RA ECHO 10

1Mi 'bʉ 'nara 'ñøhø nuni Cesarea mrá thuhu ra Neyo nú'a̱ mrá me Italia ne himrá xodyo, nehe go mrá nda̱ de nú'ʉ ya soldado myá mengu rá hai'a̱. 2Nú'á̱ xi mrá hoja̱'i ne xi mi tsu Ajua̱, ne gatho nú'ʉ ya mengu rá ngu. Ne mi øt'a ndunthi ra hño ngue'a̱ mi faxa ya xodyo nú'ʉ xi myá hyoya. Ne nza̱ntho mi xøcambeni Ajua̱. 3Nepʉ 'nara pa ngu mi nzʉnga hñu nde bi hyanda 'nará ɛnxɛ Ajua̱ ngu dega t'i, bi yʉt'a habʉ mi 'bʉi'a̱ ne bi 'ñembabi: ―¡Neyo! 4Nu mi hyandi xi bi nʉ'ti ne xi bi ntsu, ne bi 'ñena: ―¿Te'a̱, zi Hmu? Nura ɛnxɛ bi 'ñembi: ―Nuri nt'adi xa 'yøde Ajua̱ ne nú'ʉ ri mfats'i xcá 'yøt'e xa hyandi'a̱. 5Hangue nubya pɛhna 'raya 'mɛhni pa ja ra hnini Jope pa dua tsi ra Simu nú'a̱ thu'mbabi nehe ra Pedro. 6Nú'á̱ bí 'bʉi ja rá ngu ma'na ra Simu nú'a̱ ra dɛxifri, 'bʉi guetbʉ ja rá hyo ra ndehe. Y nú'a̱ ra Pedro go gue'a̱ ma da xi'a'i te rí 'ñep'a'i gui 'yøt'e. 7Nu mi ma ra ɛnxɛ nú'a̱ mi ña̱ui ra Neyo, bi zohna yoho yá 'bɛgo ne 'namrá nza̱i soldado nú'a̱ mi xøcambeni Ajua̱ nehe. 8Go gue'ʉ bi xipabi te 'bɛ'a̱ bi nja, ne bi mɛhni pa ra hnini Jope. 9Ha nurá hyax'a̱ de mi 'yo yá 'ñu'ʉ y ya mi ma da zønga ja ra hnini Jope, nu'bʉ́ nura ora'a̱ ra cu Pedro bi bøxa ja 'nara tøngu pa da 'yapabi Ajua̱ nuni ja ra hnini Jope, y mi ngu nde ma pa nura ora'a̱. 10Y xi mi tsʉ 'nara thuhu y ya xa nehma̱ xa ñuhma̱, pe ja mi thocuabi te da zi. Y nú'a̱ ra ora'a̱ bi hyanda 'nara nt'udi ngu dega t'i. 11Ne bi hyandi bi xogui mahets'i ne bá ja̱'ma pa ja ra hai 'ñena 'nara da̱nga dutu mi thu'tsa gatho goho yá ña̱ni. 12Y ja nú'a̱ ra dutu'a̱ mbra cʉni gatho ya mbo'oni ne gatho ya zu'ue nú'ʉ ja goho yá ua, ne ya qu'eña̱ ne ya ts'ints'ʉ. 13Nepʉ bi 'yøde 'nara noya bi 'ñena: ―Pedro, jʉ nuyʉ ya mbo'oni ne ya zu'ue ne hyo pa gui tsi. 14Nu'bʉ́ nura cu Pedro bi da̱di ne bi 'ñena: ―Hina, zi Hmu, ngue'a̱ hinhya'mʉ stá tsi nú'a̱ xá nts'o ne hingui t'axi. 15Ne nú'a̱ ra noya'a̱ bi 'ñemba ma'na'qui: ―Oguí embi xá nts'o nú'a̱ xa xʉca Ajua̱ ne xá nt'axi. 16Bi njabʉ hñu'qui, nepʉ bi bøxa ma'na'qui pa mahets'i nú'a̱ ra dutu. 17Ha nura cu Pedro mi 'bʉhni mi 'yo rá mfeni ne mi ne da ba̱di te mri bønga nú'a̱ ngu ra t'i xqui hyandi. Nura ora'a̱ bi zøhø yá 'mɛhni ra Neyo ja ra gosthi, xqui 'ño xqui 'ñani habʉ mi ja rá ngu ra Simu dɛxifri. 18Ha nu mi zøni ja nú'a̱ ra ngu'a̱ bi 'ñani ua ja mi 'bʉhni ra Simu nú'a̱ xqui thu'mbabi nehe ra Pedro. 