1 ᐊᐊᐌ ᑕᔥ ᑭᒋᐅᑳᑏᑭᓀᐱᒃ ᐃᐃᒫ ᑮᓃᐸᐎ ᒌᑫᐤ ᒥᑖᐗᑳᕽ ᑭᒋᑲᒦᕽ᙮ ᓂᑮᐙᐸᒫ ᑕᔥ ᐯᔑᒃ ᐱᑾᒋᐊᔭᐋᐎᔥ ᐁᐱᐊᒀᓰᒡ ᑭᒋᑲᒦᕽ, ᐁᒥᑖᒋᓂᒡ ᐅᑌᔥᑲᓇᐞ ᑲᔦ ᐁᓃᔣᒋᓂᓂᑭᓐ ᐅᑎᒀᓇᓐ᙮ ᐁᑕᓱᐯᔑᑯᓂᒡ ᐃᑕᔥ ᐅᑌᔥᑲᓇᐞ ᒦ ᐃᒫ ᐯᔑᒃ ᐁᔮᓂᒃ ᐅᑭᒫᐎ ᐸᓯᑴᐱᓱᓐ᙮ ᒦᑕᔥ ᑳᑕᓯᓂᓂᑭᓐ ᐅᑎᒀᓇᓐ ᒪᒋᐐᓱᐎᓐ ᐁᒪᒋᐹᐱᓀᒥᓐᒡ ᑭᔐᒪᓂᑑ ᑮᐃᔑᐲᐃᑳᑌ᙮ 2 ᐊᐊ ᑕᔥ ᐱᑾᒋᐊᔭᐋᐎᔥ ᑳᐙᐸᒪᒃ ᑭᒋᐴᔐᓯᕽ ᑮᐃᔑᓈᑯᓯ, ᐅᓯᑎᕽ ᑲᔦ ᑖᐱᔥᑰ ᒪᑯᓯᑕᓐ, ᐅᑑᓐ ᑲᔦ ᑖᐱᔥᑰ ᒥᔑᐱᔑᐎᑑᓐ ᑮᐃᔑᓈᑾᓂᓂ᙮ ᐃᓂ ᑕᔥ ᑭᒋᐅᑳᑏᑭᓀᐱᑰᓐ ᐅᑮᒦᓂᑰᓐ ᑎᐱᓇᐌ ᐅᒪᔥᑲᐎᓰᐎᓂᓂ, ᐅᑭᑕᐱᐎᓂᓂ ᑲᔦ ᐅᑭᒋᑎᐯᒋᑫᐎᓂᓂ ᑲᔦ᙮ 3 ᐯᔑᒃ ᐃᑕᔥ ᐃᐃᐌᓂ ᐅᑎᒀᓐ ᐊᐊ ᐱᑾᒋᐊᔭᐋᐎᔥ ᐱᓵᓂᑯ ᑮᐃᔑᓈᑾᓂᓂ ᐁᑮᒫᑭᒋᑳᑌᓂᒃ ᒋᐅᒋᓂᐳᒡ᙮ ᒦᓇᐙ ᑕᔥ ᑮᒥᓄᔭᔮᒋᑳᑌᓂ ᑫᑮᓂᓯᑯᐸᓐ ᑳᑮᐃᔑᒫᑭᒋᑲᓂᐎᒡ ᐅᑎᒀᓂᕽ᙮ ᑲᑭᓇ ᑕᔥ ᒥᓯᐌᑲᒥᒃ ᑳᐊᔮᐙᒡ ᐅᑮᒫᒪᑳᑌᓂᒫᐙᓐ ᐃᓂ ᐱᑾᒋᐊᔭᐋᐎᔕᓐ ᐁᐱᒥᓂᔕᐙᐙᒡ᙮ 4 ᑲᑭᓇ ᐃᑭ ᐯᒫᑎᓯᐙᒡ ᐅᑮᐅᒋᒌᑾᓃᑕᐙᐙᓐ ᐃᓂ ᑭᒋᐅᑳᑏᑭᓀᐱᑰᓐ ᐁᑭᒋᐃᓀᓂᒫᐙᒡ, ᐋᓃᔥ ᐅᑎᐯᒋᑫᐎᓂᓂ ᐁᑮᒦᓈᓂᒡ ᐃᓂ ᐱᑾᒋᐊᔭᐋᐎᔕᓐ᙮ ᑲᔦ ᐐᓐ ᐃᓂ ᐱᑾᒋᐊᔭᐋᐎᔕᓐ ᐅᑮᐅᒋᒌᑾᓃᑕᐙᐙᓐ ᐁᐃᑭᑐᐙᒡ: ᐊᐌᓀᓐ ᐁᔑᐊᔮᒡ ᑖᐱᔥᑰ ᐊᐌ ᐱᑾᒋᐊᔭᐋᐎᔥ? ᐊᐌᓀᔥ ᑫᑲᔥᑭᑑᐸᓐ ᒋᒦᑳᓈᒡ? 