RA ECHO 11

1Bi 'yøde nú'ʉ ya apostol ne ma'ra ya gamfri mbi 'bʉ Judea gue ne nú'ʉ himyá xodyo ya xqui hña̱nga rá noya Ajua̱. 2Ne mi menga ra cu Pedro pa Jerusale, ja bá nuuini nú'ʉ yá mixodyoui ya myá gamfri pe mri dɛnbatho yá nza̱i ya xodyo. Nú'ʉ́ bi zʉi ra cu Pedro, 3ne bi 'ñembabi: ―¿Hanja xcá cʉt'a ja yá ngu nú'ʉ ya 'ñøhø hingyá xodyo ne xcá ñuni con gue'ʉ? 4Nu'bʉ́ ra cu Pedro bi metuabi gatho nú'a̱ xqui nja desde ra mʉdi ne bi 'ñembabi'ʉ: 5―Nuga ndí 'bʉhni ndí apabi Ajua̱ ja ra hnini Jope, ne dá handa 'nara nt'udi ngu dega t'i. Bá ja̱'mi de mahets'i 'ñena 'nara da̱nga dutu mi thu'tsa gatho goho yá ña̱ni, ne bi zøhø habʉ ndí 'bʉi. 6Ne dá handa xá hño te mi cʉni, dá handi mi cʉ gatho ya mbo'oni ne gatho ya zu'ue nú'ʉ ja goho yá ua, ne ya qu'eña̱ ne ya ts'ints'ʉ. 7Ne dá øde 'nara noya bi 'ñengagui: “Pedro, jʉ nuyʉ ya mbo'oni ne ya zu'ue, ne hyo pa gui tsi.” 8Ne dá embabi: “Hina, zi Hmu, ngue'a̱ hinhya'mʉ stá tsi nú'a̱ xá nts'o ne hingui t'axi.” 9Nepʉ nú'a̱ ra noya de mahets'i bi yopa ña̱ ne bi 'ñengagui: “Oguí embabi xá nts'o nú'a̱ xa xʉca Ajua̱ ne xá nt'axi.” 10Bi njabʉ hñu'qui, nepʉ bi njʉts'i pa mahets'i nú'a̱ ra dutu. 11Ha nú'a̱ ra ora'a̱ bi zøhø ja ra ngu habʉ ndí 'bʉi hñu ya 'ñøhø xqui 'bɛhni de Cesarea pa da zixcagui. 12Y nura Ma̱ca Nda̱hi bi 'ñengagui ga mɛ'be'ʉ, masque himyá xodyo. Nehe dá mɛ'be nú'ʉ má 'rato ya cu, ne dá tsøñhe dá cʉthe ja rá ngu nú'a̱ to'o xqui mɛhna ya 'mɛhni da zixcagui. 13Nura 'ñøhø'a̱ bi xicje hanja xqui hyandua 'nará ɛnxɛ Ajua̱ de guehni ja rá ngu gue nu'á̱ bi 'ñembabi 'na̱: “Pɛhna 'raya 'mɛhni pa ja ra hnini Jope pa dua tsi ra Simu nú'a̱ xa thu'mbabi nehe ra Pedro. 14Nu'á̱ go da xi'a'i hanja da za gui mpøhø ne gatho ya mengu ri ngu.” 15Ha nu ndá fʉdi dá ña̱, bi hña̱ni'ʉ ra Ma̱ca Nda̱hi mahyɛgui ngu dá ha̱ñhe ra mʉdi nehe. 16Ra ora'a̱ dá beni de nú'a̱ xqui ma̱nga ma zi Hmuhʉ nú'bʉ bi 'ñena: “Ra Xuua mi xi'tsate co ra dehe, pe nu'ahʉ́ ma gui nxistehehʉ co ra Ma̱ca Nda̱hi.” 17'Bʉ Ajua̱ njabʉ rá paha xa umbabi'ʉ ra Ma̱ca Nda̱hi ngu bi 'racaguihʉ nújʉ dí camfrihʉ ma zi Hmuhʉ ra Jesucristo, to'oguiga pa go ga ha̱cua rá 'bɛfi Ajua̱. 