1 Pita 2

1Nohe taptema. Nohe taptem Got ohe nita hat pati gurri guragure er danong ma marin pati dao dasuh hapti dao atem teidapatwi yah han hatin hapti dao damdapat arwananah ire abopor deipti dao komdapat aripti dao gure ama ihapti da ohri pomat gonsi hariri por mandanmur. 2Mandama brer birip ire non danongwi isip hat ma pati ohe tan hat orhor gurhe Got ohe yah meng ersi yahsi sahsahhe timbas yahnap hat pat meng moh dipera daham din ohe danongwi hat patenmur. Din danongwi ham daptin Mama den moh kasip naham Got ohe danong hapti da oh hanipyah nahatporhan Got oh sa nambutipra daham ohe danongwi hat patenmur. 3Gur hanipyah ohe hinhina naham yah nahapat da oh gur kis taham daya por oh yahnap denhe dahatirimur. Yahnap den hatir ohoh ihan gurhe ama den din ohe danongwi hat patenmur. 4Hanipyah Krais oh ap kwei tam hatin dipwi paten dasi hat pat han ohoh ihan orhe duupnong orhorwi hat patenmur. Ama ap kwei tam oh kuuhan ihir Moh er tamhe por dasei mar mandatpa orhora; Got orhor Moh yahnap kasip tammur. Datiprawa daham mamen mat itipmur. 5Eimat paten dasi hat ma pati gurhe kwei hatin hat pati bap gurmur. Ama ihat pati bap gurnong oh Got orhe ros paten ap yawar tam nadara orhe ap nahapatmur. Ama inahat napapat bap gurnong oh Got orhor ongeng nahat napapten hanat bok han nahapatmur. Ma nahapat oh gure dahe Krais ohe dap tei ire apop ma sum naprisheru mat orhor gure dahe ha naprishengwe daham inahapatmur. Gur imat orhornong apriperhan Krais ohe dap tei imat napriya moh yahwa daham amam hapatmur. 6Hanipyah ohnong ap kwei tam ohe tan datiprawa daham mamen mat ma itip ohe meng oh mamaru mat ritporhan brak matpamur. We. Gur amratin. Nohe ma kis mat it pat ap kwei tam moh kasip yahnapmur. Mama kasip yahnap tam tei moh norhe nita bap ihirnong mama ohe tam teinong mar norhe ap hatipramur daham noh norhe Saion ap mutuh ap haw tam mar gonamur. Kasip tam gona ohoh ihan mama kasip tam ohe danong ham Ohwi inahatin hatin hanwa ma dahaya ihir Noh kinham sa maboknong hatir daham na kas haprimur. ritporhan brak matpamur. 7Ama kwei tam ohe danong hat pati han gur Moh yah tamo por armi mat papten han ohmur. Orhe danong na hapti han ihiroh ohe danong na hapti orhor oh dire titwi duuptei han hat patmur. Ihat patmur ritporhan ma brak matpa meng oh mamarumur. Mama ap kwei tam moh ap hapti han ihir Moh er tamhe daham mandatpa orhora; ero por mandatpa kwei tam oh yahnap mutuh tamnap hat patmur. ritporhan brak matpamur. 8Ama ero por mandatpa han ire ihat pati ohe meng oh ritporhan ma brak matpa oh mamaru hat patmur. Ama ap kwei tam ohe bok oh ihir tung rim tapam or wandasiprimur. ritporhan brak matpamur. Ma brak matpa mengru meng na amram kom asariya han ihirnong oh ama kwei bok oh tung rim or wandaptimur. Ama ihat pati bap ihirnong rih orhor Got oh ihir ihaprimur rim kis mat paptesuh bap ihirmur. 9Gurnong oh Got oh rih orhor Mama kuuhan ihiroh norhe nita kuuhan bap hat pateprimur napor kis nahatipmur. Ginapor ma kis nahatip gure ma atamreipti oh rih ihir Got oh dire napapat kakhano rim orhe hanat bok han hat ma atamreisheru gin gurhe ire tan hat atamreindin han hat patimur. Dahe yah danongwi hatpera daham ongeng mat pati bap gurmur. Ama ihat pati kuuhan bap gurnong Got oh Norhenapmur napor kis nahatip han bap gurmur. Ama kis nahatip bap gure da oh kwitem dus hat patina Got oh nambura orhe has yahnap da mutuhnong nahatipmur. Nahama orhe ma inahat napapat yah meng oh pot ha pisongwe rim gurnong kis nahat napapatmur. 10Gur rih ma pateshe oh be han bap hatin hat pateshemur. Gin ma pati oh Got orhe nita han bap hat patimur. Be han bap hatin hat ma pateshe oh gur Got orhe hinhina naham napanggeipat da oh hanhan hat pateshemur. Gin oh orhe nita bap hat pati ohoh ihan orhe hinhina naham napanggeipat da oh am hat patimur. 11Nohe yah han bopor nahat napapat han bap gurnong oh kasip mengtei napotiprohmur. Gur kakdah moh kakun hohop han bap hat pati han bap gur ohoh ihan gure da mutuhdapat tarpam er nahapat da oh eimat kom asar mandanmur. Ama er da oh orhap tarpapat da oh Got orhe apteinong son ohe yah danong sum naer deipat ohoh ihan ama danong oh eimat kom asar mandanmur. 12Mandanmura; Got ohnong ma hanhan hat pati han bap ire kin tei oh yah hat saya apriya hatin ohe yah da orhorsiwi saya apriya hat patenmur. Gur ihat yah hat saptin orhor ihir gure yah hat sapti danong oh wanahama am ham orhor Maihir er hat sapti bapmur napor inahaptimur. Ama ihat pati bap ihir kaput Got ohe pepe dik apris ma nasatipra dik oh Epe. Dir maihir yah hat saptin orhor ihirnong indeishe ma hapat daham Got orhornong armi matiprimur. 