RÁ MɄDI RA XUUA 1

1Ma ga xi'ahʉ de ma zi Hmuhʉ ra Jesucristo nú'a̱ to'o go guesɛ rá Noya Ajua̱ ne ri unga ra 'ra'yo te. Nú'á̱ ya mi 'bʉi desde rá mʉdi, y go guet'a̱ dá hanthe ne dá ødehe nú'a̱ te bi ma̱, dá nhyandahmihe con gue'a̱ ne dá thanihe'a̱. 2Nú'á̱ mbi 'bʉhui Ajua̱ ra Dada, nepʉ bá e bi nja̱'iua ja ra ximhai ne bi za to bi hyandi. Y go guecsɛhe dá hanthe, ne nubyá dí damajua̱nihe de gue'a̱ nú'a̱ to'o nza̱ntho ja rá te. 3Nú'a̱ dá hanthe, ne nú'a̱ dá øtuahe rá noya, go gue'a̱ dí xi'ahe, pa nu'ahʉ nehe gui pa̱dihʉ'a̱ ngu nuje dá pa̱he'a̱, ne pa njabʉ ga 'bʉhʉ mahyɛgui co 'nada ra mfeni co Ajua̱ ma Dadahʉ ne ra zi Hmu Jesucristo rá T'ʉ. 4Hangue dí op'a'ihʉ nuya noyaya pa xi ga johyahʉ mahyɛgui. 5Nuje dí xi'ahe nú'a̱ bi xicje ma Zidadahʉ ra Jesucristo, gue Ajua̱ xá nt'axi nja ngu 'nara hyats'i ri yot'i, ne habʉ 'bʉi'a̱ otho ra 'bɛxuui. 6'Bʉ dí eñhʉ gue dí 'nada ra mfenihʉ co Ajua̱, pe 'bʉ dí 'yohʉ ja ra 'bɛxuui ne dí øthʉ ya ts'oqui, nu'bʉ́ 'nadyá c'uambahʉ ngue'a̱ hindí øthʉ nú'a̱ xá hño. 7Pe 'bʉ dí 'yohʉ ja ra hyats'i ngu nja'a̱ 'bʉi ja ra hyats'i, nu'bʉ́ dí pɛ'tshʉ 'nada ra mfeni, y co rá ji ma zi Hmuhʉ ra Jesucristo rá T'ʉ Ajua̱ xʉgaguihʉ gatho ma ts'oquihʉ. 8'Bʉ dí eñhʉ gue hindyá 'yøt'ats'oquihʉ, dí nhyat'asɛhʉ ne hinxa yʉt'a ja ma mfenihʉ nú'a̱ majua̱ni. 9'Bʉ ga daphʉ ma ts'oquihʉ Ajua̱, nu'á̱ da pungaguihʉ, ne da xʉgaguihʉ gatho ma ts'oquihʉ, ngue'a̱ nu'á̱ øt'e gatho nú'a̱ xá hño ne øt'e gatho nú'a̱ ma̱. 10'Bʉ dí eñhʉ gue hinstá øthʉ ya ts'oqui, nu'bʉ́ ja ra uɛnda dí ec'uambahʉ Ajua̱, y rá noya'a̱ hinxa yʉt'a ja ma mfenihʉ.

will be added

X\