Mak 12

1Gahan Jisas oh ihirnong Gin gur mama paham meng moh amratinmur. Tit han tit mongsi han hat patesuhri. Patdapat tomhan amgap rang deim tomhan amgap itipri. Sara kasip doho hat mandapat tomhan marindin ohe watah mamen mat itipri. Dat sarpat ru kak paten ap oh dokap tit hatipri. Hat mandapat Gin gur wamat patenmur pora ire bes teinong mara oh wan mongnong pipri. Susa indipri. 2Patdapat gahan kapotin haya tei mah Gin kapoma yan nasariya ma hapat daham orhe atamreipat han ohnong Gin go susa norhe tomhan san wamat napapti han ire tomhano tomhan mohom yan ma nasaripti yano oh ma nasaripti oh go nadar aprinmur por darhetipri. 3Por darhetporhan oh sus tomhan san awamat papti han ire duup han kotporhan ihir wamara Tomhan san nita han oh erer moh datipra daham tomhan san nita han ohe darhetir han ohnong kawsi suma be it darhetiri hangopari. 4Imtirihan oh it orhe atamreipat han tit han ohnong darhetipri. Darhetporhan oh ire duup han saporhan ihir ohnong kak moh kawsi haptor mara ohnong sumo imaro mar darhetiri hangopari. 5Imtirihan oh it atamreipat han tit ohnong darhetipri. Darhetporhan oh ire duup han saporhan ihir wamara ohnong net pora sutperhan hapungopri. Haputporhan it tit tit mat darherpatin kat han ihirnong suyao kat han war mar darheriyao imat orhorwi indeiniptiri. 6Imatwi ihaptin gahan kom pepe oh Norhe mon bopor mat pat brer moh ohe danong ham ohe meng amratiprohewa daham darhetipri. 7Darhetporhan oh saporhan ru wamat pati han ihir wamara Moh ru nita han ohe mon moh kaput mong pan moh oh datiprahe. Ihan dir kaput mong pan moh dir datiprimur. Ihan mon moh dir sutiprohemur goshapti 8mon ohnong net pora pisusa kot dahnong mara sein sut itiri hangopri. Ihtipari pongopri. 9Jisas oh paham meng oh giporpat kuuhan ihirnong Gin mama paham meng ma napor moh tomhan san wamat pati ihir imtiperhan tomhan san nita han oh ihirnong kinmatipra dahaya por dahandeingopri. Dahamara ihir na pot patin Jisas orhordapat Tomhan san nita han oh mimtipramur. Oh ire pati teinong it susa ihirnong sein suma wan han ihirnong Gin gur nohe tomhan san moh gur wamar napaptenmur por wan han ire bes teinong matipramur. 10Gur Got oh ritporhan ma brak matpa meng moh sam na dahaptida. Ritporhan ma brak matpa meng oh mamaru hat patmur. Ap hapti han ihir ap tam moh ero rim mandatperhan ama mandatiri tam wanin oh wan han ihir dara na mandatin tamo rim it haw mutuh tam orhor mar gonotiprimur. 11It dar ma gonotipri oh Hanipyah Got orhor imtipramur. Imtiporhan wamara Epe. Na imtin hatin han moh it dara haw mutuh tam matir moh yahnap moho rim amam isip mat papteprimur. ritporhan brak matpamur pongopri. 12Potporhan sawa poripti hano ihir amrama Mama paham meng napor moh Isrer diradire boknong naham ginapor ma hapat daham Ihan dir gin morhor karapus matinmat net potpera gospotpa orhor kuuhan ire kintei ohoh kas ham ama mandatpa oh. 13Gahan Parisi ihir tap tei hapti kat han Parisio Herot ohe hano ihirnong Gur Jisas ohe patnong sus ohnong da aban mar orhe boknong tasutin meng tit ha ritinohmur por ama darhetpa oh. 14Darhetperhan ihir Jisas ohe pat teinong aprisa Tisa. Nuhut gonong am hat patimur. Go arpin mengwi ripat hanmur. Go Moh winsi hanhe. Moh win timbas hanhe daham meng na porpat hanmur. Got ohe yah meng oh pomatwi porpat hanmur pongopari. Ma potpa oh Jisas ohnong da aban matinmat pongopari. Pora Ihat pat han gwe da oh kiano dahah. Rom ire gapman Sisa ohnong takis yan apriyahan yahda da na apriyahan yaha por dahandeingopari. 