13Hanipyah oh Gur kakdah kakhan hat pati han ire hrepdapat hat patim gonsi ire meng amram ha dindeingwe dahat pat ma hapat daham ire hrepdapat hat patim ire meng amram dindeinmur. Kakdah moh ohe erer gon oh gonsi ohe hrepnong mat papat han ohe menghe Oh kaknap hat pat han ma hapat daham ohe meng amram dindeinmur. 14Ama duuptei han ohe hrepdapat ma kakhan hat pati han bap ire menghe amram dindeinmur. Ama ihat pati han bap ihirnong duuptei han oh Gur susa er hat sapti han ihirnong ama er hat saya ohe er yan apriyao yah hat sapti han ihirnong armi mar yah yan apriyao hat patenmur pora ihirnong darhetporhan ihir mama kakhan hat pati oh ma hapat daham iraire hrepdapat hat patim ire naporiya meng oh amram dindeinmur. 15Amram dimara ihat yah hat sapti ohe da ohsi kat han ire na daham dasuh meng ripti atemnong oh apat apaptenmur. Got oh ire dasuh atemnong yah da ohsi apat apaptenmur dahat pat ohoh ihan apat orhorwi apaptenmur. 16Kat han ihiroh Dir er da nang natpat pat hrepdapat hat na pati ohoh ihan dir ihat sapti moh yahwiwa daham er hat saptimur. Ama han ire kakdah napapti han ire mengnong na amram ihat sapti han hatin hathe patepri. Gur Dirri Got orhe hrepdapat hat pati ma hapat ihan Got orhe Gur ire hrepdapat hat patena naporpat danong ohwi hat sasiper daham yah hat orhorwi patenmur. 17Gur kuuhan gonsi ihirnong kin katket mat paptepri. Gonsi ihirnong rum mutuh mat orhorwi paptenmur. Guragure taptem bap ihirnonghe bopor mat paptenmur. Got ohnonghe orhe danong ham kasa ham orhe hrepnong hat orhorwi patenmur. Kakdah moh ohe kakhan duupteinap hat pat han ohnonghe rum mutuh mat orhorwi paptenmur. 18Kakdah moh ire hrep patim be atamreipti han bap gur ire mengnong amrama atamreinpera daham kas hat patim orhor atamreinmur. Manap mengtei ma naporpat han ohe meng mohwi amram atamreinpera dahapri. Heisup nahat naporpat han ohe meng ohsi amram atamreinpera daham tap mat pomat orhor atamreinmur. 19Got oh Gur ire hrepdapat hat patim ihat atamrein sashenmur naporpat ma hapat. Ihan orhe dahapat daru hat orhorwi atamrein sasipera daham yah hat orhorwi atamrein sashenmur. Ire atamreindin asoh ihat yah hat orhorwi atamrein saptin orhor be batbet nang napriyahanoh ama be batbet napriya ohe pe oh na garham kasip hat orhorwi inperhan Got oh Gur yah hanmur napor amam nahat napapatmur. 20Gur er hat saperhan ama ohe pe oh batbet nang nahatperhan gur na gapa ham kasip hat orhor sayahanoh Got oh go yah hapatmur napor na amam nahapatmur. Yah hat saya ohe pe oh batbet nang nahatperhan gur na gapa ham kasip hat orhorwi sayahanoh Got oh Gure ama ihat sapti oh yah hat saptimur napor amam nahapatmur. 21Got oh dirnong Norhe nita nahat napapat bap gur guragure yah hat sapti ohe pe oh gur batbet dariprimur. Batbet dat ma sasipri oh Krais orhe gure gwemat yah hat orhor sapatin batbet dat kasip hat ma pipru hat orhor norhe nita bap gurhe ihat orhor na gapa ham ihat orhor kasip ham batbet dat sashenmur napor ama batbet oh dat sashen ohe han bap kis nahat napapatmur. 22Krais orhe yah hat ma sasuh oh er dahe ohe bok adeh na patesuh hanmur. Dasuh menghe ohe atem tei na risuh hanmur. Orhe boknong oh ongeng tahat patesuh hanmur. 23Ihat ma patesuh han ohnong dasei mar er meng ohe boknong matperhanhe oh it diteim na porisuh han ohmur. Batbet oh ohe boknong matperhanhe oh Nohhe gurnong inahatipramur por ihirnong kas menghe ti na deisuhmur. Be kimirim batbet dara At duung dasi yah mat nasapat han orhorwi sama duung dasi sa matipra daham diteim na pora itap orhe bes teinong mat mandasuhmur. 24Ihat yah hat patdapat Ire ma er danong hat sapti da oh hapur sus erer ma hanhan ham mandapti ohe tan mat er danong sa mandatipri. Mandama yah hat son ohe danong oh da patim kasip hat saya apriya hapti da hatin hat orhor sa patepri daham dire er hat sapti ohe ina ruumsup batbet oh orhe boknongwi mar irat bok sur gartaham haputipmur. Orhe ina boknong batbet dar ma er hatip oh dire er hat sapti danong moh oh nasi mar yah nahatporhan dir gin si ham yah hat saptimur. 25Rih oh gur sipsip bap ire papindin han ohnong mandama mandap angmar irarhe kot dus ma patiru hatin hat pateshemur. Ginnong oh gure da oh sipsip bap ihir iraire papat han orhe hrepnong mar papatru mat orhor gure dahe napapat han orhe hrepnong naham napapatmur.

will be added

X\