ajua̱ mi pɛncahe pa ma grá ma̱ñheni ra hoga nt'øde de ra mpøhø. 11Hangue dá pøñhe de guehni Ntroa dá jʉhe ra motsa pa dá 'raxhe ja ra ndehe. Ne dá mahe manjua̱ntho ja ra zi t'ʉca hai rá thuhu Samotracia o madetho ra ndehe. Nepʉ rá hyax'a̱ dá tsøñhe ja ra hnini Neapoli de ra hai Macedonia. 12De guehni dá mahe pa Filipo gue'a̱ 'nará hnini ya me Nroma, ne gue'a̱ 'nara da̱nga hnini de ra hai Macedonia. Y ja dá 'bʉheni 'raya pa. 13Ha ra pa dega tsaya dá pøñhe de ra hnini ne dá mahe ja ra da̱the habʉ xqui nza̱i ya ja̱'i da ma dua apabi Ajua̱. Ne ja dá huheni habʉ xqui munts'a 'raya 'bɛhña̱, ne dá fʉhe dá xiphe de rá noya Ajua̱. 14Ne 'na de gue'ʉ mrá thuhu ra Lidia mrá me Tiatira, mi pa ya hoga dutu xqui ja̱t'i dega murado, ne mi xøcambeni Ajua̱. Bi 'yøde nú'a̱ mi ma̱nga ra cu Pablo, y Ajua̱ bi xocua rá mfeni pa bi gamfri. 15Ne bi nxistehe'a̱ con gatho ya mengu rá ngu. Nepʉ bi ba̱nteguihe bi 'ñenje: ―'Bʉ nu'ahʉ guí hanthʉ gue xi majua̱ni drá gamfri de ra Zidada Jesu, maha pa ja ra ngu ga 'bʉhʉni. Ne bi jacje dá 'bʉheni 'raya pa. 16Ne 'nara pa ndrá mahe habʉ nza̱ntho mi t'apabi Ajua̱, de má 'ñu dá nthɛhe 'nara nxutsi mrá 'bɛgo ne mi pɛ'tsa 'nara ts'onda̱hi nú'a̱ mi japi da xipabi te ma suerte mi pɛ'tsa cada 'nara ja̱'i, y nuyá hmu'a̱ mi ta̱ha̱ ndunthi ra boja̱ po nú'a̱ ra 'bɛfi mi pɛfi'a̱ ngue'a̱ nura nxutsi'a̱ mrá ba̱di. 17Nepʉ nu'á̱ bi dɛngahe ne bi ña̱ nts'ɛdi bi 'ñena: ―Nuyʉ ya da̱meyʉ go guehyʉ yá 'bɛgo Ajua̱ de mahets'i, ne utua ya ja̱'i hanja da za da mpøhø. 18Ndunthi ya pa bi dɛngahe ne nza̱ntho mi ma̱nga njabʉ. Pe ra cu Pablo ya himi ne da 'yøde da ma̱nga njabʉ. Hangue bi mpʉnts'i ne bi zofo nú'a̱ ra ts'onda̱hi mi pɛ'tsa nú'a̱ ra nxutsi ne bi 'ñembi: ―De rá thuhu ra Zidada Jesucristo dí 'bɛp'a'i gui pøni de gue nuna nxutsina̱. Y nura ora'a̱ 'bestho bi bønga ra ts'onda̱hi. 19Ha nu mi hyanda yá hmu gue ya himi tsa da da̱ha̱ ra boja̱ co rá 'bɛfi nú'a̱ ra nxutsi, bi bø yá cuɛ ne bi gʉ ra cu Pablo ne ra cu Sila pa bi zi'tsua ya nda̱ ja ra tai. 20Ne bi zi'tsua ya nzaya ne bi 'ñembabi: ―Nuya ya 'ñøhø go ya xodyo, ne hønsɛ rí 'ñehe pa da japi da nxaxni ma hninihʉ. 21Ne udi yá nza̱i nú'ʉ hindí 'ñepi ga øthʉ ngue'a̱ dyá me Nromahʉ y dí ohʉ ja yá 'yɛ ma nda̱hʉ me Nroma. 