Kihkentamooshiwewin 1

1ᐅᑭᑫᑕᒨᔑᐌᐎᓐ ᒋᓴᔅ X ᑭᔐᒪᓂᑑᓐ ᑳᑮᒦᓂᑯᒡ ᒋᐙᐸᑕᐋᒡ ᐅᑕᓄᑮᐋᑲᓇᐞ ᐐᐸ ᑫᓂ​ᐃᔑᐌᐸᓂᓂᒃ᙮ ᐅᑌᒐᓬᐃᒪᓐ ᐅᑮᐱᓈᔑᓂᔕᐙᓐ ᐁᑮᑭᑫᑕᒨᓈᓂᒡ ᐅᑕᓄᑮᐋᑲᓇᓐ ᒞᓇᓐ John᙮ 2ᔑᑾ ᒞᓐ ᐅᑮᑎᐹᑐᑖᓇᓐ ᑲᑭᓇ ᐃᓂ ᑳᑮᐙᐸᑕᕽ, ᒦ ᐅᐌᓂ ᐅᑎᑭᑐᐎᓂᓂ ᑭᔐᒪᓂᑑᓐ ᑲᔦ ᐅᑌᐺᐎᓂᓂ ᒋᓴᔅ Xᑕᓐ ᑳᑮᑭᑫᑕᒨᔑᐌᓂᒡ᙮ 3ᔕᐌᑖᑯᓯ ᐊᐊ ᑫᐊᓇᒥᑕᒫᑫᒡ ᐅᐅ ᒪᓯᓇᐃᑲᓐ ᑲᔦ ᑳᐱᓯᑕᒧᐙᒡ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ, ᐃᑭ ᑲᔦ ᑳᑲᓇᐌᑕᒧᐙᒡ ᐅᒫ ᑳᐅᔑᐲᐃᑳᑌᓂᑭᓐ᙮ ᐋᓃᔥ ᐯᔓ ᐋᔕ ᒋᐊᓂᐅᒋᒋᓭᓂᒃ᙮ 4ᓃᓐ ᒞᓐ ᓂᑑᔑᐲᐊᒪᐙᒃ ᐃᑭ ᐅᑌᐺᑕᒨᒃ ᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ ᐁᔖᐗᑮᕽ Asia᙮ ᔕᐌᓂᒥᑰᐎᓐ ᑲᔦ ᐱᓵᓀᑕᒧᐎᓐ ᑭᑲᐅᒌᑕᒫᑯᐙ ᐊᐊ ᑭᔐᒪᓂᑑ ᐅᒫ ᓅᑯᒻ ᑳᐊᔮᒡ ᑲᔦ ᒣᐎᔕ ᑳᐱᐅᒋᐊᔮᒡ ᑲᔦ ᑳᐐᐱᐊᔮᒡ, ᑲᔦ ᐃᑭᐌᓂᐗᒃ ᓃᔣᓱ ᐊᒑᑾᒃ ᑳᐃᓈᓴᒥᑳᐸᐎᐙᒡ ᑭᔐᒪᓂᑑ ᐅᑭᑕᐱᐎᓂᕽ, 5ᒋᓴᔅ X ᑲᔦ ᑳᑾᔭᑴᑖᑯᓯᒡ ᐅᑎᐹᒋᒧ, ᐊᐊᐌ ᓂᑕᒻ ᑳᓂᑖᐎᑭᒡ ᑭᔐᒪᓂᑑᓈᕽ, ᑳᑮᑮᐌᐱᒫᑎᓯᒡ, ᑳᑎᐯᓂᒫᒡ ᑭᒋᐅᑭᒫᐞ ᐊᑮᕽ ᑳᐊᔮᓂᒡ᙮ ᑭᓵᑭᐃᑯᓈᓐ ᓴ, ᐅᒥᔅᑸᒥᕽ ᑲᔦ ᑭᑮᐅᒋᐋᐸᐅᑯᓈᓐ ᒋᐴᓂᑎᐯᓂᒥᑯᔭᕽ ᑭᒪᒋᑑᑕᒧᐎᓂᓈᓂᓐ ᑳᑮᐱᑑᑕᒪᕽ᙮ 6ᑭᑮᐃᔑᐃᑯᓈᓐ ᐃᑕᔥ ᒋᑎᓄᐎᔭᕽ ᒋᑎᐯᓂᒥᐌᔭᕽ, ᒋᑕᔑᑭᒋᐊᓇᒥᐁᐎᑭᒫᐎᔭᕽ, ᒋᐊᓄᑮᑕᐎᒪᕽ ᐅᑭᔐᒪᓂᑑᒪᓐ ᑳᐅᔫᓯᒫᒡ᙮ ᐐᓐ ᐅᑲᐊᔮᓐ ᑭᒋ​ᐃᓀᑖᑯᓯᐎᓐ ᑲᔦ ᑎᐯᒋᑫᐎᓐ ᐱᔑᔑᒃ ᐃᑯ ᐊᐸᓀ᙮ ᐁᒣᓐ᙮ 7ᐃᓇᔥᑫ ᑕᐱᓈᑯᓯ ᐗᑸᕽ! ᑲᑭᓇ ᑕᔥ ᐊᐎᔭ ᐅᑲᐙᐸᒫᐙᓐ, ᐃᐴᔥᑫ ᑲᔦ ᐃᑭ ᑳᑮᐸᔑᐸᐙᐙᒡ᙮ ᑲᑭᓇ ᑕᔥ ᑳᑕᓶᐙᓇᑭᓯᒡ ᐊᑮᕽ ᑕᐅᒋᒪᐎᐗᒃ ᐊᐲ ᐙᐸᒫᐙᒡ᙮ ᐊᒦ ᓴ ᑯ ᑕᐃᔑᐌᐸᓐ᙮ ᐁᒣᓐ᙮ 8ᓃᓐ ᐊᐊᐌ ᓂᑕᒻ ᑳᑮᐊᔮᒡ ᒦᓇᐙ ᐃᔥᒀᒡ ᑫᐊᔮᒡ, ᐃᑭᑐ ᑳᑎᐯᒋᑫᒡ ᑭᔐᒪᓂᑑ ᒫᐗᒡ ᑳᒪᔥᑲᐌᑖᑯᓯᒡ᙮ ᒦ ᐊᐊᐌ ᓅᑯᒻ ᑳᐊᔮᒡ ᑲᔦ ᐅᑖᓈᕽ ᑳᑮᐊᔮᒡ, ᑲᔦ ᑫᐱᐊᔮᒡ᙮ 9ᓃᓐ ᒞᓐ John ᑮᒋᑭᐌᓯᐙ ᑫᓃᓐ ᐁᐐᒌᐗᒃ ᒋᓴᔅ, ᑭᐐᒌᐎᓂᓂᒻ ᐁᐃᔑᔕᔒᐯᑕᒣᒃ ᑭᒥᑯᔥᑳᒋᐃᑰᐎᓂᐙᕽ, ᐃᐃᐌ ᐅᒑᓂᒥᓯᐎᓐ ᐃᐃᒫ ᑳᐅᒌᒪᑲᒃ ᐁᐊᔮᒃ ᐅᑎᐯᒋᑫᐎᓂᕽ ᒋᓴᔅ᙮ ᓂᑮᓇᑲᓂᑰ ᐃᒫ ᒥᓂᓯᕽ ᐹᑎᒪᔅ Patmos ᑳᐃᔑᓂᑳᑌᒃ᙮ ᓂᑮᐅᒋᐊᓯᑰ ᐁᑮᐐᑕᒫᑫᔮᓐ ᑭᔐᒪᓂᑑ ᐅᑎᑭᑐᐎᓐ ᑲᔦ ᐅᑌᐺᐎᓐ ᒋᓴᔅ᙮ 10ᐊᐲ ᐁᑮᔑᑲᒃ ᑳᑎᐯᒋᑫᒡ ᐅᑮᔑᑳᒻ ᑳᐃᔑᐐᑌᒃ ᓂᑮᐐᒌᐎᒥᒃ ᐃᓂ ᑭᔐᒪᓂᑑ ᐅᑕᒑᑾᓐ᙮ ᓂᑮᓅᑖᓐ ᐃᑕᔥ ᐁᑭᒋᑭᔒᐌᒃ ᐃᓉᐎᓐ ᑖᐱᔥᑰ ᑭᒋᐴᑖᒋᑲᓂᕽ, ᐌᑎ ᓂᐱᑾᓂᕽ ᐊᐎᔭ ᐁᑲᓅᔑᒡ᙮ 11ᒦ ᐅᐌ ᐁᔑᒡ: ᐃᐃᐌ ᑳᐙᐸᑕᒪᓐ ᒦ ᐃᐌ ᐅᔑᐲᐊᓐ ᒪᓯᓇᐃᑲᓂᕽ᙮ ᒦ ᐃᒫ ᐃᔑᓂᔕᐊᒪᐤ ᐃᑭ ᐅᑌᐺᑕᒨᒃ ᐃᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ᙮ ᒦᐗᓄᓄ ᐆᑌᓇᐗᓐ: ᐁᐱᓴᔅ Ephesus, ᓯᒥᕒᓇ Smyrna, ᐸᕒᑲᒪᒻ Pergamum, ᑕᔭᑕᐃᕒᐊ Thyatira, ᓵᕒᑎᔅ Sardis, ᐱᓬᐊᑌᓬᐱᔭ Philadelphia, ᓬᐁᔮᑎᓰᔭ Laodicea᙮ 12ᒦᑕᔥ ᓂᑮᑴᑭᑳᐸᐤ ᐁᐐᐙᐸᒪᒃ ᐊᐌᓀᓐ ᐅᑎᓉᐎᓐ ᑳᑲᓅᔑᒡ᙮ ᓂᑮᐙᐸᑖᓇᓐ ᐃᑕᔥ ᓃᔣᓱ ᐙᓴᑯᓀᒋᑲᓈᑎᑰᓐ ᐁᐅᓵᐎ​ᔔᓂᔮᐗᑭᓐ᙮ 13ᒣᑴᔭᐄ ᐃᒫ ᐙᓴᑯᓀᒋᑲᓈᑎᑯᕽ ᐊᐎᔭ ᓂᑮᐙᐸᒫ ᑖᐱᔥᑰ ᐯᒫᑎᓯᒡ, ᐁᑭᑭᔥᑲᕽ ᑭᒋᒪᑰᑦ ᐅᓯᑎᕽ ᐁᐊᑴᑲᓂᓂᒃ, ᒦᓇᐙ ᐁᑭᒋᐱᓱᒡ ᐅᑳᑭᑲᓀᐱᓱᓐ ᐁᐅᓵᐎ​ᔔᓂᔮᐎᓈᑾᓂᓂᒃ᙮ 14ᐅᑎᒀᓂᕽ ᐃᑕᔥ ᐐᓂᓯᓴᓐ ᑮᐙᐱᔥᑳᓂᐗᓐ ᑖᐱᔥᑰ ᒫᓇᒑᓂᔑᐲᐗᔨᕽ; ᑖᐱᔥᑰ ᑰᓐ ᑳᐙᐱᔥᑭᓯᒡ ᑮᐊᐲᒋᐙᐱᔥᑳᓂᐗᓐ᙮ ᑮᐙᓯᑌᓂᐗᓐ ᐃᑕᔥ ᐃᓂ ᐅᔥᑮᔑᑰᓐ ᑖᐱᔥᑰ ᑳᐊᐲᒋᐙᓯᑌᒃ ᐃᔥᑯᑌ᙮ 15ᐅᓯᑕᓐ ᐃᑕᔥ ᑲᔦ ᑖᐱᔥᑰ ᐅᓵᐙᐱᒃ ᐁᑮᐯᑳᐱᑭᑌᒃ ᑲᔦ ᐐᑫ ᐁᔔᔥᒀᐱᑲᒃ ᑮᐃᔑᓈᑾᓂᓂᐗᓐ᙮ ᒦ ᑲᔦ ᑳᐃᓂᑖᑯᓯᒡ ᑖᐱᔥᑰ ᑳᒪᑗᒋᐗᕽ ᑭᒋᐹᐎᑎᒃ᙮ 16ᐅᑭᒋᓂᑭᕽ ᐃᑕᔥ ᑮᐊᐱᐗᐞ ᓃᔣᓱ ᐗᓇᑯᔕᐞ᙮ ᐊᒦᔥ ᒦᓇᐙ ᐅᑑᓂᕽ ᑮᐅᒋᓭᓂ ᑳᐄᑕᐎᑳᔖᓂᒃ ᑭᒋᒨᑯᒫᓐ᙮ ᒦᔥ ᑲᔦ ᐁᔑᓈᑾᓂᓂᒃ ᐅᐗᑌᕽ ᑖᐱᔥᑰ ᑮᓯᔅ ᑳᐊᐲᒋᐙᓭᔮᓯᑫᒡ ᑮᐃᔑᓈᑾᓂᓂ᙮ 17ᐊᐲ ᐁᐙᐸᒪᒃ ᓂᑮᑲᐎᐸᓂᐅᐙᓐ ᐅᓯᑎᕽ᙮ ᑖᐱᔥᑰ ᐊᐎᔭ ᐁᓂᐳᒡ ᓂᑮᐃᔑᓈᑯᔅ᙮ ᓂᑮᑖᑭᓂᒃ ᐃᑕᔥ ᐅᑭᒋᓂᑭᕽ, ᐁᑮᐃᔑᒡ: ᑫᑯ ᓭᑭᓯᑫᓐ! ᓃᓐ ᐊᐊ ᓂᑕᒻ ᑳᑮᐊᔮᒡ ᑲᔦ ᐲᓂᔥ ᐃᔥᒀᒡ ᑫᐊᔮᒡ᙮ 18ᓃᓐ ᐊᐊ ᑳᐱᒫᑎᓯᒡ᙮ ᓂᑮᓂᑉ, ᒦᓇᐙᔥ ᓂᐱᒫᑎᔅ, ᑲᔦ ᓀᐱᒡ ᐱᔑᔑᒃ ᓂᑲᐱᒫᑎᔅ᙮ ᓃᓐ ᓂᑌᐃᓀᑖᑯᔅ ᒋᑎᐯᑕᒫᓐ ᓂᐳᐎᓐ ᑲᔦ ᐃᑭ ᐃᐃᒫ ᑳᓂᐳᐙᒡ ᑳᐃᔑᐊᔮᐙᒡ᙮ 19ᐅᔑᐲᐊᓐ ᐃᑕᔥ ᐃᓂ ᑳᐙᐸᑕᒪᓐ, ᒦᐗᓐ ᐃᓂᐌᓂᐗᓐ ᓅᑯᒻ ᑳᐊᔮᑭᓐ ᑲᔦ ᓃᑳᓐ ᐌᑎ ᑫᓂ​ᐃᔑᓭᒃ᙮ 20ᑭᑭᑫᑕᒨᓂᓐ ᐃᐌ ᐁᓀᑖᑯᓯᐙᒡ ᐅᑯ ᓃᔣᓱ 7 ᐗᓇᑯᔕᒃ ᑳᑮᐙᐸᒪᑣ ᓂᑭᒋᓂᑭᕽ ᐁᐊᐱᐙᒡ, ᑲᔦ ᐃᓂ ᓃᔣᓱ ᐅᓵᐎ​ᔔᓂᔮᐎ ᐙᓴᑯᓀᒋᑲᓈᑎᑰᓐ, ᐃᐃᐌ ᑳᑳᒋᑳᑌᒃ᙮ ᐅᑯ ᓃᔣᓱ ᐗᓇᑯᔕᒃ, ᒦᐗᐞ ᐅᑌᒐᓬᐃᒥᐙᐞ ᐅᑌᐺᑕᒨᒃ ᑳᑕᔑᒫᐗᒋᐊᓇᒥᐋᐙᒡ ᑳᓃᔣᒋᑭᓐ ᐆᑌᓇᐗᓐ᙮ ᐃᓂ ᑲᔦ ᓃᔣᓱ ᐙᓴᑯᓀᒋᑲᓈᑎᑰᓐ, ᒦᐗᑭᑭ ᐅᑌᐺᑕᒨᒃ ᐁᓃᔣᒋᑭᓐ ᐯᐸᑳᓐ ᑳᐃᔑᒫᒫᐗᒋᐃᑎᐙᒡ᙮

will be added

X\