Epesas 5

1Gur Got orhe boporsi nahat napapat brer gur ohoh ihan gurdapathe ita orhe da orhor dindeinmur. 2Krais oh dirnong bopor nahama dire gwemat haputipmur. Dire gwemat ma haputip ohe gapgwe oh ap yawar tei apop atendeipti ohe gapgwe hatin hat sus Got ohe rum tem roporhan oh da yah ham amam hatipmur. Ihan Krais oh dirnong imat bopor naham haputipru hat orhor gurhe arwananah ihirnonghe imat orhor bopor mar da apris paptenmur. 3Gur Got orhe nita hat pati ohoh ihan gure mutuh oh bisei saw goshat sapti dao imaho miano ire da hatin ham er hat sapti dao arwananah ire erernong asoh abopor mat sapti dao oh gure mutuhnong oh tarpama gwe duup oh meng pat hatiprarim inin ham ongeng tahat orhorwi patenmur. Gur Got orhe nita hat pati ohoh ihan ongeng tahat orhorwi ayahan yahmur. 4Ongeng tahat orhorwi patim tohor meng hatin hat er meng ripti mengo dam na tarpatin ohe mengo tohor goshapti mengo ama meng oh gurri ripri. Got orhe nita hat pati gurri ihtin meng oh na ripti awam meng ohoh ihan ama ihtin meng ohri ripri. Gure ritin oh Got orhornongwi weso por armi mat paptenmur. 5Nohe ma napotiproh meng moh gur arpin ma hapat dahat pati meng oh napotiprohmur. Mamarumur. Bisei saw goshat sapti ihiro imah mian ire da hatin hat er hat sapti ihiro nohewimur por ma abap mat pisapti ihiro ama bap ihir eimatnap Kraissi; Got ite napapindin hrepnong na hatipri bap ihirmur. Erer oh nohewimur por ma abap mat pisapti han bap ihir ama erernong iraire got hatin mat paptim ihat saptimur. 6Ama Got ohe meng na amram kom asar ihat sapti han bap ihirnong Got oh heisup mat papatmur. Imat papat ohoh ihan gurri ama ihtin danong ohri hapri. Kat ihir dam na tarpatin meng asoh dam tarpatin meng hatin mat napor dasuh naham ihtin dap teinong pranahat napisasipri ohoh ihan gurri ama dam na tarpatin mengnong ohri amram dindeipri. 7Ihat dasuh han ihir dasuh nahat aprisipri ohoh ihan ama ihapti han bap ihirsiri nap nanip gosham ire tapnong hat patepri. Gurarhe teinong patenmur. 8Rih gure da oh kwitem hat pateshemur. Gin oh diradire Hanipyah orhe danong hama orhe nita ma hat pati oh orhe has da ohsi nahat napapatmur. Orhe has da ohsi imat napapat ohoh ihan gur kwitem dus napapat han ohe brer hatin hathe patepri. Orhe has tei ma napapat han orhe brer hat patenmur. 9Orhe has da teiwi susa dam ma timapat ohe dam oh mamarumur. Yah hat sus ma duutin dawi hat sapti dao arpin dasi sapti dao oh has da teiwi sus ma dam timapat ohe dam ohmur. Gur ama has da teinong hat pati bap gur ohoh ihan ama dam ohsi hat sashenmur. 10Ama dam ohsi hat susa Hanipyah ohe Moh yahmur napor ma amam hat pat danong asoh dason tahat sasipora daham dason mat orhorwi sashenmur. 11Kwitem ohe brer hat ma pati bap ihirhe dam na tarpatin ohe er danong asohwi dason mar dinggoshat sapti ohoh ihan gurri ama dam na tarpatin ohe danong ham dinggoshat sapti bap ire tapnong hamhe sasispri. Has da teinong hat orhorwi hat susa ire kwitem hat sapti er danong oh has teinong mar pitap teinong deinmur. 12Ire ahar ma er hat sapti ohe da meng oh kassi meng ohoh ihan ritinhe na ritin mengo rim na poriptimur. Ihan ire er da oh has teinong mar pitap teinong deinmur. 13Ire er da oh has teinong mar pitap teinong matperhan kuuhan gonsi ihir has teinong hat pati kuuhan ihirnong wamara ihat pati kuuhanhe daham pomat daham am haptimur. 14Tit has teinong ma hapti ohe meng oh mamaru hat riptimur. Hapura timon pat han go kin wataham masona. Masporhan Krais orhe has ohsi has teinong nahatiprohmur riptimur. 15Gur has teinong hat pati han bap gur ohoh ihan da hut patim kwitem dus ohe da hatin hat pati han bap ire da hatin hat sasipri. Dakuu hat ma has teinong sapti han ire da hat saptiru hat orhorwi potahat sashenmur. 