RÁ ÑOHO RA TIMOTEO 1

1Núgui drá Pablo, rá apostolgui ra Zidada Jesucristo. Ajua̱ go gue'a̱ rá paha pa bi hñuxcagui drá apostolgui'a̱ ne bi mɛncagui ga ma̱ de ra te pa nza̱ntho nú'a̱ bi ña̱'ti da umbi gatho nú'ʉ to'o da gamfri ra Zidada Jesucristo. 2Nú'i zi cu Timu ma hma̱ca t'ʉ'i ja ra jamfri, dí op'a'i. Ajua̱ ma Dadahʉ ne ma Hmuhʉ ra Jesucristo da ja̱p'a'i, da mɛ'ts'a ra nthecate, ne da max'a'i pa gui 'bʉi te rá 'ñentho. 3Ajua̱ dí api ma pa ra xuui, ne ra ora'a̱ nza̱ntho dí beñ'a'i, ne dí umba njama̱di'a̱ por gatho nuya ja̱pi 'ra'a'i. Y nehe go gue'a̱ dí pɛpabi co ma mfeni xá nt'axi, ngu mi pɛpabi nehe ndu ma mbøxita xi maya'bʉ. 4Y nura ora tso ma mfeni de gue'i nú'a̱ ra pa'a̱ gá nzoni nú'bʉ dá nhyɛguiui, ga nehma̱ ga hant'a'i pa njabʉ ma'na ga johyaga. 5Nehe dí beni de ri hoga jamfri guí pɛ'tsi nú'a̱ bi mɛ'tsa 'mɛt'o ri ngande ra nju Loida ne ri ma̱ma̱ ra nju Eunice, y dí pa̱di xá hño gue ne'i go guet'a̱ ra jamfri guí pɛ'tsbya. 6Hangue por gue'a̱ dí zo'a'i gue gui 'yøt'a ra ts'ɛdi pa gui pɛfi xá hño nú'a̱ ra 'bɛfi bi 'ra'a Ajua̱ gui pɛfi nu ndá hu'ts'a ma 'yɛ. 7Ngue'a̱ Ajua̱ bi 'racjʉ 'nara ts'ɛdi pa ga zɛdihʉ, pa da nja ma hma̱tehʉ, pa ga su ma mfenihʉ, hingue pa ga ntsuhʉ. 8Hangue oxqui ntsa gui ma̱ gue guí camfri ma Zidadahʉ, nixi oxqui ntsa gui ma̱ gue dí ntsixhʉ núgui dí jot'ua fadi ngue'a̱ dí ma̱mba rá noya ra Zidada. Nu'a̱ gui 'yøt'e ha̱, ma̱nga ra ma̱ca noya masque gui tho ya ts'othogui ngu dí thoguiga, ne Ajua̱ da 'ra'a ra ts'ɛdi pa gui tsɛti. 9Nú'á̱ go gue'a̱ bi pøhøguihʉ ne bi zoncahʉ pa ga 'bʉhʉ strá nt'axi. Bi pøhøguihʉ po rá da̱nga hma̱te bi mɛscaguihʉ, y hingo por ma 'bɛfisɛhʉ bi pøhøguihʉ. Go gue'a̱ rá mfeni sɛhɛ pa bi pøhøguihʉ, ngue'a̱ ante da hyoca ra ximhai ya mi beni dua pɛhna ra Zidada Jesucristo pa da pøhøguihʉ. 10Y nu mi zøhøua ja ra ximhai numa Pøhøtehʉ ra Zidada Jesucristo, ja gue'bʉ bi hnequi nú'a̱ ra da̱nga hma̱te Ajua̱ pɛscaguihʉ pa bi pøhøguihʉ. Ra Zidada Jesucristo go gue'a̱ bi nta̱te de ra du, ne bi 'racjʉ ra te pa nza̱ntho nú'a̱ hinhya'mʉ da uadi. Y nurá noya Ajua̱ go gue'a̱ xicjʉ de gue'a̱. 11Y nugui go bi thuxcagui pa ga ma̱nga nú'a̱ ra ma̱ca noya'a̱. Nehe bi thuxcagui dega apostol pa ga zofo nú'ʉ ya ja̱'i hingyá xodyo, ne pa ga utuabi'ʉ rá noya Ajua̱. 12Y hangue por gue'a̱ dí thogui nuya ts'othoguiya. Pe masque dí ofadi, hindí 'bɛ ma tsa, ngue'a̱ dí pa̱di nú'a̱ to'o stá camfriga, ne dí pa̱di xá hño gue nu'á̱ ja rá ts'ɛdi pa da supca ma te nú'a̱ stá ɛnt'ua ja rá 'yɛ asta ra pa'a̱ da yopa pengui. 13Nu'i oxqui pumfri nú'a̱ stá xi'a'i, pa njabʉ gue'a̱ gui 'ñudi nehe, ngue'a̱ go gue'a̱ 'nara hoga nt'utuate. Ne gui 'ñudi co ra jamfri ne ra hma̱te nú'a̱ ri 'racjʉ ra Zidada Jesucristo. 14Su nehe nú'a̱ ra ma̱ca noya xa t'ɛnt'a ja ri 'yɛ co rá ts'ɛdi ra Ma̱ca Nda̱hi nú'a̱ 'bʉ ja ma corasohʉ. 15Nu'i guí pa̱di gue nuya cu de guepʉ Asia bi zogaguiua sɛhɛ. 'Ra de gue'ʉ go nura cu Figelo ne ra cu Ermogene. 16Pe nura cu Onesiforo nú'á̱ himbi ntsu bi e bi c'a̱scaua ja ra fadi ne ndunthi ya 'mi'qui bi hñubga ma mʉi. Y ra Zidada go gue'a̱ da mats'i ne gatho nuya mengu ja rá ngu'a̱. 17Ngue'a̱ nu mí zøcua Nroma nura cu'a̱, nú'á̱ bi ja bi hyongagui asta himbi zʉcagui. 18Hangue ra Zidada da mɛ'tsua ra nthecate nura pa'a̱ da nja ra nsʉca uɛnda. Nu'i guí pa̱di xá hño gue nu ndá 'bʉhʉbʉ Efeso xi bi maxcaguihʉ nú'a̱ ra zi cu'a̱.

will be added

X\