RA ECHO 1

1Núga drá Luca, nura mʉdi t'ofo dá ofo ne dá pɛhn'abʉ, zi cu Teofilo, ja ma̱ni gatho nú'a̱ te bi 'yøt'a ma zi Hmuhʉ ra Jesucristo, ne nú'a̱ bi 'ñudi desde ra pa'a̱ bi fʉta rá 'bɛfi, 2asta ra pa bi yopa mengui pa mahets'i. Pe ante da ma pa mahets'i, bi zofo yá apostol nú'ʉ xqui huahni, ne po ra Ma̱ca Nda̱hi bi xipabi te mi ma da 'yøt'e'ʉ. 3'Mɛfa de xqui du ra Jesu ja ra pont'i ne de xqui yopa nte, nú'á̱ bi 'mʉcua má ñote ma pa, ne mri 'ñudi ja yá apostol pa bi gamfri'ʉ gue ya xqui yopa nte ma'na'qui, ne pa mi xipabi'ʉ de hanja ri manda Ajua̱. 4Y de mi ña̱ui yá apostol ante da ma'a̱ pa mahets'i, bi 'ñembi'ʉ: ―Oxqui ma gui pøñhʉ de guecua Jerusale, ja da 'bʉhʉua asta hingui ha̱ñhʉ nú'a̱ xa ña̱'t'ahʉ Ajua̱ ra Dada, nú'a̱ ya stá xi'ahʉ gue ma gui ha̱ñhʉ. 5Ra Xuua mi xi'tsate co ra dehe, pe nu'ahʉ́ ya 'bestho ma da zø ra pa gui nxistehehʉ co ra Ma̱ca Nda̱hi. 6Y de mi ña̱ui yá apostol bi 'ñani'ʉ bi 'ñembi: ―Ma zi Hmu'ihe, ¿ha gue nuya pabya ma gui umba ma'na'qui rá ts'ɛdi ra hnini Israel pa da nda̱? 7Nu'bʉ́ ra Zidada Jesu bi da̱tuabi'ʉ ne bi 'ñembi: ―Hingo rí 'ñep'ahʉ gui pa̱hʉ ha'mʉ ma da 'yøt'a Ajua̱ ra Dada nú'a̱ xa bensɛ'a̱ da 'yøt'e. 8Nu'ahʉ, nu'a̱ ma da nja, ma gui ha̱ñhʉ rá ts'ɛdi ra Ma̱ca Nda̱hi sta zøhø, ne ma gui dahʉ majua̱ni de gueque nuua Jerusale, ne gatho rá ngʉni Judea, ne nuni Nsamaria, ne gatho maxøgue rá ngʉni ra ximhai. 9Nu mi uadi bi ma̱nga njabʉ ra Zidada Jesu bi njʉts'i pa maña̱ ja yá thandi yá apostol. Nepʉ bi hyandi'ʉ gue bi go'ma 'nara guui, ne ya himbi za bi yopa hyant'ʉ ma'na'qui. 10Nepʉ de mi nøts'e mi handa ra Jesu bi ma pa mahets'i, mi da̱mfri'ʉ mi 'bahni yoho ya ɛnxɛ con gue'ʉ, mri hñe dega t'axi. 11Y nú'ʉ ya ɛnxɛ'ʉ bi 'ñembabi ya apostol: ―Nú'ahʉ gyá me Galileahʉ, ¿te 'bɛ guí nø'tshʉ nuni mahets'i? Nura Jesu xcá hyanthʉbya xa ma pa mahets'i, go guet'atho ma da yopa menguiua ngu xcá hyanthʉ bi ma, njabʉ ma da mengui. 12Nepʉ yá apostol ra Jesu bi ga̱i de ja ra t'øhø 'bo Olivo pa bi ma ja ra hnini Jerusale. Nurá ñabʉ de ra t'øhø pa ja ra hnini pɛ'tsa ngu 'na kilometro. 13Y nu de mi zøni'ʉ mbo ja ra hnini, bi bøxa ja ra tøngu habʉ xqui mihi'ʉ, ne ja mi 'bʉhni ri gatho'ʉ, ra Pedro, ra Cobo, ra Xuua, ra Andre, ra Lipe, ra Toma, ra Tolo, ra Teo, ma'na ra Cobo rá t'ʉ ra Alfeo, ne ra Simu nú'a̱ mi t'embi ra Selote, ne ra Juda rá cu ra Cobo. 14Gatho'ʉ nza̱ntho mi munts'i mi apabi Ajua̱ co 'nada ra mfeni, mahyɛgui co yá cu ra Jesu, ne ra Maria rá na̱na̱'a̱, ne ma'ra ya 'bɛhña̱. 15Ha nuya pa'ʉ bi munts'ini ngu 'na nthebe ne 'nate ya cu, y 'na'qui, ra cu Pedro bi 'mai madetho de gue'ʉ ne bi 'ñembi'ʉ: 16―Ma zi cu'ihʉ, pɛ'tsi te xi da njabʉ ngu nú'a̱ xqui ma̱nga ra Davi ne bi 'yofo ngu nú'a̱ xqui xipabi ra Ma̱ca Nda̱hi. Ra Davi bi ma̱ de ra Juda nú'a̱ to'o bi zixa ya ja̱'i pa bá jʉ ma zi Hmuhʉ ra Jesu. 17Y nujʉ dí pa̱hʉ gue nu'á̱ go gue'a̱ nehe mrá nxadi ra Jesu, ne mahyɛgui ndí pɛphʉ'a̱. 18Nu'á̱ bi pa ma zi Hmuhʉ ra Jesu, y co nú'a̱ ra boja̱ bi t'umbi, bi thanga 'nara hai. Nepʉ nu'á̱ bi dagui ma'mɛmfo, ne 'bestho bi fø rá mʉi ne bi bønga yá xefo, y bi du. 19Y gatho ya me Jerusale bi ba̱di nú'a̱ xqui nja, hangue nu'ʉ́ bi hñu'mbabi nura hai'a̱ de yá hña̱qui'ʉ Aceldama, rí bøni da 'ñena ra Hai dega Ji. 20Pɛ'tsi te da njabʉ ngu nú'a̱ xa t'ofo ja ra Ma̱ca T'ofo ja ya Salmo ne ena: Dá nhuata rá ngu'a̱, oto sti ma da 'mʉini. Nehe ena: Nu'a̱ mrá 'bɛfihma̱'a̱, dá mɛ ma'na ra ja̱'i. 21Hangue mahyoni ga huañhʉbya 'na de nú'ʉ to'o ndí 'ñohʉ gatho nú'ʉ ya pa ndá 'bʉhʉ co ma zi Hmuhʉ ra Jesu, 22desde mi xi'tsa ra Xuua asta mi ma mahets'i. Nu'a̱ tó'o ma ga huahnihʉ go gue'a̱ ma da maxcahʉ ga dahʉ majua̱ni gue ma zi Hmuhʉ ra Jesu ya xa yopa nte de ra du. 23Nepʉ bi huahni'ʉ 'nara cu rá thuhu ra Jose nú'a̱ xqui thu'mbabi ra Barsabá ne mi t'embi ra Justo, ne bi huahni'ʉ ma'na ra cu rá thuhu ra Matía. 24Nepʉ bi 'yapabi'ʉ Ajua̱ ne bi 'ñena: ―Ma zi Dada'ihe, go gue'e guí pa̱tca gatho ma mfenihe, 'ñutcahebya de nuya yoho ya cu 'bʉcua to'o de guehyʉ xcá huahni. 25Nu'i go guí pa̱di nda'ña̱ de guehyʉ xcá huahni pa da mɛp'a'i ne go di guehni dri apostol pa drá mpøte ra Juda nú'a̱ to'o bi nts'oqui ne bi 'uegue bi ma habʉ mri 'ñepi da ma. 26Y nu'ʉ́ bi rifa ne bi zo rá thuhu ra Matía, hangue ya bi ma 'mede co nú'ʉ 'rɛt'ama'ra yá apostol ra Zidada Jesu, pa bi yopa nzøt'a nú'ʉ 'rɛt'amayoho.

will be added

X\