RÁ ÑOHO RA PEDRO 3

1Ma zi hma̱di cu'ihʉ, nuna guehna rá ñoho ra carta dí op'a'ihʉ. Nu'a̱ rá mʉdi ra carta dá op'ahʉ ja guehni dá ben'ahʉ nú'a̱ xcá pa̱dihʉ, ne dá nup'a ri mfenihʉ. Y nepya dí yopa ben'ahʉ de gue'a̱ pa njabʉ hingui pumfrihʉ nú'a̱ xcá pa̱dihʉ. 2Dí ben'ahʉ nú'a̱ bi ma̱nga yá ma̱ca 'mɛhni Ajua̱ maya'bʉ, nehe dí ben'ahʉ nú'a̱ bi ma̱nga ma Zidadahʉ nú'a̱ to'o bi pøhøguihʉ. Y nú'á̱ go gue'a̱ bá pɛncahe núje dyá apostolhe pa dá xi'a'ihe nú'a̱ bi ma̱ñ'a̱. 3Pa̱hʉ gue nuyá nga̱ts'i ya pa ma da 'mʉ 'raya 'yøtbuhla gá ja̱'i nú'ʉ dya zistema ne di øt'a nú'a̱ go da ne'ʉ. 4Nu'ʉ́ ma da 'ñena: “¿Habʉ ja nú'a̱ bi ma̱nga ra Jesu gue ma da yopa 'ñehe?” Nu'ʉ́ ma da 'ñena gue ya hinda ma da 'ñehe ma Zidadahʉ, ngue'a̱ ma da 'ñeñ'ʉ gue desde mi 'bʉ ndu ma xitahʉ asta mapaya, desde mi thoca ra ximhai guet'atho ngu nza̱i. 5Nuya ja̱'i'ʉ ya hinda ma da ne da gamfri gue Ajua̱ go gue'a̱ bi hyoca mahets'i ne ra ximhai desde maya'bʉ, ne hindi camfri gue hønsɛ co rá noya Ajua̱ bi ma̱ bi nja 'bestho ra ximhai, mi o mbo ja ra dehe, ne ja bi bøhøni. 6Nepʉ nura ximhai'a̱ 'nara pa bi go'ma ra dehe ne bi nhuati'a̱. 7Pe nubyá nura ximhai ne mahets'i ja mapaya, Ajua̱ xa 'yɛ'mbabi da tsøgue. Y de da zø ra ora da nzø, Ajua̱ ri su hma̱ha̱, y nú'a̱ ra pa'a̱ da nja ra nsʉca uɛnda ne dra huata gatho ya ts'o'mʉi gá ja̱'i. 8Pe nu'ahʉ́, ma zi hma̱di cu'ihʉ, oxqui pumfrihʉ gue pa ma Zidadahʉ, nu'a̱ 'na pa gue'a̱ ngu 'na 'mo njɛya, ha nu'a̱ 'na 'mo njɛya pa gue'a̱ ngu 'na patho. 9Ra Zidada hinxa pumfri da 'yøt'a nú'a̱ xa ña̱tcahʉ gue ma da yopa 'ñehe, ngu ma̱nga 'ra gue ya xa pumfri. Hina, hinxa pumfri. Pe nu'á̱ pɛscahʉ ra pacencia, ne hingui ne'a̱ gue ni 'nara ja̱'i hinda 'mɛdi. Nú'á̱ ne gue gatho da ñobri. 10Pe dí pa̱hʉ gue nura Zidada ma da yopa 'ñehe, y sta da̱mfri ya ja̱'i ma da zø ra pa de rá yo'ehe ngu ra ora tsøhø 'nara be. Nu'bʉ́ mahets'i ne gatho nú'ʉ te bí jani ma da nhuati co ra tsibi asta dri ñʉni. Nehe nuna ximhai ma da za̱t'i con gatho nú'ʉ te jaua. 11Hangue nu'ahʉ́, mahyoni gui 'yohʉ xá hño ne gui pɛpabihʉ Ajua̱, ngue'a̱ gatho nú'a̱ jaua ja ra ximhai ne mahets'i ma da nhuati gatho. 12Hangue xi da ndø'mhʉ, ne gui da̱ma mpɛfihʉ ja rá 'bɛfi Ajua̱ pa 'nihi dua yopa pengui ma Zidadahʉ. Y nú'a̱ ra pa'a̱ gue'bʉ ma da za̱t'a mahets'i ne da nhuati, nehe gue'bʉ ma da za̱t'a gatho nú'ʉ te jaua. 13Pe Ajua̱ xa ma̱ gue ma da yopa hyoca mahets'i ne ra ximhai ma'ra'yo nú'a̱ habʉ ma da nja hønsɛ ra hño, ne hinhya'mʉ ma da nja ra ts'oqui. Hangue nujʉ́ dí tø'mhʉ gue ma da njabʉ. 14Hangue ma zi hma̱di cu'ihʉ, de gui tø'mhʉ da zø ra ora da yopa 'ñehe ra Zidada, 'yøthʉ ra ts'ɛdi pa strá nt'axi'ihʉ pa hinto da ña̱p'ahʉ nu sta 'yøt'a ra nsʉca uɛnda ra Zidada, pa njabʉ gui 'bʉhʉ xá hño ja rá thandi'a̱. 15Pa̱hʉ gue ma Zidadahʉ pɛscahʉ ndunthi ra pacencia, hangue hinxa 'ñehetho ngue'a̱ tø'mi gue da mpøhø ndunthi ya ja̱'i. Nehe ma zi cuhʉ ra Pablo co nura mfa̱di xa umbabi Ajua̱, ya xa 'yop'ahʉ de rá yo'ehe ma Zidadahʉ, ngu núna dí op'ahʉ nehe. 16Y ja nú'a̱ ra carta bi 'yop'a'ihʉ'a̱, ne gatho nú'ʉ ma'ra ya carta xa 'yofo'a̱, mahyɛgui nú'a̱ ma̱. Y 'raya xɛni de nuya t'ofo'ʉ xi xá hñei pa da zo rá mfeni 'na. Hangue nú'ʉ hingui pa̱tua rá noya Ajua̱ ne nú'ʉ ri yohna yá mfeni, 'na'ño ra mfeni beni'ʉ de nú'a̱ ma̱nga yá t'ofo ra cu Pablo, nehe de nú'a̱ ma̱nga nú'ʉ ma'ra ya xɛni de ra Ma̱ca T'ofo. Hangue nu'ʉ́ pɛ'tsi te da 'mɛdi. 17Ma zi hma̱di cu'ihʉ, ya gá pa̱hʉ nú'a̱ stá xi'ahʉ te ma da nja. Hangue nsuhʉ pa hinda ca'ahʉ nú'ʉ ya ts'oja̱'i, ngue'a̱ nu'bʉ da ca'ahʉ, ma gui 'ueguehʉ de ri jamfrihʉ. 18'Yøthʉ ra ts'ɛdi pa ma'na gui pa̱dihʉ ma Zidadahʉ ra Jesucristo nú'a̱ to'o bi pøhøguihʉ, ne pa gui pɛ'tshʉ ma'na ndunthi rá hma̱te ja ri corasohʉ. ¡Nu'á̱ rí 'ñepi ga nsundahʉ nubya ne pa nza̱ntho! Njabʉ gue'a̱.

will be added

X\