Ruk 1

1Nohan hanipyah kamoheim hat pat han Tiopirasa. Rih nure mutuh tarpam ma ihat pir ohe meng oh kat han ihirdapat ama meng oh nure bes tei brak matpera daham brak matirimur. 2Ire ma brak matiri oh kat han ire kintei Jisas Krais ohe gonsi tamreim saporhan Got orhe meng pot pisapti han ihir wandeipti ritperhan ire wamara ritiri meng ohwi brak matirimur. 3Ihir imat brak matiri orhor nohnong oh ama meng oh gonsinong oh noh potahat dahatahama pomat dahapat ohri ma ihat sasuh meng ohri daham brak deipat noh imat tit tit mat brak matpora daham mama brak mat nasar ohmur. 4Go ire ma napotiri mengnong oh arpin meng ma hapat ha dahatinoh rim noh it pomat mama brak mat nasar ohmur. 5Herot oh Judia mong ohe kakhan hat patina gahan Sekaraia oh Got ohe ap yawar ohe hanat bok han hat patesuhmur. Ti hanat bok han hat ma pateshe han bap ihir Abaisa ihirmur ama porishe han bap ihiroh Sekaraia oh hanat bok han hat patesuhmur. Inap Irisabet uhhe Eron ohe puh ma hanat bok han hat pateshe ire puh orhormur. 6Ite gamin dahe Got ohe kintei duutin dasi hat orhorwi susa Got ohe sawa mengo orhe porpat mengo ohwi rum mutuh matwi dindeishemur. 7Yah hat sashe orhor brernong inap uh kasip ham brer timbas patin kusen haya paser haya hatpamur. 8Gahan tit dah tit Abaisa bap ire ap yawar ohe tamreipti dik oh hatporhan Sekaraia hanat bok han oh Got orhe kintei tamrein indingopri. 9Tamreipatin iraire Nih Got ohe ap yawar ongengnap papat mutuh ros gapgwesi han oh Got ohnong atemtiproh rim ma kis deipti kwei ohsi kis deiyaoh Sekaraia ohe boknong hangopri. Hatporhan oh irat gap temtiperhan tuhup maras ma gapgwesi hapatru ama ihtin han irat gap oh atemtinmat Got ohe ap yawar ongeng mat papat dahnong rongopri. 10Ros atendeipatin kuuhan kat gon ihirhe Oh ama han atendeipatin dirhe Got ohsi mengitpera daham ihirhe kot dah oh tarmur Got ohsi mengir inpari. 11Ihir kot dah oh ihat patin Sekaraia oh wandeioh Hanipyah Got ohe atamreipti han enser ihir tit han tit gapgwesi han atendeipti gwar tan oper tan oh tandeit patgopri. 12Tandeit pathan sein bupang rim kas isip tit hatipri. 13Kas isip tit hatporhan enser oh We. Go kas hapra. Gwe Got ohnong ma dahandeipat meng oh Got orhor amram am hat patmur. Am hat pat ohoh ihan gwe inan Irisabet uh brer mon tit natipramur. Natporhan ohe win oh Jon potinmur. 14- 15Ama brer oh hanip yah hatporhan Hanipyah oh wamara yahnap han win isipsi hat pat hanhe dahatipramur. Ihtin han hatiprao rim itap gorhorhe weso rim amam isip tit ham patepramur. Be kuuhan kat ruumsan ihirhe Ihtin brer saro rim Wes ihtin brer saro rim amam hatiprimur. Hanip Brer orhornong oh wain tomo kasip er tomo oh na dapra hanmur. Orhe dahe sup uh ma sar tei orhor Yahsup oh teip mat orhorwi pisasipramur. 16Imat isip mat pisapatin ama brer oh Isrer ruumsan kuuhan bap iraire danong hat sapti danong adapurkera Hanipyah Got ohe danong hen ohe danong deipramur. 17Ihama Iraija ohe kasip ham ma tamreisuh ohe da hatin hat dara ohe tan hat Hanipyah ohe aprin mandap oh ohri han hat sapramur. Ohri han hat susa brer tamder iraire da na gosat pati da oh it irair tamder da gosat indin dasi mat pisapramur. Got ohe mengnong na amram sakarap mat sapti han ire dahe adapurkera duutin dasi hat ma sapti han ire da hatin mat apisasipramur. Ihama Hanipyah ohe nita hatin han ire danong amamen mat tei orhor sa apripra daham amamen matipramur pongopri. 18Gipot mandatporhan Sekaraia oh Wa. Nohhe paser hat tei uhe kusen hat tei moh noh kinhat gwe ma napor meng moh arpinhe dahatiproh potipri. 