1 Mbi 'bʉ ja ra nija̱ nuni Antioquía 'rayá 'mɛhni Ajua̱ ne 'raya xahnate, ra cu Berhna ne ra cu Simu nú'a̱ xqui thu'mbabi nehe ra Negro, ne ra cu Lucio nú'a̱ mrá me Cirene, ne ra cu Saulo, ne ra cu Manaén nú'a̱ bi teui mahyɛgui ra nda̱ Erode. 2 'Nara pa xqui munts'i mi xøcambeni Ajua̱ ne xqui ayuna. Nepʉ ra Ma̱ca Nda̱hi bi 'ñembabi'ʉ: ―'Uegaguihʉ ra Berhna ne ra Saulo pa da mɛ nú'a̱ ra 'bɛfi stá umbi. 3 Nu'bʉ́ ya cu bi ayuna ne bi 'yapa Ajua̱ po ra cu Berhna ne ra cu Saulo, ne bi hñu'tsua yá 'yɛ'ʉ, nepʉ bi 'ñehui'ʉ. 4 Nu'bʉ́ ra cu Berhna ne ra cu Saulo xqui mɛhna ra Ma̱ca Nda̱hi da mɛ rá 'bɛfi Ajua̱ ne bi zits'i pa bi ma ja ra hnini Seleucia, ne de guehni bi ma co ra motsa bi 'raxa ja ra ndehe pa bi ma ja 'nara zi hai rá thuhu Chipre bí o madetho de ja ra ndehe. 5 Nu mi zønga de guehni ja ra hnini Salamina ja rá hyo ra ndehe bi mʉdi bi ma̱mba rá noya Ajua̱ mbo ja yá nija̱ yá mixodyoui. Ne mi 'ñoui'ʉ ra cu Xuua mi faste nehe. 6 Y de ya xqui 'ranga gatho maxøgue ra hai de Chipre bi zʉ ma'na ra zi t'ʉca hnini mrá thuhu Pafos ja rá hyo ra ndehe. Ne de guehni bi nthɛui 'nara xodyo mrá thuhu ra Barjesu mrá 'ñete ne mi 'ñet'a ba̱di de Ajua̱. 7 Nú'á̱ nza̱ntho mri 'ñoui ra nda̱ Sergio Paulo nú'a̱ xi mrá nimfeni. Nepʉ nú'a̱ ra nda̱ bi zohna ra cu Berhna ne ra cu Saulo ngue'a̱ mi ne da 'yøtua rá noya Ajua̱. 8 Ne nú'a̱ ra 'ñete'a̱ mi t'embi nehe ra Elima rí bøni da 'ñena 'ñete, nú'á̱ bi nø'tua ra cu Berhna ne ra cu Saulo, ne mi ne da hña̱cuahma̱ ra nda̱ pa hinda gamfribi nú'a̱ mi udi'ʉ. 9 Nu'bʉ́ ra cu Saulo nú'a̱ xa thu'mbi nehe ra Paulo, mi ha̱mpa rá ts'ɛdi ra Ma̱ca Nda̱hi ne xi bi nʉ'ta nú'a̱ ra 'ñete, 10 ne bi 'ñembabi: ―¡Nu'i 'nagrá 'yʉ'tate ne 'nagrá c'uamba, rá t'ʉ'i ra ts'onda̱hi grí ʉtsa gatho nú'a̱ xá hño! ¿Hanja xi guí ts'ocua yá mfeni nú'ʉ ne da gamfri Ajua̱? 11 Nubyá Ajua̱ ma da castiga'i. Ma gui ngoda pa ndunthi ya pa, nixi da za gui hyanda ra hyadi. 'Bestho ra ora'a̱ bi go'mba yá da 'nara 'bɛxuui, himbi za bi hyandi. Nepʉ mi honi to'o da gʉhni ngue'a̱ ya himi tsa da hyandi. 12 Nu'bʉ́ nú'a̱ ra nda̱ nu mi hyanda nú'a̱ bi nja, bi gamfri Ajua̱ ngue'a̱ xi bi ho nú'a̱ bi 'yøde de ra Zidada. 