1 ᓂᑯᑎᕽ ᐃᑕᔥ ᐃᑯ ᒞᓐ John ᓰᑲᐊᑖᑫᐎᓂᓂ ᑮᑕᑯᔑᓐ ᐁᑮᒫᒌᐐᑕᒫᑫᒡ ᐃᐃᒫ ᐱᑾᑕᑲᒥᑯᕽ ᒎᑏᔮᑳᕽ Judea, 2 ᐁᑮᐃᑭᑐᒡ: ᑴᑳᑎᓯᒃ ᐅᒋ ᑭᒪᒋᑑᑕᒧᐎᓂᐙᕽ! ᐋᔕ ᐯᔓᓈᑾᓐ ᐃᐃ ᑭᔐᒪᓂᑑ ᒋᐅᔑᓯᑑᒡ ᐅᑎᐯᒋᑫᐎᓐ! 3 ᒞᓐ ᑕᔥ ᑳᑮᑕᔑᒥᑰᑯᐸᓀᓐ ᐃᓂ ᐋᐃᓭᔭᐗᓐ Isaiah ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐊᐲ ᐁᑮᐃᑭᑐᓂᑯᐸᓀᓐ ᒣᐎᔕ: ᐯᔑᒃ ᐊᐎᔭ ᑕᔑᔖᑯᐌ ᐱᑾᑕᑲᒥᒃ, ᐅᔑᑕᒪᐎᒃ ᑫᐃᔖᒡ ᐊᐊ ᑳᑎᐯᒋᑫᒡ, ᑾᔭᑯᒧᑕᒪᐎᒃ ᐃᐃᐌᓂ ᐅᒦᑲᓈᒻ ᑳᐐᐃᔑᐱᒧᓭᒡ᙮ 4 ᒦᑕᔥ ᐅᐅ ᒞᓐ ᑳᐃᔑᑯᓇᔦᒡ, ᐱᒀᐎᑲᓀᐎᒥᑕᑎᒻ ᐅᐲᐗᔭᓐ ᑮᐅᒋᐅᔑᒋᑳᑌᓂ ᑫᑭᔥᑲᕽ, ᐸᔥᑴᑭᓉᔮᐲᓂ ᑮᑭᒋᐱᓱ᙮ ᐸᐸᑭᓀᐞ ᐃᑕᔥ ᐅᑮᐊᒸᐞ, ᐋᒨᐎᓰᓯᐹᑾᑑᓂ ᑲᔦ ᐅᑮᒦᒋᓐ᙮ 5 ᐃᐃ ᑕᔥ ᐊᐎᔭᐞ ᑳᑮᐱᓈᓯᑳᑯᒡ ᒉᕒᐆᓴᓬᐊᒥᕽ Jerusalem ᑮᐅᒌᐗᐞ, ᐃᐃᒫ ᑲᔦ ᒥᓯᐌ ᒎᑏᔭᐗᑮᕽ, ᐃᐃᒫ ᑲᔦ ᒥᓯᐌ ᐯᔓ ᒞᕒᑕᓇᐎ ᓰᐲᕽ Jordan᙮ 6 ᐅᑮᐐᑖᓈᐙᓐ ᐃᑕᔥ ᐅᒪᒋᑑᑕᒧᐎᓂᐙᓐ, ᒞᓐ ᑕᔥ ᐅᑮᓰᑲᐊᑕᐙᐞ ᐃᐃᒫ ᒞᕒᑕᓇᐎ ᓰᐲᕽ᙮ 7 ᐊᐲ ᑕᔥ ᒞᓐ ᐁᐙᐸᒫᒡ ᓃᐱᐗᐞ ᐁᐱᐊᑕᓰᑲᐊᑖᓱᓂᒡ ᐃᓂᐌᓂᐗᐞ ᐯᕒᐊᓰᐞ Pharisees, ᓵᒐᓰᐞ Sadducees ᑲᔦ, ᐅᐅ ᑕᔥ ᐅᑮᐃᓈᐞ: ᑮᓇᐙ ᑳᑭᓀᐱᑯᐎᔦᒃ! ᐊᐌᓀᓐ ᑳᑮᐃᓂᓀᒃ ᒋᑲᔥᑭᑑᔦᒃ ᒋᐸᓂᔥᑳᑯᔦᒃ ᑭᔐᒪᓂᑑ ᐅᓂᔥᑳᑎᓯᐎᓐ ᑳᐐᐲᔖᒪᑲᓂᓂᒃ? 