5 ᑮᐃᔑᒦᓈ ᒋᑲᑭᒋᒧᒡ ᒋᒪᒋᐹᐱᓀᒫᒡ ᐃᓂ ᑭᔐᒪᓂᑑᓐ᙮ ᑮᐃᔑᒦᓈ ᑲᔦ ᑎᐯᒋᑫᐎᓐ ᒋᐊᔮᒡ ᓃᒥᑕᓇᔑᓃᔑᓐ 42 ᑕᓱᑮᓯᔅ᙮ 6 ᒦᑕᔥ ᐁᒫᒌᑲᑭᑐᒡ ᐅᑮᒪᒪᒋᑕᔑᒫᓐ ᑭᔐᒪᓂᑑᓐ, ᑲᔦ ᐅᑮᒪᒪᒋᑕᔑᑕᒪᐙᓐ ᐅᐐᓱᐎᓂᓂ ᑲᔦ ᐅᑕᔮᐎᓂᓂ, ᐌᑎ ᑲᔦ ᑲᑭᓇ ᑭᒋᑮᔑᑯᕽ ᑳᐅᑖᐎᓂᓂᒡ᙮ 7 ᑮᒦᓈ ᑲᔦ ᒋᐊᐎᒦᑳᑕᒪᐙᒡ ᑭᔐᒪᓂᑑᓐ ᐅᐱᒫᑎᓰᒥᓂ ᑲᔦ ᒋᔖᑰᒋᐋᒡ᙮ ᑮᒦᓈ ᑲᔦ ᒋᑎᐯᓂᒫᒡ ᑲᑭᓇ ᐯᐸᑳᓐ ᑳᐋᔫᒌᓂᒡ ᑲᔦ ᑲᑭᓇ ᐯᐸᑳᓐ ᑳᐋᔫᒋᑎᐯᑖᑯᓯᓂᒡ ᑲᔦ ᐁᑕᓱᐯᐸᑳᓂᑮᔗᓂᒡ ᑲᔦ ᑲᑭᓇ ᑳᑕᓶᐙᓇᑭᓈᑯᓯᓂᒡ᙮ 8 ᑲᑭᓇ ᐃᒫ ᐊᑮᕽ ᑳᐊᔮᐙᒡ ᐅᑲᐅᒋᒌᑾᓃᑕᐙᐙᓐ ᐃᓂ ᐱᑾᒋᐊᔭᐋᐎᔕᓐ᙮ ᐃᑭᐌᓂᐗᒃ ᐁᑕ ᑳᐅᔑᐲᐃᑳᓱᐙᒡ ᐱᒫᑎᓯᐎᓂᒪᓯᓇᐃᑲᓂᕽ, ᑳᐐᓐ ᑕᐃᔑᒋᑫᓰᐗᒃ᙮ ᐊᐌ ᐋᓃᔥ ᒫᓇᒑᓂᔐᔅ ᑳᑮᓂᓯᓐᒡ ᐅᑎᐯᑖᓐ ᒪᓯᓇᐃᑲᓐ ᐃᐃᒫ ᑳᐃᔑᐅᔑᐲᐃᑳᓱᐙᒡ ᐊᐌᓀᓇᐞ ᐱᔑᔑᒃ ᑫᐱᒫᑎᓯᐙᒡ᙮ ᐋᔕ ᑮᐅᔑᐲᐙᐗᒃ ᒋᑆ ᐅᔑᒋᑳᑌᒃ ᐊᑭ᙮ ᐊᒦᐗᒃ ᐁᑕ ᐅᑯ ᑳᐐᓐ ᐅᑲᐅᒋᒌᓋᓃᑕᐙᓰᐙᐙᓐ ᐃᓂ ᐱᑾᒋᐊᔭᐋᐎᓴᓐ᙮ 9 ᑮᔥᐱᓐ ᐊᐎᔭ ᐌᓅᑕᒫᐎᓂᑴᓐ ᒫᓄ ᐅᑲᐱᓯᑖᓐ! 