RA ECHO 12

1Nuya pa'ʉ ra nda̱ Erode bi mʉdi bi 'yø'tua ra nts'o'mʉi ya gamfri. 2Nú'á̱ bi manda da thɛcua rá 'yʉga ra apostol Cobo rá cu ra apostol Xuua. 3Ha nu mi hyandi'a̱ gue ya xodyo mri ho njabʉ, nu'bʉ́ bi manda dra jʉ ra apostol Pedro nehe. Ne bri jʉ ja 'nará ngo ya xodyo de rá pa ra thuhme nsinque rá nzoi. 4Ha nu mri jʉ'a̱ bi jot'a fadi ne bi t'ɛnt'ua ja yá 'yɛ goho ya hmunts'a soldado pa da su'a̱, cada 'nara hmunts'i mi goho ya soldado. Ngue'a̱ ra Erode mi beni gue de xa ua ra ngo de ra pascua xa pønga de ra fadi pa xa thohma̱ ja yá thandi ya ja̱'i. 5Pe nu de mi ofadi ra cu Pedro ne mri su xá hño, nuya gamfri himi tsaya mi apabi Ajua̱ por gue'a̱ con gatho yá jamfri. 6Y nú'a̱ ra xuui'a̱ ante da manda ra Erode dua ts'i de ja ra fadi, ra cu Pedro mi a̱ha̱ de guehni, y mi tha̱t'i co 'nara soldado ja rá 'ñɛi ne ma'na ja rá nga̱ha̱, gatho ri hñu mi tha̱t'i co ya cadena, y nu ma'ra ya soldado mi 'bai ja ra gosthi fadi mri su ra cu Pedro pa hinda bøni. 7Y masɛctho bi zøhø 'nará ɛnxɛ Ajua̱ ne asta mri yot'a mbo ra fadi, y nura ɛnxɛ bi dʉni ra cu Pedro pa bi 'ya, ne bi 'ñembabi: ―Nxøni da̱ma nangui. Y nura ora'a̱ 'bestho bi xot'a ya cadena de ja yá 'yɛ ra cu Pedro. 8Ha nura ɛnxɛ bi 'ñembabi: ―Dʉ'ta ri ngʉt'i ne ti'ta ri thiza. Y nu'á̱ 'bestho bi 'yøt'a njabʉ. Nepʉ ra ɛnxɛ bi 'ñembabi: ―Pat'a ri pat'i ne maha. 9Nu'bʉ́ ra cu Pedro bi bøni bi dɛna ra ɛnxɛ, nixi mi pa̱di gue xi majua̱ni xqui 'yøt'a njabʉ ra ɛnxɛ ngue'a̱ mi hu rá mʉi'a̱ gue mi 'ui'tha̱. 10Ne bi thogui'ʉ habʉ mi 'ba ya mʉdi soldado, nepʉ bi thogui habʉ mi 'ba rá ñoho ra hmunts'a soldado, ne 'bestho bi zønga ja ra da̱nga gosthi dega bøja̱ nú'a̱ mi ja de thi ja ra 'ñu. Y nú'a̱ ra gosthi'a̱ bi xoguisɛ. Nepʉ bi bøni'ʉ pa ja ra 'ñu. Y de guehni bi 'ño 'na tʉi'ʉ, nepʉ 'bestho ra ora'a̱ ra ɛnxɛ bi 'uegue de ra cu Pedro. 11Nu'bʉ́ ra cu Pedro ya bi gʉ rá mfeni, ne bi 'ñensɛ: ―Nubyá ha̱ dí pa̱di gue xi majua̱ni Ajua̱ xpá mɛhni rá ɛnxɛ pa bi ña̱ngagui de yá 'yɛ ra Erode ne de gatho nú'ʉ mi ne xa 'yøtcagui ya xodyo. 12De mi beni njabʉ ra cu Pedro bi gʉ ra 'ñu bi ma pa ja rá ngu ra nju Maria nú'a̱ rá na̱na̱ ra cu Xuua, nú'a̱ xqui thu'mbabi ra Marco nehe. Ne ja mi 'bʉhni ndunthi ya gamfri mi apabi Ajua̱ por gue'a̱. 