13 Ra cu Pablo co nú'ʉ ma'ra mi 'ñoui bi gʉ ra motsa de guehni Pafos pa bi 'raxa ja ra ndehe pa bi ma ja ra hnini Perge de ja ra hai Panfilia. Pe nura cu Xuua bi 'uegue de gue'ʉ, bi menga pa Jerusale. 14 Nepʉ de guehni Perge bi gʉ yá 'ñu bi ma'ʉ pa ja ra hnini Antioquía nú'a̱ bí ja ja ra hai Pisidia, ne bi 'mʉhni 'raya pa. Ne nú'a̱ ra pa dega tsaya bi yʉt'a ja yá nija̱ yá mixodyoui ne bi hñudini'ʉ. 15 Nepʉ de mi uadi bi the'ta ra Ma̱ca T'ofo nú'a̱ xa 'yofo ra Moise ne nú'ʉ xa 'yofo ma'ra yá 'mɛhni Ajua̱, nu'bʉ́ ya nda̱ de ra nija̱ bi zohna ra cu Pablo ne ra cu Berhna, ne bi 'ñembabi: ―Zi cuhʉ, 'bʉ guí ne te gui xiphʉ ya ja̱'i pa gui zofohʉ, da za gui xiphʉbya. 16 Nu'bʉ́ ra cu Pablo bi 'mai ne bi 'ñu ra seña co rá 'yɛ pa hinto da ña̱ ne bi 'ñembabi: ―Nú'ahʉ gyá me Israelhʉ, ne gatho'ihʉ guí tsuhʉ Ajua̱, 'yøhʉ núna ma ga xi'ahʉ. 17 Nu Ajua̱ nú'a̱ ri xøcambeni ma ja̱'ihʉ ya me Israel bi huahna nú'ʉ ndu ma dadahʉ pa bi ja̱pi'ʉ, ne bá nxa̱ndi nuni Egipto de mi 'bʉhni ngu myá nzøhø'ʉ. Nepʉ Ajua̱ co rá da̱nga ts'ɛdi bá pøni'ʉ de nú'a̱ ra hai'a̱. 18 Ne bi zɛtua yá nts'o'mʉi de guehni ja ra mbonthi ngu ñote njɛya. 19 Nepʉ Ajua̱ bi huata yoto ya hnini de nuni ja ra hai Canaán, pa go bi t'umba nú'ʉ ndu ma dadahʉ pa ja bi 'mʉhni'ʉ. 20 De guehni Ajua̱ bi hñuxa ya nzaya pa bi manda'ʉ ngu goho nthebe made ya jɛya, asta bi 'mʉi ra ba̱di Samue pa bi sigui bi manda nehe'a̱. 21 Nepʉ nu'ʉ́ bi 'yadi 'nayá nda̱ pa da nda̱ de gue'ʉ. Y Ajua̱ bi umba ra Sau pa bi nda̱ ñote njɛya, nú'a̱ mrá t'ʉ ra Cis, mi gue'a̱ 'nara 'ñøhø desde yá t'ʉ ra Benjami. 22 Y 'mɛfa Ajua̱ bi zica ra Sau dega nda̱, pa go bi hñuxa ra Davi. Ne bi ma̱ de gue'a̱ bi 'ñena: “Nuni ra Davi rá t'ʉ ra Isaí, guehni stá hopa rá 'mʉi, ne ma da 'yøtca gatho nú'a̱ ma pahaga.” 23 Y de ja yá t'ʉ ra Davi bá ehe ra Jesu. Y nú'a̱ ra Jesu go gue'a̱ xqui hñuxa Ajua̱ pa da pøhø ya ja̱'i de Israel ngue'a̱ njabʉ xqui ña̱gui. 24 Ne ante da mʉta rá 'bɛfi ra Jesu, nura Xuua mi zofo gatho ya ja̱'i de Israel gue da ñobri ne da nxistehe. 25 Ne de ya mi ma da ua rá 'bɛfi ra Xuua bi 'ñena: “Nuga hingo gueque ngu guí beñhʉ gue go gueque nú'a̱ xi guí tø'mhʉ. Pe 'mɛfa de gueque xa 'ñepʉ ma'na nú'a̱ to'o ma'na ja ndunthi rá nsu de gueque, nú'a̱ hindí 'ñepcagui nixi ga xo'tua yá thiza.” 