18Ha nu mi 'yøde njabʉ nú'ʉ ya cu mi 'bʉhni Jerusale, ya bi go'tatho yá ne, ne bi nsunda Ajua̱ bi 'ñena: ―¡Njabʉ rá paha Ajua̱ gue da ñobri nehe nú'ʉ hingyá xodyo pa da mɛ'tsa ra te pa nza̱ntho ngu nú'a̱ dí pɛ'tshʉ nehe! 19Desde bi tho ra cu Teba, bi mʉdi bi t'ʉtsa nú'ʉ ma'ra ya gamfri. Hangue nu 'ra de gue'ʉ bi 'bat'i gá ma Fenicia, ha nu ma'ra Chipre, ha nu ma'ra Antioquía. Y nu habʉ gá ma'ʉ bá zo yá mixodyoui de rá noya Ajua̱, hinto ma'ra bá zofo. 20Pe mi 'bʉ 'raya cu myá me Chipre ne nu ma'ra myá me Cirene, nú'ʉ́ bi zønga ja ra hnini Antioquía, y bi zofo nehe nú'ʉ ya ja̱'i himyá xodyo de ra hoga nt'øde de ra Zidada Jesu. 21Ajua̱ bi umba ra ts'ɛdi'ʉ ne bi mats'i, ne ndunthi ya ja̱'i bi hyɛpʉ yá nda̱xjua jamfri ne bi gamfri ra Zidada Jesu. 22Ne mi ba̱di ya gamfri nú'ʉ mi 'bʉhni Jerusale de nú'a̱ mbi ja de guehni Antioquía, hangue nu'ʉ́ bi mɛhna ra cu Berhna pa guehni. 23Ne nu mi zøñ'a̱ bi hyandua rá 'bɛfi Ajua̱, nu'bʉ́ nu'á̱ bi ba̱di gue Ajua̱ xqui ja̱pi'ʉ, ne nu'á̱ xi bi johya. Ne bi zofo gatho nú'ʉ xqui gamfri de guehni gue xá hño da sigui da gamfri Ajua̱ co yá mfeni strá nt'axi ne da zɛdi yá jamfri. 24Ngue'a̱ nú'a̱ ra cu Berhna 'namrá hoga cu mi ha̱mpa rá ts'ɛdi ra Ma̱ca Nda̱hi ne xi mi ja rá jamfri. Y ndunthi ya ja̱'i bi gamfri ra Zidada por gue'a̱. 25Nepʉ ra cu Berhna bi ma pa Tarso pa da hyonga ra cu Saulo, ne de mi zʉdi bi zits'i bi mɛui pa Antioquía. 26Ne ja bi 'mʉhni'ʉ maxøgue 'na njɛya, ne mri munts'i'ʉ co ya gamfri, ne bi 'ñutuabi ndunthi ya ja̱'i de rá noya Ajua̱. Y nuni Antioquía ja guehni bi mʉdi bi thu'mba ya gamfri gue dya cristiano ngue'a̱ bi gamfri ma zi Hmuhʉ ra Jesucristo. 27De nuya pa'ʉ bi bønga 'rayá 'mɛhni Ajua̱ de guehni Jerusale pa bi ma Antioquía. 28Ne 'na de gue'ʉ mrá thuhu ra Agabo bi 'mai madetho de habʉ xqui munts'a ya cu ne bi ma̱ gue xqui xipa ra Ma̱ca Nda̱hi gue mi ma da nja 'nara da̱nga thuhu maxøgue rá ngʉni ra ximhai. Y ha̱ bi njabʉ nú'ʉ ya pa mrá nda̱ ra Claudio. 29Nepʉ nuya gamfri de Antioquía bi beni gue da mɛmpa 'nara mfats'i nú'ʉ ma'ra ya gamfri mi 'bʉ nuni Judea, bi uni cada 'na de gue'ʉ ngu nú'a̱ mi tsʉpa yá ts'ɛdi. 30Y nú'a̱ ra mfats'i bi uñ'ʉ bi 'bɛmpa nuya nda̱ de ra nija̱ Judea, y go bi hña̱xa ra cu Berhna co ra cu Saulo pa guehni.

will be added

X\