RÁ MɄDI RA CORINTIO 14

1Hangue xi da 'yøthʉ 'nara ts'ɛdi pa gui pɛ'tshʉ ra hma̱te, nehe hyoñhʉ nú'ʉ ya mfa̱di ne ra ts'ɛdi ri unga ra Ma̱ca Nda̱hi. Y de gatho nuya mfa̱di'ʉ, ma'na go gui hyoñhʉ ra mfa̱di pa gui ma̱nbahʉ rá noya Ajua̱. 2Ora ña̱ 'nara cu de 'nara hña̱qui nú'a̱ hingui fa̱di, pa̱dihʉ gue nú'a̱ ra cu'a̱ ña̱ co Ajua̱, hingui ña̱ co yá mija̱'iui ngue'a̱ nu'ʉ́ hingui pa̱di nú'a̱ ma̱ñ'a̱. Nu'á̱ ña̱ co rá ts'ɛdi ra Ma̱ca Nda̱hi, ne ma̱ de nú'a̱ hingui pa̱di ya ja̱'i. 3Pe nura ora ma̱nba rá noya Ajua̱ 'nara cu de rá hña̱qui'a̱, ña̱ njabʉ pa da zofo ya cu, pa da te yá jamfri, ne pa da nupabi yá mfeni, ne pa da hñu'mba yá mʉi. 4Nura ora ña̱ 'nara cu co 'nara hña̱qui nú'a̱ hingui fa̱di, nusɛ'a̱ ma'na rí te rá jamfri. Pe nu 'nara cu ma̱nbabi rá noya Ajua̱ de rá hña̱qui'a̱, nú'á̱ ri japi ma'na da te yá jamfri gatho ya cu. 5Nugui ga nehma̱ ga øde gui ña̱hʉ de ma'na ra hña̱qui nú'a̱ hingui fa̱di. Pe ma'na dí ne ga øde gui ña̱hʉ de rá noya Ajua̱. Ngue'a̱ nu'a̱ tó'o ma̱nba rá noya Ajua̱, ma'na ri muui nú'a̱ ma̱ que nú'a̱ to'o ña̱ co 'nara hña̱qui hingui fa̱di. Xá hño to'o da ña̱ co 'nara hña̱qui hingui fa̱di, pe nú'bʉ di 'bʉi to'o da 'ra'tsa nú'ʉ ya noya de nú'a̱ ra hña̱qui'a̱, pa njabʉ ma'na da te yá jamfri ya cu. 6Zi cuhʉ, nu'bʉ nugui ga mabʉ pa ga zo'ahʉ co 'nara hña̱qui nú'a̱ hinguí pa̱hʉ, ¿te 'bɛ da za gui pa̱hʉ njabʉ? Nu'a̱ ma'na xá hño pa gue'ahʉ, ga u't'ahʉ ngu nú'a̱ xa 'ñutcagui Ajua̱, ne ma'ra ya t'øt'e mahyoni gui pa̱hʉ, ne ga zo'ahʉ de rá noya Ajua̱, ne ma'ra ya hoga nt'udi. 7Nuya 'bida ngu ra thʉza o ra arpa, 'bʉ hingui zʉni xá hño, nu'bʉ́ ¿hanja da za da fa̱di te ma thuhu'a̱ pɛi? 8O nu'bʉ ra corneta hinda ña̱ xá hño pa da t'umbabi ra seña ya soldado 'yo ja ra tuhni, ¿ha di ba̱di'ʉ te ra ora da mʉdi da ntuhni? 9Dí njahʉbʉ nehe, 'bʉ nujʉ hindí ña̱hʉ ngu yá hña̱qui nú'ʉ to'o dí zofohʉ, hinda za da ba̱di'ʉ nú'a̱ te dí ma̱ñhʉ, ne hinte ri muui nú'a̱ dí ma̱ñhʉ. 10De guecua ja ra ximhai xi ja ndunthi ya hña̱qui, y cada 'na to'o pa̱di nú'ʉ ya hña̱qui'ʉ, pa̱di xá hño te ma̱. 11Nu'bʉ nugui ga øde 'nara ja̱'i da ña̱ de ma'na ra hña̱qui nú'a̱ hindí pa̱di, nu'bʉ́ pa guequi ga beni gue nú'a̱ ra ja̱'i'a̱ hingrá mengu, ngue'a̱ hindí pa̱di nú'a̱ ra hña̱qui gra ña̱'a̱. Ne pa gue'a̱ da beni gue hindrá mengu nehe, ngue'a̱ nixi gue'a̱ hingui pa̱di nú'a̱ te dí ma̱. 12Dí pa̱di gue xi guí hoñhʉ ya mfa̱di ne ra ts'ɛdi nú'ʉ ri unga ra Ma̱ca Nda̱hi, hangue 'yøthʉ ra ts'ɛdi gui hoñhʉ nú'ʉ ya mfa̱di ne ra ts'ɛdi nú'ʉ da za da japi da te yá jamfri ya cu. 13Hangue nu'a̱ tó'o ña̱ de ma'na ra hña̱qui nú'a̱ hingui fa̱di, dá 'yapabi Ajua̱ da umbabi ra mfa̱di pa da za da 'ra'tsi nú'a̱ ma̱ pa da fa̱di te ma̱. 