Oroomanak 4

1ᐋᓃᓐ ᑕᔥ ᑫᐃᓇᒃ ᐊᐊ ᑳᑮᐅᑫᑌᐊᔭᐋᒥᔮᕽ ᐁᐸᕒᐊᐋᒻ Abraham, ᓃᓇᐎᓐᑦ ᑳᒎᐎᐎᔮᕽ ᑳᐅᑕᑳᓀᓯᔮᕽ? ᐌᑯᓀᔥ ᐐᓐ ᑳᐊᓂᐅᑎᑖᐸᑕᕽ? 2ᑮᔥᐱᓐ ᐐᓐ ᐅᑎᔑᒋᑫᐎᓂᕽ ᑳᑮᐅᒋ​ᐃᓇᓯᑯᒡ ᒋᐅᒋᒥᓄᐐᒌᐙᒡ ᑭᔐᒪᓂᑑᓐ, ᐅᑖᑮᐅᑎᓈᓐ ᑫᑰᓐ ᒋᒥᓄᒫᒦᒀᑕᑭᐸᓐ᙮ ᐃᐃᒫ ᑕᔥ ᑳᔑᐙᐸᒋᑫᓂᒡ ᑭᔐᒪᓂᑑᓐ ᑳᐐᓐ ᑫᑰᓐ ᐅᑮᐊᔮᓰᓐ ᒋᒫᒦᒀᑕᕽ᙮ 3ᐅᐅᐌ ᐋᓃᔥ ᐃᑭᑑᒪᑲᓐ ᑭᒋᐅᔑᐲᐃᑫᐎᓐ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᑕᔥ ᐃᐃᒫ ᑳᑮᐅᒋ​ᐃᓇᑭᒥᑯᒡ ᐁᑾᔭᒀᑎᓯᒡ᙮ 4ᐃᓇᔥᑫ, ᑳᐊᔭᓄᑮᒡ ᐊᐎᔭ, ᐅᑎᐸᐊᒫᑰᐎᓐ ᑳᐐᓐ ᒦᓂᑰᐎᓐ ᐃᓇᑭᑌᓯᓂᓂ, ᒦ ᓴ ᐁᓇᑭᑌᓂᒃ ᐁᑮᑲᔥᑭᑕᒫᓱᒡ᙮ 5ᐃᓇᔥᑫ ᑕᔥ ᐐᓐ ᐊᐎᔭ ᑳᑲᔥᑭᑕᒫᓱᓯᒃ ᒋᒥᓍᐸᒥᑯᒡ ᑭᔐᒪᓂᑑᓐ, ᐁᐊᐯᓂᒧᓄᑕᐙᒡ ᐃᑕᔥ, ᐅᐙᐸᒥᑰᓐ ᐁᑌᐺᑕᐙᒡ᙮ ᒦᑕᔥ ᐋᓇᐐᓐ ᐁᑮᐱᒪᒋ​ᐃᔑᐌᐱᓯᒡ, ᒦ ᐅᐌ ᐅᑎᑰᓐ: ᑳᐐᓐ ᑫᑰᓐ ᑭᑎᓀᓂᒥᓯᓅᓐ, ᑭᑲᐃᓇᑭᒥᓐ ᐁᑾᔭᒀᑎᓯᔭᓐ, ᐁᐃᑯᒡ᙮ ᒦ ᐃᐌ ᐅᑌᐺᑕᒧᐎᓂᕽ ᐊᐊ ᐃᓂᓂ ᑳᐅᒋ​ᐃᓇᓯᑯᒡ ᑾᔭᒃ ᒋᒥᓄᐐᒌᐙᒡ ᑭᔐᒪᓂᑑᓐ᙮ 6ᒦ ᐃᐌᓂ ᑳᐃᑕᕽ ᐊᐊ ᑌᐱᑦ David ᐁᑮᑕᔑᑕᕽ ᑳᐃᔑᔕᐌᓂᒥᒥᓐᒡ ᐃᓂ ᐃᓂᓂᐗᓐ ᑾᔭᒀᑎᓯᐎᓂᕽ ᑳᐃᓀᓂᒥᑯᓂᒡ ᑭᔐᒪᓂᑑᓐ ᐋᓇᐐᓐ ᑫᑰᓐ ᐁᑮᐊᓄᑳᑕᓯᓂᒃ ᐃᓂ ᐃᓂᓂᐗᓐ ᒋᐅᒋᐅᑖᐱᓂᑯᓂᒡ ᑭᔐᒪᓂᑑᓐ᙮ ᒦ ᐅᐌ ᐁᑭᑐᒡ: 7ᔕᐌᑖᑯᓯᐗᒃ ᐃᑭᐌᓂᐗᒃ ᐅᒪᒋᒋᑫᐎᓂᐙᓐ ᑳᐴᓀᑕᒪᐎᑣ, ᐅᒪᒋᑑᑕᒧᐎᓂᐙᓐ ᐐᑫ ᑳᑮᑳᓰᓇᒪᐎᑣ! 8ᔕᐌᑖᑯᓯ ᐊᐊ ᐃᓂᓂ ᐅᒪᒋᑑᑕᒧᐎᓐ ᐁᑳ ᐐᑳ ᐁᐐᐊᑭᑕᒫᑯᓯᒃ ᑳᑎᐯᒋᑫᓂᒡ! ᑮᐃᑭᑐ ᑌᐱᑦ᙮ 9ᐅᐅᐌ ᑕᔥ ᔕᐌᑖᑯᓯᐎᓐ, ᐃᑭᐌᓂᐗᒃ ᐃᓇ ᐁᑕ ᑳᑭᑭᓇᐙᑕᔕᑫᔑᑲᓂᐎᐙᒡ ᐅᑲᐊᔮᓈᐙ? ᑳᐐᓐ᙮ ᑲᔦ ᓴ ᑯ ᑫᐐᓇᐙ ᑳᑮᑭᑭᓇᐙᒋᐋᓯᐎᑣ ᐅᑲᐊᔮᓈᐙ᙮ ᐋᓃᔥ ᓂᑮᑕᔑᒫᓈᓐ ᐊᐊᐌ ᐁᐸᕒᐊᐋᒻ ᐁᑮᑌᐺᑕᐙᒡ ᑭᔐᒪᓂᑑᓐ, ᒦᑕᔥ ᑳᑮᐅᒋ​ᐃᓇᑭᒥᑯᒡ ᐁᑾᔭᒀᑎᓯᒡ᙮ 10ᐋᓃᓐ ᒪᔮ ᐊᐲ ᑳᒫᒌᐃᓇᑭᒥᑯᒡ ᐁᑾᔭᒀᑎᓯᒡ? ᒋᑆ ᑭᑭᓇᐙᑕᔕᑫᔑᑲᓂᐎᒡ ᐃᓇ? ᑳᐃᔥᒀ ᑭᑭᓇᐙᑕᔕᑫᔑᑲᓂᐎᒡ ᐃᓇ? ᑳᐐᓐ ᑳᐃᔥᒀᑑᑕᐎᓐᒡ, ᒋᑆ ᑑᑕᐎᓐᒡ ᐃᓴ ᑮᐃᓇᑭᒫ ᒋᑾᔭᒀᑎᓯᒡ᙮ 11ᓈᓈᑫ ᑕᔥ ᑮᑭᑭᓇᐙᑕᔕᑫᔑᑲᓂᐎ᙮ ᒦ ᐃᐌ ᑳᐃᔑᒋᑫᐃᓐᒡ, ᒨᔕᒃ ᐃᑯ ᒋᑭᑫᒋᑳᑌᒃ ᒦ ᐃᒫ ᐅᑌᐺᑕᒧᐎᓂᕽ ᐁᑮᐅᒋ​ᐃᓇᑭᒥᓐᒡ ᐁᑾᔭᒀᑎᓯᒡ᙮ ᐋᓃᔥ ᒋᑆ ᑭᑭᓇᐙᒋᔓᓐᒡ ᐅᑮᐃᔑᐅᑖᐱᓂᑰᓐ ᑭᔐᒪᓂᑑᓐ᙮ ᒦᑕᔥ ᐃᐃᐌ ᐁᐃᓀᑖᑯᓯᒡ ᐁᐸᕒᐊᐋᒻ ᐁᐅᔫᓯᒥᑯᒡ ᑲᑭᓇ ᐊᐎᔭᐞ ᑳᑌᐺᑕᐙᓂᒡ ᑭᔐᒪᓂᑑᓐ᙮ ᑫᐐᓇᐙ ᓴ ᐅᑎᔑᐅᑖᐱᓂᑯᐙᓐ ᑭᔐᒪᓂᑑᓐ ᒋᑾᔭᒀᑎᓯᐙᒡ ᐋᓇᐐᓐ ᐐᑳ ᐁᑮᑭᑭᓇᐙᑕᔕᑫᔣᓯᐎᑣ᙮ 12ᔑᑾ ᐃᑭᐌᓂᐗᒃ ᑳᑮ ᑭᑭᓇᐙᑕᔕᑫᔑᑲᓂᐎᐙᒡ ᑲᔦ ᐐᓇᐙ ᐯᔑᑾᓐ ᐅᑑᔫᓯᒫᐙᓐ ᐁᐸᕒᐊᐋᒪᓐ᙮ ᑳᐐᓐ ᐁᑕ ᐅᑭᑭᓇᐙᒋᐃᑰᐎᓂᐙᕽ ᐅᒋ ᐅᔫᓯᓰᐗᒃ, ᐃᐃᐌ ᓴ ᐐᓐ ᐁᓈᐸᐊᒫᓈᐙᒡ ᐃᓂ ᐁᐸᕒᐊᐋᒪᓐ ᑳᑮᐃᔑ​ᐅᑌᐺᑕᒧᐎᓂᓂᒡ, ᑳᑮᐃᔑᐱᒫᑎᓯᓂᒡ ᒋᑆ ᑭᑭᓇᐙᒋᐃᒥᓐᒡ᙮ 13ᐃᓇᔥᑫ ᑭᔐᒪᓂᑑ ᐅᑮᐲᑕᔓᑕᒪᐙᓐ ᐁᐸᕒᐊᐋᒪᓐ Abraham ᒦᓇᐙ ᐅᐲᐌᓰᒥᓂ ᐱᒌᓇᒃ ᒋᑎᐯᑕᒥᓂᒡ ᐅᐅ ᐊᑮᓂ᙮ ᐅᐅᐌ ᑕᔥ ᑳᑮᐃᓇᔓᑕᒪᐎᓐᒡ ᐁᐸᕒᐊᐋᒻ, ᑳᐐᓐ ᐃᐃᒫ ᐁᑮᑲᓇᐌᑕᕽ ᐃᓈᑯᓂᑫᐎᓐ ᑮᐅᒋᒦᓂᑯᐎᓯᓰ᙮ ᐃᐃᒫ ᓴ ᐐᓐ ᐁᑮᑌᐺᑕᐙᒡ ᑭᔐᒪᓂᑑᓐ ᑲᔦᔥ ᐁᑮᐅᒋ​ᐃᓇᑭᒥᑯᒡ ᐁᑾᔭᒀᑎᓯᒡ, ᒦ ᓴ ᐐᓐ ᐃᐃᒫ ᑳᐅᒋᐊᔓᑕᒫᑯᒡ᙮ 14ᑕᑲ ᑕᔥ ᐅᐅᐌ ᐃᔑ​ᐃᑭᑐᔭᑭᐸᓐ ᑭᔐᒪᓂᑑ ᐁᐊᔓᑕᒪᐙᒡ ᑫᑰᓐ ᒋᒦᓈᒡ ᐊᐎᔭᓐ ᐃᐃᒫ ᐁᑕ ᑳᔑᑲᓇᐌᑕᒥᓂᒡ ᐃᓈᑯᓂᑫᐎᓐ᙮ ᑮᔥᐱᓐ ᐃᐃᐌ ᐃᔑᓭᑭᐸᓐ, ᐊᓂᔖ ᐃᐌ ᑖᐃᔑᓈᑾᓐ ᐊᐎᔭ ᒋᐅᑌᐺᑕᒧᐎᓂᒡ᙮ ᔑᑾ ᐋᓇᐐᓐ ᑭᔐᒪᓂᑑ ᐁᐊᔓᑕᒪᐙᒡ ᑫᑰᓐ ᐃᓂ ᑳᑌᐺᑖᑯᒡ, ᑳᐐᓐ ᑫᑰᓐ ᑖᐃᓈᐸᑕᓯᓂᓂ ᐅᑕᔓᑕᒫᑫᐎᓐ᙮ 15ᐃᐃᒫ ᓴ ᐁᐊᔮᓂᒃ ᐃᐃ ᒨᓯᔅ Moses ᐅᑎᓈᑯᓂᑫᐎᓐ, ᐊᐎᔭ ᐁᐲᑯᓇᕽ ᐁᒫᔑᒋᑫᒡ, ᐅᑲᐅᒋᑎᐸᐊᒫᑰᓐ ᑭᔐᒪᓂᑑᓐ ᐅᓂᔥᑳᑎᓯᐎᓂᓃᕽ᙮ ᐃᐃᒫ ᑕᔥ ᐊᔮᓯᓄᒃ ᐃᓈᑯᓂᑫᐎᓐ, ᑳᐐᓐ ᑖᑕᓀᒋᑳᑌᓯᓅᓐ ᒫᔑᒋᑫᐎᓐ᙮ 16ᒦᑕᔥ ᐐᓐ ᐃᐃᒫ ᐅᑌᐺᑕᒧᐎᓂᕽ ᐊᐊ ᐁᐸᕒᐊᐋᒻ ᑳᑮᐅᒋᐊᔓᑕᒪᐎᓐᒡ᙮ ᒦ ᐃᐌ ᒋᐅᒋᑫᒋᓈᐅᐌᑖᑾᓂᓂᒃ ᐃᐃᐌ ᑭᔐᒪᓂᑑ ᐅᑕᔓᑕᒫᑫᐎᓐ, ᐅᔕᐌᒋᑫᐎᓂᕽ ᐁᐐᐅᒋᒥᒋᒦᓈᒡ ᑲᑭᓇ ᐊᐎᔭᓐ ᐅᐲᐌᓰᒥᓂ ᐃᓂ ᐁᐸᕒᐊᐋᒪᓐ᙮ ᑳᐐᓐ ᐁᑕ ᑕᒦᓈᓰᐗᒃ ᐃᑭ ᑳᑲᓇᐌᑕᒧᐙᒡ ᒨᓯᓲᓐ ᐅᑎᓈᑯᓂᑫᐎᓂᓂ, ᐃᑭᐌᓂᐗᒃ ᐃᑕᔥ ᑲᔦ ᑳᓈᐱᑌᐺᑕᒧᐙᒡ ᐃᓂ ᐁᐸᕒᐊᐋᒪᓐ ᑳᑮᐃᔑᑌᐺᑕᒥᓂᒡ᙮ ᐋᓃᔥ ᐅᑌᐺᑕᒧᐎᓂᕽ ᐁᐸᕒᐊᐋᒻ ᑮᓇᐎᓐᑦ ᑲᑭᓇ ᑳᐅᒋᐅᔫᓯᒪᕽ᙮ 17ᒦ ᐋᓃᔥ ᐅᐅ ᐁᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ: ᐅᐅᐌ ᓴ ᑳᐃᔑᒋᑫᐃᓈᓐ, ᓃᐱᐗᐞ ᑫᑕᓶᐙᓇᑭᓯᐙᒡ ᐯᒫᑎᓯᐙᒡ ᑭᑲᐅᔫᓯᒥᑰᒃ, ᐁᑮᐃᓂᓐᒡ ᐁᐸᕒᐊᐋᒻ᙮ ᑌᐺ ᓴ ᑯ ᑮᓇᐎᓐᑦ ᑭᑑᔫᓯᒫᓈᓐ ᐁᐸᕒᐊᐋᒻ, ᐁᔑᐙᐸᒋᑫᓂᒡ ᑭᔐᒪᓂᑑᓐ ᑳᑮᑌᐺᑕᐙᒡ᙮ ᒦ ᐊᐌ ᑭᔐᒪᓂᑑ ᑳᐱᒫᑎᓰᔥᑲᐙᒡ ᐃᐃ ᑳᑮᓂᐳᓂᒡ, ᑲᔦ ᑳᐃᑭᑐᒡ: ᑕᑲ ᐃᐌ ᑕᓈᑾᓐ ᒪᔑ ᑳᐊᔮᓯᓄᒃ, ᒦᑕᔥ ᐃᐃ ᑳᐃᔑᓭᓂᒃ᙮ 18ᐊᐊ ᑕᔥ ᐁᐸᕒᐊᐋᒻ ᑮᑌᐺᑕᒻ, ᐅᑮᐊᔕᐙᐸᑖᓐ ᒪᔑ ᑫᑰᓐ ᐋᐲᓐᒡ ᐁᑮᓈᑾᓯᓂᓂᒃ ᒋᑮᐅᒋᒋᓭᓂᑭᐸᓐ ᐃᐃ ᑳᑮᐲᑑᒡ᙮ ᒦᔥ ᐃᐃ ᐲᓂᔥ ᑌᐺ ᐅᑮᐅᔫᓯᒥᑰᐞ ᓃᐱᐗᐞ ᑳᑕᓶᐙᓇᑭᓯᓂᒡ᙮ ᒦ ᓴ ᒪᔮ ᑳᐊᓂ​ᐃᔑᓭᓂᒃ ᑳᑮᐃᓂᓐᒡ: ᒦ ᐃ ᑫᑕᔑᐙᒡ ᑭᐲᐌᓰᒪᒃ, ᐁᑮᐃᓂᓐᒡ᙮ 19ᐊᐲ ᑳᐊᔓᑕᒪᐎᓐᒡ, ᐋᔕ ᑫᑳ ᓂᑯᑣᒃ ᑮᑕᓱᐱᐴᓉ᙮ ᑳᐐᓐ ᐃᑕᔥ ᐐᓐ ᑮᐅᒋᒣᒋᓭᓯᓂᓂ ᐅᑌᐺᑕᒧᐎᓐ ᐁᑮᓈᑲᑕᐌᑕᕽ ᑎᐱᓇᐌ ᐅᐐᔭᐤ ᐋᔕ ᑖᐱᔥᑰ ᓂᐴᒪᑲᓐ ᐁᑮᐃᔑᓇᕽ, ᑲᔦ ᐃᓂ ᓭᕒᐊᐗᓐ Sarah ᐋᔕ ᒣᐎᔕ ᐁᑮᐃᔥᒀᓭᓂᒃ ᐅᐱᒨᔐᐎᓂᓂ᙮ 20ᑳᐐᓐ ᐊᐙᒡ ᐸᑮ ᑮᐅᒋᐴᓂᑌᐺᑕᓰ, ᑳᐐᓐ ᐅᑮᐋᓉᑕᓰᓐ ᐃᐃ ᑭᔐᒪᓂᑑᓐ ᑳᑮᐊᔓᑕᒫᑯᒡ᙮ ᐊᐗᔑᒣ ᓴ ᐐᓐ ᑮᐊᓂᓲᑭᑌᐺᑕᒻ, ᐅᑮᐊᓂᑭᑕᑭᒫᓐ ᑭᔐᒪᓂᑑᓐ᙮ 21ᐗᐐᑫ ᑮᑫᒋᓈᐅ, ᑌᐺ ᑭᔐᒪᓂᑑ ᓂᑲᑲᔥᑭᑕᒫᒃ ᐃᐃ ᑳᑮᐃᔑᐊᔓᑕᒪᐎᒡ, ᑮᐃᓀᑕᒻ ᐊᐊ ᐁᐸᕒᐊᐋᒻ᙮ 22ᒦ ᐅᐌ ᐅᑌᐺᑕᒧᐎᓂᕽ ᑳᑮᐅᒋᐅᑖᐱᓂᑯᒡ ᑭᔐᒪᓂᑑᓐ ᐁᑮᐃᓇᑭᒥᑯᒡ ᐁᑾᔭᒀᑎᓯᒡ᙮ 23ᐅᐅ ᑕᔥ ᑳᐃᑭᑑᒪᑲᒃ: ᑮᐃᔑ​ᐃᓇᑭᒫ ᐁᑾᔭᒀᑎᓯᒡ, ᑳᐐᓐ ᐐᓐ ᐁᐸᕒᐊᐋᒻ ᐁᑕ ᑳᐅᒋᐅᔑᐲᐃᑳᑌᓂᒃ᙮ 24ᑮᓇᐎᓐᑦ ᐅᔕ ᑲᔦ ᑳᐅᒋ​ᐃᔑᐲᐃᑳᑌᒃ, ᑫᐃᔑ​ᐃᓇᑭᒥᓇᕽ ᑭᔐᒪᓂᑑ ᒋᑾᔭᒀᑎᓯᐗᕽ, ᐋᓃᔥ ᑭᑌᐺᑕᐙᓈᓐ ᑭᔐᒪᓂᑑ ᑳᑮᑮᐌᐱᒫᑎᓯᐋᒡ ᒋᓴᓲᓐ ᑳᑎᐯᓂᒥᒥᓇᕽ᙮ 25ᑭᔐᒪᓂᑑ ᐋᓃᔥ ᐅᑮᐸᑭᑎᓈᓐ Xᑕᓐ ᒋᐅᒋᓂᓯᒥᓐᒡ ᑭᒪᒋᒋᑫᐎᓂᓈᓂᕽ ᐅᒋ᙮ ᐅᑮᑮᐌᐱᒫᑎᓯᐋᓐ ᑕᔥ ᑮᓇᐎᓐᑦ ᐁᐐᐅᒋ​ᐃᓇᓯᓇᕽ ᒋᒥᓄᐐᒌᐗᕽ ᑭᔐᒪᓂᑑ᙮

will be added

X\