22Nu'bʉ́ nú'ʉ ya ja̱'i xqui munts'ini bi bø yá cuɛ con gue'ʉ, nepʉ ya nda̱ bi manda da 'bøcua yá dutu ne dra fɛt'i co ya ts'ʉt'o. 23Y mi uadi bi hna'mbabi nts'ɛdi, bi jot'a fadi ne bi sipa ra nsufadi gue da su xá hño. 24Y mi 'yøde njabʉ ra nsufadi, bi cʉ'ta asta xi ra ts'a̱t'a fadi, ne bi zɛ'mba yá ua ja 'nara da̱nga za habʉ hingui tsa da xocsɛ'ʉ. 25Pe ngu made ra xuui ra cu Pablo ne ra cu Sila mi apabi Ajua̱ ne mi tutuabi ya ja̱hña̱ Ajua̱, ne gatho ma'ra ya 'yofadi mi øde'ʉ, 26mi da̱mfri bi nja 'nara da̱nga mbimhai, asta mi 'ña̱nga yá ua ya ja̱do de ra fadi, ne asta bi xogui gatho ya gosthi fadi, ne bi xot'a gatho ya cadena nú'ʉ mi tha̱t'a ya 'yofadi. 27Ha nura nsufadi bi nuhu bi hyanda ya gosthi fadi gatho mi xogui, hangue bi gʉca rá mahuai pa xa hñosɛhma̱'a̱, ngue'a̱ mi hu rá mʉi gue ya xqui 'bat'a gatho ya 'yofadi. 28Pe nura cu Pablo bi ma'ti ne bi 'ñembi: ―Oxqui ma gui hñosɛ. Nuje dí 'bʉheua gatho. 29Nepʉ nura nsufadi bi 'yadi 'nara ñot'i, ne bi yʉt'i hnest'ihi asta mri hua̱t'i co ra ntsu, ne bá ndandiña̱hmu ja yá ua ra cu Pablo ne ra cu Sila. 30Nepʉ 'bestho bi pøni pa thi ne bi 'yambabi'ʉ bi 'ñembi: ―'Ñøhøhʉ, ¿te rá 'bɛ ga øt'e pa ga mpøhø? 31Nu'bʉ́ nu'ʉ́ bi 'ñembi: ―Camfri ra Zidada Jesucristo pa njabʉ gui mpøhø nu'i ne gatho ya mengu ri ngu. 32Nepʉ ra cu Pablo ne ra cu Sila bi xipa rá noya Ajua̱ nú'a̱ ra nsufadi ne gatho ya mengu rá ngu. 33Y mi nxuuitho ra nsufadi bi xʉcuabi'ʉ habʉ xqui t'umba ya mfɛi. Nepʉ nu'á̱ bi nxistehe 'bestho ne gatho ya mengu rá ngu. 34Ne bi zixa pa ja rá ngu ne bá umbi te bi zi'ʉ. Y nú'a̱ ra nsufadi ne nú'ʉ ya mengu rá ngu xi mri johya ngue'a̱ xqui gamfri'ʉ Ajua̱. 35Nurá hyax'a̱ ya nda̱ bi mɛhna ya polecia da xipa ra nsufadi gue da hyɛgui ra cu Sila ne ra cu Pablo. 36Hangue ra nsufadi bi 'ñembabi ra cu Pablo: ―Xuá mɛnca ra noya ya nda̱ ga hɛc'ahʉ. Hangue da za gui pøñhʉ ne gui maha te rá entho. 37Pe ra cu Pablo bi zofo nú'ʉ to bá ha̱ ra noya pa da thɛgui'ʉ, ne bi 'ñembi: ―Hina, ngue'a̱ nuje dyá me Nromahe nehe y dí ohe ja yá 'yɛ ma da̱nga nda̱hʉ me Nroma, ne bri fɛtc'ahe ja yá thandi ya ja̱'i nsinque bi t'angahe 'nara nt'ani, ne bi jotcaguihe ja ra fadi. Ha nubyá go ne da hyɛgaguihe nsinque to da ba̱di. Hinda za. Duá esɛ'ʉ pa da pøngaguihe de guecua. 38Nu'bʉ́ ya polecia bi ma bá xipa njabʉ ya nda̱. Nu'bʉ́ nu'ʉ́ bi ntsu nu mi ba̱di gue myá me Nroma ne mi o ja yá 'yɛ ra da̱nga nda̱ Nroma. 39Hangue nu'ʉ́ bi ma bá apa ra pumbate ra cu Pablo ne ra cu Sila, bi pøni de ra fadi ne bi ba̱ntebi da bøni'ʉ de ja ra hnini. 40Ha nu mi bønga fadi'ʉ bi ma ja rá ngu ra nju Lidia. Ne bá hu'mba yá mʉi ya cu. Nepʉ bi ma'ʉ.

will be added

X\