Maahtiyo 17

1ᐹᓂᒫ ᑕᔥ ᓂᑯᑣᓱᑮᔑᒃ ᐁᐃᔑᓭᓂᒃ ᒋᓴᔅ ᐅᑮᒫᒌᓈᓐ ᐲᑕᕒᐆᓐ Peter, ᐃᓂᐌᓂᐗᐞ ᑲᔦ ᑳᐐᒋᑭᐌᑎᓂᒡ ᒌᒥᓴᓐ James ᔑᑾ ᒞᓇᓐ John, ᐗᑭᑕᑎᓐ ᑕᔥ ᐁᑮᐃᔑᐎᓈᒡ, ᐐᓀᑕᐙ ᐌᑎ ᐁᑮᐃᔖᐙᒡ ᑳᑮᐃᔑ​ᐃᔥᐸᑎᓈᓂᒃ᙮ 2ᒣᒀ ᑕᔥ ᐁᑲᓇᐙᐸᒥᑯᒡ, ᐸᑳᓐ ᑮᐊᓂ​ᐃᔑᓈᑯᓯ ᑖᐱᔥᑰ ᑮᓯᔅ ᑳᐊᐲᒋ​ᐙᓭᓈᑯᓯᒡ, ᒦᔥ ᐃᐃ ᑳᐊᐲᒋ​ᐙᓭᓈᑯᓯᒡ ᐊᐊ ᒋᓴᔅ᙮ ᐅᑭᑭᔥᑭᑲᓇᓐ ᑲᔦ ᐐᑫ ᑮᐙᐱᔥᑭᐙᓭᓈᑾᓂᓂᐗᓐ᙮ 3ᐃᑭ ᑲᔦ ᓂᓯᓐ ᑭᑭᓄᐊᒪᐙᑲᓇᒃ ᐅᑮᐙᐸᒫᐙᓐ ᒨᓯᓲᓐ Moses ᔑᑾ ᐃᓬᐋᐃᒐᐗᓐ Elijah ᐁᑮᐐᒌᐙᓂᒡ ᒋᓴᓲᓐ, ᐁᑲᑲᓅᓂᑎᓂᒡ᙮ 4ᐲᑕᕒ ᑕᔥ ᐅᑮᐅᒋ​ᑲᓅᓈᓐ ᒋᓴᓲᓐ: ᑌᐯᒋᑫᔭᓐ, ᐋᐱᒋ ᓴ ᒦᐃ ᑾᔭᒃ ᐅᐅᒫ ᑳᐊᔮᔭᕽ, ᑮᔥᐱᓐ ᐃᔑ​ᒥᓴᐌᑕᒪᓐ, ᓂᓯᓐ ᐊᑲᐙᑌᐃᑲᓇᓐ ᓂᑲ​ᐸᑕᑭᑑᓇᓐ, ᑮᓐ ᐯᔑᒃ ᒋᐊᔮᔭᓐ, ᒨᓯᔅ ᑲᔦ ᐯᔑᒃ, ᐃᓬᐋᐃᒐ ᑲᔦ ᐯᔑᒃ, ᑮᐃᑭᑐ᙮ 5ᒣᒀ ᑕᔥ ᐁᑲᑭᑐᒡ, ᐙᓭᐗᑸᓂ ᐅᑮᐋᑲᐎᔥᑳᑯᓈᐙ᙮ ᒦᑕᔥ ᐃᐃᒫ ᑳᑮᐅᒋ​ᓅᑕᐎᒥᓐᒡ ᐊᐎᔭᓐ ᐁᑮᑭᑐᓂᒡ: ᒦ ᓴ ᐊᐊ ᑎᐱᓇᐌ ᓂᑯᓯᔅ ᑳᓵᑭᐊᒃ, ᑳᒥᓍᐸᒪᒃ ᑲᔦ᙮ ᐱᓯᑕᐎᒃ᙮ 6ᐁᑮᓅᑕᐙᐙᒡ ᑕᔥ ᐊᐎᔭᓐ ᐁᑮᑭᑐᓂᒡ, ᐐᑫ ᑮᑭᒋ​ᓭᑭᓯᐗᒃ ᑭᑭᓄᐊᒪᐙᑲᓇᒃ᙮ ᒦᑕᔥ ᑳᐃᔑ​ᐊᓂᒥᑯᐸᓂᐅᐙᒡ ᐃᐃᒫ ᒥᑕᑲᒥᒃ᙮ 7ᒋᓴᔅ ᐅᑮ​ᐱᓈᓯᑲᐙᐞ ᐁᑮ​ᓵᒥᓈᒡ ᐁᑮᐃᓈᒡ: ᐸᓯᑸᒃ᙮ ᑫᑯ ᓭᑭᓯᑫᒃ, ᐅᑮᐃᓈᐞ᙮ 8ᐁᐃᓈᐱᐙᒡ ᐃᑕᔥ, ᑳᐐᓐ ᐸᑳᓐ ᐊᐎᔭᓐ ᐅᑮᐙᐸᒫᓯᐙᐙᓐ, ᒋᓴᓲᓐ ᐁᑕ᙮ 9ᐁᐱ​ᓃᓵᒪᒋᐌᐙᒡ ᑕᔥ ᒋᓴᔅ ᐅᑮᐃᓈᐞ: ᑫᑯ ᐐᓐ ᐐᑕᒪᐙᑫᒃ ᐊᐎᔭ ᐅᐅᐌ ᑳᐃᔑ​ᐙᐸᑕᐃᑰᐎᓯᔦᒃ, ᐹᓂᒫ ᓴ ᑮᑮᐌᐱᒫᑎᓯᐃᒥᓐᒡ ᐃᓂ ᐃᓂᓂ ᐅᑯᓯᓴᓐ᙮ 10ᑭᑭᓄᐊᒪᐙᑲᓇᒃ ᐃᑕᔥ ᐅᑮ​ᑲᑴᒋᒫᐙᓐ ᒋᓴᓲᓐ: ᐌᑯᓀᓂᓂ ᐌᒋ​ᐃᑭᑐᐙᒡ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᓬᐋᐃᒐ ᐱᓇᒫ ᑕᑕᑯᔑᓐ? 11ᒋᓴᔅ ᑕᔥ ᐅᑮᐃᓈᐞ: ᐃᓬᐋᐃᒐ ᓴ ᓂᑕᒻ ᑕᑕᑯᔑᓐ ᒋᐱ​ᐅᓇᑑᒡ ᑲᑭᓇ ᑫᑰᓂᓂ᙮ 12ᐅᐅᐌ ᑕᔥ ᑭᐐᑕᒪᐎᓂᓂᒻ: ᐃᓬᐋᐃᒐ ᓴ ᐋᔕ ᑮᑕᑯᔑᓐ, ᐯᒫᑎᓯᐙᒡ ᑕᔥ ᑳᐐᓐ ᐅᑮᓂᓯᑕᐎᓇᐙᓯᐙᐙᓐ, ᐅᑮ​ᑑᑕᐙᐙᓐ ᑲᔦ ᐐᓇᐙ ᐋᓃᓐ ᑳᑮᐃᔑ​ᒥᓴᐌᑕᒧᐙᒡ᙮ ᒦᑕᔥ ᐯᔑᑾᓐ ᑫᑑᑕᐙᐙᒡ ᐃᓂ ᐃᓂᓂ ᐅᑯᓯᓴᓐ᙮ 13ᑭᑭᓄᐊᒪᐙᑲᓇᒃ ᐃᑕᔥ ᑮᐅᒋ​ᓂᓯᑐᑕᒨᒃ ᒞᓐ John ᓰᑲᐊᑖᑫᐎᓂᓂᐗᓐ ᐃᓴ ᑳᑮᑕᔑᒥᒥᓐᒡ᙮ 14ᐊᐲ ᑕᔥ ᐁᑮ​ᐱᓈᓯᑲᐙᐙᒡ ᐃᐃ ᑳᐹᑏᓄᓂᒡ, ᐃᓂᓂ ᐅᑮ​ᐱᓈᓯᑲᐙᓐ ᒋᓴᓲᓐ ᐁᑮᐅᒋᒌᑾᓇᐲᑕᐙᒡ, 15ᐁᑮᐃᓈᒡ: ᑌᐯᒋᑫᔭᓐ, ᑯᐹᑌᓂᒻ ᓂᑯᓯᔅ! ᐅᒋᐱᓂᑯᐙᐱᓀ ᐅᔕ, ᑲᔦ ᒨᔕᒃ ᐁᑭᒋ​ᐃᔑᐊᔮᒡ᙮ ᒪᒍᑌᓭ ᒨᔕᒃ, ᐸᑯᐲᓭ ᑲᔦ ᒨᔕᒃ᙮ 16ᓂᑖᓇᑮᐲᑕᒪᐙᒃ ᐃᓴ ᐃᑭ ᑭᑭᑭᓄᐊᒪᐙᑲᓇᒃ, ᑳᐐᓐ ᑕᔥ ᐅᑮ​ᑲᔥᑭᐋᓯᐙᐙᓐ ᒋᒥᓄᐊᔮᓂᒡ᙮ 17ᒋᓴᔅ ᑕᔥ ᑮᐃᑭᑐ: ᐅᐅᒫ ᑲᑭᓇ ᐁᔮᔦᒃ, ᐁᑕᑕᐌ ᑳᐐᓐ ᑭᑌᐺᑕᓰᒻ, ᑳᐐᓐ ᑲᔦ ᑾᔭᒃ ᑭᑎᔑ​ᐊᔮᓰᒻ! ᑳᓇᑲ ᓈ ᒥᓂᒃ ᑫᐐᒌᐎᓇᑰᑭᐸᓐ? ᑳᓇᑲ ᓈ ᒦ ᓇ ᑭᑖ​ᔕᔒᐯᓂᒥᓂᓂᒻ! ᐲᑕᒪᐎᔑᓐ ᐅᐅᒫ ᐊᐊ ᑸᐎᓭᔅ! 18ᒋᓴᔅ ᑕᔥ ᐅᑮ​ᑲᓅᓈᓐ ᐃᓂ ᒪᒋᐊᒑᑾᓐ, ᒦᑕᔥ ᔐᒫᒃ ᑳᐃᔑ​ᓵᑲᐊᒥᓂᒡ᙮ ᔐᒫᒃ ᑕᔥ ᐐᑫ ᑮᒥᓄᐊᔮ ᐊᐊ ᑸᐎᓭᔅ᙮ 19ᑭᑭᓄᐊᒪᐙᑲᓇᒃ ᑕᔥ ᐅᑮ​ᑮᒨᒋ​ᓈᓯᑲᐙᐙᓐ ᐁᑮᐃᓈᐙᒡ: ᐌᑯᓀᓐ ᑳᐅᒋ​ᑆᓇᐎᐊᑭᒡ ᐊᐊ ᒪᒋᐊᒑᒃ ᒋᓵᑭᒋᐌᐱᓇᑭᒡ? 20ᒋᓴᔅ ᑕᔥ ᐅᑮᐃᔑ​ᓇᑴᑕᐙᐞ: ᐋᓃᔥ ᐅᓵᒻ ᐸᑮ ᑭᑌᐺᔦᑖᒻ᙮ ᑮᔥᐱᓐ ᐃᓴ ᓵᐱᐊᔮᔦᒃ ᑌᐺᔦᑕᒧᐎᓐ, ᑖᐱᔥᑰ ᑳᐃᔑ​ᓈᑾᒃ ᐃᐃ ᒫᐗᒡ ᑳᐊᑳᓯᕽ ᑭᑎᑳᓀᔅ ᒪᔅᑕᕒᑦ mustard, ᐱᓵᓂᑯ ᑭᑖᑲᓅᑖᒻ ᐁᐱᑾᑎᓈᒃ ᒋᑮᐃᑭᑐᔦᑭᐸᓐ: ᑕᑲ ᐅᐅᒫ ᐅᒋᒫᒑᓐ, ᐌᑎ ᐃᔖᓐ! ᒦᑕᔥ ᐃᑯ ᑫᔑ​ᒫᒑᒪᑲᒃ᙮ ᑲᑭᓇ ᑫᑰᓐ ᑭᑖ​ᐃᔑᒋᑫᒻ, ᐅᑮᐃᓈᐞ᙮ 21[ᐊᐎᔭ ᐅᔕ ᐁᑕ ᐊᓇᒥᐁᑕᐙᒡ ᑭᔐᒪᓂᑑᓐ, ᐐᓯᓂᓯᒃ ᑮᐊᓇᒥᐋᒡ, ᒦ ᐁᑕ ᐃᒫ ᑫᐅᒋ​ᓵᑭᒋᐌᐱᓈᐸᓐ ᐅᓄ ᑎᓄ ᒪᒋᐊᒑᑾᓐ, ᐅᑮᐃᓈᐞ᙮] 22ᐊᐲ ᑕᔥ ᐃᑭ ᑲᑭᓇ ᑭᑭᓄᐊᒪᐙᑲᓇᒃ ᐁᒫᐗᒋᐃᑎᐙᒡ ᐃᐃᒫ ᑳᓬᐊᓬᐄᕽ Galilee, ᒋᓴᔅ ᐅᑮᐃᓈᐞ: ᓃᓐ ᐃᓂᓂ ᐅᑯᓯᓴᓐ ᓂᑲ​ᐸᑭᑎᓂᑰ ᒋᐅᑖᐱᓂᐙᒡ 23ᐃᑭ ᑳᐐᓂᔑᐙᒡ᙮ ᓂᓱᑮᔑᒃ ᐃᑕᔥ ᐃᔑᓭᒃ ᒦᓇᐙ ᓂᑲ​ᑮᐌᐱᒫᑎᔅ, ᑮᐃᑭᑐ᙮ ᑭᑭᓄᐊᒪᐙᑲᓇᒃ ᑕᔥ ᐐᑫ ᑮᒫᓀᑕᒨᒃ᙮ 24ᐃᐃᒫ ᑕᔥ ᐆᑌᓈᕽ ᑲᐸᕒᓂᔭᒦᕽ Capernaum