Марк 6

1Йесо уырдыгӕй араст Йӕ ахуыргӕнинӕгтимӕ ӕмӕ ӕрцыд Йӕ сахармӕ. 2Сабат куы ралӕууыд, уӕд райдыдта амонын синагогӕйы, ӕмӕ Йӕм цы бирӕ адӕм хъуыста, уыдон дисы ӕфтыдысты ӕмӕ дзырдтой: «Ӕппӕт адӕттӕ Йын кӕцӕй сты? Уагӕр Ын цавӕр зонд рардӕуыд, ӕмӕ ахӕм диссӕгтӕ аразын Йӕ бон куыд у? 3Ай хъӕддӕсны нӕу, мыййаг, Мариайы фырт, Иаковы, Иосифы, Иудӕйы ӕмӕ Симоны ӕфсымӕр? Йӕ хотӕ дӕр ам, не 'хсӕн, не сты, ӕви?» Ӕмӕ Йыл не 'ууӕндыдысты. 4Йесо сын загъта: «Пехуымпар йӕ фыдыбӕстӕ, йӕ хӕстӕджытӕ ӕмӕ йӕ хӕдзарӕй дарддӕр ӕгад никуы вӕййы». 5Ӕмӕ уым иу диссаг саразын дӕр Йӕ бон нӕ уыд; ӕрмӕст Йӕ къухтӕ ӕрӕвӕрдта цалдӕр рынчыныл ӕмӕ сӕ сдзӕбӕх кодта. 6Дисы Йӕ ӕфтыдта се 'нӕуырнындзинад. Уый фӕстӕ зылди хӕстӕг хъӕутыл ӕмӕ ахуыр кодта адӕмы. 7Йесо басидт Йӕ дыууадӕс ахуыргӕнинагмӕ, арвыста сӕ дыгӕйттӕй, ӕмӕ сын радта тых, цӕмӕй сӕ бар цӕуа ӕнӕзӕгъинӕгтыл. 8Ӕмӕ сын бафӕдзӕхста: «Лӕдзӕг йеддӕмӕ фӕндагмӕ уемӕ мацы райсут – нӕдӕр хойраг, нӕдӕр хордзен, нӕдӕр ӕхца уӕ роны. 9Фӕлӕ дзабыртӕ дарын уӕ бон у, ӕрмӕст-иу уӕ уӕлӕ дыгай хӕдӕттӕ ма скӕнут». 10Загъта ма сын: «Цы хӕдзармӕ-иу бацӕуат, уым-иу баззайут, цалынмӕ уырдыгӕй рацӕуат, уӕдмӕ. 11Кӕм уӕ не суазӕг кӕной ӕмӕ уӕм кӕм нӕ байхъусой, уырдыгӕй куы рацӕуат, уӕд та-иу ацӕгъдут уӕ къӕхты рыг – аххосджын кӕй сты, уымӕн ӕвдисӕйнагӕн. [Ӕцӕг уын зӕгъын: Содом ӕмӕ Гоморрӕйӕн тӕрхоны бон уыцы сахарӕй ӕнцондӕр уыдзӕн.]» 12Ахуыргӕнинӕгтӕ ацыдысты ӕмӕ адӕмӕн дзырдтой, цӕмӕй ӕрфӕсмон кӕной сӕ тӕригъӕдтыл. 13Адӕмӕй-иу расырдтой бирӕ дӕлимонты, бирӕ рынчынты сӕрстой зетийӕ ӕмӕ сӕ дзӕбӕх кодтой. 14Паддзах Ирод фехъуыста Йесойы тыххӕй, уымӕн ӕмӕ Йӕ кой айхъуыст дардыл. Иутӕ дзырдтой: «Аргъауӕг Иоанн райгас мӕрдтӕй ӕмӕ уый тыххӕй аразы диссӕгтӕ»; 15Иннӕтӕ дзырдтой: «Уый Илиа у»; аннӕтӕ та дзырдтой: «Уый раздӕры пехуымпарты хуызӕн пехуымпар у». 16Фӕлӕ Ирод, уыдӕттӕ фехъусгӕйӕ, загъта: «Ӕз кӕй сӕр акъуырдтон, уыцы Иоанн райгас». 17Уымӕн ӕмӕ уымӕй размӕ Ирод арвыста Иоаннмӕ, ӕрцахста йӕ, ӕмӕ йӕ бакодта ахӕстоны йе 'фсымӕр Филиппы ус Иродиадӕйы тыххӕй. Ирод ракуырдта Иродиадӕйы, 18Ӕмӕ йын Иоанн дзырдта: «Де 'фсымӕры усимӕ цӕрын дын не 'мбӕлы». 