RÁ MɄDI RA TIMOTEO 2

1Rá mʉdi dí 'bɛp'a'ihʉ gue gui orahʉ por gatho ya ja̱'i. Gui 'yaphʉ Ajua̱ da mats'i'ʉ, ne gui umfʉ njama̱di'a̱. 2Gui 'yaphʉ Ajua̱ po ya da̱nga nda̱ ne por gatho nú'ʉ ha̱ ra ts'ʉtbi, pa njabʉ da za ga 'bʉhʉ 'nara 'mʉi te rá 'ñentho, ne pa da za ga pɛ'tsuahʉ rá ntsu Ajua̱ ne ga 'yohʉ ngu rí 'ñepcahʉ ne hinte ga jahʉ. 3Nuna go guehna xá hño, ne go guehna ri ho Ajua̱ ma Pøhøtehʉ. 4Nú'á̱ ne gue gatho ya ja̱'i da mpøhø ne da ba̱di'ʉ nú'a̱ xi majua̱ni. 5'Nat'a Ajua̱ 'bʉi, nehe 'bʉi 'natho nú'a̱ to'o 'bande de Ajua̱ co ya ja̱'i, y nú'á̱ go gue'a̱ ra Zidada Jesucristo nú'a̱ to'o bá e bi nja̱'iua ja ra ximhai. 6Nu'á̱ bi unsɛ rá te pa bi du pa bi gu'tua yá thai gatho ya ja̱'i. Ha nu mi zø ra ora, bi t'unga nt'øde pa bi fa̱di gue nu'á̱ bi du pa bi pøhø ya ja̱'i. 7Y pa gue'a̱ bi thuxcagui dega apostol pa ga ma̱mba rá ma̱ca noya Ajua̱. Hindí hate, dí ma̱nga majua̱ni. Bi thuxcagui pa ga nxahnate de ya ja̱'i nú'ʉ hingyá xodyo pa ga utuabi'ʉ de ra jamfri nú'a̱ majua̱ni. 8Dí ne gue habʉraza ra luga habʉ ri munts'a ya cu, gatho ya 'ñøhø da gʉxa yá 'yɛ da 'yapabi Ajua̱ co yá mfeni strá nt'axi, ne hindri ncuɛ, nixi da nehmya̱. 9Nehe dí ne gue gatho ya 'bɛhña̱ da jamasu pa da hñe ngu rí 'ñehe. Hinda hñe dega nt'ets'i. Hindí ne gue da 'ñeña̱ dega nt'ets'i, nixi da 'ñets'i co ra oro, ni co ya do mahotho, nixi co ya he nú'ʉ xi xá ma̱di. 10Nu'a̱ dí ne gue da 'yøt'e'ʉ, dá 'yøt'a ya hoga 'bɛfi ngu rí 'ñepa 'nara hoga 'bɛhña̱ nú'a̱ 'yo ja rá ntsu Ajua̱. 11Ya 'bɛhña̱ dá 'yødetho rá noya Ajua̱ ja ra nija̱ pa da ba̱di, ne dá 'yøt'e ngu nú'a̱ da sipabi. 12Hindí ne gue go ya 'bɛhña̱ da xahna ya 'ñøhø ja ya hmunts'i, nixi hingo ma'na da manda'ʉ que ya 'ñøhø. Dá 'yøstho. 13Ngue'a̱ Ajua̱ bi hyoqui rá mʉdi ra Adá, nepʉ ra Eva. 14Y hingo ra Adá bi thát'i. Nura 'bɛhña̱ go gue'a̱ bi thát'i, hangue bi dagui ja ra ts'oqui. 15Hangue nubyá 'bʉi yá ba̱tsi co ndunthi ya ʉgui, pe ya 'bɛhña̱ da mpøhø 'bʉ hinda 'uegue de yá jamfri, 'bʉ da mɛ'tsa ra hma̱te, 'bʉ da 'ño strá nt'axi, ne 'bʉ da 'mʉi ngu rí 'ñepi.

will be added

X\