RÁ MɄDI RA CORINTIO 1

1Nugui drá Pablo, Ajua̱ go rá paha'a̱ pa bi zoncagui pa drá apostolgui ma zi Hmuhʉ ra Jesucristo. Nugui ne ra cu Soste dí op'a'ihe nuna ra carta, 2nú'ahʉ gyá gamfrihʉ guí 'bʉhʉbʉ Corinto. Nu'ahʉ bi zohn'ahʉ Ajua̱ pa gá camfrihʉ ma zi Hmuhʉ ra Jesucristo, ne bi 'uec'ahʉ de ja ya ts'oqui pa go gui pɛpabihʉ'a̱, ne bi t'axca ri mfenihʉ mahyɛgui con gatho nú'ʉ 'bʉ habʉraza ri xøcambeni'a̱. Nú'a̱ ma zi Hmuhʉ drí xøcambenihʉ go guet'a̱ ri xøcambeni nehe'ʉ. 3Ajua̱ ma Dadahʉ ne ma zi Hmuhʉ ra Jesucristo da ja̱p'a'ihʉ ne da max'ahʉ pa gui 'bʉhʉ te rá 'ñentho. 4Nza̱ntho dí umba njama̱di Ajua̱ por gue'ahʉ, ngue'a̱ nu'á̱ co rá hñoja̱'i xa pøhø'ihʉ po ra Zidada Jesucristo. 5Ajua̱ xa ja̱p'a'ihʉ ndunthi ngue'a̱ xcá camfrihʉ ra Zidada Jesucristo, hangue xa 'ra'ahʉ ra ts'ɛdi pa guí ña̱hʉ de rá noya'a̱, ne xa 'ra'ahʉ ndunthi rá hoga mfa̱di'a̱ nehe. 6Nubya ri hnequi gue xcá camfrihʉ xá hño gatho nú'a̱ dá xi'ahe de ra Zidada Jesucristo. 7Hangue nubyá hinte grí 'bɛhʉ de gatho ya hoga ja̱pi nú'ʉ ri 'racjʉ Ajua̱, ne guí tø'mhʉ nú'a̱ ra pa stua yopa pengui ma Zidadahʉ ra Jesucristo. 8Nú'á̱ go gue'a̱ ma da su'a'ihʉ asta ra pa'a̱ rá ga̱ts'i ri tehʉ de guecua ja ra ximhai, pa hinda za to da ma̱ gue nu'ahʉ guí tuhʉ ra ts'oqui nu stua yopa penga ma Zidadahʉ ra Jesucristo. 9Ajua̱ nza̱ntho øt'a gatho nú'a̱ xa ma̱, y nú'á̱ go gue'a̱ xa huahn'ahʉ pa gui 'bʉhʉ co ma zi Hmuhʉ ra Jesucristo rá T'ʉ'a̱. 10Zi cuhʉ dí ba̱nte'ihʉ de rá thuhu ma Zidadahʉ ra Jesucristo gue da 'nat'a gui ma̱ñhʉ, pa da 'ñotho ya hegue de gue'ahʉ. Nu'a̱ gui 'yøthʉ, 'bʉhʉ mahyɛgui co 'nada ra mfeni ne 'nada ra jamfri. 11Dí xi'ahʉ njabʉ ma zi cu'ihʉ ngue'a̱ xa xicagui nú'ʉ ja te yá njaui ra nju Cloé gue ja ra ora grí ntunsɛhʉ. 12Dí xi'ahʉ njabʉ ngue'a̱ 'ra de gue'ahʉ guí ma̱ñhʉ njaua: “Nugui drí dɛna ra cu Pablo”, ha nu ma'ra guí eñhʉ: “Nugui drí dɛna ra cu Polo”, y nu ma'ra guí eñhʉ: “Nugui drí dɛna ra cu Pedro”, ha nu ma'ra guí eñhʉ: “Nugui drí dɛna ra Zidada Jesucristo.” 13¿Ha gue hingue gatho'ihʉ guí dɛnhʉ ra Zidada Jesucristo? ¿Ha gue bi du ja ra pont'i ra Pablo po rá ngue'a'ihʉ? ¿Ha gue xcá nxistehehʉ de ja rá thuhu ra Pablo? Hina. 14Dí umba njama̱di Ajua̱ gue nugui hønsɛ ra cu Crispo ne ra cu Gayo stá xi'tsi de gue'ahʉ, y hinto ma'na stá xi'tsi. 15Hangue hinda za gui ma̱ñhʉ gue xcá nxistehehʉ de ma thuhuga. 