19Иродиадӕ йӕм мӕстӕй марди, фӕндыд ӕй йӕ амарын, фӕлӕ ницы йӕ бон уыд. 20Уымӕн ӕмӕ Ирод тарст Иоаннӕй; раст ӕмӕ сыгъдӕг адӕймаг кӕй у, уый зыдта, ӕмӕ йӕ хъахъхъӕдта. Кӕд-иу ӕй Иоанны ныхӕстӕ фӕкъӕмдзӕстыг кодтой, уӕддӕр ӕм хъуыста зӕрдиагӕй. 21Иродиадӕйӕн фӕзынди фадат. Ирод йӕ райгуырӕн боны фӕдыл йе 'лдӕрттӕн, ӕфсӕддон хицӕуттӕн ӕмӕ Галилейы уӕздӕттӕн скодта куывд. 22Иродиадӕйы чызг сӕм бацыд ӕмӕ кафыд. Уымӕй балхӕдта Ироды ӕмӕ уазджыты зӕрдӕ, ӕмӕ паддзах загъта чызгӕн: «Цы дӕ хъӕуы, уый ракур, ӕмӕ дын ӕй ратдзынӕн». 23Ирод ын расомы кодта: «Цыдӕриддӕр мӕ ракурай, уый дын ратдзынӕн, суанг мӕ паддзахады ӕмбисы онг». 24Чызг рацыд ӕмӕ бафарста йӕ мады: «Цы ракурон?» Уый йын загъта: «Аргъауӕг Иоанны сӕр». 25Чызг уайтагъд бацыди паддзахмӕ ӕмӕ йын загъта: «Фӕнды мӕ, цӕмӕй мын гъертӕккӕ тӕбӕгъы ӕрбахӕссай Аргъауӕг Иоанны сӕр». 26Паддзах ӕрӕнкъард, фӕлӕ йӕ сомымӕ гӕсгӕ ӕмӕ йемӕ минасгӕнджыты ӕфсӕрмӕй чызгӕн «нӕ» зӕгъын не сфӕрӕзта. 27Уайтӕккӕ йӕ хъахъхъӕнджытӕй иуы арвыста Иоанны сӕр ӕрбахӕссыны бардзырдимӕ. 28Хъахъхъӕнӕг ацыд, ахӕстоны Иоаннӕн акъуырдта йӕ сӕр, ӕмӕ йӕ тӕбӕгъы ӕрбахаста чызгӕн, чызг та йӕ радта йӕ мадмӕ. 29Иоанны ахуыргӕнинӕгтӕ уый куы фехъуыстой, уӕд ӕрцыдысты, йӕ мард ын ахастой ӕмӕ йӕ зӕппадзы бавӕрдтой. 30Апостолтӕ ӕрӕмбырд сты Йесомӕ ӕмӕ Йын радзырдтой, цы сарӕзтой ӕмӕ адӕмы цӕуыл сахуыр кодтой, ӕппӕт уыдӕттӕ. 31Йесо сын загъта: «Хибар ранмӕ иунӕгӕй ацӕут ӕмӕ иучысыл уӕ фӕллад суадзут». Уымӕн ӕмӕ ӕрцӕуӕг ӕмӕ фӕстӕмӕ здӕхӕг адӕм уыйас бирӕ уыдысты, ӕмӕ сӕ суанг хӕрынмӕ дӕр не 'вдӕлд. 32Йесо ӕмӕ апостолтӕ иунӕгӕй бӕлӕгъы араст сты хибар ранмӕ. 33Уӕддӕр сӕ бирӕтӕ федтой фӕцӕйцӕугӕ ӕмӕ сӕ базыдтой. Уӕд ӕппӕт сахартӕй азгъордтой фистӕгӕй ӕмӕ сӕ разӕй фесты. 34Йесо былмӕ куы рахызт, уӕд федта бирӕ адӕм ӕмӕ сын фӕтӕригъӕд кодта, уымӕн ӕмӕ уыдысты ӕнӕфыййау фыстау. Ӕмӕ сын бирӕ фӕцамыдта. 35Бонӕй бирӕ куы нал баззади, уӕд Йесомӕ бацыдысты Йӕ ахуыргӕнинӕгтӕ ӕмӕ Йын загътой: «Ам фӕсвӕд ран у, бон та фӕивгъуыйы. 36Ауадз адӕмы, ацӕуой хӕстӕг хъӕутӕм ӕмӕ сӕхицӕн хӕринаг балхӕной». 