Jemis 3

1Nohe taptem gur amratinmur. Got oh meng amrapti han ihirnong dahamara sama garpok imtipramur. Sawa meng am deipti han dirnong oh dahanahama nasama isipnap orhor inahatipramur. Inahatipra ohoh ihan gur Noh sawa meng am mat pisashen han hatiprohnengo han ruumsan gur ihat dahathe sasipri. 2Dire ma saya apriya haptinong oh trun tit er hat saya apriya hat patimur. Tit han tit han ihir er meng na rima yah meng orhorwi rit saya apriya hat pati han ihirmur. Ama ihat pati bap ihir Got orhe da ohsi tap kat hat ma pati han ihirwimur. Ama ihat pati han bap ihirwi iraire inanong ongeng mat orhorwi pisaya popriya mat papti han bap ihirmur. Ama ihat pati han uut han gurwi Nuhur meng am mat pisashen han hatpera dahenmur. 3Pangnong ongeng mat paptenmat oh mohnong dahenmur. Hos isip ohnong ma pisapti oh ain gar du tit atem tei mandeh katwa mat asara nangdapat pras pora hanip diradire saper dahaya katnong dason mar pisaptimur. 4Oh hos ohe ma ihpat meng oha; tit oh sip ohnong dahatinmur. Sip oh isipnap hat patin inim oh apris mermat pisapatmur. Mermat pison ina mat papatin orhora; ma pisapat han orhordapat gar han ma dason mat pisapat gar han ohnong marima orhe ma sapor ri katnong oh sip isip gonnong moh gar han moh ohdapat dason mar pisapatmur. 5Amaru hat orhor pang oh gar orhora; gar pang orhor isip ham bapkei tahat sapatmur. Irat danong oh dahatinmur. Ama irat da gar oh har hapat tandot susa isip hat sapatmur. 6Pang oh ama irat da ohe tan hat patim gar has hat sus hanip boknong har mara er deipatmur. Diradire atem tei ma pat han pang mohoh er ohe hrepdapat hat patim hanip dirnong er danong arnahat napisus dire boknong sup naham er nahapatmur. Sup naham er nahama er aptei ohe er nahatin irat has ohe kasip ohsi matporhan ama kasip ohsi ina boknong moh har naham er nahat orhorwi napapten han ohmur. 7Hanip dirdapat kot apopo nero hasiapo pumo sor hru tem pat hano ama kot apop erernong oh ambura hanip dire bes tei sahama papindin ina hat patimur. 8Apop erer ihirnong imat papten inasi hat pati orhor diradire pangnong oh imat papindin ina hat na patimur. Na patin orhordapatwi hanip dirnong er nahatinmat ama er nahatin danong oh na tupera oh danwa danot namdem nitin ohe danong ohwi hat patmur. 9Tap pang morhorsi tit dah Hanipyah at Got ohnong weso por armi deiptimur. Tit dah hanip Got orhor orhe hatin namanhetip hanip bap ihirnong dasei mar er meng poriptimur. 10Nohanher nohe taptem gur tap pang morhorsi weso riyao dasei meng poriyao ma hapti oh ermuro. Tap pang morhorsiwi iham pati oh ermuro. 11Tom tap uuptem amdapat oh tom napon tomsi; yah tomsi tap uuptem orhor maron hatinda. Basra. Na ihtin hatinmur. 12Nohe taptem gur dahatinmur. Irat yuwot oh ket timdiprohda. Mahap oh yuwot timdiprohda. Basra. Ihat dam na timaptimur. Napon tom uuptem oh tom yah uuptem maraprohda. Basra. Na ihpatmur. Amaru hat orhor tap pang morhorsi er pang hayao yah pang hayao oh na haptimur. 13Gur Noh dakuu hanmur. Noh am hanmur ma ripti han gur ihir wanahama Mama han moh arpin dakuu hanhe ha dahatingwe rim dakuu han ire dakuu hat pati ohe pe manap da teiwi kuuhan ire danong ham panggeiptiru mat susa pinggit sashenmur. 14Imat na pinggima damdapat heisup mar bap matin da deiyao Ihtin han hat inpor dahatin da hayao ihyahanoh ama ihat dahapti han gur Nuhur dakuu han hat patimur ripri. Giriyahanhe ama ihat patim giriya han gur dasuh meng ritiprohe ohoh ihan gur ihat daham ripri. 15Ama ihat dahapti da oh Got orhe dakuu nahapat da oh basmur. Kakdah morhe er nahapat dao mongsup ire er dao ama ire hrepnong bapkei nahat napapti da ohmur. 16Ama da ohe dam ma timapat oh er dam orhap timapatmur. Er dam ma timapat oh hanip ihir heisup mar bap deipti dao Norhorwi ihtin han hat inpor dahapti dao ama ihat dahapti ohe pe ma dam timapat oh sakarap gosham inggoshapti dao ti da ti da hapti dao ama da orhap dam timapatmur. Ihtin ohoh ihan gur Nuhur mama er da mohsi patim be nuhur dakuu hanmur ripti ma hapat dahenmur. 17Oh kakdah ohe da dam ma timapat da ohmura; aw tei ohe arpin dakuu da ohe pe ma dam timapat oh mamaru hat dam timapat ohmur. Ohri duuptei ma dam timapat da oh ongeng taham yahnap hat pati da ohmur. Tit oh manap goshat pati ohe da ohmur. Tit oh da gosat pati ohe da ohmur. Tit oh hanip ire hrepdapat hat patim ire meng amrapti ohe da ohmur. Tit oh dipwi hinhina mar panggeipti da ohmur. Tit oh hanip ihirnong Moh kamah hat pat hanhe ihan ohnong yah matpora. Moh borop hanhe noh na panggeitpora na daham yah da titwi deipti da ohmur. Tit oh ina teimdapat tit da hah da mutuhdapat tit da hah na ham tit dawi hat pati da ohmur. Ama ihapti da muk gon oh aw tei ohe dakuu da ohe pe dam timapat ohe da ohmur. 18Hanipnong manap goshat patenmur por sawa meng poripti ohe pe oh yah hat son ohe yah dam oh timan sapatmur.

will be added

X\