RÁ ÑOHO RA CORINTIO 1

1Núgui drá Pablo rá apostolgui ma zi Hmuhʉ ra Jesucristo. Ajua̱ go rá paha'a̱ pa bi hñuxcagui dega apostol. Nugui co ra cu Timoteo dí op'a'ihe nuna carta, nú'ahʉ gyá gamfrihʉ guí 'bʉhʉbʉ Corinto, ne pa gatho nú'ʉ ma'ra ya gamfri 'bʉi ja ma'ra ya hnini de guepʉ ja ra hai Acaya. 2Ajua̱ ma Dadahʉ ne ma zi Hmuhʉ ra Jesucristo da ja̱p'a'ihʉ ne da max'ahʉ pa gui 'bʉhʉ te rá entho. 3Ga xøcambenihʉ Ajua̱ nurá Dada ma zi Hmuhʉ ra Jesucristo, ngue'a̱ go gue'a̱ ma Dadahʉ nú'a̱ pɛscahʉ ra nthecate ne go gue'a̱ nza̱ntho hubga ma mʉihʉ. 4Nú'á̱ hubga ma mʉihʉ ora dí thohʉ ya ts'othogui, pa njabʉ nujʉ́ da za ga hu'mbahʉ yá mʉi nú'ʉ ma'ra to'o thogui ya ts'othogui nehe, ngu bi hñubga ma mʉihʉ nehe Ajua̱. 5Njabʉ ngu ma zi Hmuhʉ ra Jesucristo bi thogui ndunthi ya ts'othogui, njabʉ nehe dí sufrihʉ por gue'a̱, pe por gue'a̱ dí ha̱ñhʉ ndunthi ra humʉi nehe. 6Hangue nuje xi dí thohe ya ts'othogui pa njabʉ nu'ahʉ da za gui ha̱ñhʉ ra humʉi ngu nú'a̱ dí ha̱ñhe ne pa da za gui mpøhøhʉ. Nuje Ajua̱ hubga ma mʉihe pa njabʉ nu'ahʉ nehe da za gui ha̱ñhʉ nuna ra humʉina̱ ora guí thohʉ ya ts'othogui nehe, pa njabʉ da za gui tsɛthʉ. 7Nuje xi dí camfrihe gue nu'ahʉ ma gui tsɛthʉ nuya ts'othogui ngu stá tsɛthe, ngue'a̱ dí pa̱he gue nura ora guí thohʉ ya ts'othogui, ra ora'a̱ guí ha̱ñhʉ ra humʉi ngu nú'a̱ dí ha̱ñhe nehe. 8Zi cuhʉ, dí nehe gui pa̱hʉ de nuya ts'othogui dá thoguihe de guehni Asia. Gue'ʉ 'raya ts'othogui xi ya da̱ngui, ya mi otho ma ts'ɛdihe pa ga tsɛthe, ya nixi ndi tø'mhe gue stá yopa ntehe ma'na'qui. 9Nuje ya ndí njahe ngu 'raya ja̱'i nú'ʉ xa t'ɛ'mbi pa da tho. Dá thohe njabʉ pa ma'na dá pa̱dihe gue Ajua̱ go gue'a̱ ña̱ngaguihe de ya ts'othogui, ngue'a̱ de guecsɛhe hinte tsa ga øthe, y nu'á̱ ja rá ts'ɛdi pa da japi da yopa nte nú'ʉ ya xa du. 10Ajua̱ go gue'a̱ bi ña̱ngaguihe de nú'ʉ ya da̱nga ts'othogui habʉ ma xa thogaguihe, y asta nubya ri sigui ri ña̱ngaguihe, ne dí tø'mhe gue ma da sigui da ña̱ngaguihe. 11Nu'á̱ ma da sigui da ña̱ngaguihe 'bʉ gui faxcahe gui 'yaphʉ'a̱ por guecje. Y nu'bʉ ndunthi ya cu apabi Ajua̱ por guecje, nu'bʉ́ 'mɛfa ndunthi ma da umba njama̱di'a̱ por nú'a̱ xa 'yøt'e'a̱ con guecje por yá nt'adi'ʉ. 12Co 'nara johya ne co 'nara mfeni xá nt'axi dí xi'ahe gue nuje stá 'yohe xá hño ja yá thandi ya ja̱'i de gatho ya hnini habʉ stá 'yohe, ne ma'na ndunthi gá handgahe nu ndá 'bʉhebʉ. Co