13Nepʉ nu'á̱ bi gant'a ra gosthi, ne 'nara nxutsi mrá thuhu ra Rode bi ma ja ra gosthi pa da nu to'o mri gant'i. 14Y nú'a̱ ra nxutsi 'bestho bi ba̱tua rá noya gue go mi gue'a̱ ra cu Pedro. Pe co ra johya mi pɛ'tsi himbi xocua ra gosthi. Bi nest'ihi bá xipabi nú'ʉ ma'ra ya gamfri gue ya mi 'bahni ra cu Pedro ja ra gosthi. 15Nepʉ nu'ʉ́ bi 'ñembabi: ―¡Xcá 'bɛ ri mfeni! Pe nu'á̱ xi mi zɛdi gue go mi gue'a̱ ra cu Pedro. Hangue nu'ʉ́ bi 'ñembabi: ―Hingo gue'a̱, za̱i go di gue'a̱ rá ɛnxɛ Ajua̱ nú'a̱ su'a̱. 16Pe nura cu Pedro himi tsaya mi gant'a ra gosthi. Ne de mi xoca ra gosthi'ʉ bi hyandi gue go mi gue'a̱ ra cu Pedro. Nepʉ nu'ʉ́ xi bi ntsu. 17Pe ra cu Pedro mi utua ra seña co rá 'yɛ gue da go'ta yá ne, ne bi metuabi gue Ajua̱ xqui pønga ja ra fadi. Nepʉ nu'á̱ bi 'ñembabi'ʉ: ―Xiphʉ ra cu Cobo ne gatho ma'ra ya cu hanja bi za duá pønga ja ra fadi. Y nu'á̱ 'bestho bi ma de guehni pa ja ma'na ra hnini. 18Y nurá hyax'a̱ xi mi tu yá mʉi ya soldado y himi pa̱ te da beni, ngue'a̱ himi pa̱di te xqui nja co ra cu Pedro. 19Nepʉ ra nda̱ Erode bi manda da yopa thoni'a̱, pe himbi za bi ts'ʉdi. Hangue nura nda̱ Erode bi xʉcua ra uɛnda nú'ʉ ya nsufadi, nepʉ bi manda da tho'ʉ. Nepʉ nu'á̱ bi bønga de guehni Judea, bi ma bá 'bʉ ja ra hnini Cesarea. 20Ra nda̱ Erode xi mri ʉtsa ya me Tiro ne ya me Sidó. Pe nuya mengu de guehni bi go 'nara cohi pa da ma da c'a̱'tsa ra Erode, pe 'mɛt'o bi gu'tuabi ra Blasto nú'a̱ mi supa rá hudi, pa nú'á̱ da zofo ra Erode pa da za da ña̱ui'ʉ, pa njabʉ da ba̱ntebi gue ya hinda ntuhni'a̱ con gue'ʉ. Bi 'yøt'e njabʉ ngue'a̱ ra Erode mi ja rá nsu pa da umba nsɛqui ya me Sidó ne ya me Tiro da ts'ocui te da zi'ʉ ja yá hai. 21Hangue 'nara pa ra Erode bi zohna ya me Tiro ne Sidó, y nú'a̱ ra pa'a̱ xqui nhye dega nda̱, bi hñudi ja ra hudi habʉ mi ja ra ts'ʉtbi ne bi mʉdi bi zofo'ʉ. 22Nepʉ nú'ʉ ya ja̱'i xqui munts'ni xi mi thø ya hmafi mi ena: ―¡Núni dí øhʉ ña̱, go 'nara zidada, hingrá ja̱'i! 23Nura ora'a̱ 'nará ɛnxɛ Ajua̱ bi japi bi hñenga ra Erode ngue'a̱ hinxqui umba rá nsu Ajua̱ pa da ña̱ njabʉ, ngue'a̱ nu'á̱ xqui gʉsɛ ra ts'ɛdi. Hangue ra Erode bi zʉ 'nara ts'ohñeni nú'a̱ bi yʉ 'raya zu'ue mbo rá mʉi, ne 'bestho bi du. 24Ha nuya pa'ʉ bi 'ño bi ntʉnga rá noya Ajua̱ habʉraza ya hnini. 25De mi ua yá 'bɛfi ra cu Berhna co ra cu Saulo nuni Jerusale bi bøni pa bi menga Antioquía, ne bá 'ñoui ra cu Xuua nú'a̱ xqui thu'mbabi nehe ra Marco.

will be added

X\