19Pe nura cu Pedro tobya mi oda rá mfeni nú'a̱ ngu ra t'i xqui hyandi, ne ra Ma̱ca Nda̱hi bi 'ñembi: ―Bi zø hñu ya 'ñøhø hoñ'a'i. 20'Bai ca̱i rí mɛui'ʉ. Ne ote xqui ma gui tsu, ngue'a̱ go stá pɛnca'ʉ. 21Nepʉ ra cu Pedro bi ga̱i habʉ mi 'ba nú'ʉ yá 'mɛhni ra Neyo, ne bi 'ñembi: ―Nuga go gueque guí honjʉ. ¿Te xqui 'bɛñ'ahʉ? 22Nu'ʉ́ bi da̱di ne bi 'ñena: ―Xpá mɛncahe ma nda̱ gá soldadohe ra Neyo, 'nara hoga 'ñøhø xi tsu Ajua̱, ne gatho ya xodyo ña̱mahño de gue'a̱. Y 'nará ɛnxɛ Ajua̱ bi xipi gue mahyoni da mɛhni to'o da e da zix'a'i pa gui ma ja rá ngu'a̱, pa da 'yøde nú'a̱ ma gui xipabi. 23Nepʉ ra cu Pedro bi umba ntsaya'ʉ habʉ mi 'bʉi'a̱, ne ja bi 'ñoxini'ʉ con gue'a̱ nú'a̱ ra xuui'a̱. Ha nurá hyax'a̱ ra cu Pedro bi ma con gue'ʉ ne bi mɛ ma'ra ya cu nú'ʉ mi 'bʉhni Jope. 24Y rá hyax'a̱ bi zøñ'ʉ nuni Cesarea habʉ mi 'bʉ ra Neyo mi tø'mi, ne xqui zohna gatho nú'ʉ ja te myá njaui, ne nú'ʉ xi myá hma̱di'a̱. 25De mi zønga ra cu Pedro ja rá ngu ra Neyo, nu'á̱ bi bøni pa da da̱di, ne bi ndandiña̱hmu ja yá ua'a̱. 26Pe nura cu Pedro bi 'ba'mi ne bi 'ñembabi: ―'Bai, ngue'a̱ nequi 'nadrá 'ñøhø nehe ngu'atho. 27Y de mi ña̱'ʉ bi yʉt'a ri yoho mbo ra ngu, ne mi 'bʉhni ndunthi ya ja̱'i xqui munts'i. 28Nepʉ ra cu Pedro bi 'ñembabi'ʉ: ―Nu'ahʉ guí pa̱hʉ gue núje dyá xodyohe hingui tsa ga ntha̱ntshe co nú'ahʉ hingyá xodyohʉ, y nixi tsa ga cʉthe ja ri nguhʉ, ngue'a̱ 'rama'na'ño ma jamfrihʉ. Pe Ajua̱ xa xicagui gue hinga embabi xá nts'o o hingui t'axi ni 'nara ja̱'i. 29Hangue ngu mi xicagui ya 'mɛhni gue ga eheua, 'bestho duá ehe nsinque te dá ma̱. Ne dí ne ga pa̱di pa te uá tsigaguihʉ. 30Nu'bʉ́ ra Neyo bi da̱tuabi ne bi 'ñembi: ―Øt'a goho ma pa ngu ra zi orabya ndí 'bʉcua ja ma ngu stí ayuna ne ndí apabi Ajua̱ ngu ma nza̱i dega nde, ndá tha̱mfri dá handa 'nara 'ñøhø mi he 'raya dutu asta mi huɛxqui. 31Ne bi 'ñengagui: “Neyo, Ajua̱ xa 'yø't'a'i ri t'adi ne xa hyanda nú'a̱ xcá 'yø'tua ya hyoya xcá fats'i. 32Pɛhna pa ja ra hnini Jope to'o ma dua tsi ra Simu nú'a̱ xa thu'mbabi nehe ra Pedro. Nu'á̱ bí 'bʉ ja rá ngu ma'na ra Simu ra dɛxifri nú'a̱ bí 'bʉ guetbʉ ja rá hyo ra ndehe. Y nu sta zø'a̱ ma gui ña̱ui pa da zo'a'i,” njabʉ bi 'ñengagui. 33Hangue 'bestho dá pɛmpʉ to'o bá hoñ'a'i, ne xá hño'a̱ xcá ehe. Y nubyá dí 'bʉheua gatho ja rá thandi Ajua̱, ne dí ne ga øhe gatho nú'a̱ xa xi'a'i pa gui xicje. 