RÁ ÑOHO RA TIMOTEO 4

1Dí 'bɛp'a'i ja rá thandi Ajua̱ ne ja rá thandi ra Zidada Jesucristo, go gue'a̱ ma da hña̱'mba nguɛnda gatho ya ja̱'i nú'ʉ di te ne nú'ʉ ya hindi te nu stua yopa ehe pa da nda̱. 2Guehna dí 'bɛp'a'i gue gui ma̱mba rá noya Ajua̱, ne gui ja gui 'yøt'e nza̱ntho. Unga ra ts'ofo, ntsʉte ne nzote con gatho ri hñoja̱'i, ne gui 'ñutuate. 3Ngue'a̱ ma da zø ya pa gue ya ja̱'i hinda ne da 'yøde nura hoga nt'utuate. Nu'ʉ́ ma'na da ho da 'yøde nú'a̱ hinxá hño, hangue ma da hyonga 'raya xahnate nú'ʉ di ma̱ ngu nú'a̱ di ho da 'yøde'ʉ. 4Nu'ʉ́ ya hinda ne da 'yøde nú'a̱ xi majua̱ni. Ma da 'uegue'ʉ pa da yopa dɛna ya 'bede nú'ʉ xa zansɛ ya ja̱'i. 5Pe nu'í, xi da su ri mfeni de gatho nú'a̱ da 'ñehe, ne gui tsɛta ya dumʉi. 'Yøt'a ra ts'ɛdi pa gui ma̱mba rá noya Ajua̱, ne gui pɛfi gatho nú'a̱ ra 'bɛfi xa t'a'a'i. 6Ngue'a̱ nugui ya bi zø ra ora pa ga unga ma te. Ya bi zø ra ora ga tsocua nuna ximhai. 7Ya stá øt'a ra ts'ɛdi pa stá nta̱te ja ra hoga tuhni. Ya stá juata nú'a̱ ra 'bɛfi bi t'aqui, ne stá su nú'a ra jamfri bi t'utcagui. 8Hangue nubyá bí 'bɛscagui 'nara tha̱ha̱ nú'a̱ ma da t'umba gatho nú'ʉ to'o ri hñoja̱'i. Ha nú'a̱ ra tha̱ha̱'a̱ ma go da 'raca ra Zidada nú'a̱ ra pa da yopa 'ñehe. Nú'á̱ go gue'a̱ ra hoga nzaya. Y hingo pa hønsɛgui nura tha̱ha̱'a̱, nehe pa gatho nú'ʉ to'o tø'mbabi rá yo'ehe'a̱. 9Nde nubyá, 'yøt'a ra ts'ɛdi gue 'nitho gui 'ñe gui c'a̱scagui. 10Ngue'a̱ ra cu Dema xa zogagui sɛhɛua ne bi ma pa Tesalonica, ngue'a̱ nu'á̱ ma'na bi ho nuna ra ximhai. Ha nura cu Crecente bi ma pa Galacia y nura cu Tito bi ma pa Dalmacia. 11Hønsɛ ra cu Luca dí 'bʉ'beua. De má 'ñu gui tsincabʉ ra cu Marco ngue'a̱ xi xá hño'a̱ pa da maxcagui ja ra 'bɛfi. 12Y nura cu Tiquico dá pɛnpʉ pa Efeso. 13Nu xcrí ehe gui ha̱ncabʉ ma pat'i duá tsopʉ Ntroa ja rá ngu ra cu Carpo. Ne gui ha̱ncabʉ ya libro. Nehe oxqui ma gui pumfri gui ha̱ncabʉ nuya libro dega xifri. 14Ra Jandro nú'a̱ ra huiti xi xa 'yøtca ndunthi ra nts'o'mʉi. Ra Zidada go gue'a̱ ma da gu'tuabi de nú'a̱ xa 'yøt'e. 15Hangue ne'i nsu ndunthi de gue'a̱, ngue'a̱ nu'á̱ xi ri nøt'atho de nú'a̱ dí ma̱ñhʉ. 16Nurá mʉdi bi zonca ra ts'ʉtbi pa bi xʉga ra uɛnda, ni 'na hinto bi maxcagui, ngue'a̱ gatho bi hyɛgagui sɛhɛ. Ajua̱ da punduabi'ʉ. 17Pe ra Zidada himbi hyɛgagui sɛhɛ. Nú'á̱ go bi 'raca ra ts'ɛdi pa dá ma̱ xá hño gatho nurá noya'a̱, ne pa bi 'yøde gatho nú'ʉ ya ja̱'i hingyá xodyo. Hangue njabʉ ra Zidada bi ña̱ngagui pa dá c'ot'i de rá ne ra zate. 18Nehe ma da ña̱ngagui de gatho nú'a̱ xá nts'o, ne ma da zixcagui pa ga ma ga 'bʉ nuni mahets'i habʉ bí manda'a̱. ¡Nú'á̱ go gue'a̱ dra nsunda pa nza̱ntho! Njabʉ gue'a̱. 19Fat'ajua̱bʉ ra nju Prisca ne ra cu Aquila ne gatho ya mengu rá ngu ra cu Onesiforo. 20Nura cu Rasto bá cohi nuni Corinto, y nura cu Trofimo dá tsogui nuni Mileto ngue'a̱ bi hñeni. 21'Yøt'a ra ts'ɛdi gui ja gui 'ñehe ante da dagui ya tsɛ. Fat'ajua̱'i ra cu Eubulo, ra cu Pudente, ra cu Linu, ra nju Claudia ne gatho nuya cu 'bʉiua. 22Ra Zidada Jesucristo da 'mʉi con gue'i. Ajua̱ da max'a'ihʉ. Njabʉ gue'a̱.

will be added

X\