10 ᐊᐌᓀᓐ ᐃᑯ ᐁᓀᑖᑯᓯᒡ ᒋᑳᒋᑎᓂᓐᒡ ᑫᒋᓈᒡ ᑕᑳᒋᑎᓈ ᒋᒫᒌᓂᓐᒡ᙮ ᐊᐌᓀᓐ ᐃᑯ ᐁᓀᑖᑯᓯᒡ ᒨᑯᒫᓂᕽ ᒋᐅᒋᓂᓯᓐᒡ, ᑕᐅᒋᓂᓵ ᒨᑯᒫᓂᕽ᙮ ᒦᔥ ᐃ ᐁᔑᐊᑕᐌᑖᑯᓯᓂᒡ ᑭᔐᒪᓂᑑ ᐅᑾᔭᒀᑎᓰᒪᐞ ᒋᒪᔥᑲᐌᑕᒥᓂᒡ ᑲᔦ ᒋᑲᐯᑌᐺᑕᒥᓂᒡ᙮ 11 ᓂᐙᐸᒫ ᑕᔥ ᑯᑕᒃ ᐱᑾᒋᐊᔭᐋᐎᔥ ᐊᑮᕽ ᐁᐱᐅᒋᒨᑮᒡ, ᐁᓃᔑᓂᒡ ᐅᑌᔥᑲᓇᐞ ᑖᐱᔥᑰ ᑳᐃᔑᑌᔥᑲᓀᓂᒡ ᒫᓇᒑᓂᔐᓴᓐ᙮ ᑭᒋᐅᑳᑏᑭᓀᐱᑯᕽ ᐃᑕᔥ ᑮᐃᓂᑖᑯᓯ ᐁᑮᑭᑐᒡ᙮ 12 ᐗᐊ ᑯᑕᒃ ᐊᔭᐋᐎᔥ ᐅᑮᐋᐸᒋᑕᒪᐙᓐ ᐅᑭᒋᑎᐯᒋᑫᐎᓂᓂ ᐃᓂ ᓂᑕᒻ ᐊᔭᐋᐎᔕᓐ ᒣᒀ ᐁᑲᓇᐙᐸᒥᑯᒡ᙮ ᐅᑮᑲᔥᑭᑑᓐ ᐊᑮᓂ ᑲᔦ ᐃᑭ ᐊᑮᕽ ᑳᐊᔮᐙᒡ ᒋᐅᒋᒌᑾᓃᑕᐙᓂᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ ᐃᓂ ᑳᑮᒥᓄᔮᔮᒋᑳᑌᓂᒃ ᐅᓂᓯᑰᐎᓐ ᑳᐃᔑᒫᑭᒋᑲᓂᐎᒡ᙮ 13 ᐊᐊ ᑕᔥ ᑯᑕᒃ ᐱᑾᒋᐊᔭᐋᐎᔥ ᐅᑮᑑᑖᓇᓐ ᑭᒋᒫᒪᑳᒋᒋᑫᐎᓇᓐ, ᐴᔥᑫ ᐊᐙᒡ ᒋᐱᓈᔕᑮᓭᓂᒃ ᐃᔥᑯᑌ ᐊᑮᕽ, ᑮᔑᑯᕽ ᒋᐅᒋᓭᓂᒃ, ᐁᐙᐸᒥᑯᒡ ᑲᑭᓇ ᐯᒫᑎᓯᓂᒡ᙮ 14 ᒦᔥ ᐃᐃ ᐅᑮᐅᒋᐗᔦᔑᐋᐞ ᐃᓂ ᐊᑮᕽ ᑳᐊᔮᓂᒡ ᐃᓂ ᐅᒫᒪᑳᒋᒋᑫᐎᓇᓐ ᐁᑮᐋᐸᒋᑑᒡ ᑳᑮᒦᓂᓐᒡ ᒋᑑᑕᕽ ᐁᐙᐸᒥᑯᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ᙮ ᐅᑮᐐᑕᒪᐙᐞ: ᐅᔑᐃᒃ ᒪᓂᑑᑳᓂᐎᑯᒋᑲᓐ, ᒋᑭᒋᐃᓀᒋᑲᓂᐎᒡ ᐊᐊ ᐯᔑᒃ ᐱᑾᒋᐊᔭᐋᐎᔥ ᑭᒋᒨᑯᒫᓂᕽ ᑳᑮᐅᒋᒫᑲᑲᓈᓱᒡ, ᒦᓇᐙ ᑕᔥ ᐁᐱᒫᑎᓯᒡ, ᑮᐃᑭᑐ᙮ 