8 ᑫᑰᓇᓐ ᐃᑕᔥ ᐃᔑᒋᑫᒃ ᒋᓈᑯᑑᔦᒃ ᑫᑫᑦ ᐃᑯ ᐁᑮᑴᑳᑎᓯᔦᒃ ᐃᐃᒫ ᑭᒪᒋᑑᑕᒧᐎᓂᐙᕽ᙮ 9 ᒥᓴᐙ ᐱᑯ ᐋᓇᐃᑭᑐᔦᒃ ᐁᐸᕒᐊᐋᒻ Abraham ᓂᑭᒋᐊᔭᐋᒥᓈᐸᓐ, ᑳᐐᓐ ᑫᑰᓐ ᑭᑲᐃᔑᐐᒋᐃᑯᓰᒻ᙮ ᑭᐐᑕᒪᐎᓂᓂᒻ, ᑭᔐᒪᓂᑑ ᐅᑖᑲᔥᑭᐋᐞ ᐃᐃ ᐊᓯᓃᐞ ᒋᐃᓇᐌᒫᓂᐸᓐ ᐃᓂ ᐁᐸᕒᐊᐋᒪᓐ᙮ 10 ᐙᑳᑾᑦ ᑕᔥ ᑕᐋᐸᑕᓐ ᒋᑮᔥᑲᑕᐅᑣ ᐃᑭ ᒥᑎᑰᒃ ᑭᑭᒌᐱᒃ᙮ ᐊᐊᐌᑎ ᑕᔥ ᒥᑎᒃ ᑳᓂᑖᐎᑭᐋᓯᒃ ᐌᓂᔑᔑᓂᓂᒡ ᔔᒥᓇᐞ ᑕᑲᐗᐙ, ᑕᒪᒍᑌᐌᐱᓂᑲᓂᐎ ᑲᔦ᙮ 11 ᓂᐲᕽ ᐃᑕᔥ ᓃᓐ ᑭᑎᔑᓰᑲᐊᑕᐎᓂᓂᒻ ᒋᑭᑫᓂᒥᑰᔦᒃ ᐁᑴᑭᐱᒫᑎᓯᔦᒃ᙮ ᐊᐊ ᑕᔥ ᐐᓐ ᑳᐐᐱᑕᑯᔑᕽ ᑭᔐᒪᓂᑑᓐ ᐅᑕᒑᑯᓃᕽ, ᐃᔥᑯᑌᕽ ᑲᔦ ᑭᑲᐃᔑᓰᑲᐊᑖᑯᐙ᙮ ᓇᐗᒡ ᐐᓐ ᐃᔥᐯᑖᑯᓯ ᐊᐲᒡ ᓃᓐ᙮ ᑳᐐᓐ ᓂᑌᐊᐲᑌᑖᑯᓯᓰ ᒋᐱᒥᐎᑖᐗᒃ ᐅᒪᑭᓯᓇᓐ᙮ 12 ᑖᐱᔥᑰ ᐃᓀᑖᑯᓯ ᑭᑎᑫᐎᓂᓂ ᑳᑕᑯᓇᕽ ᐅᐸᐎᐌᐸᐃᑲᓈᑎᒃ, ᐁᐐᐸᐙᔑᒫᒡ ᐅᐸᑴᔑᑲᓂᒥᓇᓐ᙮ ᐅᑲᓇᐃᓈᓐ ᐃᑕᔥ ᐅᐸᑴᔑᑲᓂᒪᓅᒥᓂᒪᓐ᙮ ᐅᑲᒪᒍᑌᐌᐱᓈᓐ ᑕᔥ ᐐᓐ ᒪᔥᑯᓰᓂ ᐃᐃᒫ ᐐᑳ ᑳᔑᐋᑕᐌᓯᓂᓂᒃ ᐃᔥᑯᑌᓂ᙮ 13 ᒋᓴᔅ ᑕᔥ ᑳᓬᐊᓬᐄᕽ Galilee ᑮᐱᐅᒌ ᐁᑮᐱᓈᓯᑲᐙᒡ ᐃᓂ ᒞᓇᓐ John ᒋᓰᑲᐊᑖᑯᒡ ᐃᐃᒫ ᒞᕒᑕᓇᐎ ᓰᐲᕽ Jordan᙮ 14 ᒞᓐ ᑕᔥ ᐅᑮᐃᓈᓐ ᒋᓴᓲᓐ: ᑕᑾᒡ ᓃᓐ ᑭᑖᓰᑲᐊᑕᐤ᙮ ᔖᑰᒡ ᐃᑕᔥ ᑭᐱᓈᓯᑲᐤ᙮ 15 ᒋᓴᔅ ᑕᔥ ᐅᑮᐃᔑᓇᑴᑕᐙᓐ: ᐊᐤ ᒫᓄ ᐃᐃᐌ ᑕᐃᔑᓭ ᒋᐃᔑᒋᑫᔭᕽ ᐋᓃᓐ ᑳᔑᒥᓴᐌᑕᕽ ᑭᔐᒪᓂᑑ᙮ 16 ᐊᐲ ᑕᔥ ᒋᓴᔅ ᑳᐃᔥᒀᓰᑲᐊᑖᓱᒡ, ᐁᑮᐊᓂᐊᒀᓰᒡ, ᑭᒋᑮᔑᒃ ᑮᐹᑭᓂᑳᑌᓂ, ᐅᑮᐙᐸᒫᓐ ᑭᔐᒪᓂᑑᓐ ᐅᑕᒑᑯᓂ ᐁᐱᓈᓯᑳᑯᒡ ᑖᐱᔥᑰ ᐱᑯ ᐅᒦᒦᓯᕽ ᐁᑮᐃᔑᓈᑯᓯᓂᒡ, ᐁᐱᐴᓃᓴᑖᑯᒡ᙮ 17 ᑮᓅᑕᐙ ᑕᔥ ᐊᐎᔭ ᐁᑮᑭᑐᒡ ᐃᐃᒫ ᑭᒋᑮᔑᑯᕽ: ᒦ ᐗᐊ ᓂᑯᓯᔅ ᑳᓵᑭᐊᒃ᙮ ᐋᐱᒋ ᓂᒥᓍᐸᒫ᙮