rá mfats'i Ajua̱ nza̱ntho stá 'yohe xá nt'axi ja rá thandi'a̱, ngue'a̱ nu'á̱ xa 'racje ra ts'ɛdi pa dá øthe njabʉ, hingo de ma mfenisɛhe dá øthe. 13Gatho nuya noya dí op'ahe de ja ma cartahe go guehna da za gui hñe'tihʉ ne gui pa̱dihʉ, ne dí tø'mhe gue gui pa̱dihʉ xá hño. 14Ya guí pa̱hʉ teraza de nú'a̱ stá xi'ahe gue nu stí yopa menga ma Zidadahʉ ra Jesu nuua ja ra ximhai, ma gui esca ma nsuhe ngu nuje ma ga e'ts'ahe ri nsuhʉ nehe, ne dí tø'mhe gui pa̱hʉ ma'na xá hño de guehna. 15Nugui ndí humamʉi gue nguí numahñoguihʉ, hangue por gue'a̱ ndí beni stá c'a̱'ts'ahʉ de ndá ecua Macedonia, ngue'a̱ ndí beni gue xcá johyahma̱hʉ 'bʉ stá thopʉ pa xa za stá c'a̱'ts'ahʉ yo'qui. 16Nu nduá ehe pa nuua Macedonia, dá behma̱ gue de má 'ñu stá gathma̱bʉ Corinto pa stá tsøñ'ahma̱hʉ, y ndí beni nehe gue nura pa stá ma de guecua, stá yopa gathma̱bʉ ma'na'qui, y de guepʉ xcá nexcahma̱hʉ pa stá thogui asta ja ra hai Judea. 17Xi nu de ndá xi'ahʉ gue ga mabʉ, ¿ha gue gá beñhʉ gue ndí ma ga ha'ahʉ? O ¿ha gue guí beñhʉ gue dí øt'a ngu nú'a̱ øt'a nú'ʉ hingyá gamfri? Ngue'a̱ nú'ʉ́ go gue'ʉ øt'a njabʉ, ts'ʉ da 'ñena ha̱, ts'ʉ da 'ñena hina. Pe nugui hindí njabʉ. 18Ajua̱ pa̱di gue nuje hinda za ts'ʉ ga eñhe ha̱, ts'ʉ ga eñhe hina. 19Nugui co ra cu Silvano ne ra cu Timoteo nza̱ntho stá xi'ahe rá noya ra Zidada Jesucristo rá T'ʉ Ajua̱, y nurá noya'a̱, hingue ts'ʉ da 'ñena ha̱, ts'ʉ da 'ñena hina. Nu'á̱ nza̱ntho øt'a nú'a̱ ma̱. 20Ngue'a̱ gatho nú'a̱ xqui ña̱tcahʉ Ajua̱, bá pɛhna rá T'ʉ pa go bi 'yøt'e'a̱, pa bi nja gatho ngu nú'a̱ xqui ña̱gui. Hangue po ra Zidada Jesucristo dí xøcambenihʉ Ajua̱, ne dí eñhʉ, “Njabʉ gue'a̱”. 21Nu Ajua̱ go gue'a̱ bi 'yøt'e pa dá 'bʉhʉ co ma zi Hmuhʉ ra Jesucristo, ne go xa 'racjʉ ra ts'ɛdi pa ga pɛphʉ'a̱. 22Ne xa 'racjʉ ra Ma̱ca Nda̱hi pa da 'mʉi ja ma corasohʉ, go gue'a̱ 'nara seña gue yá mɛtiguihʉ'a̱. Y nú'á̱ go gue'a̱ 'nara mʉdi ja̱pi dí ha̱ñhʉ de guecua ja ra ximhai de dí t'acjʉ ma'ra ya ja̱pi nuni mahets'i. 23Pe nugui hindá catbʉ Corinto ngu ndí behma̱, ngue'a̱ ndí tsu stá zo'ahʉ nts'ɛdi y njabʉ xcá ʉhʉ. Ajua̱ pa̱di xá hño gue dá beni njabʉ, ne dí unga ma te 'bʉ hindí ma̱nga majua̱ni. 24Hindí ne ga mabʉ pa go ga xi'ahʉ nda'na̱ gui camfrihʉ pa go da ua'a̱ ga ma̱, ngue'a̱ nu'ahʉ́ ya xcá camfrihʉ xá hño rá noya Ajua̱. Hønsɛ nu'a̱ dí ne, ga nup'a ri mfenihʉ pa ma'na gui johyahʉ.

will be added

X\