15 ᐊᐊ ᑕᔥ ᑯᑕᒃ ᐊᔭᐋᐎᔥ ᑮᒦᓈ ᐁᑮᐸᑭᑕᓈᒧᓄᑕᐙᒡ ᐃᓂ ᐅᔑᑯᒋᑲᓇᓐ ᒋᐱᒫᑎᓯᓂᒡ, ᒦᐗᓂᓂ ᓂᑕᒻ ᐊᔭᐋᐎᔕᓐ ᑳᐃᔑᓈᑯᓯᓂᒡ ᐅᔑᑯᒋᑲᓇᓐ᙮ ᐗᐊᔥ ᐅᔑᑯᒋᑲᓐ ᐅᑮᑲᔥᑭᑑᓐ ᒋᑲᑭᑐᒡ ᑲᔦ ᒋᓂᓯᒥᓐᒡ ᐊᐌᓀᓇᓐ ᐃᑯ ᑳᐐᐅᒋᒌᑾᓃᑖᑯᓯᒃ᙮ 16 ᐊᐊᐌ ᑕᔥ ᐊᔭᐋᐎᔥ ᐅᑮᑲᔥᑭᐋᐞ ᑲᑭᓇ ᐊᐎᔭᐞ ᒋᑭᑭᓇᐙᒋᒋᑲᓂᐎᓂᒡ ᐅᑭᒋᓂᑭᓃᕽ ᑫᒫ ᐅᔅᑲᑎᑯᓃᕽ᙮ ᑲᑭᓇ ᐊᐎᔭ ᑮᑭᑭᓇᐙᒋᐋ, ᑳᐊᑳᓭᑖᑯᓯᐙᒡ ᑲᔦ ᑳᑭᒋᐃᓀᑖᑯᓯᐙᒡ, ᑳᐌᓅᑎᓯᐙᒡ ᑲᔦ ᑳᑭᑎᒫᑭᓯᐙᒡ, ᑳᑎᐯᓂᑎᓱᐙᒡ ᑲᔦ ᑳᑎᐯᑖᑯᓯᐙᒡ᙮ 17 ᑮᔥᐱᓐ ᐊᐎᔭ ᒦᓈᓯᐎᓐᒡ ᐃᐃᐌ ᑭᑭᓇᐙᒋᐲᐅᑰᐎᓐ, ᑳᐐᓐ ᑕᐊᑖᐌᓰ, ᑳᐐᓐ ᑲᔦ ᑫᑰᓐ ᑕᐊᑖᐙᑫᓰ, ᒦ ᐁᑕ ᐊᐎᔭ ᐃᔑᐅᔑᐲᐅᓐᒡ ᐅᐐᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ ᑫᒫ ᐃᐌᓂ ᐅᑕᑭᑖᓱᐎᓂᓂ, ᒦ ᐅᐌ ᐅᐐᓱᐎᓂᓂ ᑳᐃᒋᑳᑌᓂᒃ᙮ 18 ᐊᑕᐌᑖᑯᓯ ᐊᐎᔭ ᒋᑭᑫᑕᒫᐎᓯᒡ: ᐊᐌᓀᓐ ᐃᑯ ᐊᐊ ᑳᑭᑫᑖᓱᒡ ᐅᑲᓂᐅᒋᒫᒥᑴᑖᓐ ᐋᓃᓐ ᑳᐃᒋᑳᑌᓂᒃ ᐃᐌ ᐅᑕᑭᑖᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ᙮ ᐋᓃᔥ ᒦ ᐁᒋᑳᑌᒃ ᐃᓂᓃᐎ ᐐᓱᐎᓐ, ᐊᒦ ᐅᐌ ᐁᐃᓇᑭᑌᒃ ᐃᐃ ᐐᓱᐎᓐ: ᓂᑯᑣᔂᒃ ᓂᑯᑣᓯᒥᑕᓇᔑᓂᑯᑣᓱ 666.