34Hangue nura cu Pedro bi mʉdi bi ña̱ ne bi 'ñena: ―Nubyá ha̱, stá pa̱di gue xi majua̱ni Ajua̱ hingui huahna ya ja̱'i 'ra co ma'ra. 35Ngue'a̱ nu'á̱ ri ma̱di gatho nú'ʉ to'o 'yo ja rá ntsu'a̱ ne øt'a nú'a̱ xá hño, masque habʉraza dya mengu. 36Ajua̱ bi zocje núje dyá me Israelhe pa dá má̱dihe con gue'a̱ po ra Zidada Jesucristo nú'a̱ to'o ma Hmuhʉ drí gathohʉ. 37Ngu guí pa̱sɛhʉ nú'a̱ bi nja nuni ja ma haihe núje dyá xodyohe, ra Xuua bi 'yøt'a ra sistehe, 'mɛfa ma zi Hmuhʉ ra Jesu bi fʉta rá 'bɛfi nuni Galilea ne bi 'ño gatho ja ra hai Judea. 38Ne guí pa̱sɛhʉ gue Ajua̱ bi umba ra Ma̱ca Nda̱hi ra Jesu nú'a̱ mrá me Nasare pa bi umba ra ts'ɛdi. Nú'á̱ bi 'ño bi 'yøt'a ra hño, ne bi 'yøthe gatho nú'ʉ mi hñeni ne mi pɛ'tsa ya ts'onda̱hi. Ra Zidada Jesu mi øt'a njabʉ ngue'a̱ Ajua̱ mi 'bʉi con gue'a̱. 39Y nuje go drí damajua̱nihe gatho nú'a̱ bi 'yøt'a ra Zidada Jesu nuni ja ya t'ʉca hnini Judea ne ja ra da̱nga hnini Jerusale. Y 'mɛfa nu'á̱ bi ts'ʉta ja 'nara pont'i asta himbi tho. 40Pe Ajua̱ bi 'yøt'e pa rá hñupa bi yopa nte, ne bi 'yøt'e pa bi hnecanja̱'i pa dá hanthe ma'na'qui. 41Pe hingo gatho ya ja̱'i bi yopa hyant'a̱, hønsɛguihe dá hanthe, ngue'a̱ Ajua̱ xqui huancahe desde rá mʉdi pa ga dahe majua̱ni de gue'a̱ gue nu'á̱ bi yopa nte ma'na'qui de ja ra du. Y nu de ya xqui yopa nte de ja ra du, dá yopa ñuñhe ne dá ntsithehe con gue'a̱. 42Nepʉ nu'á̱ bi 'bɛpcahe ga zofohe ya ja̱'i ne ga dahe majua̱ni gue Ajua̱ go xa hñuts'i'a̱ pa da hña̱'mba nguɛnda nú'ʉ te, ne nú'ʉ xa du. 43Nehe gatho yá 'mɛhni Ajua̱ mi 'bʉi desde rá mʉdi bi damajua̱ni de ra Zidada Jesu gue nu'a̱ tó'o da gamfribi rá thuhu dra pumbabi yá ts'oqui. 44Ha de mi ma̱nga ra cu Pedro nuya ya noyaya, bá ca̱i ra Ma̱ca Nda̱hi ne bi yʉt'a ja yá coraso gatho nú'ʉ to'o mi øde nú'a̱ mi ma̱nga ra cu Pedro. 45Ha nú'ʉ ya xodyo myá gamfri nú'ʉ bá 'ñoui ra cu Pedro, xi bi 'yø ngue'a̱ xqui hña̱nga ra Ma̱ca Nda̱hi nehe nú'ʉ himyá xodyo. 46Ngue'a̱ bi 'yøde mi ña̱ nehe de ma'ra ya hña̱qui nú'ʉ himi pa̱di, ne mri xøcambeni'ʉ Ajua̱. 47Nepʉ nura cu Pedro bi 'ñena: ―¿To'o ja da hña̱cuabi da nxistehe núyʉ to'o xa hña̱nga ra Ma̱ca Nda̱hi ngu stá ha̱ñhʉ? 48Nu'bʉ́ ra cu Pedro bi 'bɛpabi'ʉ da nxistehe de rá thuhu ra Zidada Jesucristo. Nepʉ nu'ʉ́ bi ba̱ntebi ra cu Pedro gue da gohi con gue'ʉ ma'ra ya pa.

will be added

X\