19Gipotporhan enser oh Es. Got ohe duup tandeit pat han Gebrier nohmur. Ihat pat han norhornong Got oh Gin go yah meng mohsi susa ohnong potinmur napor nadarhetporhan noh apris gonong mama napor ohmur. 20Gin Got orhor ama dik oh dam ha tarpatinoh potporhan arpin dam timdipra meng ma napor moh go Moh arpin menghe na dahah ohoh ihan go menghe na mengir meng timbas han hatin hat patin mameng moh dam tarpatporhan go it mengitipramur pongopri. 21Ameng oh imat ohnong porpatin ihir kot dahdapat trun tit minhan inpari. Trun tit minhan patim Han moh ap yawar mahamdapat kapkap na mara moh kinham sa kapkap na maro daham minhan inpari. 22Minhan pater patima ire garhaya tei mah marongopri. Maraoh meng timbas han hatin ham kimiringopri. Oh kimirit mandatporhan ihir Moh Got ohe ap yawar maham wan han tit pinggi ma hapat dahatpari. Ihpat meng timbas han hatin hat patin beswi kis mar pinggim patenipatri. 23Iham ap yawar ohe tamreindin oh tamreima ohe tamrein indin dik oh timbas hatporhan it orhe apteinong susa patesuhri. 24- 25Patin gahan inap Irisabet uh brer ake hangopri. Brer ake hama Gin Hanipyah oh hinhina naham kuuhan ire nohnong naripti da moh gin yah naham napanggei ma hapat. Gin noh brer ake isip hahrit ire kintei pitap hatpor daham urhe ap oh treman indipmur. Treman patin hanen hayop sutipmur. 26Irisabet uh brer akesi treman patin gahan hanen hayop oh sutporhan dop hayop oh Got oh enser Gebrier orhornong Gin go Gariri mong Nasaret apteinong sonmur. 27Susa kuu horhor Maria uh Depit ohe puh Josep ohnong ihit sa gosdatipri rim kis mat apapti kuu Maria uhnong meng potinmur por Got oh ama darhetip oh. 28Por darhetporhan enser oh arpin Maria uhe patnong susa We. Kor Maria go patda. Got oh gosi patim bapkei dasi isip nahat napapatri pongopri. 29Potporhan Maria uh amrama Epe. Got oh gonong bapkei nahat napapatmur ma napor meng moh kian meng sa napor daham da trun darhetipri. 30Da trun darhetporhan enser oh We. Maria go da trun darher kas hatipra. Got oh go yahnap kuuo rim orhe da orhor yah nahat napapatri. 31Orhor inahat napapat ohoh ihan go brer ake hama brer mon tit itiprari. Sarpat brer ohe winhe Jisas potinri. 32Ama brer oh hanipyah winsi han ham tandaptuhutin han win isipsi han hatiprari. Hama putei mahat ma pat han Got orhe brermuro porin han hatiprari. Ihama rop Depit ohe Isrer ihirnong ohe hrepnong mar ma paptesuh ohe ap tan wanin oh oh datiprari. 33Darpat Jekop ohe puh ihirnong ohe hrepnong mar eimatnap dipdipwi papteprari. Ohe hrepnong mar ma paptepra oh na timbas ham eimatnap orhe hrepnong mar papten han hatiprari pongopri. 34Potporhan Maria uh Epe. Noh han ihir tap na pat tei moh noh kinhat brer ake hama gwe ma napor brer oh itipra potipri. 35Potporhan enser oh Es. Got ohe Yahsup oh gwe mutuhnong hatporhan putei mahat ma pat Got ohe kasip oh gonong gianahatipramur. Gianahatporhan ama ohe kasip ohe pe oh brer tarpatipramur. Tarpama go itipramur. Gwe ma itipra brer oh yahnap han ongeng tahat orhorwi patin ihir wamara moh Got orhe brer monmur porin brer itipramur. 36Amratin. Gwe amun Irisabet uhhe Brer na sar kasip hatip kuumur ma poripti kuu uhhe gin kusen tei orhor brer ake ham dophei hayop sutmur. 37Tit han tit Got oh na imtin hatin handa. Basra. Orhorwi gonsi indeipat han ohoh ihan orhor inahapatmur pongopri. 38Potporhan Maria uh Yahwa. Hanipyah orhe atamreipat kuu noh mama pat ohmur. Ihan gwe ma naporru ha nahatinoh potipri. Gipotporhan enser oh amrama mandam sangopri. 39Maria uh meng amrama patdapat gahan Judia mong yei mutuh mongnong kapkapwi hat ruhupri. 40Rupat Sekaraia ite gamin ap oh rosa amup Irisabet uhnong Uum go patda por meng potipri. 41Potporhan Irisabet uh amratporhan uhe brer ma ake mutuh pat brer oh tandapurkengopri. Tandapurketporhan Yahsup oh uhe mutuh oh ruumsan ham isipnap hangopri. 42Ihpat Maria uhnong akitwi Got ohe bapkei naham ma yah nahapat da oh Maria gonong isipnap bapkei naham yah mat napapatmur. Kat kuu ihirnong imat na apripatmur. Gonongwi imat napin patmur. Gorhornonghe inahat napapatmura; gorhe ma itipra brernonghe bapkeisi mat orhor papatmur. 43- 44Go apris nohnong Uum go patda napotporhan kopen amrapatin orhor nohe brer ake mutuh ma pat brer mohhe amam ham taptaparmur. Taptapatporhan norhe Hanipyah ohnong itipra kuu moh bisei kuu nohe patnong nandarhe moh nohnong yah da tit naham nohe patnong nandarhe ma hapat dahahmur. 45Gin Hanipyah ohe meng oh Go ihtipra kuu gomur napotporhan go Arpin nohnong inahatiprawa ma dahah kuu go amam isipnapsi kuu gomur pongopri. 46Irisabet uh Maria uhnong meng potporhan Maria uh ga tit ama ritip oh. Nohe damdapat Hanipyah ohnong armi mar win isipsi adeipatmur. 47Adeipat nohe nambutin Got oh patwa daham damdapat amam isipnap tit deipatmur. 48- 49Noh orhe atamreipat bisei kuu orhor orhor nohe danong ham inahapat ohoh ihan noh orhornong amam isipnap deipatmur. Kasipnap Got oh yahnap tit nahatporhan kuuhan gonsi ihir nohnong Uhnong Got oh amam isipsi mat papat kuu moho naporwi napapteprimur. Orhorhe ongeng tahat yahnap hat orhorwi pat hanmur. 50Orhornong kas ham orhe danongwi hat pati kuuhan dirnong oh orhor hinhina nahat napapatmur. Napapatru han puh han puh ihirhe imat orhorwi orhornong kasa ham orhe danongwi hat ayahanoh ama ihat pati bap ihirnonghe hinhina da ohsi mat orhorwi paptepramur. 51Orhe bes tei kasip han indeipatmur. Ma indeipat oh tit hanip ihir Nuhurwi ihtin han bap hat patimur daham iraire danongwi hat sapti han bap ihirnong oh er mat darherpatmur. 52Ire hrepnong mar ma papti kakhan ire isip hat pati winnonghe ahatip deipatmur. Nuhurwi ihtin han hat pati ma hapat na daham iraire danong na hat pati bap ihirnong oh winsi han bap mar ire winnong adaptuhurpatmur. 53Pahohsi hat pati dirnong oh yah han oh yah mat orhorwi napripatmur. Nuhur erer ohsi yah hat patimur ma dahapti bap ihirnong oh ire boknong andehhe ti na deima be darherpatmur. 54Dire awher ihirnong Kaput noh ihtipramur por ma rit asarisuhru mat orhor inahapatmur. 55Ma inahapat oh Eprahamo orhe puh dirnongo oh orhe hinhina mat paptepramur ma potip mengnong oh orhor daham hinhina nahat napapatmuro. rima Maria uh Got ohnong armi mara ga ama ritip oh. 56Maria uh ama ga oh rimo hama amup Irisabet uhsi patin hayop yitir sutporhan it urhe apteinong ama waihip oh. 57Gahan Irisabet uh brer ake sum brer mon itipri. 58Itporhan tap aptei hano urhorsi taptem bapo ihir Got ohe uhnong hinhina mar isip ma yah dei ohe meng oh amrama uhe patnong sus urhorsi irair tap hat amam hatpari. 59Ihama gahan brer itir dik oh patin kir oh hatporhan kuuhan ihir Gin mon ohe eit watah agatmatin dik hah ma hapat daham tap tei hangopari. Tap tei hapti brer ohe win oh itap orhe winsi Sekaraia potinmur pongopari. 60Potperhan sup uh Es. Ohe win oh Jon potiprohemur pongopri. 61Potporhan ihir Wa. Orhe uum mam ihirhe ihtin win tit patda. Ihan ihtin win oh na atiprohemur pongopari. 