Maahtiyo 2

1ᒋᓴᔅ ᑕᔥ ᑮᐃᔑᓂᑖᐎᑭ ᐃᐃᒫ ᐆᑌᓈᕽ ᐯᑕᓬᐃᐁᒦᕽ Bethlehem ᐃᐃᒫ ᐊᑮᕽ ᒎᑏᔭ Judea ᑳᑮᐃᔑᓂᑳᑌᓂᒃ ᐊᐲ ᐁᕒᐊᑦ Herod ᑮᑭᒋᐅᑭᒫᐎᒡ᙮ ᒦᑕᔥ ᐃᐃ ᐊᐲ ᑮᐲᔖᐗᒃ ᐃᐃᒫ ᒉᕒᐆᓴᓬᐊᒥᕽ Jerusalem ᐃᑭᐌᓂᐗᒃ ᐃᓂᓂᐗᒃ ᑳᓇᓈᑲᒋᐋᐙᒡ ᐗᓇᑯᔕᐞ ᐙᐸᓄᕽ ᑳᑮᐅᒌᐙᒡ᙮ 2ᒦᑕᔥ ᑮᐃᑭᑐᐗᒃ: ᐋᑎ ᐊᐊᐌ ᐊᐱᓅᒌᔥ ᑳᓂᑖᐎᑭᒡ ᑳᐐᐅᑭᒫᑲᑕᐙᒡ ᐃᐃᐌᓂᐗᐞ ᒎᐗᐞ᙮ ᓂᑮᐙᐸᒥᒫᓈᓂᓐ ᐅᔕ ᐃᓂ ᐅᐗᓇᑯᔑᒪᓐ ᐃᐃᐌᑎ ᐙᐸᓄᕽ, ᒦᑕᔥ ᑳᐅᒋ​ᐲᔖᔮᕽ ᐁᐐᐅᒋᒌᑾᓃᑕᐗᑭᒡ᙮ 3ᐊᐲ ᑕᔥ ᑳᓅᑕᕽ ᐊᐊ ᐁᕒᐊᑦ ᐐᑫ ᑮᒥᑯᔥᑳᑌᑕᒻ, ᐃᑭ ᑲᔦ ᑲᑭᓇ ᑳᑮᐊᔮᐙᒡ ᐃᐃᒫ ᒉᕒᐆᓴᓬᐊᒥᕽ᙮ 4ᑲᑭᓇ ᑕᔥ ᐅᑮᐊᑐᒫᐞ ᐃᐃ ᑭᒋᐊᓇᒥᐁᐎᑭᒫᐞ, ᑳᑭᑭᓄᐊᒫᑫᓂᒡ ᑲᔦ ᐅᓈᑯᓂᑫᐎᓐ, ᒦᑕᔥ ᑳᐃᔑ​ᑲᑴᒋᒫᒡ: ᐋᑎ ᑳᐐᐃᔑ​ᓂᑖᐎᑭᓂᒡ ᐃᓂ ᑭᔐᒪᓂᑑ ᑳᑮᐊᔓᑕᒫᑫᒡ ᒋᐱᒫᒋᐃᐌᓂᒡ? 5ᒦᑕᔥ ᐁᕒᐊᑦ ᑳᐃᔑ​ᓇᑴᑕᐎᓐᒡ: ᐃᐃᒫ ᓴ ᐆᑌᓈᕽ ᐯᑕᓬᐃᐁᒦᕽ ᐃᐃᒫ ᐊᑮᕽ ᒎᑏᔭ ᑕᐃᔑ​ᓂᑖᐎᑮ, ᐋᓃᔥ ᑭᔐᒪᓂᑑ ᒣᐎᔕ ᑳᑮᑲᓅᑕᒫᑯᒡ ᐅᐅ ᑮᐃᔑᐲᐃᑫᐗᓐ: 6ᐃᐃᐌ ᓴ ᐯᑕᓬᐃᐁᒻ ᐃᐃᒫ ᑳᐊᔮᒃ ᐊᑮᕽ ᒎᑕᑳᕽ Judah, ᑳᐐᓐ ᐸᑮ ᐃᓇᑭᑌᓯᓅᓐ ᐃᒫ ᑳᑭᒋ​ᐃᓀᑖᑾᑭᓐ ᐆᑌᓇᐗᓐ ᒎᑕ ᐊᑮᕽ᙮ ᒦ ᐅᔕ ᐃᒫ ᐯᑕᓬᐃᐁᒦᕽ ᑳᐐᐅᒌᒡ ᐊᐊ ᑳᐐᓃᑳᓃᑕᒫᑫᒡ ᑫᑭᑭᓄᐎᓈᒡ ᑲᔦ ᓂᑑᐱᒫᑎᓰᒪᐞ ᐃᐃ ᐃᔅᕒᐃᔭᓬᐊᐞ Israel, ᑮᐃᑭᑐ ᑳᑎᐯᒋᑫᒡ᙮ 7ᐁᕒᐊᑦ ᑕᔥ ᐅᑮ​ᑮᒨᒋᑲᓅᓈᐞ ᐃᓂᐌᓂᐗᐞ ᐃᓂᓂᐗᐞ ᐙᐸᓄᕽ ᑳᑮᐅᒌᓂᒡ, ᑲᔦ ᐅᑮ​ᑲᑴᒋᒫᐞ ᐋᓃᓐ ᒪᔮ ᐊᐲ ᑳᓈᑯᓯᓂᒡ ᐃᓂ ᐗᓇᑯᔕᓐ᙮ 8ᒦᑕᔥ ᑳᐃᔑ​ᐃᔑᓂᔕᐙᒡ ᐃᐃᐌᑎ ᐯᑕᓬᐃᐁᒦᕽ ᐁᑮᐃᓈᒡ: ᒫᒑᒃ, ᐌᐌᓂ ᑲᑴ​ᒥᑲᐎᒃ ᐊᐊ ᐊᐱᓅᒌᔥ᙮ ᑮᒥᑲᐌᒃ ᐃᑕᔥ ᐱᐐᑕᒪᐎᔒᑫᒃ ᑫᓃᓐ ᓴ ᒋᐅᒋᒌᑾᓃᑕᐗᒃ, ᐅᑮᐃᓈᐞ᙮ 9ᔐᒫᒃ ᐃᑕᔥ ᑮᒫᒑᐗᒃ᙮ ᒦᓇᐙ ᑕᔥ ᐅᑮᐊᓂ​ᐙᐸᒫᐙᓐ ᐃᓂ ᐗᓇᑯᔕᓐ ᑳᑮᐙᐸᒫᐙᒡ ᐙᐸᓄᕽ, ᐁᑮᐊᓂ​ᓃᑳᓃᑕᒫᑯᐙᒡ, ᐲᓂᔥ ᐁᓂ​ᐅᑎᑕᒥᓂᒡ ᐁᑮᐊᓂ​ᑭᐱᒋᔥᑳᓂᒡ ᑎᐱᔥᑰ ᑳᐃᔑ​ᐊᔮᓂᒡ ᐃᓂ ᐊᐱᓅᒌᔕᓐ᙮ 10ᐋᐱᒋ ᑕᔥ ᑮᑭᒋ​ᒨᒋᑫᑕᒨᒃ ᐊᐲ ᑳᐙᐸᒫᐙᒡ ᐃᓂ ᐗᓇᑯᔕᓐ᙮ 11ᒦᑕᔥ ᑳᐃᔑ​ᐲᑎᑫᐙᒡ ᐃᐃᒫ ᐙᑳᐃᑲᓂᕽ, ᐁᑮᐙᐸᒫᐙᒡ ᐃᓂ ᐊᐱᓅᒌᔕᓐ, ᑲᔦ ᐅᒫᒫᓂ ᒣᕒᐄᓐ Mary᙮ ᔐᒫᒃ ᐃᑕᔥ ᐅᑮᐅᒋᒌᑾᓃᑕᐙᐙᓐ ᐃᓂ ᐊᐱᓅᒌᔕᓐ ᐁᑮ​ᑭᒋ​ᐃᓀᓂᒫᐙᒡ᙮ ᒦᑕᔥ ᑳᐃᔑ​ᐹᑭᓇᒧᐙᒡ ᐅᒪᔥᑭᒧᑎᐙᓐ ᑭᒋᑫᑰᓇᓐ ᐁᑮᒦᓈᐙᒡ, ᐅᓵᐎ​ᔔᓂᔮᓐ, ᒥᓈᓯᑲᓂᓂ frankincense ᑲᔦ, ᐱᑭᐎ​ᒥᓈᑯᐅᓂᓂ myrrh ᑲᔦ᙮ 12ᑮᐸᐙᒧᐗᒃ ᐃᑕᔥ ᐁᑮ​ᑭᑫᑕᒨᓂᑯᐙᒡ ᑭᔐᒪᓂᑑᓐ ᒋᑮᐌ​ᐃᔖᓯᒀ ᐌᑎ ᐁᕒᐊᑕᓐ ᑳᐃᔑ​ᐊᔮᓂᒡ᙮ ᐸᑳᓐ ᐃᑕᔥ ᐃᓇᑫ ᑮᐃᔑ​ᑮᐌᐗᒃ ᐅᑕᑮᐙᕽ᙮ 13ᐊᐲ ᑕᔥ ᑳᐊᓂ​ᒫᒑᓂᒡ ᐃᓂᐌᓂᐗᐞ ᐃᓂᓂᐗᐞ, ᑭᔐᒪᓂᑑ ᐅᑌᒐᓬᐃᒪᓐ ᐅᑮ​ᐱᓈᓯᑲᐙᓐ ᒎᓴᐴᓐ Joseph ᐃᐃᒫ ᐃᓈᐸᑕᒧᐎᓂᕽ ᑳᑮᐃᓈᒡ: ᐗᓂᔥᑳᓐ, ᒫᒌᐸᐃᐌᒃ ᐊᐊ ᐊᐱᓅᒌᔥ ᑲᔦ ᐅᒫᒫᓐ, ᐄᒋᐸᑮᕽ Egypt ᐊᐸᐃᐌᒃ᙮ ᒦᑕᔥ ᐌᑎ ᑫᐊᔭᔮᔭᓐ ᐹᒫ ᑲᓅᓂᓈᓐ ᒫᒑᑲᓐ᙮ ᐁᕒᐊᑦ Herod ᑭᒋᐅᑭᒫ ᐅᑲ​ᑲᑴ​ᒥᑲᐙᓐ ᐁᐐᓂᓵᒡ ᐃᓂ ᐊᐱᓅᒌᔕᓐ᙮ 14ᔐᒫᒃ ᐃᑕᔥ ᒎᓴᑉ ᑮᐗᓂᔥᑳ ᐁᑎᐱᑲᓂᓂᒃ ᐁᑮᒫᒋᐸᐃᐌᐙᒡ ᐃᓂ ᐊᐱᓅᒌᔕᓐ, ᐅᒫᒫᓂ ᑲᔦ, ᐄᒋᐸᑮᕽ ᐁᑮᐊᐸᐃᐌᐙᒡ᙮ 15ᒦᑕᔥ ᐃᐃᒫ ᑳᐃᔑ​ᐊᔮᒡ ᐲᓂᔥ ᐁᑮᐃᔥᒀᐱᒫᑎᓯᓂᒡ ᐁᕒᐊᑕᓐ᙮ ᒦᑕᔥ ᐃᐃ ᐊᐲ ᐹᓂᒫ ᑳᑮᐱᑮᐌᐙᒡ᙮ ᒦᑕᔥ ᐅᐅ ᑳᑮᐅᒋ​ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᑳᑎᐯᒋᑫᒡ ᑳᑮᐃᑭᑐᑯᐸᓀᓐ ᐁᑮᐋᐸᒋᐋᒡ ᐅᑎᐹᒋᒧᐎᓂᓃᒪᓐ ᑳᑮᑲᓅᑕᒫᑯᒡ: ᓂᑮ​ᑲᓅᓈ ᓂᑯᓯᔅ ᒋᓵᑲᐊᕽ ᐃᐃᒫ ᐄᒋᐸᑮᕽ, ᐁᑮᐃᑭᑐᒡ᙮ 16ᐊᐲ ᑕᔥ ᐁᕒᐊᑦ Herod ᐁᑮᐙᐸᑕᕽ ᐁᑮᐱᑮᐌ​ᐐᑕᒫᑯᓯᒃ ᐃᐃ ᐃᓂᓂᐗᐞ ᐙᐸᓄᕽ ᑳᐅᒋᓂᒡ, ᐋᐱᒋ ᑮᑭᒋᓂᔥᑳᑎᓯ᙮ ᒦᑕᔥ ᑳᐃᓈᑯᓂᑫᒡ ᑲᑭᓇ ᒋᐊᑕᐎᓂᓯᒥᓐᒡ ᑸᐎᓭᓴᐞ ᐃᐃᒫ ᐯᑕᓬᐃᐁᒦᕽ Bethlehem ᑳᐊᔮᓂᒡ ᑲᔦ ᐯᔓ ᐃᒫ ᑳᐊᔮᓂᒡ, ᑳᓃᔓᐱᐴᓉᓂᒡ 2 ᓇᐗᒡ ᑲᔦ ᑳᐅᔥᑳᑎᓯᓂᒡ ᒋᓂᒋᑲᓂᐎᓂᒡ᙮ ᐋᔕ ᒦᐃ ᓃᔓᐱᐴᓐ ᑮᐃᔑᓭᓂᒃ ᐊᐲ ᐊᐊ ᐗᓇᑯᔥ ᓂᑕᒻ ᑳᑮᓈᑯᓯᑯᐸᓀᓐ᙮ 17ᔑᑾ ᒦᐃ ᑳᑮᐃᑭᑐᑯᐸᓀᓐ ᐊᐊ ᒉᕒᐊᒫᔭ Jeremiah ᑳᑮᑲᓅᑕᒪᐙᒡ ᑭᔐᒪᓂᑑᓐ, ᒪᔮ ᐱᑯ ᑮᐃᔑᓭᓂ᙮ 18ᑫᑰᓐ ᓅᑖᑾᓐ ᐃᐃᒫ ᐅᕒᐁᒫᕽ Ramah, ᒦᐃ ᐁᓂᑖᑾᒃ ᑖᐱᔥᑰ ᐊᐎᔭ ᐁᑭᒋᒪᐎᒡ ᑲᔦ ᐁᑲᒀᑕᑲᑌᒧᒡ, ᐅᕒᐁᒐᓬ Rachel ᐁᒪᐎᒫᒡ ᐅᓃᒑᓂᓴᐞ, ᑳᐐᓐ ᑲᔦ ᑲᔥᑭᐋᓰ ᒋᒥᓉᑕᕽ, ᐋᓃᔥ ᑲᑭᓇ ᑮᓂᐳᐗᐞ᙮ 19ᐊᐲ ᑕᔥ ᐁᕒᐊᑦ Herod ᑳᐃᔥᒀᐱᒫᑎᓯᒡ, ᒎᓴᑉ Joseph ᐅᑮᐙᐸᒥᒫᓐ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᒥ ᐃᐃᒫ ᐃᓈᐸᒋᑲᓂᕽ 20ᐁᑮᐃᑯᒡ: ᐗᓂᔥᑳᓐ, ᒫᒌᔥ ᐊᐊ ᐊᐱᓅᒌᔥ, ᐅᒫᒫᓐ ᑲᔦ, ᐃᐃᐌᑎ ᐃᔑ​ᑮᐌᓐ ᐊᑮᕽ ᐃᔅᕒᐃᔭᓬ Israel ᑳᐃᔑᓂᑳᑌᒃ᙮ ᐋᓃᔥ ᐋᔕ ᑲᑭᓇ ᑮᓂᐳᐗᒃ ᐃᑭ ᑳᐐᓂᓵᐙᐸᓐ ᐃᓂ ᐊᐱᓅᒌᔕᓐ᙮ 21ᔐᒫᒃ ᐃᑕᔥ ᒎᓴᑉ ᑮᐗᓂᔥᑳ ᐁᑮᒫᒌᓈᒡ ᐃᓂ ᐊᐱᓅᒌᔕᓐ, ᐅᒫᒫᓂ ᑲᔦ, ᐃᔅᕒᐃᔭᓬᐃᑳᕽ ᐁᑮᐃᔑ​ᑮᐌᐎᓈᒡ᙮ 22ᑮᑯᑖᒋ ᑕᔥ ᒎᑏᔭᐗᑮᕽ Judea ᒋᐃᔖᒡ, ᐋᓃᔥ ᑮᐃᔑ​ᓅᑕᒻ ᐋᕒᑭᓬᐁᔭᓲᓐ Archelaus ᐁᑭᒋᐅᑭᒫᐎᓂᒡ ᐁᑮᓈᐱᔥᑲᐙᓂᒡ ᐃᓂ ᐅᓯᐸᓃᓐ ᐁᕒᐊᑕᓐ᙮ ᑮᑲᓅᒋᑲᓂᐎ ᑕᔥ ᒎᓴᑉ Joseph ᐃᐃᒫ ᐃᓈᐸᑕᒧᐎᓂᕽ, ᒦᑕᔥ ᑳᐃᔑ​ᐃᔖᒡ ᐃᐃᐌᑎ ᓇᑫ ᑳᓬᐊᓬᐄᐎ Galilee ᐊᑮᕽ᙮ 23ᐃᐃᒫ ᑕᔥ ᐆᑌᓈᕽ ᓈᓴᕒᐃᑦ Nazareth ᑳᑮᐃᔑᓂᑳᑌᓂᒃ ᒦ ᐃᒫ ᑳᐃᔑ​ᑲᐯᔑᒡ᙮ ᒦᑕᔥ ᐅᐅᐌ ᒦᓇᐙ ᑳᑮᐅᒋ​ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᒣᐎᔕ ᑳᑮᐱ​ᐃᑭᑐᐙᑯᐸᓀᓐ ᐃᑭ ᑳᑮᐱ​ᑲᓅᑕᒪᐙᐙᒡ ᑭᔐᒪᓂᑑᓐ ᐁᑕᔑᒫᐙᒡ ᐃᓂᐌᓂᐗᓐ ᑭᔐᒪᓂᑑ ᑳᑮᐊᔓᑕᒫᑫᒡ ᒋᐱᒫᒋᐃᐌᓂᒡ: ᒦᐃᐌ ᑫᐃᓂᓐᒡ, ᓈᓴᕒᐃᑎᕽ ᐁᐅᒌᒡ, ᑮᐃᑭᑐᐗᒃ᙮

will be added

X\