RÁ ÑOHO RA TESALONICENSE 1

1Núga drá Pablo, ne ra cu Silvano ne ra cu Timu, dí pɛhn'a'ihebʉ nuna ra carta nu'ahʉ gyá gamfrihʉ guí 'bʉhʉbʉ Tesalonica ne guí 'bʉhʉ co Ajua̱ ma Dadahʉ ne co ma zi Hmuhʉ ra Jesucristo. 2Ajua̱ ra Dada ne ra zi Hmu Jesucristo da ja̱p'a'ihʉ ne da max'a'ihʉ pa gui 'bʉhʉ te rá 'ñentho. 3Zi cuhʉ, pɛ'tsi te ga umfe nza̱ntho njama̱di Ajua̱ por gue'ahʉ ngu rí 'ñepcahe ga øthe ngue'a̱ xi rí te ri jamfrihʉ ne gatho'ihʉ ma'na rí zi'ta ri hma̱tehʉ 'na ngu ma'na. 4Hangue nuje dí e'ts'a'ihe ri nsuhʉ ja yá nija̱ Ajua̱ ngue'a̱ xi ra da̱ngui ri jamfrihʉ masque guí thohʉ ya ts'othogui ne ya nt'ʉtsate. 5Pe gatho nuya thogui guí thohʉ, ja ri hnecni gue Ajua̱ øt'a nú'a̱ xá hño ne ma da 'yøt'a ra hoga ts'ʉtbi, ngue'a̱ por nuya ts'othoguiya Ajua̱ da za da ma̱ gue rí 'ñep'a'ihʉ gui 'bʉhʉ habʉ bí manda'a̱, ne por gue'a̱ grí sufrihʉ. 6Ajua̱ øt'a nú'a̱ xá hño da co'tsuabi nú'ʉ to'o ri ʉtsa'ihʉ. 7Nehe nú'ahʉ t'ʉtsa'ihʉ, Ajua̱ øt'a nú'a̱ xá hño da 'ra'a'ihʉ ra tsaya mahyɛgui con guecje nu stua pengui de mahets'i ra Zidada Jesu co ya ɛnxɛ nú'ʉ ha̱mpa rá ts'ɛdi'a̱. 8Nu stí 'ñeheua'a̱, ma da hnequi 'nara da̱nga tsibi ja rá nthets'i. Ma da 'ñehe pa da castiga nú'ʉ to'o hingui pa̱ Ajua̱ nixi hingui øtuabi rá ma̱ca noya ma Zidadahʉ ra Jesucristo. 9Nu'ʉ́ ma da gut'a yá thai ja ra nidu pa nza̱ntho, ne hinda za da 'mʉ'ʉ ja rá thandi ra Zidada habʉ ja rá nsunda ne rá ts'ɛdi. 10Nura pa stí 'ñehe'a̱, gatho ya cu nú'ʉ to'o camfri'a̱ ma da 'yø ne da nsunda'a̱. Ne'ahʉ ma gui 'yøhʉ ne gui nsundahʉ'a̱ ngue'a̱ gá camfrihʉ nú'a̱ dá xi'a'ihe. 11Por guehna nza̱ntho dí aphe Ajua̱ gue da max'a'ihʉ pa gui 'bʉhʉ ngu rí 'ñep'a'ihʉ ngue'a̱ xa zohn'a'ihʉ'a̱, ne dí aphe gue da nup'a ri mfenihʉ co rá ts'ɛdi'a̱ pa gui 'yøthʉ co 'nara johya gatho nú'a̱ xá hño ne pa gui 'yøthʉ ya 'bɛfi dega jamfri, 12pa njabʉ da hnequi rá nsunda ma Zidadahʉ ra Jesucristo ja ri 'mʉihʉ ne da t'e'ts'a ri nsuhʉ po rá hñoja̱'i Ajua̱ ne ra Zidada Jesucristo.

will be added

X\