Erer tarpatipra 19

1Gahan noh amraoh aw tei mahat kuuhan ire tarmur akit meng nurur riptiru hat mengir hangopa. Got ohnongwi armi mar amam matinmuro. Ohwi nambutin hanmuro. Ohwi winsi han kasipnap hanmuro. 2Hanip ihirnong satpor rihanhe pomatwi sama iraire ma ihapti oh duung dawi indeipat hanmuro. Indeipat han ohoh ihan Babiron ap mutuh ire bisei saw hapti er da oh among among ihirnong ma pinggit pisapti ohe pe oh gin ihirnonghe pomat sama iraire ma ihapti ohe pe yan oh apirmuro. Ama ap mutuh ihirdapat orhe atamreipti han ihirnong sushe ohe pe oh gin ihirnonghe ama ohe yan oh sumuro rim hangopa. 3Girima it kasip mengtei Got ohnongwi armi mar amam mat paptenmuro. Winsi ap mutuh ma taur ohe tuhup oh duut orhorwi maras patru pateprao rim Got ohnonghe amam mat paptenmuro girim hangopa. 4Giritperhan han pohon 24 han ihirsi; yotayota dasi han ihirsi tap ham Got orhe pohon tongnopat duup oh bos hamnong ham orhe danong hama Got ohnongwi armi mar amam mat papten hanmuro. Arpinmuro girim hangopa. 5Giritperhan noh amraoh Got orhe pohon tongnot pat tei amdapat meng tit Got ohe atamreipti han bap kamah hat pati hansi; borop hat pati hansi ama han guro orhornong kas hama orhe danong hat pati han bap kamah hat pati hansi; borop hat pati hansi ama han bap guro gur gonsi tap ham orhornong armi mar amam mat paptenmuro rim hangopa. 6Gahan Jon noh amraoh kuuhan ruumsan tarmura ha meng sariya hatin hat mengrim hangopa. Ma mengriya oh tom war isip kuro minggihim isip gurir deio hatin ham hangopa. Dire napapat han oh Hanipyah kasipnap han orhorwi erer gon oh gonsinap orhe hrepnongwi mat papat hanmuro. Ihtin han ohoh ihan orhornongwi armi mara amam mat paptenmuro. 7- 8Sipsip bap oh Ama kuu uhnong noh datiprohwa ma dahat pat kuu uhnong Got oh Watah has yahnap moh ara mamen tahat indinmur potporhan uh arpin ara mamen tahat patmuro. Gin ite gosdatin ohe dik oh gin hahmuro. Ihtin dik hah ohoh ihan dir da yah ham amam hayamuro. Amam hama orhorwi yahnap hano rim armi mat pateprimuro. rim hangopa. Watah has yahnap ma apdap oh Got orhe nita dire yah hat sapti ohe da ohmur. 9Gahan enser oh Jon nohnong Gin go mama meng moh brak matinmur. Sipsip bap oh Gin noh kopen kuu dara amam ham den ruumsan dinmat norhe nita gurnong Gin apris amam ham den dinmur napor unatipramur. Ma unatipra gur oh amamsi bap gurmuro napor ama meng oh brak matina napongop. Naporpat it nohnong ama meng oh Got ohe arpinnap meng ohmur napongop. Napotporhan noh mama nabrak dei ohmur. 10Enser oh napotporhan noh ohe duup oh bos hamnong ham timama ohe danong ham armi matpor ihpatin oh Es. Nohe danong ham armi nahatipra. Noh ditadit tap Got ohe atamreipti han ditaditmur. Gure taptem bap Jisas ohe arpin meng ma dindeipti ihirsi; diradir tap atamreipti bap diradir ohoh ihan nohe danong ham armi nahatipra. Got orhe danong ham armi mat paptenmur napongop. Got ohe meng pot pison ina mara ma kasip deipat sup oh dirnonghe Jisas ohe meng oh pot pison ina dasi nahat napapat ohmur. 