14Nu'bʉ nugui dí apabi Ajua̱ co 'nara hña̱qui nú'a̱ hindí pa̱di, njabʉ dí xøcambeni Ajua̱, pe hingui tsa ma'na dí te ma mfa̱di ngue'a̱ nixi dí pa̱di nú'a̱ dí ma̱. 15Nu'bʉ́, ¿te da za ga øthʉ? Da za ga aphʉ Ajua̱ co 'nara hña̱qui nú'a̱ hindí pa̱hʉ, pe nehe da za ga apabihʉ Ajua̱ co ma hña̱quisɛhɛhʉ pa da zo ma mfenihʉ xá hño nú'a̱ dí ma̱ñhʉ. Ga tutuabihʉ Ajua̱ co 'nara hña̱qui nú'a̱ hindí pa̱hʉ, pe nehe ga tutuabihʉ Ajua̱ co ma hña̱quisɛhɛhʉ pa da zo ma mfenihʉ xá hño nú'a̱ dí ma̱ñhʉ. 16Ngue'a̱ 'bʉ ga xøcambenihʉ Ajua̱ co nuya hña̱qui hindí pa̱hʉ, nu'bʉ́ nu'a̱ tó'o hingui øde nuya hña̱qui'ʉ hingui tsa da xøcambeni Ajua̱ mahyɛgui con guecjʉ, ngue'a̱ hingui pa̱di te rí bøni nú'a̱ te dí ma̱ñhʉ. 17Nu'bʉ dí xøcambenihʉ Ajua̱ njabʉ, nujʉ́ dí ma̱ñhʉ ra hño, pe nu'ʉ tó'o øcaguihʉ hindí tetuahʉ yá jamfri ngue'a̱ hingui pa̱di te rí bøni nú'a̱ dí ma̱ñhʉ. 18Nugui dí umba njama̱di Ajua̱ ngue'a̱ ma'na dí ña̱ ndunthi que gue'ahʉ co ya hña̱qui nú'ʉ hingui fa̱di. 19Pe de ja ya hmunts'i, ma'na xá hño ga ma̱nga cʉt'a ya noya de ma hña̱qui pa da fa̱di te dí ma̱, pa njabʉ da za ga utuabi ya cu de rá noya Ajua̱, que ga ma̱nga 'rɛt'a 'mo ya noya de ma'na ra hña̱qui hingui fa̱di ne hinda za da zo yá mfeni ni 'nara noya nú'ʉ ya cu. 20Zi cuhʉ, nuri mfenihʉ odi nja ngu yá mfeni ya ba̱tsi. Njahʉ ha̱ ngu ya zi ba̱tsi hingui øt'a ya ts'oqui. Pe dá nja ndunthi ri mfenihʉ ngu rí 'ñep'ahʉ, ngue'a̱ ya gyá da̱nga ja̱'ihʉ. 21Ajua̱ bi zofo ya ja̱'i de Israel co nuya ya noya xa t'ofo ja ra Ma̱ca T'ofo ne ena njaua: “Ma ga pɛhn'ahʉbʉ 'raya ja̱'i hindya mengu pa da zo'ahʉ de ma'na'ño ra hña̱qui ngue'a̱ hindri ña̱ ngu grí ña̱hʉ, pe masque njabʉ hingui ma gui 'yøtcaguihʉ ma ts'ofo.” 22Hangue nura ora dí ña̱hʉ co ya hña̱qui hingui fa̱di, gue'a̱ ngu 'nara nt'udi pa nú'ʉ hingyá gamfri. Pe nura ora dí ma̱nbahʉ rá noya Ajua̱, dí umfʉ ra ts'ofo de rá hma̱te Ajua̱ nú'ʉ to'o camfri, pe nu'ʉ tó'o hingui ne da gamfri, hingui ne nehe da hña̱nga nú'a̱ ra ts'ofo'a̱. 23Nu'bʉ ja ri hmunts'ihʉ gatho'ihʉ guí ña̱hʉ co ya hña̱qui nú'ʉ hingui fa̱di, nepʉ da zøhø 'ra nú'ʉ hints'a di pa̱tua rá noya Ajua̱, o da zøhø 'ra nú'ʉ hindya gamfri, ¿ha gue hinda 'ñena'ʉ gue xcá 'bɛ ri mfenihʉ? 24Pe nu'bʉ nújʉ dí muntshʉ ne dí ma̱nbahʉ rá noya Ajua̱ ne da zøhø 'na hindra gamfri, o 'na hints'a di pa̱tua rá noya Ajua̱, nu'bʉ́ co nú'a̱ da 'yøde di hma̱, da unsɛ nguɛnda de yá ts'oqui. 25Nu'bʉ́ nú'ʉ ya ja̱'i'ʉ da ba̱di te gra 'mʉi yá coraso, ne nu'ʉ́ 'bestho da ndandiña̱hmu ne da xøcambeni Ajua̱. Nepʉ nu'ʉ́ da 'ñeñ'a'ihʉ, xi majua̱ni Ajua̱ 'bʉi con gue'ahʉ. 26Nu'bʉ́ zi cuhʉ, ¿te da za gui 'yøthʉ ora grí muntshʉ? 