15Por dahamtiperhan Jisas oh Norhe boknong tasutin ohe meng ha ritinoh rim naporiya ma hapat daham am hapat ihirnong Wa. Pang yotsi hat pati han bap gur norhe boknong tasutin ohe meng oh ha ritinoh rim dahanahaptida. Gin gur takis yan saripti ohe mani oh tit pitap teinong matinmur potporhan 16ihir arpin dar pitap deingopari. Pitap teinong matperhan oh Gin mani mohnong wamtin. Wamara rumkin moh nihohe rumkin pathe. Winhe nihohe win pathe gur wamar ritina pongopri. Potporhan ihir wamara Mohra Rom ire gapman Sisa ohe rumkino wino mam pat ohwa pongopari. 17Potperhan oh Ihan Sisa ohe wino rumkino oh pathanhe Rom gapman ohe ma hapat daham orhornong asarinmur. Got ohe erer ma apapti ohhe orhornongwi aprishenmur pongopri. Potporhan ihir Epe. Dakuu meng tit napor ma hapat daham sein bupang ringopari. 18Gahan Sadyusi ihir Hanip haputporhan it da na tarpam na masaprimur ripti han bap ihir Jisas ohnong meng dahamtinmat orhe patnong apingopari. 19Aprisa Jisas ohnong Tisa. Moses ohe brak natip meng oh tit mamaru mat brak mar natipmur. Han tit kopen kuu dara inap uh brer timbas patin imap oh hapurhanoh ohe tahem oh arwap go dara ama haputir han ohe puhsi ha hatinoh rim datinmur rim brak mar natipmur. 20Moses oh girim brak mat natip ohoh ihan nuhur dahatin ohe paham meng tit dahanahatiprohemur. 21Han beshei han nanggamder moh patesheri. Patimdapat nanip oh kuu dara inap uh brer timbas hat patin hapungopri. 22Haputporhan arwap oh it tahem datipri. Dat patin gahan uh brer timbas hat patin orhor oh hapungopri. Haputporhan gahan mutuh tah oh datipri. Dat patin inap uh brer timbas hat patin orhor oh hapungopri. 23Ihat orhorwi saptin gahan kom pepe han oh datipri. Dara uh brer timbas patin orhor ohhe hapungopri. Haputporhan gahan uhhe hapungopri. Ihtipari. 24Gin kuu mauh beshei han maihirnong gonsi ma datip oh kaput hanip da ma it masas patepri tei oh ama beshei han maihir de han oh eimat dat patepra por dahandeingopari. Ma dahamtipa oh it masas patimur ma ripti mengnong oh dasei mar ihat mengingopari. 25Por dahamtiperhan Jisas oh Epe. Gur Got ohe meng potporhan ma brak matpa mengo Got ohe kasip oh wan inasi naham napamsapra dao oh gur hanhan hat patim guragure damdapat dasuh da hapti meng riyamur. 26Got ohe wan inasi naham ma napamsapra oh mamarumur. Got ohsi pati han enser ire ina hatin naham dipdipwi patepri ohe dasi nahat napaptepra ohoh ihan kuu han gosdaro na pateprimur. 27Gur hapuripti han ihir da na masapri ma hapat ma dahapti oh Gur Moses ohe irat bek san has hapatin wamar brak matip ohe brak oh gur na saptida. Ma brak matip oh Got oh Moses ohnong Noh Eprahamo Aisako Jekopo ire Gotmur potporhan brak matipmur. 28Got oh hapur da timbas hapti han ire Got hat patda. Basra. Got oh hapur sus da pati han ire Gotmur. Got oh hanip dir haputperhan ire da oh na timbas ham patiwa dahapat ohoh ihan oh da pati han ire Got hat patmur. Gur it da na masaprimur ma ripti oh arpin potahat na daham giporiptimur pongopri. 29Ihir ihat meng oh gosporiptin sawa meng am hat pat han tit aprisa amrapat Jisas oh yah mat orhorwi porpathe dahapat ohnong Gwe da oh kiano dahapat. De ohe sawa meng oh isipnap hat patin ohe hrep oh gonsi sawa meng pat. Go napotina por dahandeingopri. 30Dahamtiporhan Jisas oh sawa meng isipnap hat pat oh mohmur. 31Isrer han gur amratin. Got oh dire hanipyah titwimur. Hanipyah titwi ohoh ihan guragure hanipyah Got ohnong bopor mat papten oh da mutuhdapat orhor orhornongwi bopor mat paptenmur. Dahe orhornongwi dahat patenmur. Kasiphe orhornongwi kasip hat patenmur. Amaru hat orhorwi bopor mat paptenmur ritporhan ma brak matip ohe meng oh noh isipnap hat pat sawa meng ohmur dahapatmur. 