16Er hat son supheri gin tarpat apir ohoh ihan Mihat pati dik morhor yah da pinggit pisapora daham onggem mama dik morhor yah da pinggit pisonmur. 17Gur yah da pinggitinmat oh da hut pati han ire da hatin hat sasipri. Hanipyah orhe dahat pat danong morhorwi am hat sasipora daham am hat sashenmur. 18Wain er tom ruumsan dama ohe kasip hrepnong nahatporhan da ban tahat ma sapti oh er ohoh ihan gurri ihapri. Mandama Got orhe Yahsupnong asoh nohe da mutuh mahan ha teip nahatinoh. Teip nahat napapatin noh orhe kasip hrepnong hat patepor daham pei mat pisashenmur. 19Imat pei mat pisusa guragure ma tarmur meng sariya tei oh ma brak matpa meng ganong riyao rotu ham ma ga ripti ohe ga riyao Yahsup orhe bokdapat tarpam ma ripti ga riyao ihat meng ohwi gosporinmur. Ihat mengitin danong ohwi hat patim Hanipyah orhornongwi dahamo armi maro mat paptenmur. 20Ihapti Jisas Krais orhorsi tap hat patio rim diradire At Got ohnong Wes erer gonsi moh inahapat hano por dipwi armi mar paptenmur. 21Krais orhe danong ham orhe winnong aisip matin ina hat pati guroh tit uhe meng amra tit uhe meng amra gosham guragur tap kat goshat patenmur. 22Kuu gurhe Hanipyah orhe hrepdapat hat patim meng ma amraptiru mat orhor imanir ire hrepdapat hat patim meng amramo hat patenmur. 23Krais orhe nita bap sios dire kakhan hat patmur. Orhe kakhan hat patru hat orhor han ihir kuu gure kakhan hat patimur. Ihan ire hrepdapat hat patim meng amramo hat patenmur. Krais orhor kakhan hat ma pat oh orhe nita sios bap dirnong nambur orhe hrepnong nahat napapatmur. 24Inahat napapat ohoh ihan sios dir Krais orhe hrepdapat hat patim meng ma amram dindeiptiru hat orhor kuu gurhe imanir ire hrepdapat hat patim ire meng gonsi amram dindeinmur. 25Imapir gurdapathe Krais oh orhe nita sios dirnong bopor nahama dire gwemat ma haputipru mat orhor gurhe inanir ihirnong imat bopor mat paptenmur. 26- 27Krais oh dire gwemat ma haputip oh Noh norhe nita sios kuuhan bap maihirnong tom gahdeipti ohe tan mat gahmaro norhe meng ohsi yah maro mar ongeng mat papten dasi matipramur. Deipat ire ina bok andeh sirap huhun tamboro er yan datin hatin hat pati ohe tamboro oh timbasnap ina yahnap ongeng mar mihihnap mat papat bok tei andeh norhe bes teinong mar datipramur daham dire gwemat haputipmur. 28Ama Krais oh dire danong ham haputipru hat orhor han gurhe inanir ihirnong imat orhor da apris bopor mar paptenmur. Bopor mat papindin oh ditadit tap ina hat pati sa. Ihan noh norhe boknong bopor mat patru uhe boknonghe imat orhor bopor mat papinpora daham bopor mat paptenmur. Uhe boknong ma bopor mat papat oh oh gorhe boknong bopor tahat patmur. 29Diradire inanong oh diradir dasei deiptida. Basra. Krais oh orhe nita sios dirnong pomat ma napapatru hat orhor dirhe diradire inanong pomat paptimur. 30Dir orhe buh bes ina titwi hat pati ohoh ihan orhor pomat napapatmur. 31Kuuhan gosdara tit inawi haptimur rim ma brak matpa oh mamarumur. Ihan han ihir kuu datinmat supir itapir mandama kuu dara itait tap hapti tit inawi hat patimur rim brak matpamur. 32Ama brak matpa meng ohe mutuh meng yahnap treman patesuh meng oh patmur. Ama treman pat meng oh noh Mamaru hat pat ma hapat dahapatmur. Kuuhan gosdar tit inawi hat patimur ma napotip oh Krais orhe nita sios dirnong orhe ina titwi nahat napapat ohe meng oh ginapotip ma hapat noh dahapatmur. 33Orhe nita sios bap dire pati ohe meng ohwi na napotip ma hapat kuu gamder dire paten mengsi tap mat napotip ma hapat dahapatmur. Imat napotip ohoh ihan Han gurhe gure inanong ma bopor mat paptiru mat orhor guragure inanir ihirnonghe imat orhor bopor mat paptenmur. Kuu gurhe imanir ire meng amram ire hrepdapat hat orhorwi patenmur napotip ma hapat dahapatmur.

will be added

X\