1 Ra Ma̱ca Nda̱hi xa ma̱ xi xá hño ne ena gue nuyá nga̱ts'i ya pa 'raya cu ma da 'uegue de ra jamfri ngue'a̱ ma da hñuxa nt'øde nú'a̱ di ma̱nga ya hyate ja̱'i nú'ʉ di udi ya nt'udi dega ts'onda̱hi. 2 Nú'ʉ ya yohmi ja̱'i ma da ma̱nga ya nc'uamba ne da ts'oca yá mfeni. 3 Nuya ts'oja̱'i'ʉ ma da hña̱cuabi ya ja̱'i pa hinda ntha̱ti. Ne da hña̱cuabi pa hinda zi 'raya nzaqui, masque gatho ya nzaqui go bi hyoca Ajua̱ pa ga tsihʉ co ra jama̱di nújʉ dyá gamfrihʉ ne stá pa̱hʉ nú'a̱ majua̱ni. 4 Ngue'a̱ gatho nú'a̱ bi hyoca Ajua̱, gatho xá hño. Hingui ho te ga ʉtsahʉ, hønsɛ ga umfʉ njama̱di Ajua̱ ora te dí tsihʉ. 5 Ngue'a̱ rá noya Ajua̱ ena gue gatho ya nzaqui xá nt'axi. Hangue ga aphʉ Ajua̱ da ja̱pi gatho nú'a̱ te dí tsihʉ, y njabʉ xá nt'axi nú'a̱ dí tsihʉ. 6 'Bʉ gui 'ñutua ya cu gatho nú'a̱ dí xi'a'i, ne 'bʉ gui pa̱di xá hño ra ma̱ca noya nú'a̱ ma̱ de ma jamfrihʉ ne ra hoga nt'utuate nú'a̱ xcá tɛni, nu'bʉ́ ma xi gui hñoga mɛfi de ra Zidada Jesucristo. 7 Ogrí ho gui 'yøde nuya ts'o'bede de ra ximhai ngu nú'ʉ ma̱nga ya 'ña̱mfeni ja̱'i. 'Yøt'a ra ts'ɛdi pa ma'na gui 'bʉi 'nara hoga'mʉi. 8 Ngue'a̱ nu'a̱ tó'o japi da 'ña̱nga rá ndo'yo pa da nja rá ts'ɛdi, hønsɛ 'na tʉi ri muui rá 'bɛfi. Pe nu'a̱ tó'o øt'a ra ts'ɛdi pa da 'mʉ 'nara hoga'mʉi, nurá 'bɛfi'a̱ ma'na ri muui, ngue'a̱ hingue hønsɛ nuua ja ra ximhai ma da muui rá 'bɛfi'a̱, nehe ma da muui ja rá ñoho ra 'mʉi. 9 Nuna noya stá xi'a'i go guehna majua̱ni, hangue rí 'ñepi gue gatho ya ja̱'i da gamfri. 10 Y hangue por gue'a̱ xi drí mpɛfihʉ ne dí thohʉ ya ts'othogui ngue'a̱ dí camfrihʉ 'nat'a Ajua̱ nú'a̱ te. Y nú'á̱ go gue'a̱ ra Pøhøte pa gatho ya ja̱'i, pe ma'na pa nú'ʉ to'o camfri'a̱. 11 'Ñudi nuya ya noya dí xi'a'i, ne manda da t'øt'e. 12 Oto di dintstho nú'a̱ guí ma̱ ngue'a̱ grá ba̱sja̱'itho. Nu'i 'ñudi ra hoga'mʉi pa gue'a̱ da 'yøt'a ya cu nehe. Nura hoga'mʉi gui 'ñudi, nú'a̱ gui ma̱nga ya hoga noya, gui 'ñequ'ei, gui pɛ'tsa ra hma̱te, gui pɛ'tsa ra jamfri, ne strá nt'axi ri mfeni. 13 Mientra ga mabʉ, 'yøt'a ra ts'ɛdi pa gui hñe'tuabi ra Ma̱ca T'ofo ya cu, pa gui zofo'ʉ ne gui 'ñutuabi'ʉ. 14 Jamasu nú'a̱ rá 'bɛfi Ajua̱ bi t'a'a'i nú'a̱ bi ma̱nga ra Ma̱ca Nda̱hi gui pɛfi nu ndá hu'ts'ahe ma 'yɛhe núje dyá nda̱he de ra nija̱. 15 Pɛfi gatho nuya t'øt'eya. Ja da mpɛfini con gatho ri mʉi, pa gatho ya cu ne ma'ra ya ja̱'i da hyandi gue rí te ri jamfri ne ri mfa̱di ja rá 'bɛfi Ajua̱. 16 Xi da nsu sɛhɛ, ne jamasu de nú'a̱ guí udi. Oguí tsaya gui 'yøt'a njabʉ, ngue'a̱ nu'bʉ gui 'yøt'a njabʉ, nu'bʉ́ gui mpøhø ne da mpøhø nú'ʉ to'o da 'yøde'i.
