RÁ ÑOHO RA TESALONICENSE 2

1Núbya zi cuhʉ dí ne ga xi'ahe de rá yo'ehe ma Zidadahʉ ra Jesucristo nu xcrá muntshʉ con gue'a̱. 2Dí ba̱nte'ihe zi cuhʉ gue hingui ntsuhʉ nixi to gui hophʉ da 'uec'a'ihʉ de ri hoga mfenihʉ ne da 'ñeñ'ahʉ gue ra Zidada ya bá yopa pengui, nixi dega thedi, nixi dega noya, nixi dega hɛ'mi nú'a̱ di ma̱ gue go stá pɛnhe, ne nú'ʉ di ma̱ gue rá pa de rá yo'ehe ra Zidada ya bi zøhø. 3Oxqui hophʉ ni 'na tʉi to da hya'ahʉ ne da 'ñeñ'ahʉ gue nura pa ya bi zøhø. 'Mɛt'o ma da nanga ndunthi to'o da ña̱ ncontra de Ajua̱, ne da hnequi nú'a̱ ra 'ñøhø dega 'yøt'ats'oqui ma da ma ja ra nidu. Nepʉ 'mɛfa de gue'a̱ ma da zøhø ra Zidada. 4Nura 'yøt'ats'oqui gá ja̱'i'a̱ ma da ma ncontra de Ajua̱ ne da 'ñexa sɛhɛ, ne da ne da hña̱mba yá luga gatho nú'ʉ t'embi gue go gue'ʉ Ajua̱, nú'ʉ ri nsunda ya ja̱'i, asta hinda hñudi ja rá nda̱nija̱ Ajua̱, ne da ma̱ñ'a̱ gue go gue'a̱ Ajua̱. 5¿Ha gue hinguí beñhʉ gue nú'bʉ ndí 'bʉi con gue'ahʉ dá xi'a'ihʉ de guehna? 6Nu'ahʉ guí pa̱hʉ te rá 'bɛ'a̱ hinxa hopi da hnequitho nura 'yøt'ats'oqui gá ja̱'i'a̱. Ma da hnequi asta nú'a̱ ra pa da zø rá ora. 7Nura ts'oqui ya ri mpɛfi mant'a̱gui, hønsɛ tø'mabya da tha̱ca nú'a̱ to'o hingui hopi da hnequi. 8Nu'bʉ́ gue'bʉ da hnequi nú'a̱ ra ts'oja̱'i, ne ra Zidada ma da hyo'a̱ co 'nara noya da ma̱, ne da ma da huati co rá nsunda nu sta 'ñehe'a̱. 9Nu sta hnequi nura ts'oja̱'i'a̱ dri hña̱mpa rá ts'ɛdi ra Satá ne ma da 'ñudi ndunthi ya nt'udi ne da 'yøt'a ndunthi ya milagro dega nthate. 10Ne ma da hyat'i co ya nthate xi xá nts'o nú'ʉ to'o ma da ma ja ra nidu. Nu'ʉ́ mi tsa da mpøhø hma̱ha̱ pe himbi ne bi gamfri nú'a̱ xi majua̱ni hangue ma da ma ja ra nidu. 11Hangue ringue'a̱ Ajua̱ da pu'tua yá mfeni'ʉ pa da gamfri nuna ra nc'uambana̱. 12Pa njabʉ da duxa ra ts'oqui nuto gatho himbi ne bi gamfri nú'a̱ majua̱ni, nú'ʉ to'o ma'na bi ho ra ts'oqui que nú'a̱ majua̱ni. 13Pe nuje rí 'ñepcahe gue nza̱ntho ga umfe njama̱di Ajua̱ por gue'ahʉ zi cuhʉ yá hma̱di'ihʉ ra Zidada, nguetho Ajua̱ bi huahn'a'ihʉ ante da hyoca ra ximhai pa gui mpøhøhʉ. Ne gá mpøhøhʉ ngue'a̱ ra Ma̱ca Nda̱hi bi 'uec'a'ihʉ de ya ts'oqui, ne xcá camfrihʉ nú'a̱ majua̱ni. 14Pa guehna bi zohn'a'ihʉ Ajua̱ por nura ma̱ca noya stá xi'a'ihe pa da hnequi rá nsunda ma Zidadahʉ ra Jesucristo ja ri 'mʉihʉ. 15Hangue ringue'a̱ zi cuhʉ oxqui 'ueguehʉ. Pɛ'tshʉ xá hño ya nt'utuate nú'ʉ stá u't'a'ihe dega noya o nú'a̱ stá op'ahe. 16Ajua̱ ma Dadahʉ bi ma̱caguihʉ ne bi huegaguihʉ hangue bi 'racjʉ ra humʉi pa nza̱ntho ne bi 'racjʉ 'nara hoga nthø'mate. 17Nú'á̱ ne ma zi Hmuhʉ ra Jesucristo da nup'a ri mfenihʉ ne da ja'ahʉ gui 'yohʉ xá hño de nú'a̱ guí øthʉ ne nú'a̱ guí ma̱ñhʉ.

will be added

X\