RA ECHO 15

1De nú'ʉ ya pa'ʉ 'raya cu xqui 'ñehe de ra hai Judea pa ja ra hnini Antioquía bi mʉdi bi xipa gatho ya cu gue pa da mpøhø'ʉ mahyoni da thu'tsua nú'a̱ ra seña xqui ma̱nga ra Moise da thu'tsua gatho ya xodyo nú'ʉ dya 'ñøhø. 2Nu'bʉ́ ra cu Pablo ne ra cu Berhna bi ntsanoyaui'ʉ ndunthi. Hangue bi thahna ra cu Pablo ne ra cu Berhna ne ma'ra ya cu pa da ma pa Jerusale da c'a̱'tsa ya apostol ne ya nda̱ de ra nija̱ de guehni, pa da ña̱ui'ʉ de nú'a̱ ra seña'a̱. 3Nepʉ ya gamfri de ra nija̱ Antioquía bi 'ñehui nú'ʉ ya cu. Ne dega 'ñu bi 'ranga ja ra hai Fenicia ne Nsamaria, ne bi xipa ya cu gue nú'ʉ himyá xodyo ya xqui hyɛpʉ yá nda̱xjua jamfri ne ya xqui gamfribi rá noya Ajua̱ nehe. Nu'bʉ́ gatho ya cu xi mri johya ndunthi. 4Ne nu mi zønga Jerusale, nuya apostol de guehni ne ya nda̱ de ra nija̱ co ma'ra ya cu mi 'bʉhni bi umba'ʉ 'nara hoga 'ñehe. Ne ra apostol Pablo ne nú'ʉ to'o mi 'ñoui bi xipabi'ʉ gatho nú'a̱ xqui 'yøt'e co rá mfats'i Ajua̱. 5Pe 'raya fariseo mi 'bʉhni nú'ʉ ya xqui gamfri, bi 'mai ne bi 'ñena: ―Mahyoni da thu'tsua nú'a̱ ra seña gatho ya gamfri masque hingyá xodyo, ne dra 'bɛpabi da 'yøt'a gatho nú'a̱ ma̱nga rá ley ra Moise. 6Nepʉ ya apostol ne ya nda̱ de ra nija̱ bi munts'i'ʉ pa da ña̱'ʉ de rá ley ra Moise ne de nú'a̱ ra seña, ua mahyoni da t'øt'e pa da mpøhø 'na. 7Nepʉ de ya xqui ña̱'ʉ ndunthi, ra apostol Pedro bi 'mai ne bi 'ñena: ―Zi cuhʉ, ngu guí pa̱sɛhʉ ya øt'a ndunthi ya pa Ajua̱ bi huancagui pa dá umba ra hoga nt'øde de ra mpøhø nú'ʉ hingyá xodyo pa bi gamfri'ʉ nehe. 8Ne Ajua̱ nú'a̱ to'o pa̱tca gatho ma mfenihʉ bi 'ñudi gue mi ja yá jamfri'ʉ, ngue'a̱ bi umba ra Ma̱ca Nda̱hi'ʉ njabʉ ngu bi 'racjʉ nehe. 9Njabʉ stá pa̱hʉ gue Ajua̱ handgaguihʉ gue dí mahyɛguihʉ con gue'ʉ, ngue'a̱ nu'á̱ bi xʉcua yá mfeni ngue'a̱ bi gamfribi rá noya'a̱. 10Nu'bʉ́ ¿hanja hinguí ne gui camfrihʉ nú'a̱ xa 'yøt'a Ajua̱? ¿Hanja guí japhʉ ya cu da 'yøt'a núna himbi za dá øthʉ, ne nixi ndu ma dadahʉ himbi za bi 'yøt'e? 11Hingui tsa ga øthʉ njabʉ. Nujʉ́ dí camfrihʉ gue stá mpøhøhʉ po rá hñoja̱'i ra Zidada Jesucristo, y njabʉ xa mpøhø'ʉ nehe. 12Nepʉ mi uadi bi ma̱nga ra cu Pedro njabʉ, bi go'ta yá ne gatho pa da 'yøde nú'a̱ mi ma̱ ra cu Berhna ne ra cu Pablo. Nu'ʉ́ bi ma̱ de gatho ya nt'udi ne ya da̱nga t'øt'e xqui 'yø'tuabi Ajua̱ nú'ʉ himyá xodyo por gue'ʉ. 13Y de mi uadi bi ña̱'ʉ bi 'ñenga ra cu Cobo: ―Zi cuhʉ, 'yøhʉ nú'a̱ ma ga ma̱ngá. 14Ra cu Pedro ya bi xicjʉ hanja Ajua̱ xqui mʉdi xqui ja̱pa nú'ʉ hingyá xodyo ne go xqui huahna 'ra de gue'ʉ pa nehe'ʉ drá hnini'a̱. 15Hangue bi njabʉ ngu nú'a̱ xqui 'yofo 'nará 'mɛhni Ajua̱ ne bi 'ñena: 16'Mɛfa de guehna ma ga japi da yopa nja rá hmanda ra nda̱ Davi masque ya xa du, ne masque ya xa nhuati ma da yopa nja ngu rá mʉdi. 17Pa njabʉ gatho ma'ra ya hnini da hyongagui, ne gatho'ʉ da xøcambenigui ma thuhu. 18Njabʉ bi 'ñena Ajua̱ nú'a̱ to'o xa 'yøt'a nuya ya t'øt'e nú'ʉ bi 'ñudi maya'bʉ. 19Hangue ringue'a̱ nuga dí beni gue hindí 'ñepi ga xaxhʉ nú'ʉ hingyá xodyo nú'ʉ xa hyɛpʉ yá nda̱xjua jamfri ne xa gamfri Ajua̱. 20Hønsɛ mahyoni ga opabihʉ pa ga ha̱cuahʉ hinda zipa yá ngø ya mbo'oni nú'ʉ xa hña̱'tua ya c'oi. Nehe ga ophʉ gue hinda hñuxui 'nara 'bɛhña̱ nú'a̱ hingue xi rá 'bɛhña̱, ne hinda zipa yá ngø nú'ʉ ya mbo'oni hinxra 'bømba yá ji. Nehe ga xiphʉ gue hingui ho da zipa yá ji ya mbo'oni. 21Nuga dí beni ga xiphʉ njabʉ ngue'a̱ desde ya'bʉ 'bʉi to'o he'tuabi rá ley ra Moise tat'a pa dega tsaya ja gatho ya hnini. 22Hangue nuya apostol ne nú'ʉ ya nda̱ de ra nija̱ ne gatho ya gamfri bi beñ'ʉ gue xá hño da huahna 'raya cu pa da mɛhna Antioquía co ra cu Pablo ne ra cu Berhna. Ne bri thahna yoho ya da̱nga cu, ra cu Juda nú'a̱ xqui thu'mbabi nehe ra Barsabá, ne ra cu Sila. 23Ne bi umbabi'ʉ 'nara hɛ'mi pa da hña̱'tsua ya cu nuni Antioquía habʉ mi ena: “Núje dyá apostolhe ne núje dyá nda̱he de ra nija̱, ne gatho ya cu de guecua Jerusale, dí pɛn'ahebʉ ra nzɛngua nú'ahʉ ma cu'ihe hingyá xodyohʉ guí 'bʉhʉbʉ Antioquía, ne nú'ahʉ guí 'bʉhʉbʉ ja ra hai Siria ne Cilicia. 24Stá pa̱he gue 'raya cu de guecua xa ma xqui mabʉ nsinque ma nsɛquihe, ne xpá xax'ahʉ, y co nú'ʉ yá noya xa xi'ahʉ'ʉ xa ts'oc'a ri mfenihʉ. Xa xi'ahʉ gue mahyoni gui 'yøthʉ nú'a̱ ra seña xqui ma̱nga ra Moise, ne mahyoni gui 'yøthʉ gatho nú'a̱ bi ma̱ñ'a̱ ja ra ley. 25Hangue nuje dá beñhe xá hño ga huañhe 'raya cu de guecje pa ga pɛñhebʉ da ma da c'a̱'ts'ahʉ pa da mɛui mahyɛgui ma zi cuhʉ ra Berhna ne ra Pablo. 26Nuyʉ ri yoho xa hñuxa yá te pa da ma̱mba rá noya ma zi Hmuhʉ ra Jesucristo. 