RÁ ÑOHO RA CORINTIO 4

1Nuje hinxa zabiguihe ga ø'tuahe rá 'bɛfi Ajua̱ ngue'a̱ nu Ajua̱ go gue'a̱ xa 'racje nuna 'bɛfina̱ po rá nthecate. 2Y gatho nú'a̱ dí pɛfihe hindí pɛfihe mant'a̱gui nixi dí mpɛfihe co 'nara 'bɛtsa. Hindí udihe co 'raya nthate, nixi dí patuahe rá noya Ajua̱. Nu'a̱ dí øthe, dí ma̱ñhe nú'a̱ majua̱ni de ja yá thandi ya ja̱'i. Y njabʉ da za da hyandgahe gatho ya ja̱'i gue dí pɛfihe 'nara 'bɛfi xá hño ja rá thandi Ajua̱. 3Nu'ʉ tó'o hinxa mpøhø ne hingui ne da gamfri rá noya Ajua̱ dí ma̱ñhe, go gue'ʉ hingui tso ja yá mfeni te rí bøni rá noya'a̱, ngue'a̱ ha̱da ra velo pa jutua yá mfeni. 4Nu'ʉ́ xa go'tua yá mfeni ra ts'onda̱hi nú'a̱ di nda̱ de guecua ja ra ximhai, pa hinda yot'a ja yá mfeni rá noya Ajua̱ nú'a̱ utcahʉ rá nsunda ma Zidadahʉ ra Jesucristo, nú'á̱ xi xá nsunda rá 'mʉi'a̱ ngu rá 'mʉi Ajua̱ rá Dada. 5Nú'a̱ dí xi'ahe, hindí xi'ahe pa go gui camfriguihe, dí xi'ahe pa go gui camfrihʉ ma Zidadahʉ ra Jesucristo. Y nuje hønsɛ dyá 'bɛgohe de gue'ahʉ po rá ngue ra Zidada Jesu. 6Nu mi hyoca ra ximhai Ajua̱ bi 'ñena: “Dá nja ra ñot'i ja ra 'bɛxuui.” Y nu Ajua̱ go guet'a̱ xa yotca ma mfenihʉ nehe, pa njabʉ bi za dá handuahʉ rá nsunda'a̱ nú'a̱ bi 'ñe bi 'ñutcahʉ ma Zidadahʉ ra Jesucristo co rá 'mʉi. 7Nujʉ́ dí njahʉ ngu 'nara ts'øe dega dohmi xa t'øt'e dega 'mɛ'tsboja̱, dí pɛ'tsuahʉ rá noya Ajua̱ pa dí ma̱ñhʉ. Y dí njahʉbʉ pa da hnequi gue nura ts'ɛdi dí pɛ'tshʉ go xa 'racjʉ Ajua̱, hingo de ma ts'ɛdisɛhʉ. 8Nuje masque habʉraza t'ʉtsaguihe, pe Ajua̱ go gue'a̱ ña̱ngaguihe. Ha masque ya hindí pa̱he te ga øthe, pe Ajua̱ nza̱ntho faxcahe pa hinda du ma mʉihe. 9Masque ri dɛngahe ya ja̱'i pa te da 'yøtcahe, pe Ajua̱ hingui hɛgasɛhe. Masque ya ja pa da hyoje ya ja̱'i, pe Ajua̱ ri suje pa hinte ga thohe. 10Nza̱ntho t'øtcahe ngu bi t'ø'tua ra Zidada Jesu y asta himbi tho, pe nu'á̱ bi yopa nte de ra du, y nubyá go gue'a̱ ri ña̱ngaguihe de ya ts'othogui, y njabʉ ri hneca rá ts'ɛdi ja ma 'mʉihe. 11Nuje mientra dí tehe, 'na pa ngu 'na pa dí thoguihe njabʉ y asta da za da thogaguihe po rá ngue ma Zidadahʉ ra Jesucristo. Dí thohe njabʉ pa da hnequi ja ma 'mʉihe gue ra Zidada Jesu bi yopa nte ne ri ña̱ngaguihe de ja ya ts'othogui. 12Nuje dí thohe ya ts'othogui ne asta da za da thogaguihe, pa njabʉ nu'ahʉ da za gui pɛ'tshʉ ra te pa nza̱ntho. 13Nuje dí pɛ'tshe ra jamfri ngu mi pɛ'tsa nú'a̱ to'o bi 'yofo njaua ne bi 'ñena: “Nugui dá camfri Ajua̱ da maxqui, hangue por gue'a̱ dá ma̱ gue nu'á̱ xi majua̱ni ja rá ts'ɛdi.” Necje dí camfrihe Ajua̱, hangue hindí tsuhe ga ma̱nbahe rá noya'a̱. 14Ngue'a̱ nuje dí pa̱he gue nu Ajua̱ to'o bi japi bi yopa nte de ra du ma Zidadahʉ ra Jesu, go guet'a̱ ma da jacjʉ ga yopa ntehʉ nehe de ra du ngue'a̱ dí 'bʉhʉ co ma Zidadahʉ ra Jesu, ne da zixcahʉ, nguje ngu'ahʉ, pa grá 'bʉhʉni ja rá thandi'a̱. 15Gatho nuya ts'othogui stá thohe, stá thohe njabʉ po rá ngue'ahʉ, ne pa da gamfri ma'ra ya ja̱'i nehe, pa njabʉ gathoguihʉ ga umfʉ njama̱di Ajua̱, y njabʉ ma'na da hnequi rá nsunda'a̱. 16Hangue hinga 'bɛ ma ts'ɛdihʉ pa ga pɛphʉ'a̱, masque 'yo rí the ma nzaquihʉ, pe numa 'ra'yo tehʉ 'na pa ngu 'na pa 'yo rí nja rá ts'ɛdi. 17Nuya ts'othogui dí thohʉbya, 'bestho ma da thoguitho y hingyá da̱ngui ngu rá nda̱ngui nú'a̱ ra johya ma dí t'acjʉ, ngue'a̱ po nú'a̱ dí thohʉbya ma dí t'acjʉ 'nara da̱nga johya nu xcrá tsøñhʉ nuni habʉ xá nsunda, y nura johya'a̱ xi dra da̱ngui ne hinhya'mʉ ma da uadi. 18Hangue hinda 'yoda ma mfenihʉ ya t'øt'e nú'ʉ dí hanthʉ de guecua ja ra ximhai, ngue'a̱ gatho'ʉ ma da uadi da thogui. Go dá 'yoda ma mfenihʉ nú'ʉ ya hño bí ja mahets'i nú'ʉ hini hnequi, ne hinda ma da uadi da thogui.

will be added

X\