32Tit sawa meng isip hat ma pat oh Gur guragure boknong ma bopor tahat patiru arwananah ihirnong asohhe imat orhor ihirnong bopor mat paptenmur. Ama sawa meng yot oh isipnap duupteinap hat pati sawa meng yot ohmur pongopri. 33Potporhan ama sawa meng am hat pat han oh Am nahapat han go yah meng napormur. Arpin hanipyah oh titwimur. Trun handa. 34Got ohe damdapat oh Mama da mohri isipnap hat patmur ma dahat pat oh Apop sum natendeiyao ihsen erer oh Got gwemur napor napriyao ma hapti danong oh Oh isip hat patmur dahapatda. Basra. Ama da ohri isip hat na patmur. Eimat isipnap hat ma pat oh Got orhornong da apris bopor mat papti dao arwananah ihirnong da apris bopor mat papti dao ama da yot ohri isipnap hat patmur dahat patmur pongopri. 35Potporhan Jisas oh amrapat Han moh dasi ham rihe dahapat ama han ohnong Go Got ohe napapindin hrepnong hatinmat oh go kakduup hat patim ihat girimur pongopri. Potporhan kuuhan ihir amrama duung dasi hat patim duung mengwi ripat han moh dir kianorim dahamtiprohe daham it ohnong na dahandeingopari. 36Gahan Jisas oh Got ohe ap yawar oh rosa ihirnong meng por am deingopri. Meng ma potip oh Gure sawa meng ma naporipti han ihir Got oh Krais namburin han ma kis mat pat han oh Depit ohe puh ihir tarpatipramur ma ripti oh kinhat it tarpam Depit ohe puh hatiproh. 37Yahsup oh Depit ohe atem teinong rit atporhan ma brak matip oh dahenmur. Diradire Hanipyah Got ohdapat norhe Hanipyah ohnong Go norhe bes oper tan moh tongnotinmur. Tongnot patin noh gorhe mahaw nahatin han ihirnong gorhe hrepnong namtipramur. gipor rit atporhan Depit oh brak matipmur. 38Depit orhor imat Krais ohnong Norhe Hanipyahmur ma potip oh ohri hat pat hano rim Norhe Hanipyahmur potipmur. Ihan gin kinhat it orhe puh hatporhan oh Depit ohe puhmur potiprohe pongopri. Potporhan kuuhan ama ihir ohe mengnong pomat amratper daham amam hat amrangopari. 39Jisas oh kuuhan ihirnong meng am deingopri. Meng ma am matip oh Gur sawa meng napor am nahapti han ire ma ihapti oh Nuhursi inahatipri daham inin hat patenmur. Ihir iraire danong ham yahnap watah dapsi dap oh ara kuuhan ire kintei sayao tamohopti teinong saperhan kuuhan ihir Nure hanipyaha ha napotingwe daham sayao 40rotu aphe iraire pohon tongnopti yah ka ohwi tongnotpera dahayao den tarmur dapti teinong oh tamsi kat yahwi ha namdengwe daham sayao ihat iraire danongwi ham sapti han bap ihirmur. Ihan ire ma ihapti ohe da oh Nuhurri ihtin han hatiprio daham inin hat patenmur. 41Ama han ihir tit ma ihapti oh kuu tahem ihirnong Got ohnong apin oh titsi apinmur por be dasuh mar ire erer adar bisei deiptimur. Got ohsi mengritperimhe Kuuhan ihir amrama Maihir Got ohsi yahnap han hat pati ma hapat ha dahatingwe rim meng dapsi dapsiwi pramat pisaptimur. Ihir sawa meng am hat patimdapat orhor imat er hat son ohe da oh namgipti ohoh ihan ama ihapti han bap ihirnong Got oh Gur ernap han bapmuro por batbet isipnap apripra han bap ihirmur pongopri. 42Jisas oh Got ohe ap yawar ohe mani saripti san duup oh tongnom wamat patin ihir apris mani oh san temnong deingopari. Ihsen ruumsansi ma pati han ihir iraire ma apriyahe mani oh ruumsan mat orhor san temnong deingopari. 43Ihir imat sariptin kuu ihsen timbas bisei kuu tahem tit aprisa sup tan gar yot tit saringopri. 44Itporhan Jisas oh wamara kuuhan ihirnong Noh arpin meng napotiprohmur. Kamah han bap ihir ihsen ruumsan sariya orhor ruumsan kat mandaya ohoh ihan ire ma sariya oh gar hatin hat sariyamur. Mama kuu tahem uhe ma sar oh hatip hat pat orhor urhe ma garpok marin pat oh komdapat urhe mohot din ohe danong na ham gonapsi sar ohoh ihan urhe ma sar oh isip mat hatin sarmur. Ire ma sariya oh garpok hatin sariyamur pongopri.

will be added

X\