26 Zi cuhʉ, nú'ahʉ yá ja̱'i'ihʉ ra Abrá, ne nú'ahʉ guí tsuhʉ Ajua̱, pa gue'ahʉ xpá 'bɛhni nuna ra noya pa gui mpøhøhʉ. 27 Nuya me Jerusale ne yá nda̱'ʉ himi pa̱di'ʉ to'o gue'a̱ ra Jesu, y nixi mi tso yá mfeni'ʉ te 'bɛ'a̱ mi ne da ma̱ nú'ʉ ya noya bi 'yofo maya'bʉ yá 'mɛhni Ajua̱, masque mi he'ti'ʉ nú'a̱ ra pa dega tsaya. Hangue nu'ʉ́ bi 'yɛ'mbi pa da hyo pa bi njabʉ ngu nú'a̱ xqui ma̱nga maya'bʉ yá 'mɛhni Ajua̱. 28 Ne masque hinhya'mʉ bi zʉtua 'nara ts'oqui xqui 'yøt'e'a̱ pa xa za xa hyohma̱, pe nu'ʉ́ bi 'yapa ra Pilato pa da manda'a̱ da tho. 29 Ne bi uadi bi 'yø'tuabi'ʉ gatho ngu nú'a̱ xqui 'yofo yá 'mɛhni Ajua̱ ja ra Ma̱ca T'ofo, nepʉ bi ja̱'ma de ja ra pont'i pa bá t'agui. 30 Pe nu Ajua̱ bi japi bi yopa nte de ra du. 31 Ne nú'ʉ to'o xqui 'ñoui de Galilea pa Jerusale, go gue'ʉ bi hyandi ndunthi ya pa 'mɛfa de xqui yopa nte. Ne nubya go gue'ʉ ri damajua̱ni de gue'a̱ ja ya ja̱'i. 32 Hangue nuje dí xi'ahe ra hoga noya gue Ajua̱ ya bi 'yøt'e nú'a̱ xqui ña̱'tua ndu ma dadahʉ. 33 Y nú'a̱ xqui ña̱'tuabi'ʉ go bi 'racjʉ nújʉ dyá ba̱tsihʉ de ndu ma dadahʉ, ngue'a̱ bi japi da yopa nte ra Zidada Jesu de ja ra du, ngu xa nt'ofo ja rá ñoho ra Salmo ne ena njaua: “Nu'i go gue'e ma T'ʉ'i, ne nubya ri hnequi ja yá thandi ya ja̱'i gue go ri dadagui.” 34 Ajua̱ xqui ma̱ gue mi ma da japi da yopa nte de ra du, ne nurá ndo'yo'a̱ hinda 'ya ja ra hai. Hangue bi ma̱nga njaua ja ra Ma̱ca T'ofo: “Ga 'ra'ahʉ gatho nú'ʉ ya ja̱pi stí ña̱'tua ra Davi.” 35 Nehe ja ma'na ra Salmo bi 'ñenga njaua ra Davi: “Stá pa̱di gue nu'i hingui ma gui hopi da 'ya ma ndo'yo ja ra hai, ngue'a̱ go ri hma̱ca 'bɛgogui.” 36 Xi majua̱ni ra Davi bi 'yø'tua rá paha Ajua̱ de nú'ʉ ya pa bi nte'a̱ ne mi pɛpabi nuyá ja̱'i'a̱. Nepʉ bi du ne bi t'agui, ha nurá ndo'yo bi 'ya ja ra hai ngu gatho nú'ʉ ma'ra ndu ma dadahʉ. 37 Pe nura Zidada Jesu himbi 'ya rá ndo'yo ja ra hai, ngue'a̱ Ajua̱ bi japi bi yopa nte de ra du. 38 Hangue zi cuhʉ, dá zo ri mfenihʉ núna dí xi'a'ihʉ, gue por gue'a̱ da za gui tsʉhʉ ra pumbate de ri ts'oquihʉ. 39 Nurá ley ra Moise himi tsa ja da ts'ʉhni ra pumbate, pe nubyá gatho nú'ʉ to'o camfri ra Zidada Jesu, ya xra pumbabi yá ts'oqui. 40 Hangue nubyá jamasuhʉ pa hinda zʉ'ahʉ nú'a̱ xa ma̱nga yá 'mɛhni Ajua̱ ne bi 'ñena njaua: 41 Nú'ahʉ guí øtbuhlathohʉ, 'yøhʉ. Ma gui 'yøhʉ nú'a̱ ma ga øt'e co ma ts'ɛdi, pe ma gui 'mɛdihʉ. Ngue'a̱ núga drá Ajua̱ ma ga øt'a 'nara da̱nga t'øt'e de nú'ʉ ya pa gri 'bʉhʉ, pe nu sta si'ahʉ, hingui ma gui camfrihʉ. 