16Nehe dá xi'tsa nú'ʉ ya mengu de ja rá ngu ra cu Teba. Pe de guehni hinstá xi'tsa ma'ra. 17Ra Zidada Jesucristo himbá pɛncagui pa ga øt'a ra sistehe, nu'á̱ bá pɛncagui pa ga ma̱nga ra ma̱ca noya. Pe hindí ma̱ co 'raya noya xi mahotho nú'ʉ de ma mfa̱disɛ, pa hinda t'ena gue xi ja ma mfa̱di ne da gamfri ya ja̱'i hønsɛ co ma hoga noya. Nugui dí ne da gamfri'ʉ hønsɛ po nú'a̱ ra du bi thogui ra Zidada Jesucristo ja ra pont'i. 18Nujʉ́ dí ma̱ñhʉ gue bi du ra Zidada Jesu ja ra pont'i pa ga mpøhøhʉ, ha nu'ʉ tó'o hingui camfri'a̱ ma da 'mɛdi'ʉ ngue'a̱ ma̱ñ'ʉ gue hinte ri muui nú'a̱ dí ma̱ñhʉ de rá du ra Zidada Jesucristo. Pe pa nújʉ stá mpøhøhʉ ri muui, ngue'a̱ go gue'a̱ ha̱npa rá ts'ɛdi Ajua̱. 19Ma̱nga njaua ja ra Ma̱ca T'ofo: Ma ga huatuabi yá mfa̱di ya ba̱mhya̱, ne ga ha̱cuabi yá mfeni ya nimfeni. 20¿To'o nú'a̱ ra ba̱hmya̱bya? O ¿to'o nú'a̱ xi ja rá mfa̱di? Ne ¿to'o nú'a̱ pa̱di gatho te ja mapaya? Jo'o, ngue'a̱ ja rá thandi Ajua̱ hinte ri muui yá mfa̱di ya ja̱'i. 21Ngue'a̱ ya ja̱'i masque xi ja yá mfa̱di, hinxa za hanja da ba̱di'ʉ Ajua̱. Pe Ajua̱ rá paha'a̱ da pøhø nú'ʉ to'o da gamfri nú'a̱ ra noya dí ma̱ñhʉ, masque nú'ʉ ya ba̱mhya̱ ena gue hinte ri muui nú'a̱ dí ma̱ñhʉ. Pe Ajua̱ xi ja rá mfa̱di hangue bi 'yøt'a njabʉ. 22Ya xodyo nza̱ntho adi da t'utua 'nara nt'udi, y nuya griego hønsɛ ra mfa̱di honi, 23pe nujʉ dí ma̱ñhʉ de ra Zidada Jesucristo nú'a̱ bi tho ja ra pont'i. Y guehna 'nara mfe'tse pa ya xodyo, ne nú'ʉ hingyá xodyo ena gue hinte ri muui nú'a̱ dí ma̱ñhʉ de rá du ra Zidada Jesucristo. 24Pe nújʉ xa huancahʉ Ajua̱, gue dyá xodyohʉ gue hindyá xodyohʉ, gathoguihʉ dí pa̱hʉ gue ma zi Hmuhʉ ra Jesucristo bi hña̱npa rá ts'ɛdi ne rá mfa̱di Ajua̱ pa bi pøhøguihʉ. 25Ajua̱ ma'na ja rá mfa̱di ne ma'na ja rá ts'ɛdi de gatho ya ja̱'i, masque eñ'ʉ gue hinte ri muui nú'a̱ ra du bi thogui ra Zidada Jesucristo ja ra pont'i. 26Zi cuhʉ, pa̱hʉ gue nu'ahʉ xa huahn'ahʉ Ajua̱, masque hinga ndunthi de gue'ahʉ guí pɛ'tshʉ ra mfa̱di de ra ximhai, ne hinga ndunthi de gue'ahʉ guí ha̱hʉ ra ts'ʉtbi, y ne hinga ndunthi de gue'ahʉ guí pɛ'tshʉ 'nara da̱nga nsu. 27Ajua̱ bi huahna nú'ʉ hinte yá fa̱di de guecua ja ra ximhai pa da 'bɛtuabi yá tsa ya ba̱mhya̱. Ajua̱ bi huahna nú'ʉ hingui ha̱ ra ts'ɛdiua ja ra ximhai pa da 'bɛtuabi yá tsa nú'ʉ ha̱ ra ts'ɛdibya. 28Ajua̱ bi huahna nú'ʉ hinte ri muui ja ra ximhai ne nú'ʉ xi ya t'ʉtsa, ne nú'ʉ to'o ni ts'ʉ yá nsu otho, pa da 'bɛtua yá tsa nú'ʉ to'o pɛ'tsa yá nsu, 29pa njabʉ hinto da 'ñets'i ja rá thandi Ajua̱. 30Ajua̱ go gue'a̱ bi 'yøt'e pa dá 'nathohʉ co ra Zidada Jesucristo, ngue'a̱ nusɛ Ajua̱ go gue'a̱ bá pɛhni'a̱ pa bi 'ñutcahʉ rá mfa̱di Ajua̱, ne bi hña̱sca ma ts'oquihʉ, ne bi t'axca ma mfenihʉ pa bi za dá 'bʉhʉ xá hño ja rá thandi Ajua̱. 31Ajua̱ bi 'yøt'e njabʉ pa da nja ngu nú'a̱ xa nt'ofo ja ra Ma̱ca T'ofo habʉ ena: “Nu'a̱ tó'o ne da 'ñets'i, dá 'ñets'i, pe de nú'a̱ xa 'yøt'a Ajua̱, hingue de nú'a̱ xa 'yøt'asɛ.”

will be added

X\