ᑮᐱ​ᐃᔑ​ᑕᑯᔑᓅᒃ᙮ ᐲᑕᕒ Peter ᑕᔥ ᐅᑮᐱ​ᐊᑕᐙᐸᒥᑰᐞ ᐃᐃ ᑳᑮᑎᐸᐃᑫᐃᐌᓂᒡ ᔔᓂᔮᓐ ᑭᒋᐊᓇᒥᐁᐎᑲᒥᑯᕽ ᑳᑮᐃᔑ​ᐋᐸᑎᓯᓂᒡ, ᒦᔥ ᐅᐅ ᑳᐃᑯᒡ: ᑳᑭᑭᓄᐊᒪᐎᓀᒃ ᐃᓇ ᐅᑎᐸᐋᓐ ᐃᐃ ᑳᑎᐸᐃᑳᑌᓂᒃ ᑭᒋᐊᓇᒥᐁᐎᑲᒥᑯᕽ? ᐅᑮᐃᑰᐞ᙮ 25ᒦᓇᑫ, ᑕᔥ ᐲᑕᕒ ᑮᐃᔑ​ᓇᑴᑕᒻ᙮ ᐁᐱ​ᐲᑎᑫᒡ ᐃᑕᔥ, ᒋᑆ ᑮᑭᑐᒡ ᒋᓴᓲᓐ ᐅᑮᐃᑰᓐ: ᓵᐃᒪᓐ Simon, ᐋᓃᓐ ᐁᓀᑕᒪᓐ? ᐃᑭ ᓴ ᑳᐊᑖᐙᑫᐙᒡ ᑫᑰᓇᓐ ᐃᔑᐋᐗᒃ ᒋᑎᐸᐊᒪᐙᐙᒡ ᐌᑭᒫᐙᑎᓯᓂᒡ᙮ ᑲᑭᓇ ᓴ ᑲᔦ ᐁᑕᔑᐙᒡ ᐊᐎᔭᒃ ᐅᑎᐸᐊᒪᐙᐙᓐ ᐌᑭᒫᐙᑎᓯᓂᒡ᙮ ᐊᐌᓀᓇᒃ ᐃᑕᔥ ᑳᑎᐸᐊᒪᐙᐙᒡ ᐅᐅᐌᓂ ᐊᑮᐎ ᑭᒋᐅᑭᒫᐞ? ᐊᐊ ᓇ ᑭᒋᐅᑭᒫ ᐅᑯᓯᓴᐞ ᐅᐙᑳᐃᑲᓂᕽ ᑳᐊᔮᓂᒡ ᑎᐸᐃᑫᐋᐗᐞ, ᑯᒫ ᑲᔦ ᑯᑕᒃ ᐊᐎᔭᒃ? ᐅᑮᐃᑰᓐ᙮ 26ᐲᑕᕒ ᑕᔥ ᑮᐃᑭᑐ: ᑯᑕᒃ ᐃᓴ ᐊᐎᔭᒃ ᑎᐸᐃᑫᐋᐗᒃ᙮ ᒋᓴᔅ ᑕᔥ ᐅᑮᐃᓈᓐ: ᑌᐺ ᓴ, ᑭᒋᐅᑭᒫ ᐅᑯᓯᓴᐞ ᑳᐐᓐ ᒣᒬᒡ ᐅᑎᐸᐊᓰᓂ᙮ 27ᑳᐐᓐ ᑕᔥ ᐐᓐ ᑭᓇᑕᐌᓂᒫᓯᐙᓈᓂᒃ ᒋᒫᓈᐸᒥᓇᒀ ᑳᐐ​ᑎᐸᐃᑫᐃᓇᒀ ᑭᒋᐊᓇᒥᐁᐎᑲᒥᑯᕽ ᑳᐅᒌᐙᒡ᙮ ᒫᒑᓐ ᐃᑕᔥ, ᐊᑕᒀᔥᑴᐱᒋᑫᓐ ᐌᑎ ᓵᑲᐃᑲᓃᕽ᙮ ᓂᑕᒻ ᐃᑕᔥ ᑫᒀᔥᑴᐱᓇᒡ ᑮᑰᔾ, ᐅᑲᑕᑾᒫᓐ ᔔᓂᔮᓴᓐ᙮ ᒦᑕᔥ ᒋᑌᑎᐸᐊᒪᕽ ᐃᐃ ᐊᓇᒥᐁᐎᑲᒥᑯᕽ ᑳᐐᐅᒋ​ᑎᐸᐃᑫᐃᑰᔭᕽ ᐅᐅ ᑳᐃᔑ​ᓃᔑᔭᕽ᙮ ᐃᔑᐎᑖᐤ ᒋᐊᐎ​ᒦᓇᑣ ᐃᐃᐌ ᑭᑎᐸᐃᑫᐎᓂᓈᓐ, ᐅᑮᐃᓈᓐ᙮

will be added

X\