Maahtiyo 16

1ᐯᕒᐊᓰᒃ Pharisees, ᐃᑭ ᑲᔦ ᓵᒐᓰᒃ Sadducees ᐅᑮ​ᐱᓈᓯᑲᐙᐙᓐ ᒋᓴᓲᓐ ᐁᑮ​ᑲᑴᒋᐋᐙᒡ, ᐁᑲᑴᒋᒫᐙᒡ ᒫᒪᑳᒋᒋᑫᐎᓐ ᒋᑑᑕᒥᓂᒡ, ᒦᑕᔥ ᒋᐙᐸᑕᒧᐙᒡ ᑭᔐᒪᓂᑑᓐ ᐁᒥᓍᐸᒥᑯᓂᒡ᙮ 2ᒋᓴᔅ ᑕᔥ ᐅᑮᐃᓈᐞ: ᑮᔥᐱᓐ ᐃᓴ ᑮᒥᔅᑾᑾᒃ ᐁᐊᓂ​ᐅᓈᑯᔑᒃ, ᒦᐃ ᐁᑭᑐᔦᒃ: ᒦᓴ ᐃ ᐁᐐ​ᒥᓄᑮᔑᑲᒃ᙮ 3ᑮᔥᐱᓐ ᑲᔦ ᑮᒥᔅᑯ​ᒪᑲᑌᐙᓇᑾᒃ ᐐᐸ ᑭᑭᔐᑉ, ᒦᐃ ᐁᑭᑐᔦᒃ: ᐐᒫᔑᑮᔑᑲᓐ ᓅᑯᒻ᙮ ᑭᓂᓯᑕᐎᓈᒻ ᐃᓴ ᐋᓃᓐ ᑫᐊᓂ​ᐃᔑᐌᐸᒃ ᐁᒥᒋᑲᓇᐙᐸᑕᒣᒃ ᐃᐃ ᑮᔑᒃ᙮ ᐋᓇ ᑕᔥ ᐐᓐ ᐙᐸᑕᒣᒃ ᐅᓄ ᑫᑰᓇᓐ ᒣᒀ ᑳᐱᒥᓭᑭᓐ, ᔖᑰᒡ ᑳᐐᓐ ᐃᐃᒫ ᑭᑑᒋ​ᓂᓯᑐᑕᓰᒻ ᐋᓃᓐ ᐙᓂ​ᐃᔑᐌᐸᒃ᙮ 4ᐋᐱᒋ ᓴ ᒪᒋᐱᒫᑎᓯᐗᒃ ᐁᑮᐌᐱᓈᐙᒡ ᑭᔐᒪᓂᑑᓐ ᓅᑯᒻ ᑳᐱᒫᑎᓯᐙᒡ᙮ ᑭᓇᑕᐌᓂᒥᔑᒻ ᑭᑭᓇᐙᓯᓈᑯᒋᑲᓐ ᒋᐙᐸᑕᐃᓇᑰᒃ ᑫᑰᓐ ᐙᐅᒋ​ᑭᑫᓂᒥᔦᒃ᙮ ᒦᑕᔥ ᐁᑕ ᑳᑮᐃᔑᓭᑯᐸᓀᓐ ᐊᐊ ᒎᓇ Jonah, ᒦ ᐁᑕ ᐃ ᑫᔑ​ᑭᑭᓇᐙᒋᑕᒫᑰᔦᒃ ᐋᓃᓐ ᑫᐅᒋ​ᑭᑫᓂᒥᔦᒃ᙮ ᒦᐃ ᑳᐃᓈᒡ᙮ ᒦᑕᔥ ᑳᐃᔑ​ᓇᑲᓈᒡ ᐁᑮᐊᓂ​ᒫᒑᒡ᙮ 5ᐊᐲ ᑕᔥ ᐁᑮᒥᔕᑳᐙᒡ ᐌᑎ ᐊᑳᒥᕽ, ᑭᑭᓄᐊᒪᐙᑲᓇᒃ ᑮᑭᑫᑕᒨᒃ ᐁᑮᐗᓂᓯᐙᒡ ᐸᑴᔑᑲᓇᓐ᙮ 6ᒋᓴᔅ ᑕᔥ ᐅᑮᐃᓈᐞ: ᐊᔮᒀᒥᓯᒃ, ᑫᑯ ᐸᐹᒣᑕᑫᒃ ᐅᑑᐱᓯᑲᓂᐙ ᐃᑭ ᐯᕒᐊᓰᒃ Pharisees, ᐃᑭ ᑲᔦ ᓵᒐᓰᒃ Sadducees᙮ 7ᑭᑭᓄᐊᒪᐙᑲᓇᒃ ᑕᔥ ᑮᐃᑎᐗᒃ: ᐸᑴᔑᑲᓇᓐ ᐅᔕ ᐁᑮ​ᐱᓇᐗᐳᓯᐗᕽ, ᑳᐅᒋ​ᐃᓂᓇᕽ᙮ 8ᐅᑮ​ᑭᑫᓂᒫᐞ ᐃᑕᔥ ᐁᓀᑕᒥᓂᒡ, ᒦᑕᔥ ᑳᐃᓈᒡ: ᐌᑯᓀᓐ ᐌᒋ​ᑲᑲᓅᓂᑎᔦᒃ ᐁᑮ​ᐱᓇᐗᐳᓯᐌᒃ ᐸᑴᔑᑲᓐ? ᐋᐱᒋ ᐊᑳᓭᑖᑾᓐ ᑭᑌᐺᔦᑕᒧᐎᓂᐙ᙮ 9ᑳᐐᓐ ᐃᓇ ᒪᔑ ᑭᓂᓯᑐᑕᓰᒻ? ᑳᐐᓐ ᐃᓇ ᐋᔕ ᑭᒫᒥᑲᐎᓰᒻ, ᓈᓂᕽ ᒥᑖᔂᒃ 5,000 ᐃᓂᓂᐗᒃ ᐁᑮᐅᒋ​ᐐᓯᓂᐙᒡ ᐃᐃᒫ ᓈᓇᓐ ᐸᑴᔑᑲᓂᑳᓂᕽ? ᐋᓃᓐ ᒥᓂᒃ ᑳᑮᒨᔥᑭᓇᑑᔦᒃ ᐐᑯᐲᒪᑲᑰᓐ ᑮᒫᒨᔕᑭᓇᒣᒃ ᐃᔥᑾᒋᑲᓇᓐ? 10ᒦᓇᐙ ᑕᔥ ᓃᐎᕽ ᒥᑖᔂᒃ 4,000 ᐃᓂᓂᐗᒃ ᐁᑮᐅᒋ​ᐐᓯᓂᐙᒡ ᐃᐃᒫ ᓃᔣᓱ ᐸᑴᔑᑲᓂᑳᓂᕽ, ᐋᓃᓐ ᒥᓂᒃ ᑳᒨᔥᑭᓇᑑᔦᒃ ᒪᔥᑯᓰᒪᑲᑰᓐ? 11ᐌᑯᓀᓐ ᑕᔥ ᒪᔑ ᐌᒋ​ᓂᓯᑐᑕᐎᓯᐌᒃ? ᑳᐐᓐ ᑭᑕᔑᑕᒪᐎᓯᓅᓂᓂᒻ ᐊᐊ ᐸᑴᔑᑲᓐ᙮ ᐊᔮᒀᒥᓯᒃ ᑫᑯ ᒋᐸᐹᒣᑕᓯᐌᒃ ᐅᑑᐱᓯᑲᓂᐙ ᐃᑭ ᐯᕒᐊᓰᒃ, ᐃᑭ ᑲᔦ ᓵᒐᓰᒃ᙮ 12ᒦᑕᔥ ᑭᑭᓄᐊᒪᐙᑲᓇᒃ ᑳᐃᔑ​ᓂᓯᑐᑕᒧᐙᒡ, ᑳᐐᓐ ᐐᓐ ᒋᐊᔮᒀᒥᓰᑲᑕᒧᐙᒡ ᐃᐃ ᐸᑴᔑᑲᓂᐎ ᐅᐱᓯᑲᓂᓂ, ᐃᐃᐌᓂ ᓴ ᑳᑮᐃᔑ​ᑭᑭᓄᐃᑫᓂᒡ ᐃᐃ ᐯᕒᐊᓰᐞ, ᐃᐃ ᑲᔦ ᓵᒐᓰᐞ᙮ 13ᐊᐲ ᑕᔥ ᒋᓴᔅ ᑳᐱ​ᑕᑯᔑᕽ ᐃᐃᒫ ᓭᓴᕒᐄᔭ ᐱᓬᐃᐹᔨᕽ Caesarea Philippi, ᐅᑮ​ᑲᑴᒋᒫᐞ ᐅᑭᑭᓄᐊᒪᐙᑲᓇᐞ: ᐊᐌᓀᓐ ᐁᑭᑐᐙᒡ ᐊᐎᔭᒃ ᐁᑎᓄᐎᓂᒡ ᐃᓂ ᐃᓂᓂ ᐅᑯᓯᓴᓐ? 14ᐅᐅ ᑕᔥ ᐅᑮᐃᓈᐙᓐ: ᐋᓂᑕ ᑭᑎᑰᒃ, ᒞᓐ John ᓰᑲᐊᑖᑫᐎᓂᓂ᙮ ᑯᑕᒃ ᑭᑎᑰᒃ ᐃᓬᐋᐃᒐ Elijah᙮ ᑯᑕᒃ ᑭᑎᑰᒃ ᒉᕒᐊᒫᔭ Jeremiah, ᑯᒫ ᑲᔦ ᐯᔑᒃ ᐃᑭ ᑳᑮ​ᑲᓅᑕᒪᐙᑯᐸᓀᓐ ᑭᔐᒪᓂᑑᓐ ᐁᐋᐎᔭᓐ᙮ 15ᒋᓴᔅ ᐃᑕᔥ ᐅᑮᐃᓈᐞ: ᐊᐌᓀᓐ ᑕᔥ ᑮᓇᐙ ᐁᑭᑐᔦᒃ ᐁᑎᓄᐎᔮᓐ? 16ᓵᐃᒪᓐ ᐲᑕᕒ Simon Peter ᑕᔥ ᐅᑮᐃᓈᓐ: ᑮᓐ ᐃᓴ ᐊᐊ ᑭᔐᒪᓂᑑᓐ ᑳᑮᑮᔖᒋ​ᐅᓀᓂᒥᑯᒡ ᒋᐱᒫᒋᐃᐌᒡ, ᑮᓐ ᑭᔐᒪᓂᑑ ᑳᐱᒫᑎᓯᒡ ᐅᑯᓯᓴᓐ᙮ 17ᒋᓴᔅ ᑕᔥ ᐅᑮᐃᓈᓐ: ᓵᐃᒪᓐ, ᒞᓐ John ᑳᐅᑯᓯᓯᒥᒃ, ᐋᐱᒋ ᑭᔕᐌᑖᑯᔅ! ᑳᐐᓐ ᐐᓐ ᐃᓂᓃᑳᕽ ᑭᑮᐅᑎᓇᓰᓐ ᐃᐃ ᐃᑭᑐᐎᓐ, ᐊᐊ ᓴ ᓂᑌᑌ ᑭᒋᑮᔑᑯᕽ ᑳᐊᔮᒡ, ᑎᐱᓇᐌ ᑭᑮᒦᓂᒃ ᐃᐃᐌᓂ ᑳᐐᑕᒪᓐ᙮ 18ᐅᐅ ᑕᔥ ᑭᑎᓂᓐ, ᐲᑕᕒ, ᑮᓐ ᐃᓴ ᐊᓯᓐ, ᒦᓴ ᐃᐃᒫ ᑭᑖᐱᑯᕽ ᑫᐃᔑ​ᒫᐗᑑᓇᒀ ᑲᑭᓇ ᑳᑎᐯᓂᒪᒀ᙮ ᒥᓴᐙ ᑯ ᓂᐳᐎᓐ ᑳᐐᓐ ᐅᑲ​ᔖᑰᒋᐃᑯᓰᓈᐙ᙮ 19ᑭᑲᒦᓂᓐ ᐃᓂ ᐋᐹᐱᑲᐃᑲᓇᓐ ᑫᐅᒋ​ᐹᑭᓇᒪᐎᑣ ᐊᐎᔭᒃ ᑭᔐᒪᓂᑑ ᐅᑎᐯᒋᑫᐎᓂᕽ᙮ ᐌᑯᓀᓐ ᐃᑯ ᑫᑭᐱᑎᓇᒪᓐ ᐅᐅᒫ ᐊᑮᕽ ᑫᒋᓈᒡ ᑕᑭᐱᑎᓂᑳᑌ ᑲᔦ ᑭᒋᑮᔑᑯᕽ᙮ ᐌᑯᓀᓐ ᐃᑯ ᑫᐸᑭᑎᓇᒪᓐ ᐅᐅᒫ ᐊᑮᕽ ᑫᒋᓈᒡ ᑕᐸᑭᑎᓂᑳᑌ ᑲᔦ ᑭᒋᑮᔑᑯᕽ, ᐅᑮᐃᓈᓐ᙮ 20ᒦᑕᔥ ᒋᓴᔅ ᐅᑮᐊᔮᒀᒥᒫᐞ ᐅᑭᑭᓄᐊᒪᐙᑲᓇᐞ ᒋᑎᐹᒋᒥᑯᓯᒃ ᐐᓐ ᐁᐋᐎᒡ ᑭᔐᒪᓂᑑᓐ ᑳᑮᑮᔖᒋ​ᐅᓀᓂᒥᑯᒡ ᒋᐱᒫᒋᐃᐌᒡ᙮ 21ᒦᑕᔥ ᐃᐃ ᐊᐲ ᒋᓴᔅ ᑳᑮᒫᒌ​ᐐᑕᒪᐙᒡ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐅᒋᑕ ᓴ ᑯ ᐃᔑᓈᑾᓐ ᒉᕒᐆᓴᓬᐊᒥᕽ Jerusalem ᒋᐃᔖᔮᓐ, ᒋᑲᒀᑕᑭᐃᐙᒡ ᐃᑭ ᑳᓃᑳᓂᓯᐙᒡ ᒎᐗᒃ, ᐃᑭ ᑲᔦ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮ ᓂᑲᓂᓯᑰᒃ ᐃᑕᔥ, ᐊᓂᓂᓱᑮᔑᑲᒃ ᐃᑕᔥ ᓂᑲ​ᑮᐌᐱᒫᑎᔅ᙮ 22ᐲᑕᕒ Peter ᐃᑕᔥ ᐸᑫᔭᐄ ᐅᑮᐃᔑᐎᓈᓐ ᐁᑮᒫᒋ​ᐅᒋᐋᒡ ᐁᑮᐃᓈᒡ: ᑌᐯᒋᑫᔭᓐ, ᑳᐐᓐ ᑕᐃᓀᑕᓰ ᑭᔐᒪᓂᑑ ᐃᐃ ᒋᐃᔑᓭᔭᓐ! 23ᒋᓴᔅ ᑕᔥ ᑮᑴᑭᑖ ᐁᑮᐃᓈᒡ ᐲᑕᕒᐊᓐ: ᓭᑕᓐ Satan, ᐃᑯᒋ ᐃᔖᓐ! ᑮᓐ ᐅᔕ ᑳᑭᐱᔥᑲᐎᔭᓐ, ᐃᓂᓂᐗᒃ ᐋᓃᔥ ᑳᔑ​ᓈᑲᑕᐌᑕᒧᐙᒡ ᑭᑎᔑ​ᓈᑲᑕᐌᑕᒻ, ᑳᐐᓐ ᐐᓐ ᑭᔐᒪᓂᑑ ᑳᔑ​ᓈᑲᑕᐌᑕᕽ᙮ 24ᒋᓴᔅ ᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᑮᔥᐱᓐ ᐊᐎᔭ ᐐᐐᒌᐎᒡ, ᒦ ᐁᑕ ᑯ ᒋᐋᓇᐌᓂᑎᓱᒡ, ᒋᐱᒥᐎᓈᒡ ᐅᑖᔑᑌᔮᑎᑯᒪᓐ, ᒋᐱᒥᓂᔕᐅᒡ ᐃᑕᔥ᙮ 25ᐊᐊ ᓴ ᐃᓂᓂ ᑳᑲᑴ​ᐱᒫᒋᑑᒡ ᐅᐱᒫᑎᓯᐎᓐ ᐋᒋᑯ ᑳᐐᓐ ᑕᑌᐱᓇᒫᓱᓰ ᑌᐺ ᒋᐅᒋ​ᐱᒫᑎᓯᒡ, ᐊᐊ ᑕᔥ ᐐᓐ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ ᑕᑌᐱᓇᒫᓱ ᑌᐺ ᑫᐅᒋ​ᐱᒫᑎᓯᒡ᙮ 26ᐌᑯᓀᓂᓂ ᑫᐅᑎᓯᐸᓐ ᐊᐎᔭ ᒥᓴᐙ ᑯ ᐋᓇ ᑌᐱᓇᕽ ᑲᑭᓇ ᑫᑰᓂᓂ ᑫᑮᐊᔮᑳᑌᓂᑭᐸᓐ, ᑮᔥᐱᓐ ᑕᔥ ᑌᐱᓇᒫᓱᓯᒃ ᑌᐺ ᑫᐅᒋ​ᐱᒫᑎᓯᒡ? ᐌᑯᓀᓂᓂ ᒣᔥᑾᒡ ᑫᒦᑭᐌᐸᓐ ᒋᑌᐊᐲᑌᑖᑾᓂᓂᒃ ᐃᐃ ᓴ ᑫᐅᒋ​ᒦᓂᑎᐸᓐ ᑌᐺ ᒋᐱᒫᑎᓯᒡ? 27ᐋᓃᔥ ᐐᐸ ᓂᑲ​ᐱ​ᑕᑯᔑᓐ, ᓃᓐ ᐃᓂᓂ ᐅᑯᓯᓴᓐ ᑳᑎᓄᐎᔮᓐ᙮ ᓂᑲᐱ​ᐐᒌᐙᒃ ᐃᑭ ᓂᑌᒐᓬᐃᒪᒃ᙮ ᑳᔑ​ᐙᓭᓈᑯᓯᒡ ᐊᐊ ᓂᑌᑌ ᑫᓃᓐ ᓂᑲ​ᐃᔑ​ᐙᓭᓈᑯᔅ᙮ ᒦᑕᔥ ᐃᐃ ᐊᐲ ᒋᑎᐸᐊᒪᐗᒀ ᑲᑭᓇ ᐁᑕᓱᐯᔑᑯᐙᒡ ᐋᓃᓐ ᑳᐱ​ᐃᔑᒋᑫᐙᒡ᙮ 28ᒫᒥᑲᐎᒃ ᐃᑕᔥ ᐅᐅᐌ! ᐋᓂᑕ ᓴ ᐅᐅᒫ ᑳᐊᔮᐙᒡ ᑳᐐᓐ ᑕᓂᐳᓰᐗᒃ ᐹᓂᒫ ᐙᐸᒫᐙᒡ ᐃᓂ ᐃᓂᓂ ᐅᑯᓯᓴᓐ ᐱᑕᑯᔑᓂᓂᒡ ᒋᑭᒋᐅᑭᒫᐎᓂᒡ᙮

will be added

X\