'Ra de gue'ahʉ gui tuthʉ ya ja̱hña̱, nu ma'ra de gue'ahʉ gui nxahnatehʉ, nu ma'ra de gue'ahʉ gui ma̱ñhʉ nú'a̱ xa 'ñu't'ahʉ Ajua̱. Nu ma'ra de gue'ahʉ gui ña̱hʉ de ya hña̱qui nú'ʉ hingui fa̱di, ha nu ma'ra de gue'ahʉ gui ma̱ñhʉ te rí bønga nú'ʉ ya noya'ʉ. 'Yøthʉ gatho pa ma'na da te ri jamfrihʉ. 27Nu'bʉ gui ña̱hʉ de ya hña̱qui hingui fa̱di, da za gui ña̱hʉ hønsɛ yoho o hñu de gue'ahʉ, pe 'rama'na gui ña̱hʉ, ne da 'mʉhni 'na nú'a̱ to'o da 'ra'tsi pa da fa̱di te rí bønga nú'ʉ ya noya'ʉ. 28Y nu'bʉ di jo'oni to'o da 'ra'tsa nú'ʉ ya noya'ʉ, nu'bʉ́ nú'ʉ to'o ne da ña̱ de 'nara hña̱qui hingui fa̱di, odi ña̱ ja ra hmunts'i, ma'na xá hño dá ña̱sɛui Ajua̱. 29Y nú'ʉ to'o ma̱nbabi rá noya Ajua̱, dá ña̱ hønsɛ yoho o hñu, y nú'ʉ to'o øde nú'a̱ te ma̱ñ'ʉ, dá hñuxa nt'øde xá hño pa da ba̱di ua gue'a̱ ma̱ o hina. 30O nu'bʉ 'nara cu ma̱nbabi rá noya Ajua̱, ne 'bʉ Ajua̱ da umbabi ra mfa̱di ma'na ra cu di 'bʉhni, nu'bʉ́, nú'a̱ to'o mi ña̱ ra mʉdi, ya odi sigui da ña̱, pa njabʉ da za da ña̱ nehe nú'a̱ ma'na ra cu. 31Nu'ʉ tó'o xa t'umba ra mfa̱di pa da ma̱nbabi rá noya Ajua̱, da za da ma̱nbabi, hønsɛ gue 'rama'na da ña̱ ha̱, pa njabʉ gatho nú'ʉ ya cu di øde da za da ba̱tua xá hño rá noya Ajua̱, ne ma'na da za da te yá jamfri. 32Nu'a̱ tó'o ma̱nba rá noya Ajua̱, go pa̱disɛ ua rí 'ñepi da ña̱ o hina. 33Ngue'a̱ Ajua̱ ri ho ga øthʉ ma hmunts'ihʉ ngu rí 'ñehe, ne di o rá 'ñu nú'a̱ ga øthʉ. Mahyoni ga øthʉ ngu xa nza̱i øt'a ja yá hmunts'i gatho nú'ʉ ma'ra ya cu. 34Oguí hopabihʉ ya 'bɛhña̱ da 'mai ne da ma̱nba rá noya Ajua̱ ja ya hmunts'i, ngue'a̱ pa gue'ʉ otho ra nsɛqui da 'yøt'a njabʉ. Dá hñoga'ñøde ha̱, ngu ma̱nga rá ley Ajua̱. 35Nu'bʉ ya 'bɛhña̱ ne da 'yøt'a 'nara nt'ani, dá 'yamba yá da̱me ja yá ngusɛ, ngue'a̱ hini hnequi xá hño 'bʉ 'nara 'bɛhña̱ da 'mai ne da ña̱ madetho de ja ra hmunts'i. 36Bensɛhʉ gue nurá noya Ajua̱ hingo pa gue'asɛhʉ, ne hingo ja xa nexpʉ pa go gui 'yøt'asɛhʉ nú'a̱ guí nehʉ. 37Nu'bʉ nu'ahʉ xi majua̱ni guí ha̱npahʉ rá ts'ɛdi ne rá mfa̱di ra Ma̱ca Nda̱hi pa gui ma̱nbahʉ rá noya Ajua̱, nu'bʉ́ ma gui pa̱dihʉ xá hño gue nuya noya dí op'ahʉ go guehya 'raya hmanda xa 'bɛpcagui ma Zidadahʉ ga xi'ahʉ. 38Pe nu'a̱ tó'o hinda ne da gamfri núna dí ma̱, nixi gue'a̱ hinda ma da jamfribi nú'a̱ da ma̱ nehe. 39Hangue ma zi cu'ihʉ, 'yøthʉ 'nara ts'ɛdi pa gui ma̱nbahʉ rá noya Ajua̱, ne oguí ha̱cuahʉ nú'ʉ ya cu ña̱ de ya hña̱qui nú'ʉ hingui fa̱di. 40Ne 'yøthʉ gatho xá hño ngu rí 'ñehe.

will be added

X\