37Йесо сын дзуапп радта: «Сымах сын раттут хӕринаг». Загътой Йын: «Уӕд та фӕцӕуӕм ӕмӕ дзул дыууӕсӕдӕ динары аргъ балхӕнӕм, утӕппӕт адӕмы бафсадынӕн?» 38Йесо сӕ бафарста: «Цал дзулы уӕм ис? Ацӕут ӕмӕ фенут». Уыдон федтой ӕмӕ загътой: «Фондз дзулы ӕмӕ дыууӕ кӕсаджы». 39Уӕд сын бафӕдзӕхста ӕппӕт адӕмы дӕр цъӕх кӕрдӕгыл къордгай ӕрбадын кӕнын. 40Адӕм ӕрбадтысты къордгай – фондзыссӕдзгӕйттӕй ӕмӕ дӕс ӕмӕ дыууиссӕдзгӕйттӕй. 41Йесо райста фондз дзулы ӕмӕ дыууӕ кӕсаджы, скаст уӕларвмӕ, арфӕ ракодта, асаста дзултӕ ӕмӕ сӕ радта Йӕ ахуыргӕнинӕгтӕм адӕмӕн байуарынмӕ. Дыууӕ кӕсаджы дӕр байуӕрста сеппӕтыл дӕр. 42Сеппӕт дӕр бахордтой ӕмӕ бафсӕстысты. 43Ӕмӕ ма дзул ӕмӕ кӕсагӕй цы баззад, уыдонӕй байдзаг дыууадӕс чыргъӕды. 44Хӕргӕ чи кодта, уыдоны ӕхсӕн айдагъ лӕгтӕ уыди фондз мины. 45Йесо Йӕ ахуыргӕнинӕгты уайтагъд сбадын кодта бӕлӕгъы ӕмӕ сӕ арвыста денджызы иннӕ фарсмӕ, Вифсаидӕмӕ; Йӕхӕдӕг уал баззади, цалынмӕ адӕмы ауадза, уӕдмӕ. 46Ӕмӕ адӕмы куы ауагъта, уӕд хохмӕ ссыди бакувынмӕ. 47Изӕрдалынгты бӕлӕгъ бахӕццӕ денджызы хӕдастӕумӕ, Йесо та иунӕгӕй уыди денджызы был. 48Ӕмӕ федта, ахуыргӕнинӕгтӕ бӕлӕгъ зынтӕй кӕй тардтой, уый, уымӕн ӕмӕ дымгӕ дымдта сӕ ныхмӕ. Боныцъӕхты размӕ сӕм Йесо денджызыл бацыди къахӕй, ӕмӕ Йӕ фӕндыди сӕ иувӕрсты аивгъуыйын. 49Уыдон Ӕй денджызыл цӕугӕ куы федтой, уӕд Ын цӕстылуайӕн ӕнхъӕл уыдысты, ӕмӕ хъӕр систой. 50Уымӕн ӕмӕ Йӕ сеппӕт дӕр федтой ӕмӕ фӕтарстысты. Фӕлӕ сӕм Йесо уайтӕккӕ сдзырдта: «Фидар фӕлӕуут, уый Ӕз дӕн! Ма тӕрсут». 51Бахызт сӕм бӕлӕгъмӕ, ӕмӕ дымгӕ банцади. Уыдон стыр дисы бафтыдысты, 52Уымӕн ӕмӕ не 'мбӕрстой, дзултимӕ цы диссаг сарӕзтӕуыд, уый; сӕ зӕрдӕтӕ ӕхгӕд уыдысты. 53Бахӕццӕ сты денджызы иннӕ фарсмӕ, Геннисареты цурмӕ, ӕмӕ уым ӕрлӕууыдысты. 54Бӕлӕгъӕй куы рахызтысты, уӕд адӕм уайтагъд базыдтой Йесойы, 55Рӕвдз ӕрзылдысты ӕппӕт бӕстӕйыл, ӕмӕ-иу Йесо Йӕ коймӕ гӕсгӕ кӕм уыд, уырдӕм хуыссӕнтыл ӕрхастой сӕ рынчынты. 56Кӕдӕмфӕнды ма ӕрцыдаид Йесо, хъӕутӕм кӕнӕ сахартӕм, рынчынты-иу ӕрӕвӕрдтой фӕзты, хатыдысты Йӕм, цӕмӕй сӕ бауадза уӕд та Йӕ пӕлӕзы коцорайыл бандзӕвын; ӕмӕ-иу Ыл чидӕриддӕр бандзӕвыд, уыдон-иу сдзӕбӕх сты.

will be added

X\