62Pora itap oh kian win atinmur potiproho rim bes tei kis mar dahandeingopari. 63Dahamtiperhan oh iraire ohe tei brak tahapti tan tit bes tei kis mar poprina potporhan ihir dat apingopari. Dat apriperhan oh Brer ohe win oh Jonmur por brak deingopri. Brak matporhan ihir wamara da trun darhengopari. 64Ihtiperhan itap ohe meng mandap ma anggut patesuh oh asut orhor kapkap meng mandap oh adaputporhan Got ohnong armi mar mengingopri. 65Mengitporhan orhorsi tap aptei han ihir wamara Got oh wan tit dei moho daham ihirhe kas hatpari. Kas hama Judia yei mong aptei aptei moh gospot pipari. 66Gospot susa aptei aptei oh ama meng oh amrapti ihir Hanipyah orhe kasip ohsi pat brer moho daham Ihan ohe ma indipra oh kinhatin han hat sa patepra daham ihirhe gospor apetpari. 67Jon ohe itap Sekaraia ohe Got ohnong ma armi matip oh mamaru ham armi matipmur. Ma armi matip oh Yahsup oh ohe mutuhnong ruumsan hama teip hatporhan oh propet ire Got ohe meng ma poriptiru hat mengitipmur. Ma mengitip oh 68Isrer dire Hanipyah Got oh gin nambutin ina dasi nahat napapat ohoh ihan orhornongwi armi mar papten han ohmuro. 69Mama armi mar papten han orhor orhe atamreisuh han Depit ohe puh ire boknong oh dirnong namburin kasipnap han tit matporhan oh tarpam patmuro. 70Ihat tarpam ma pat oh orhe meng pot pisashe han propet yahnap han ihirnong Noh gure namburin han tit napripramur potporhan ire ma risheru mat orhor gin dirnong namburin han oh napriporhan oh tarpam patmuro. 71Namburin han oh ihat patim dirnong mahaw naham heisup nahat napapti han ire bes teinong nahat napapatin ire bes teimdap dirnong nambur yah teinong nahen han hat patmuro. 72Ihat dirnong namburin han ma napin pat oh diradire awher ihirnong Noh gurnong hinhina naham yah nahapramur ma potip meng ohsi; ihirnong ma rit atip meng ohsi gin norhe ritip meng oh gin imtipora daham dirnong gin napin patmuro. 73Rih rit ma atip meng oh dire aw Epraham ohnong Arpin noh inahatipramur por awam tuketipmur. 74Meng por ma awam tuketip oh Epraham gwe puh ihirnong noh mahaw han ire bes teidapat ambura yah teinong matipramur. Matporhan ihir norhe natamreindin oh kas timbas sa natamreipri. 75Natamreima norhe kintei nuhur Got orhe hanmur rim ongeng mat papti da ohsi; duutin da ohsi hat ma sapti da ohsi hat sa patepri rim Epraham ohnong gipor awam tuketipmur. 76Gin nohe mon go Hanipyah ohe aprin mandap oh gori hat sus mandap amanhem amamen matipramuro. Go imat amamen matporhan ihir wanahama gonong Mama han moh putei mahat ma pat Got orhe propetmur naporiprimur. 77Gori sus mandap ma amamen matipra oh Hanipyah orhe kuuhan ihirnong Hanipyah oh gure er hat sapti yan oh natimbas deipat nambutipramur por am mat pisashemuro. Go ihirnong gipor am mat pisapatin ihir am hatiprimur. 78Got orhor manap dasi naham hinhina nahapat han ohoh ihan orhor dirnong namburin han ma napripra oh atan maras mong da deipat hatin han oh dirnong napripramur. 79Imat dirnong napriporhan oh kwitem dus patim haputin ina hat pati bap ihirnonghe has teinong matipramur. Mara manap dasi ham yah hat orhorwi sashen ohe mandap oh namgit napisasipramur. rima Sekaraia oh Got ohnong armi mar ga ritipmur. 80Iham patdapat brer Jon oh hanip yah hapat Got ohnong dahatin ohe da oh isip hat pipmur. Isip hat sapatin oh Got orhe danong hatinmat hanip timbas irat timbas mong dusnong susa atei indipmur. Patdapat gahan Isrer ire kinteinong pitap hatin dik hah ma hapat daham ire kintei tamrein sasuhmur.

will be added

X\