27Hangue stá pɛn'ahebʉ ra cu Juda ne ra cu Sila, y nú'ʉ́ go ma da xi'asɛhʉ nehe núna dí xi'ahe. 28Ra Ma̱ca Nda̱hi, necaguihe stá beñhe gue xá hño hinga 'bɛp'ahe ndunthi ya hmanda, hønsɛ ga 'bɛp'ahe gui 'yøthʉ nú'a̱ xi mahyoni. 29Hangue oxqui ma gui tsiphʉ yá ngø ya mbo'oni nú'ʉ xa hña̱'tua ya c'oi, ne oxqui ma gui tsiphʉ yá ji ya mbo'oni, ne oxqui ma gui tsiphʉ yá ngø ya mbo'oni nú'ʉ hinxra 'bømba yá ji, nixi gui hñuxhʉ 'nara 'bɛhña̱ nú'a̱ hingue xi ri 'bɛhña̱hʉ. 'Bʉ gui jamasuhʉ hingui øthʉ nuya t'øt'e dí xi'ahʉ, nu'bʉ́ gui 'bʉhʉ xá hño. Nsøct'a̱ ndí ne ga xi'ahe. Nubyá Ajua̱ da max'ahʉ.” 30Nepʉ nú'ʉ to'o xqui 'bɛhni bi ma pa Antioquía. Ne mi zøñ'ʉ bi munts'a gatho ya gamfri ne nu'ʉ́ bri dapabi ra hɛ'mi. 31Y nu mi uadi bi hñe'ti'ʉ, xi bi johya co nú'a̱ ra da̱nga humʉi xqui 'bɛmpabi. 32Ra cu Juda ne ra cu Sila myá 'mɛhni Ajua̱ nehe, ne mi ña̱'ʉ co rá ts'ɛdi'a̱, hangue bi zofo ya cu ne bi nupa yá mfeni'ʉ pa da zɛ yá jamfri. 33Ne bi gohni ndunthi ya pa con gue'ʉ. Nepʉ 'mɛfa ya cu me Antioquía bi 'ñedi co 'nara hma̱te pa da menjhma̱ pa Jerusale habʉ xqui 'bɛhni. 34Pe nura cu Sila bi beni gue ja da gohni'a̱ nuni Antioquía. 35Nehe ra cu Pablo ne ra cu Berhna ja bi gohni nehe'ʉ, ne mi udi ra hoga nt'øde de rá noya Ajua̱ co ma'ra ya cu de guehni mi mfax'ʉ. 36Nepʉ xqui tho 'raya pa, ra cu Pablo bi 'ñembabi ra cu Berhna: ―Maha ma'na'qui, ma ga c'a̱'tshʉ ya cu gatho nú'ʉ ya hnini habʉ dá ma̱mfʉ rá noya Ajua̱ pa ga nuhʉ te gra ma'ʉ. 37Ra cu Berhna mi nehma̱ xa zixa ra cu Xuua nú'a̱ xqui thu'mbabi ra Marco nehe. 38Pe ra cu Pablo bi 'ñena gue hinxá hño da zits'i'a̱ ngue'a̱ 'nara pa mri 'ñoui bi 'ueguesɛ de guehni Panfilia, ne ya himbi ne bi mɛui'ʉ da ma̱mba rá noya Ajua̱. 39Y por gue'a̱ ra cu Pablo ne ra cu Berhna bi ntsanoya'ʉ, nepʉ bi beni gue ma'na xá hño da ma 'ra 'nambʉ. Hangue nura cu Berhna bi zixa ra cu Marco, ne bi mɛui ja ra motsa bi 'raxa ja ra ndehe pa bi ma Chipre. 40Ha nura cu Pablo bi huahna ra cu Sila pa da mɛui. Ne nuya cu de guehni Antioquía bi 'yɛnt'uabi'ʉ ja yá 'yɛ Ajua̱. 41Nepʉ bi gʉ yá 'ñu bi ma'ʉ pa ja ra hai Siria ne bi 'ranga Cilicia, ne mi nupa yá mfeni ya cu mbi 'bʉi de guehni pa da zɛdi yá jamfri.

will be added

X\