42 Y nu mi uadi bi ma̱nga njabʉ ra cu Pablo, bi bønga de ja yá nija̱ ya xodyo mahyɛgui co nú'ʉ mri 'ñoui. Y mi 'bʉhni 'ra himyá xodyo, ne bi ba̱ntebi ra cu Pablo da gohi pa ma'na ra pa dega tsaya pa da yopa zofo'ʉ ma'na'qui. 43 Ne mi ua ra hmunts'i ja ra nija̱, ndunthi ya xodyo ne ndunthi ma'ra ya ja̱'i nú'ʉ xqui dɛmba yá jamfri ya xodyo, bi gamfri nú'a̱ bi xipabi ra cu Pablo ne ra cu Berhna, ne bi mɛui. Ne nu'ʉ́ bi xipi gue mahyoni da zɛdi yá jamfri ne da sigui da 'mʉ ja rá hñoja̱'i Ajua̱. 44 Y rá hña̱to'a̱ ra pa dega tsaya bi munts'a maxøgue nú'a̱ ra hnini'a̱ pa da 'yøtua rá noya Ajua̱. 45 Pe nu mi hyanda ya xodyo gue xi mi ndunthi ya ja̱'i, xi bi bø yá cuɛ ngue'a̱ mi ne da nsɛhɛ'ʉ, ne bi mʉdi bi ma̱ gue nú'a̱ mi ma̱nga ra cu Pablo hinga majua̱ni, ne bi ña̱ma'ñʉ'ʉ de gue'a̱. 46 Hangue nura cu Pablo ne ra cu Berhna mi ña̱ con gatho ra ts'ɛdi ne bi 'ñembi: ―Rá mʉdi dá xi'ahe rá noya Ajua̱ nú'ahʉ gyá xodyohʉ ngue'a̱ mahyoni njabʉ. Pe hingá ne gá camfrihʉ, ne guí ma̱nsɛhʉ gue hindí 'ñep'ahʉ ra te pa nza̱ntho. Hangue nubyá ma ga zofohe nú'ʉ hingyá xodyo. 47 Ngue'a̱ njabʉ bi 'bɛpcahe Ajua̱ bi 'ñenje: Stá hux'a'ihʉ ngu 'nara ñot'i pa gui yo'tuahʉ yá mfeni gatho ya ja̱'i, ne pa gui ma̱ñhʉ ra noya dega pøhøte habʉraza maxøgue de ra ximhai. 48 Nu mi 'yøde njabʉ nú'ʉ himyá xodyo xi bi johya ne bi mʉdi bi ma̱ñ'ʉ gue rá noya Ajua̱ xá hño, ne bi gamfri gatho nú'ʉ xqui thahni pa da mɛ'tsa ra te pa nza̱ntho. 49 Ne bi mʉdi bi hma̱mba rá noya Ajua̱ maxøgue ja nú'a̱ ra hai'a̱. 50 Pe nuya xodyo bi 'ñʉ'tiui ya nda̱ de ra hnini co ya 'bɛhña̱ nú'ʉ xi ya 'yonija̱, pa da t'ʉtsa ra cu Pablo ne ra cu Berhna, ne da juui de nú'a̱ ra hnini'a̱. 51 Nu'bʉ́ ra cu Pablo ne ra cu Berhna bi hua̱t'a ra hai nú'a̱ mi tu ja yá thiza, gue'a̱ 'nara seña gue ya hinda ma da ña̱ui ya ja̱'i de guehni ne hinda ma da da̱di de gue'ʉ ngue'a̱ nu'ʉ́ himbi ne bi gamfri Ajua̱. Nepʉ nu'ʉ́ bi ma pa ja ra hnini Iconio. 52 Pe nuya gamfri xqui gohini xi mi johya'ʉ ne mi ha̱mpa rá ts'ɛdi ra Ma̱ca Nda̱hi.
