RA ECHO 14

1Ra cu Pablo ne ra cu Berhna bi zønga ja ra hnini Iconio, nepʉ bi yʉt'a ja yá nija̱ yá mixodyoui pa bi zofo ya ja̱'i de rá noya Ajua̱ co ndunthi ra ts'ɛdi. Ne ndunthi de gue'ʉ bi gamfri, ngu ya xodyo ngu nú'ʉ himyá xodyo. 2Pe nú'ʉ ya xodyo himbi ne bi gamfri bi 'yʉ'ta nú'ʉ himyá xodyo pa da benga ya ts'omfeni de nú'ʉ ya cu. 3Hangue ra cu Pablo co ra cu Berhna bi gohni ndunthi ya pa, ne himi tsu da ma̱mba rá noya Ajua̱ ngue'a̱ mi camfri gue Ajua̱ mi fats'i'ʉ. Ne nu Ajua̱ mi umbabi'ʉ ra ts'ɛdi pa da 'yøt'a ya nt'udi ne ya da̱nga t'øt'e de ja yá thandi ya ja̱'i pa da gamfri'ʉ gue nú'a̱ mi ma̱ñ'ʉ go gue'a̱ majua̱ni. 4Pe nuya mengu de guehni xqui hyegue, 'ra mri dɛna ya xodyo ha nu ma'ra mri dɛna ya apostol. 5Nepʉ 'raya xodyo ne 'ra de nú'ʉ himyá xodyo bi 'ñʉ'ti'ʉ co ya nda̱ de ra hnini pa da 'yø'tua ra nts'o'mʉi ya apostol ne da c'ahni co ya do. 6Pe nura cu Pablo ne ra cu Berhna bi 'yøde de nú'a̱ mi ma da t'ø'tua'ʉ, hangue bi 'bat'i ne bi ma pa ja ra hnini Listra ne Derbe, ya hnini de ja ra hai Licaonia. Ne bi thexa ja gatho nú'a̱ ra hai'a̱. 7Ne ja mi ma̱mbani rá noya Ajua̱. 8Nuni ja ra hnini Listra mi 'bʉ 'nara 'ñøhø himi tsa da 'ño ngue'a̱ desde mi 'mʉi ya mi njabʉ, ne hinhya'mʉ xqui 'ño, ha mi huhnitho. 9Nura 'ñøhø'a̱ bi 'yøde nú'a̱ mi ma̱nga ra cu Pablo. Nepʉ ra cu Pablo bi nʉ'ti ne bi ba̱di gue mi ja rá jamfri pa da ña̱ni. 10Hangue nura cu Pablo bi 'ñembabi nts'ɛdi: ―'Bai manjua̱ntho. Y nura 'ñøhø'a̱ 'bestho ra ora'a̱ bi 'yɛnga ra sagui bi 'mai ne bi 'ño. 11Nepʉ ndunthi ya ja̱'i de guehni bi hyanda nú'a̱ xqui 'yøt'a ra cu Pablo, ne bi ma̱nga nts'ɛdi de yá hña̱qui de Licaonia bi 'ñena: ―¡Ma ajua̱hʉ xa mpʉnga ja̱'i ne xuá 'ñehe pa ja ra ximhai, xiyʉ 'bahni! 12Hangue ra cu Berhna bi t'embabi gue go mi gue'a̱ ra zidada Jupite, ha nura cu Pablo ra zidada Mercurio ngue'a̱ nú'á̱ go gue'a̱ mi ña̱'a̱. Ngue'a̱ mi gue'ʉ yá thuhu yá ajua̱ ya me Licaonia. 13Nepʉ nura macja̱ bá tsi ya nda̱mfri ne bá ha̱ ya thødri pa ja rá nija̱ ra Jupite nú'a̱ mi ja ja ra gosthi hnini, ne ja bi munts'ini co ndunthi ya ja̱'i pa da nsunda'ʉ ya apostol, ne mi ne da hyopa ya nda̱mfri dega hña̱'ti. 14Pe nu mi ba̱di njabʉ ya apostol bi dʉnga yá dutu co ra dumʉi ngue'a̱ hingo rí 'ñepi da t'ø'tuabi'ʉ njabʉ. Ne bi yʉt'a ja ra hmuntsja̱'i ne bi 'ñena njaua: 15―¿Hanja guí øthʉ njabʉ? Nuje dyá ja̱'ihe ngu'ahʉ. Nuje stá ehehe pa ga xi'ahe gue nuya c'oi grí nsundahʉ hinte ri muui, hangue mahyoni gui 'ueguehʉ de gue'ʉ pa gui pɛphʉ Ajua̱ nú'a̱ te, nú'a̱ bi hyoca mahets'i ne ra ximhai ne gatho nú'a̱ te ja. 16Maya'bʉ nu'á̱ mi hopta ya ja̱'i da 'yøt'a gatho nú'a̱ go mi beni'ʉ. 17Pe nza̱ntho xa 'ñutuabi'ʉ tengu rá 'mʉi'a̱ ngue'a̱ xa 'yø'tuabi ya hño, ngue'a̱ go gue'a̱ pɛhna ra 'ye ne ya hoga sofo, ne 'racjʉ te ga tsihʉ, ne hubga ma mʉihʉ pa ga johyahʉ. 18Pe masque ra cu Pablo ne ra cu Berhna bi xipa ya ja̱'i njabʉ pa hinda hyopa ya nda̱mfri nú'a̱ ma xa t'umbi'ʉ dega hña̱'ti, pe xmá hñei pa da hña̱cuabi'ʉ. 19Ra ora'a̱ bi zøhø 'raya xodyo xqui 'ñehe de ra hnini Antioquía ne Iconio. Nú'ʉ́ bi 'yʉ'ta ya ja̱'i pa bi c'ahna ra cu Pablo co ya do. Nepʉ bi gʉt'i'ʉ bi pønga de ja ra hnini pa bá føte ngue'a̱ mi hu yá mʉi'ʉ gue ya xqui du. 20Y nu de ya xqui munts'a ya gamfri habʉ mi 'bɛnga ra cu Pablo, nú'a̱ ra ora'a̱ bi 'mai ne bi yopa yʉt'a ja ra hnini. Nepʉ rá hyax'a̱ bi mɛui ra cu Berhna pa ja ra hnini Derbe. 21Ne ja bá ma̱mbani'ʉ rá noya Ajua̱ nehe, ne ndunthi ya mengu de guehni bi gamfri. Nepʉ bi mengui pa bi ma Listra, ne bi 'ranga Iconio, nepʉ bi ma Antioquía. 22De nú'ʉ ya hnini'ʉ bi japi da zɛdi yá jamfri nú'ʉ ya gamfri mi 'bʉhni, bi xipi gue hinda 'uegue de yá jamfri, ne bi xipi gue mahyoni da zɛta ya nt'ʉtsate ne ya ts'othogui pa da hyandua rá nsunda Ajua̱. 23Ne bi thahna 'raya cu pa da nda̱ cada 'nara nija̱ de nuya ya hnini habʉ xqui 'rani. Nepʉ bi 'yapabi Ajua̱ ne bi ayuna, ne nú'ʉ to'o xqui thahni pa da nda̱ bi 'yɛnt'ua ja yá 'yɛ Ajua̱ nú'a̱ to'o xqui gamfri'ʉ. 24Nepʉ bi thogui bi ma ja ra hai Pisidia ne bi zøñ'ʉ ja ra hai Pamfilia. 25Nepʉ nu'ʉ́ bi ma̱mba rá noya Ajua̱ ja ra hnini Perge, nepʉ de guehni bi ma'ʉ ja ra hnini Atalia. 26Ne de guehni bi gʉ'ʉ ra motsa pa bi 'raxa ja ra ndehe pa bi menga Antioquía nuni habʉ xqui t'ɛnt'ua yá 'yɛ Ajua̱ pa bi mɛ nú'a̱ ra 'bɛfi xqui t'umbi'ʉ ne ya bi uadi. 27Ne nu mi zøni bi munts'a mahyɛgui con gatho ya gamfri ne bi xipabi'ʉ gatho nú'a̱ xqui 'yøt'e co rá ts'ɛdi Ajua̱. Ne bi xipi gue Ajua̱ bi mats'i pa bi zofo nehe nú'ʉ himyá xodyo, ne bi xocua yá mfeni'ʉ pa bi za bi gamfri'ʉ ra Zidada Jesu nehe. 28Nepʉ ra cu Pablo ne ra cu Berhna bi 'mʉhni ndunthi ya pa co ya gamfri de guehni.

will be added

X\