RÁ MɄDI RA CORINTIO 2

1Zi cuhʉ, nugui nu ndá mabʉ pa dá zo'ahʉ de rá noya Ajua̱, hindá zo'ahʉ co 'raya da̱nga noya xá hñei, nixi co ndunthi ra mfa̱di de guecsɛhɛ. 2Pe nu de nduá 'bʉpʉ, dá ja dá zo'ahʉ hønsɛ de ma Zidadahʉ ra Jesucristo nú'a̱ bri pont'a ja ra pont'i ne bi tho, ne hindá zo'ahʉ de ma'na ra noya. 3Nu ndá zo'ahʉ mi otho ma ts'ɛdisɛ, ne mi 'racagui ndunthi ra ntsu pa ga ña̱, asta ndrí hua̱t'i. 4Hindá ne dá zo'ahʉ co ra mfa̱di de ra ximhai pa gá camfrihʉ, nugui dá zo'ahʉ co rá ts'ɛdi ra Ma̱ca Nda̱hi. 5Dá zo'ahʉ njabʉ pa bi za gá camfrihʉ co rá ts'ɛdi ra Ma̱ca Nda̱hi, hingue ngue'a̱ gá 'yødehʉ yá mfa̱di ya ja̱'i. 6Nú'ʉ to'o xa zɛ yá jamfri dí zofohe co ra mfa̱di pe nura mfa̱di'a̱ go bra 'ñehe de Ajua̱, hingue de ra ximhai, nixi de yá mfa̱di ya nda̱ nú'ʉ ma da uadi da thogui. 7Dí ma̱ñhe de nú'a̱ bi 'yøt'a Ajua̱ pa bi za dá mpøhøhʉ ne ga tsøñhʉ ja rá nsunda'a̱. Y nú'a̱ dí ma̱ñhe go gue'a̱ ra hoga mfa̱di xqui beni Ajua̱ desde ante da nja ra ximhai, ne himi fa̱dihma̱, pe nubyá ya xa 'ñutcahʉ. 8Ni 'na de nuya nda̱ de ja ra ximhai himbi ba̱di nuna ra mfa̱di xa 'racjʉ Ajua̱, ngue'a̱ nu'bʉ xa ba̱di'ʉ, hinxa hyohma̱ ja ra pont'i numa Zidadahʉ xá nsunda. 9Bi nja ngu nú'a̱ xqui t'ofo ja ra Ma̱ca T'ofo habʉ ena: Ni 'nara ja̱'i himbi za bi hyandi, nixi bi 'yøde, nixi bi zo rá mfeni tengu rá 'mʉi de ja rá ña̱ni Ajua̱, ne hinto xa ba̱di gatho nú'ʉ ya ja̱pi xa beni da umbabi nú'ʉ to'o ri ma̱di'a̱. 10Y nujʉ́, Ajua̱ bi 'ñutcaguihʉ gatho nuya t'øt'eya po rá ts'ɛdi ra Ma̱ca Nda̱hi, ngue'a̱ nura Ma̱ca Nda̱hi go gue'a̱ pa̱di xá hño gatho, ne asta pa̱di gatho nú'a̱ te benga Ajua̱. 11Ni 'nara ja̱'i hingui tsa da ba̱tua rá mfeni ma'na rá miqu'eiui, ngue'a̱ cada 'na go pa̱disɛ tengu rá mfeni. Njabʉtho nehe ni 'na hinto pa̱tua rá mfeni Ajua̱. Nura Ma̱ca Nda̱hi ha̱, go gue'a̱ pa̱tuabi rá mfeni Ajua̱. 12Y nura Ma̱ca Nda̱hi'a̱ xuá mɛncahʉ pa da 'ñutcahʉ gatho nuya hño ri 'racjʉ'a̱, y hingo dí ha̱mfʉ rá mfa̱di ra ximhai pa ga pa̱hʉ nuya hño'ʉ. 13Nuje dí udihe ngu nú'a̱ utcahe ra Ma̱ca Nda̱hi, hindí udihe co ma mfa̱disɛhe. Nú'ʉ to'o pɛ'tsa ra Ma̱ca Nda̱hi ja yá coraso, dí utuabihe co ya noya nú'ʉ 'racaguihe ra Ma̱ca Nda̱hi. 14Pe nú'a̱ ra ja̱'i hinxa gamfri Ajua̱ hingui ha̱ni nú'a̱ udi rá Ma̱ca Nda̱hi Ajua̱, ngue'a̱ beni'a̱ gue hinte ri muui. Ne hingui tsa da ba̱disɛ'a̱, ngue'a̱ mahyoni go da 'ñutuabi ra Ma̱ca Nda̱hi pa da za da ba̱di'a̱. 15Pe nu'a̱ tó'o xa gamfri Ajua̱ ne pɛ'tsa ra Ma̱ca Nda̱hi ja rá coraso, nú'á̱ ha̱, pa̱di xá hño gatho nú'ʉ ya nt'udi'ʉ, ne pa̱di nda'a̱ ra hño y nda'a̱ ra 'ñʉ. Pe nu'a̱ tó'o hingui pɛ'tsa ra Ma̱ca Nda̱hi, hingui tsa da xipabi te gra 'mʉi'a̱. 16Enga ja ra Ma̱ca T'ofo: ¿To ja gue'a̱ xa ba̱tuabi rá mfeni ra Zidada? O ¿to ja gue'a̱ xa za xa 'ñutuabi te da 'yøt'e'a̱? Jo'o. Pe nujʉbya ha̱, dí pa̱tuahʉ rá mfeni ma Zidadahʉ ra Jesucristo.

will be added

X\