Maahtiyo 11

1ᐊᐲ ᑕᔥ ᒋᓴᔅ ᑳᐃᔥᒀᑲᓅᓈᒡ ᐅᑭᑭᓄᐊᒪᐙᑲᓇᐞ, ᑮᐊᓂ​ᒫᒑ ᐁᐸᐹ​ᑭᑭᓄᐊᒫᑫᒡ, ᐁᐸᐹ​ᐐᑕᒫᑫᒡ ᑲᔦ ᐅᑎᐹᒋᒧᐎᓐ ᐃᐃᒫ ᐯᐸᑳᓐ ᐆᑌᓈᑳᕽ᙮ 2ᒞᓐ John ᓰᑲᐊᑖᑫᐎᓂᓂ ᑕᔥ ᑭᐹᑾᐅᑏᐎᑲᒥᑯᕽ ᐁᑮᐊᔮᒡ, ᐁᑮᓅᑕᕽ ᐋᓃᓐ ᐁᓇᓄᑮᓂᒡ ᐃᓂ Xᑕᓐ, ᐅᑮᐃᔑᓂᔕᐙᐞ ᐅᑭᑭᓄᐊᒪᐙᑲᓇᐞ ᑳᐃᔑ​ᐊᔮᓂᒡ, 3ᐁᑮᐃᓈᐙᒡ ᒋᓴᓲᓐ: ᑮᓐ ᐃᓇ ᒞᓐ ᑳᑮᑎᐹᒋᒫᒡ ᐁᐐ​ᑕᑯᔑᓂᓂᒡ, ᑯᒫ ᑲᔦ ᑯᑕᒃ ᓂᑲ​ᐲᐋᓈᓐ? 4ᒋᓴᔅ ᑕᔥ ᐅᑮᐃᓈᐞ: ᒫᒑᒃ, ᑮᐌᒃ, ᐐᑕᒪᐎᒃ ᒞᓐ ᐌᑯᓀᓐ ᑳᓅᑕᒣᒃ, ᑳᐙᐸᑕᒣᒃ ᑲᔦ᙮ 5ᐃᑭ ᑳᐙᐱᓯᒀ ᐁᐙᐱᐙᒡ, ᑳᐱᒧᓭᓯᒀ ᐁᐱᒧᓭᐙᒡ, ᑳᐅᒥᑮᐙᐱᓀᐙᒡ ᐁᑮᒥᓄᐊᔮᐃᑣ, ᑳᓅᑕᓯᒀ ᐁᓅᑕᒧᐙᒡ, ᑳᓂᐳᐙᒡ ᐁᐱᒫᒋᐃᑣ, ᐃᑭ ᑲᔦ ᑳᑭᑎᒫᑭᓯᐙᒡ ᐁᐐᑕᒪᐎᑣ ᒥᓍᒋᒧᐎᓐ᙮ 6ᐋᐱᒋ ᑕᒥᓉᑕᒻ ᐊᐊ ᐐᑳ ᑫᐴᓂ​ᑌᐺᔦᓂᒥᓯᒃ᙮ 7ᒞᓐ ᐃᑕᔥ ᑳᐊᓂ​ᒫᒑᓂᒡ ᐅᑭᑭᓄᐊᒪᐙᑲᓇᐞ, ᒋᓴᔅ ᐅᑮ​ᑲᓅᓈᐞ ᑳᒫᒪᐌᓄᓂᒡ ᐁᑮ​ᑕᔑᒫᒡ ᐃᓂ ᒞᓇᓐ: ᐊᐲ ᑮᐊᑕᐙᐸᒣᒃ ᐊᐊ ᒞᓐ ᐌᑎ ᐱᑾᑕᑲᒥᒃ, ᐌᑯᓀᓐ ᓂᑲ​ᐙᐸᑖᒥᓐ ᑳᐃᓀᑕᒣᒃ? ᒪᔥᑯᓰᐤ ᓇ ᒋᐌᐌᐹᓯᕽ? 8ᐌᑯᓀᔥ ᑳᐊᑕᐙᐸᑕᒣᒃ? ᐊᐎᔭ ᓇ ᒋᒥᓄᑯᓇᔦᒡ ᑭᑮᐊᑕᐙᐸᒫᐙ? ᐃᑭ ᑳᒥᓄᑯᓇᔦᐙᒡ ᐃᐃᒫ ᐊᔮᐗᒃ ᑭᒋᐅᑭᒫᐞ ᑳᔑ​ᐊᔮᓂᒡ᙮ 9ᐌᑯᓀᓐ ᑕᔥ ᑳᐊᑕᐙᐸᑕᒣᒃ? ᑭᔐᒪᓂᑑ ᓇ ᐅᑎᐹᒋᒧᐎᓂᓃᒪᓐ? ᑌᐺ ᑭᑎᓂᓂᓂᒻ, ᒦ ᐊᐌ ᑎᓄ ᐃᓂᓂ ᑳᑮᐊᑕᐙᐸᒣᒃ! ᐊᐊ ᑕᔥ ᒞᓐ ᓇᐗᒡ ᑭᒋ​ᐃᓀᑖᑯᓯ ᐊᐲᒡ ᐐᓐ ᑯᑕᒃ ᑎᐹᒋᒧᐎᓂᓂᐗᐞ ᑳᑲᓅᒋᑫᑕᒪᐙᓂᒡ ᑭᔐᒪᓂᑑᓐ᙮ 10ᐃᐃᐌ ᑕᔥ ᑳᐃᔑᐲᐃᑳᑌᒃ: ᑭᔐᒪᓂᑑ ᐃᑭᑐ, ᒦ ᐊᐌ ᑳᐱᒥᐎᑑᒡ ᓂᑎᐹᒋᒧᐎᓐ, ᓂᑲ​ᓃᑳᓂᓂᔕᐙ ᒋᐅᔒᑖᑕᒪᐎᒃ ᐋᑎ ᑫᐃᔖᐗᒡ᙮ ᒞᓐ ᑕᔥ ᐊᐊᐌ ᑳᑕᔑᒥᓐᒡ᙮ 11ᒫᒥᑲᐎᒃ ᐅᐅ! ᒞᓐ ᓰᑲᐊᑖᑫᐎᓂᓂ ᓇᐗᒡ ᑭᒋ​ᐃᓀᑖᑯᓯ ᐊᐲᒡ ᐐᓐ ᒥᓂᒃ ᐃᓂᓂᐗᐞ ᑳᑮᐱᐱᒫᑎᓯᓂᒡ᙮ ᔖᑰᒡ ᐃᑕᔥ ᐊᐌᓀᓐ ᐃᑯ ᐸᑮ ᑳᐊᐲᑌᑖᑯᓯᒡ ᐃᐃᒫ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ, ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᒞᓇᓐ᙮ 12ᐃᐃ ᑕᔥ ᐊᐲ ᒞᓐ ᑳᑮᒫᒌ​ᐐᑕᒫᑫᒡ ᐅᑎᐹᒋᒧᐎᓐ ᐲᓂᔥ ᐅᐅ ᐃᔑ ᐊᐲ ᓅᑯᒻ ᑳᑮᔑᑲᒃ, ᐁᐲᒌᐙᒡ ᐊᐎᔭᒃ ᐃᔑᑲᑴ​ᐲᑎᑫᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ, ᑳᒪᔥᑲᐎᒋᑫᐙᒡ ᑲᔦ ᐅᑑᑖᐱᓈᓈᐙ᙮ 13ᑲᑭᓇ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ, ᒨᓯᔅ Moses ᐅᑑᓇᔓᐌᐎᓐ ᑲᔦ ᐅᑮᓃᑳᓂᑎᐹᑐᑖᓈᐙ ᑫᐃᔑᓭᓂᒃ, ᐲᓂᔥ ᒞᓐ ᑮᑕᑯᔑᕽ᙮ 14ᑮᔥᐱᓐ ᑕᔥ ᐐᑌᐺᑕᒣᒃ ᑳᑮᐃᑭᑐᐙᐸᓐ, ᒦᓴ ᒞᓐ ᐊᐊ ᐃᓬᐋᐃᒐ Elijah ᑳᑮᐐᓱᒡ ᐁᐐ​ᑕᑯᔑᕽ᙮ 15ᐱᓯᑕᒧᒃ ᑮᓇᐙ ᑳᐅᑕᐗᑳᔦᒃ! 16ᐋᓃᔥ ᑫᐃᔑ​ᓈᐱᓈᑯᐊᒀ ᐅᑯᐌᓂᐗᒃ ᓅᑯᒻ ᑳᐱᒫᑎᓯᐙᒡ? ᒦ ᑖᐱᔥᑰ ᐊᐱᓅᒌᔕᒃ ᑳᐊᔫᑾᐱᐙᒡ ᐃᐃᒫ ᐊᑾᒌᕽ ᑳᑕᓇᑖᐌᕽ, ᐁᔖᑯᐙᓈᐙᒡ ᑳᐐᒌᐙᐙᒡ ᐁᐅᑕᒥᓄᐙᒡ: 17ᓂᑖᓇᑮᐃᓉᐌᒧᒋᑫ​ᐴᑖᒋᑫᒥᓐ ᒋᓃᒥᔦᒃ, ᑳᐐᓐ ᓴ ᓈ ᑭᑮᓃᒥᓰᒻ᙮ ᓂᑖᓇᑮᐃᓇᐋᒥᓐ ᑲᔦ ᓇᐃᓂᑫᓂᑲᒧᓇᓐ, ᑳᐐᓐ ᓴ ᓈ ᑭᑮᒪᐎᓰᒻ᙮ 18ᒞᓐ ᑕᔥ ᑮᑕᑯᔑᓐ, ᑮᒪᑕᐎ​ᐊᓇᒥᐋ, ᑳᐐᓐ ᑲᔦ ᑮᒥᓂᑴᓰ ᔔᒥᓈᐳ᙮ ᒦᑕᔥ ᑳᐃᒋᑲᓂᐎᒡ ᒪᒋᐊᒑᑾᓐ ᐅᑭᑭᔥᑲᐙᓐ᙮ 19ᐃᓂᓂ ᐅᑯᓯᓴᓐ ᐃᑕᔥ ᑮᑕᑯᔑᓐ, ᑮᐐᓯᓂ, ᑮᒥᓂᑴ ᑲᔦ, ᒦᑕᔥ ᑳᐃᒋᑲᓂᐎᒡ: ᑳᔕᑫᔥᑭ, ᒥᓂᑴᔥᑭ, ᐅᓵᑭᐐᒌᐙᐞ ᑖᑭᔅ tax ᑳᑎᐸᐃᑫᐃᐌᓂᒡ, ᐃᐃ ᑲᔦ ᑯᑕᒃ ᑳᐋᓇᐌᓂᒥᒥᓐᒡ᙮ ᔖᑰᒡ ᐃᑕᔥ ᐊᐎᔭ ᐯᒥᓂᔕᐊᕽ ᑭᔐᒪᓂᑑᓐ ᐅᑲᑮᑖᐌᑕᒧᐎᓂᓂ, ᐱᒌᓇᒃ ᑕᓂᐯᑌᓈᑾᓂᓂ ᑌᐺ ᐃᐃ ᐁᑎᓄᐗᓂᓂᒃ ᐊᐲ ᑯᑕ ᐊᓂᓈᑾᓂᓂᒃ ᐌᑯᓀᓐ ᐃᐃᒫ ᐅᑎᔑᒋᑫᐎᓂᕽ ᐌᒋᓭᓂᒃ᙮ 20ᐃᒫ ᑕᔥ ᑳᔑ​ᐆᑌᓈᐗᑭᓐ ᓇᐗᒡ ᑳᑮᑕᔑ​ᒫᒪᑳᒋᒋᑫᒡ ᑳᐐᓐ ᑮᓀᐱᒋ​ᑴᑳᑎᓯᓰᐗᐞ ᐊᐎᔭᐞ, ᒦᑕᔥ ᑳᑮᐅᒋ​ᑭᒋᓅᒋᐋᒡ, ᐅᐅ ᐁᑮᐃᓈᒡ: 21ᑮᓇᐙ ᑾᕒᐋᓯᓐ Chorazin ᑳᐊᔮᔦᒃ ᑭᑲᐅᒑᓂᒥᓯᒻ! ᑫᑮᓇᐙ ᑭᑲᐅᒑᓂᒥᓯᒻ ᐯᓭᑕ Bethsaida ᑳᐊᔮᔦᒃ! ᑮᔥᐱᓐ ᐃᓂ ᑳᐙᐸᑕᒣᒃ ᒫᒪᑳᒋᒋᑫᐎᓇᓐ ᑮᓈᑯᒋᑳᑌᑯᐸᓀᓇᓐ ᐃᐃᒫ ᐆᑌᓈᕽ ᑕᔭᕒᐃᕽ Tyre, ᓵᐃᑕᓂᕽ Sidon ᑲᔦ, ᐋᔕ ᒣᐎᔕ ᐅᑖᑮ​ᐱᓯᑳᓈᐙ ᑳᐊᓴᐱᐌᑲᓂᓂᑭᓐ ᑲᔦ ᒣᐎᔕ ᐅᑖᑮ​ᐲᐎᐌᐱᓈᓈᐙ ᐲᑸᓂ ᐅᑎᒀᓂᐙᕽ ᒋᓈᑯᑑᐙᒡ ᑳᑮᑴᑳᑎᓯᐙᒡ᙮ 22ᒫᒥᑲᐎᒃ ᐃᑕᔥ ᐅᐅ: ᐊᐲ ᑎᐹᑯᓂᑫᐎᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ​ᑰᐹᓯᓇᐙᐞ ᐃᐃ ᑕᔭᕒᐃᕽ, ᓵᐃᑕᓂᕽ ᑲᔦ ᑳᐃᔑ​ᐊᔮᓂᒡ ᐊᐲᒡ ᑮᓇᐙ᙮ 23ᑮᓇᐙ ᑕᔥ ᑲᐸᕒᓂᔭᒦᕽ Capernaum ᑳᐊᔮᔦᒃ! ᑭᑮᐃᓀᑖᒻ ᐃᓇ ᐁᐐᐃᔥᐯᓂᑎᓱᔦᒃ ᑭᒋᑮᔑᑯᕽ ᐃᓇᑫ ᒫᐗᒡ ᒋᑭᒋ​ᐃᓀᑖᑾᒃ ᑭᑑᑌᓈᒥᐙ? ᐌᑎ ᐅᓂᐴᒃ ᑳᔑ​ᐊᔮᐙᒡ ᑭᑲᐃᔑᐌᐱᓂᑰᒻ! ᑮᔥᐱᓐ ᓈᑯᒋᑳᑌᑯᐸᓀᓇᓐ ᐃᓂ ᒫᒪᑳᒋᒋᑫᐎᓇᓐ ᐃᐃᒫ ᔂᑕᒦᕽ Sodom ᑖᐱᔥᑰ ᑳᔑ​ᐙᐸᑕᒣᒃ, ᑫᔮᐱ ᔂᑕᒻ ᑖᑮᐊᔮ ᓅᑯᒻ᙮ 24ᒫᒥᑲᐎᒃ ᐃᑕᔥ ᐅᐅ! ᐊᐲ ᑎᐹᑯᓂᑫᐎᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ​ᑰᐹᓯᓇᐙᐞ ᔂᑕᒦᕽ ᑳᑮᐊᔮᓂᒡ ᐊᐲᒡ ᑮᓇᐙ ᑲᐸᕒᓂᔭᒦᕽ ᑳᐊᔮᔦᒃ᙮ 25ᐊᒦᑕᔥ ᐃᐃ ᐊᐲ ᒋᓴᔅ ᑮᐃᑭᑐ: ᓂᑌᑌ! ᑮᓐ ᑳᑎᐯᑕᒪᓐ ᑮᔑᒃ, ᐊᑭ ᑲᔦ, ᑭᓇᓈᑯᒥᓐ ᐋᓃᔥ ᑳᐐᓐ ᑭᑮ​ᑭᑫᑕᒨᓈᓰᒃ ᐅᓄ ᑫᑰᓇᓐ ᐃᑭᐌᓂᐗᒃ ᑳᑲᑮᑖᐌᑕᒧᐙᒡ ᑳᑭᑫᑖᓱᐙᒡ ᑲᔦ, ᐃᑭ ᑕᔥ ᐐᓐ ᐋᐱᒋ ᑳᑭᑫᑕᓯᒀ ᑫᑰᓂᓂ ᑭᑮᐙᐸᑕᐋᒃ᙮ 26ᐋᓃᔥ ᑮᓐ ᓂᑌᑌ, ᒦ ᐅᐌ ᒫᐗᒡ ᐁᔑ​ᒥᓍᐸᑕᒪᓐ᙮ 27ᒦᑕᔥ ᑳᐊᓂ​ᐃᑭᑐᒡ: ᓂᑌᑌ ᑕᔥ ᑲᑭᓇ ᑫᑰᓂᓂ ᓂᑮᒦᓂᒃ᙮ ᑳᐐᓐ ᐊᐎᔭ ᐅᑭᑫᓂᒫᓰᓐ ᐃᓂ ᐅᑯᓯᓯᒫᓐ, ᒦ ᐁᑕ ᐊᐊ ᑳᐅᔫᓯᒥᓐᒡ᙮ ᑳᐐᓐ ᑲᔦ ᐊᐎᔭ ᐅᑭᑫᓂᒫᓰᓐ ᐃᓂ ᑳᐅᔫᓯᒥᒥᓐᒡ, ᒦ ᐁᑕ ᐊᐊ ᐅᑯᓯᓯᒫ᙮ ᐃᐃ ᑕᔥ ᐁᑕ ᑲᔦ ᑳᐃᓀᑕᕽ ᐅᑯᓯᓯᒫ ᒋᑭᑫᑕᒨᓈᒡ᙮ 28ᐱᓈᓯᑲᐎᔑᒃ ᑲᑭᓇ ᑮᓇᐙ ᑳᐊᔦᑯᓯᔦᒃ, ᐁᑆᐗᓀᔦᒃ ᑲᔦ, ᑭᑲᒦᓂᓂᓂᒻ ᐃᑕᔥ ᐊᓉᐱᐎᓐ᙮ 29ᐅᑖᐱᓇᒧᒃ, ᐱᓯᑲᒧᒃ ᓂᑕᐱᑲᓈᑎᒃ ᑭᑭᓇᐙᐸᒥᔑᒃ, ᐋᓃᔥ ᓂᓅᑳᑎᔅ, ᓂᑕᐸᓭᓂᒻ ᑲᔦ᙮ ᑭᑲᒥᑳᓈᐙ ᑕᔥ ᐊᓉᐱᐎᓐ᙮ 30ᐃᐃ ᑕᔥ ᐊᐱᑲᓈᑎᒃ ᑫᒦᓂᓇᑰᒃ ᐋᐱᒋ ᑭᑲᒥᓄᐗᓀᐃᑯᒻ, ᓃᓐ ᑫᐱᒥᐗᓀᐃᓇᑰᒃ ᐋᐱᒋ ᑕᓈᑲᓐ, ᑮᐃᑭᑐ᙮

will be added

X\