11Gahan Jon noh wandeioh aw tan mahat tanputporhan hos tohan tit patgop. Ohe bas oh han tit tongnot patgop. Ama han oh hanipnong dahamar satpor dahaho ihirsi gusutpor dahaho ihat dahahhanoh duung dasiwi ihpat hano rim ohe win oh yot winsi patgop. Tit win oh duung han ohmura; tit win oh arpin han ohmur. Ama win yot ohsi tongnot patgop. 12Ama win yotsi han ohe kinhe irat has hatin hangop. Kakhe kakhan ire aripti kakung hatin trun an patgop. Orhe ina bok oh orhe gon win tit orhorwi am hat pat win tit brak matpa oh patgop. 13Orhe watah dapsi ma an pat oh heim hru dahnong mara heimsi matin watah dap tit an patgop. Ire ohnong ma win poripti oh Got ohe dahat pat da oh namgipato rim winnong oh Got ohe meng ohmur poriptimur. 14Ihtin han tit hos tohan bas tongnoma sapatgop. Saporhan ohe kom oh aw tei ohe dupsi han ami bap ihir watah has yahnap namei hatin watah oh ara hos tohan bap ire bas oh nitat tongnoma ohe kom saptingopa. 15Ohri hat ma us han ohe atem tei oh bior gretnap tit atem kat oh kot patgop. Ama bior gret atem kat kot pat ohsi among among kuuhan er bap ma pati ihirnong ohe merwi mar sutipramur. Suma orhe hrepnongwi mara heisup mat orhorwi paptepramur. Heisup mat orhorwi ma paptepra oh kasip Got orhe bopor heisup mat papat san dahnong oh mar paptepramur. 16Ama han oh among among dire kakhanhe orhorwimur. Dire hanipyah hat pat oh orhapnap kakhan hat pat hano rim orhe watah dapsi an pat ohe boko orhe mun boko oh ama ihat pat ohe win oh abrak matpasi han oh patgop. 17Ihat pathe daham noh it wandeioh enser tit atan ohe heirpat tei mutuh ohon tandeit patgop. Tandeit patdapat kasip meng tit ner put sapti ner gonsi ihirnong Ei. Got ohe den yahnap ruumsan namdin dik oh ginmuro. Ihan gur gonsi apris tap tei hatinmuro. 18Tap tei hama mong mong kak hat pati han ire seino ami ma kak hat pati han ire seino han kasip bap ire seino hos bas tongnom sapti han ire seino hos ire seino han gonsi bap be bap hansi; ire hrepnong matperhan be atamreipti han bapsi winsi hansi; win timbas hansi ire seino oh gonsi gur apris dinmuro. Dinmat apris tap tei hatinmuro rim girit ungop. 19Girit utporhan noh it wandeioh ohri ma murhup kurwaho er han bap ma mong mong moh ohe kak hat ma pati hano ire ami dupsi bapo ihir gonsi Gin dir Hanipyah hos bas tongnom sapat han ohnongsi; orhe ami dupsi han bap ihirsi gusutpera rima gusutinmat tap tei hangopa. 20Gusutinmat tap tei hatperhan hos bas tongnom sapat han orhordapat kurwah ohnongsi; orhe kasip apriporhan ihirnong dasuh deisuh han ohnongsi ama ihitnong net pongop. Kurwah orhe kasip apriporhan orhe kintei orhor na imtin hatin han ma indei ohsi kurwah ohe win braksi bapo irat bok kurwah arhutperhan ohe danong hapti bapo ama ihirnong dasuh deisuhmur. Ama indeishe han yot ihitnong hos bas tongnot sapat han ohdapat ihitnong net pora da patin orhor tahe por kwei har ham mianpang hatin hapat kurgwesi ham har hapat dahnong tahe por mandangop. 21Tahe por mandama orhe atem kat kot pat bior ohsi ite ami bap ihirnong sut pisangop. Sut itporhan ner ihir apris sein daptin ake pisut mandangopa.

will be added

X\