RÁ ÑOHO RA CORINTIO 6

1Hangue núje yá 'mɛhniguihe Ajua̱ dí ba̱nte'ihe gue hinda 'mɛditho nuna ra mpøhø xa 'ra'ahʉ Ajua̱ po rá hñoja̱'i. 2Ngue'a̱ Ajua̱ bi ma̱nga ja ra Ma̱ca T'ofo ne bi 'ñena: Nú'a̱ ra pa dá pɛhn'a ra mpøhø, gá hongagui ne dá ø't'a'i ri t'adi. Y nú'a̱ ra pa dá ne dá ña̱ñ'a'i, gá honga ma mfats'i, y dá fax'a'i. Ha nubya nugui dí xi'ahʉ gue nubyá guepya ya pa da za gui hyoñhʉ Ajua̱ pa gui mpøhøhʉ. 3Nuje hinto dí ø'tuahe ni 'nara nts'o'mʉi, pa njabʉ hinto da ña̱ma'ñʉ de rá 'bɛfi Ajua̱ nú'a̱ xa 'racje. 4Nu'a̱ dí øthe, dí udihe 'nara hoga'mʉi pa da hnequi gue yá hoga mɛfiguihe Ajua̱. Hangue dí tsɛtathohe gatho nú'a̱ dí thohe, ya ts'othogui, ra nhyoya, ne ya dumʉi. 5Stá tsɛthe ya mfɛi, xa jocje fadi, xa nabgahe ya mundo ja̱'i. Stá thohe ra nzabi, stá 'ñatha̱he, stá thohe ra thuhu. Ne gatho dá tsɛtathohe. 6Dí 'yohe co ma mfenihe xá nt'axi. Dí pa̱tuahe xá hño rá noya Ajua̱. Dí tsɛtathohe nú'a̱ øtcahe ya ja̱'i ne dí pɛ'tsuahe ra t'equ'ei. Ne dí 'yohe ngu utcahe ra Ma̱ca Nda̱hi, ne xi dí pɛ'tsuahe ra hma̱te ya ja̱'i, hingue dí ma̱nthe. 7Dí ma̱nbahe rá noya Ajua̱, ne gatho nú'a̱ dí øthe, dí øthe co rá ts'ɛdi'a̱. Co rá ts'ɛdi'a̱ dí 'yohe xá hño pa da za ga nta̱tehe ne ga ña̱nbahe rá noya'a̱. 8'Raya i'qui xi ri numahñoguihe ya ja̱'i, ha nu ma'ra ya i'qui ri numa'ñʉguihe. 'Raya i'qui esca ma nsuhe, ha nu ma'ra ya i'qui ña̱ma'ñʉ de guecje. 'Ra pecaguihe gue dyá c'uambahe, pe masque ri jaje njabʉ ya ja̱'i pe nuje hindí tsaya dí ma̱ñhe nú'a̱ majua̱ni. 9'Ra øt'e gue ngu hingui pa̱cje, pe Ajua̱ go gue'a̱ pa̱cje xá hño. 'Raya i'qui ya 'ñena da thogaguihe, pe hina, 'yøt'a Ajua̱ dí tethohe. Stá thohe ndunthi ya ts'othogui pe asta nubya hinstá tuhe. 10'Raya i'qui xi xa du ma mʉihe, pe ja rí hñusɛ ma mʉihe co nú'a̱ ra johya ri 'racje ra Zidada. Masque dí thohe ra nhyoya, pe ndunthi to'o stá zohe pa xa hña̱nga ya hño de Ajua̱. Masque 'ñena hinte dí pɛ'tshe, pe Ajua̱ ha̱ pɛ'tsa gatho nú'a̱ dí hoñhe, hangue njabʉ hinte ri 'bɛtcahe. 11Ma zi cu'ihʉ gyá menguhʉ Corinto xi drí ma̱'ahe, hangue stá xi'ahe gatho nú'a̱ stá beñhe, ne hinte dí cøn'ahe. 12Xi drí ma̱'ahe con gatho ma mʉihe, pe nu'ahʉ hingrí ma̱cje con gatho ri mʉihʉ. 13Núgui dí zo'ahʉ dí nja ngu 'nara dada zofo yá ba̱tsi, hangue dí tø'mi gui coscahʉ ra hma̱te. 14Nubyá dí xi'ahʉ, oguí ntsixhʉ co nú'ʉ hingyá gamfri. Ngue'a̱ ¿hanja da za da 'mʉi 'nadbʉ ra hñoja̱'i co ra nts'o'mʉi? Ne ¿hanja da za da 'mʉ mahyɛgui ra ñot'i ne ra 'bɛxuui? 15Ne ¿hanja da za da mɛ'tsa 'nadra mfeni ra Zidada Jesucristo co ra Satá? Ne ¿hanja da za da mɛ'tsa 'nadra mfeni ra gamfri ne nú'a̱ hingrá gamfri? 16Ne ¿hanja da za da nja ya c'oi ja rá nija̱ Ajua̱? Hina, hinda za. Nugui dí xi'ahʉ njabʉ ngue'a̱ nujʉ go rá nija̱guihʉ Ajua̱ nú'a̱ te, ngu bi 'ñena'a̱ ja ra Ma̱ca T'ofo: Nugui ma ga 'bʉi con gue'ahʉ, ne ma ga 'yo habʉ gri 'yohʉ; nugui go dri Ajua̱guihʉ, ha nu'ahʉ́ go dua hnini'ihʉ. 17Hangue Ajua̱ bi 'ñena nehe ja ra Ma̱ca T'ofo: 'Ueguehʉ de nú'a̱ øt'a ya ts'oja̱'i pa hingui tɛnbahʉ nuyá ts'ot'øt'e øt'e'ʉ, ena njabʉ ma Zidadahʉ; ne oxqui øthʉ nú'a̱ xá nts'o, pa njabʉ da za gui 'bʉhʉ con guequi, ha nugui con gue'ahʉ. 18Ne go dri dadaguihʉ, y nu'ahʉ dua t'ʉ'ihʉ ne dua t'ixu'ihʉ, njaua xicjʉ Ajua̱ ma Hmuhʉ nú'a̱ to'o pɛ'tsa gatho ra ts'ɛdi.

will be added

X\